Episoder

  • فهاد الحلقة من البودكاست هضرت مع الدكتور اسماعيل سعدون لي متخصص فبطاريات الليثيوم. الدكتور سعدون عندو تجربة واعرة بزاف و خبرة واسعة فهاد المجال. عاود لنا فهاد البودكاست على كيفاش حتى قرا فالجامعة فالمغرب مع الصعوبات اللوجيتسكية و المادية لي كان كيعاني منها. قدر أنه يكون من بين أوائل الدفعة ديالهم و مشا كمل الدكوراه ديالو ففرنسا. من تما رجع للمغرب و قدر يأسس مختبر Laboratory of Materials and Environmental Chemistry فجامعة القاضي عياض. خدم مع عدد ديال الباحثين و قدر يجيب بزاف ديال التمويلات الخارجية باش يدعم المختبر ديالو. ليوما الدكتور سعدون من أكثر الناس خبرة فمجال بطاريات الليثيوم فالعالم. كيعطي محاضرات فأوروبا و آسيا. ألف أكثر من 150 ورقة بحثية و أكثر من 3600 اقتباس و حصل على جائزة من جامعة طوكيو مؤخرا. فهاد الحلقة هضرنا على المسار ديالو و كيفاش حتى حقق هادشي كامل. إضافة لهادشي هضرنا على البحث العلمي فالمغرب و المشاكل لي كاينة و الحلول ديالها. الدكتور سعدون عندو خبرة طويلة فالبحث العلمي فالمغرب، و هو ليوما مدير المحتبر لي ساهم فالتأسيس ديالو.Ismael Saadoune, PhD - Director or Research, Université Cady Ayyad

  • فهاد الحلقة من البودكاست هضرت مع عمر الشرقاوي. عمر عندو مسار غريب. بدا المسيرة الدراسية الجامعية ديالو فكلية الطب فالرباط. خلال هاد الفترة لي دوزها فالرباط أسس جمعية طلبة الطب فالمغرب. قدر يضم هاد الجمعية لشبكة IFMSA فالعالم. من تما، انضم للشبكة العالمية ديال IFMSA، أكبر و أول جمعية عالمية ديال طلبة الطب. هاد المسار ديالو غير الاعتيادي عطاه فرصة يتلاقى بزاف ديال الناس و ينظم تظاهرات كبيرة. من تم اكتشف الحب ديالو لهادشي و فهم انه ماغاديش يكون طبيب فعيادة كيداوي المرضى. خدم على مشاريع مع AMBOSS و حتى منظمة الصحة العالمية. قدر من بعد يدخل لأفضل ماستر ديال الصحة العمومية فالعالم MPH فجامعة John's Hopkins المعروفة. بل كان تما فعز بداية جائحة كورونا. ليوما خدام مع AMBOSS على مشروع باش يساهمو فتطوير الصحة فالدول الفقيرة. عمر إنسان كيعجبو يخرج على ما هو اعتيادي و يغامر شوية بحياتو المهنية باش يحقق ذاتو. فهاد البودكاست عاود لنا على هادشي كامل. هضرنا كذلك على أزمة كورونا و كيفاش فلسفة الصحة العمومية ليوما فالعالم تبدلات من بعد كورونا، و هضرنا كذلك على النظرة ديالو للصحة العمومية ليوما و الرؤية ديالو المستقبلية للأمور. حوار داز واعر مع عمر. نتمنى حتى نتوما تستافدو منو.Omar Cherkaoui, MD, MPH - Head of Global Health Initiative, AMBOSS

  • Mangler du episoder?

    Klikk her for å oppdatere manuelt.

  • فهاد الحلقة من البودكاست هضرت مع منير بنشملد لي أسس شركة فمجال العملات الرقمية و المالية اللامركزية (Decentralized Finance). منير بدا الحياة المهنية ديالو مبرمج ديال المواقع و التطبيقات ملي كان باقي كيقرا فجامعة العلوم و التقنيات فطنجة. داز من بزاف ديال المراحل و مشا خدم ففرنسا مع شركات متعددة صغيرة و كبيرة. بدا الاهتمام ديالو بمجال العملات الرقمية فـ 2013 و ابتداء من 2019 ملي بانت المالية اللامركزية (DeFi) بدا كيخدم على الشركة ديالو ParaSwap. هاد الشركة ليوما قدرات تجمع أكثر من 2,7 مليون دولار استثمار من عند أكثر من 30 مستثمر من أشهر الناس لي كاينين فمجال العملات الرقمية ليوما. هاد البودكاست عامر بالمصطلحات التقنية. حاولت نشرح ما أمكن المصطلحات لي كانستعملو، بداية من البلوكشين. و لكن اذا عجبكم هادشي ننصحكم تشوفو أول تعليق فيوتوب، منير عطاني فيه بزاف ديال المصادر لي ممكن تعاونكم تفهمو أكثر. مجال العملات الرقية كبير بزاف، و لكن قدرنا نهضرو على شي مفاهيم رئيسية فهاد البودكاست. هضرنا كذلك على المسار ديال منير و كيفاش حتى وصل لهاد النقطة فحياتو، و على مستقبل ParaSwap لي غادي ترجع قريبا منظمة لامركزية و ما غاديش تبقى شركة مركزة فيد انسان واحد. اذا بغيتو تعرفو اكثر على هادشي سمعو البودكاست. هاد الحلقة من بين الحلقات المفضلة ديالي و لهذا بارطاجيتها بالفيديو فيوتوب.Mounir Benchemled - Founder, Paraswap

  • فهاد الحلقة هضرت مع ذ. محمد عبد الوهاب رفيقي. أستاذ رفيقي غني عن التعريف، القصة ديالو معروفة ديال الدخول للسجن من من بعد أحداث 2003. من بعد خروج الأستاذ رفيقي قدم للمغرب ما لم يقدمه بزاف ديال الناس لي ما قضاوش 9 سنوات فالسجن. فتح مركز الميزان للوساطة والدراسات والإعلام. أسس مركز وعي للوساطة و التفكير. اشتغل فالمسرح لمدة أربع سنوات مع فنانين مغاربة. شارك فالعمل السياسي مع حزب الاستقلال. هادشي إضافة للعمل ديالو فمنابر الإعلام و الحوارات لي كيديرها دايما و أعمال أخرى ما ذكرتهاش هنا. الأستاذ رفيقي إنسان كيعجبو يخدم بزاف و يقرا بزاف. فهاد الحوار هضرنا على هادشي كامل، إضافة للمسار ديالو. ناقشنا كذلك مواضيع التطرف و كيفاش أنه السياسات العالمية وصلاتنا للوضيعة لي فيها العالم دابا. ناقشنا كذلك الرؤية ديالو للتدين الإسلامي ليوما، و التوقعات ديالو لمستقبل التدين فالدول الإسلامية و العالم بشكل عام. الحوار عجبني و ماكرهتش نعاودوه شي نهار. نتمنى حتى نتوما يعجبكم.Mohamed Abdelwahhab Rafiqui - Islamic Scholar and Researcher

  • فهاد الحلقة هضرت مع عزيز طالب. عزيز كبر فالمغرب و بالضبط فأكادير. كان كيتفرج الأفلام بزاف ملي كان صغير. كان كيحلم يخدم فعالم السينما. لقا بزاف ديال الصعوبات، و لكن فالأخير قدر أنه يمشي لألمانيا باش يقرا السينما. خدم فألمانيا عدة سنوات. قدم مشروع فني كبير دار بيه العالم فكارافان. هاد الكرافان سمحات لهم أنهم يوصلو متحف متنقل كيعرضو فيه فيديوهات ديال مخرجين من العالم كامل. هادشي إضافة للأعمال السينمائية ديالو لي خدا عليها عدة جوائز فمهرجانات متعددة. عزيز من بعد رجع للمغرب و أسس Arab Media Lab لي كيعاون من خلاله بزاف ديال الفنانين المغاربة فالمجال السمعي البصري. كينظم ورشات مع مخرجين محترفين، من بينها ورشة مع فوزي بنسعيدي مثلا. هضرنا على هادشي كامل مع عزيز. عاود لنا القصة ديالو و كيفاش حتى وصل لهاد النقطة من حياتو. هضرنا على السينما و المخرجين العالميين و المغاربة. ناقشنا الرؤية ديالو للفن و الإبداع عامة. أنا استمتعت بزاف بهاد البودكاست، تمنى حتى نتوما تستمتعو به.Aziz Taleb - Director/Founder - Arab Media Lab

  • فهاد الحلقة من البودكاست هضرت مع أسامة كطبي. أسامة يمكن تلاحظ أنه مقاول بالفطرة. بدا الخدمة على المشاريع ديالو ملي كان باقي طالب فالمدرسة الوطنية للتجارة و التسيير، و من تما بدات الرحلة ديالو مع المقاولات فالانترنيت. العالم ليوما ولا كيسمح لشي واحد كالس فدارو فالمغرب يسير مقاولات ديال البيع عبر الانترنيت فالعالم كامل. أغلب الناس الي كيبداو بالتجارة الالكترونية كيتوجهو لأسواق ديجا كاينة و معروفة فحال الميريكان، أستراليا ولا أوروبا. أسامة كان خلاق و مشى كيستكشف أسواق أخرى ماعندهاش بزاف ديال التجارة الالكترونية. أغلبية التجارة الي كيديرها أسامة ليوما كاينة فإفريقيا، فأسواق صعيبة و ما عليهاش معلومات بزاف. فهاد البودكاست أسامة عاود لنا على هادشي كامل. شرح لنا كيفاش حتى بدا بالتجارة ديالو و المغامرات ديالو فإفريقيا باش يوصل البزنس ديالو للمستوى لي فيه ليوما، و عطانا بزاف ديال النصائح على كيفاش تبني مقاولة ديال التجارة الالكترونية فالمغرب و إفريقيا.Oussama Guatbi - CEO & Founder, Made for her

  • فهاد الحلقة ديال البودكاست هضرت مع غيتة منير. غيتة قرات فالمغرب و مشات للميركان مور الباك. بالضبط فجامعة كاليفورنيا سانتا باربارا UCSB. قرات تما الاقتصاد و لكن كانت دايما مهتمة بالمقاولات. غيتة انسانة خلاقة. هادشي لي خلاها تفتح جمعيات و مؤسسات ديال الطلبة حتى ملي كانت فالثانوي ولا الجامعة. واحد النهار غيتة لقات فرصة باش أنها تساهم فتأسيس شركة مع طلبة ميريكانيين كانو معاها فالجامعة. و من ديك النهار بدات الرحلة ديالها مع Allthenticate. غيتى عاودات لنا هادشي كامل فهاد البودكاست. بدات معانا من الثانوي و هي طالعة، بالتفاصيل الدقيقة. هضرنا إذن على المسار ديالها كالعادة و على كيفاش حتى فتحات الشركة ليوما و على المستقبل لي كاتشوفو لهاد الخدمة ديالها. أنا الصراحة استفدت بزاف من التجربة ديال غيتة، و كانظن هادي ما غاديش تكون آخر مرة غادي تسمعو عليها حيت Allthenticate عندها فريق واقف على الصح، و عندها مستقبل طويل فالتكنولوجيا فالميريكان و بالتالي فالعالم كامل.Rita Mounir - COO & Co-founder, Allthenticate

  • فهاد الحلقة هضرت مع كمال هشكار، المخرج المعروف بأفلامو الوثائقية "تنغير-القدس"، "تاسانو تايرينو" و "فعينك كانشوف بلادي". كمال ربما من أفضل مخرجي الأفلام الوثائقية فالمغرب، و كان من أول الفنانين المغاربة لي حفرو فالتاريخ المغربي اليهودي. كمال كان أستاذ تاريخ فباريس، حتى بدا الاهتمام ديالو بالثقافة اليهودية المغربية من بعد رحلة داتو للقدس. كمال عاود لنا فهاد البودكاست على المسار ديالو و كيفاش حتى لقا راسو كيصور أول فيلم وثائقي ديالو. هضرنا على الجدل لي خلقو الفيلم فديك الوقت و على الرؤية ديالو لهادشي كامل. ثم ناقشنا الفيلم الأخير لي كيصور الرحلة ديال نيطع القايم و عميت حي كوهن. كمال انسان رائع و عندو واحد الطاقة إيجابية كبيرة. استمتعت بهاد البودكاست معاه و ماكرهتش نعاودوه قريبا. نتمنى حتى نتوما يعجبكم.Kamal Hachkar - Documentary Film Director

  • فهاد الحلقة هضرت مع فاروق المراكشي لي معروف بأنه أول مغربي كتب كتوبا ديال الابتدائي، الإعدادي و الثانوي بالدارجة. فاروق بدا خدام مهندس ففرنسا، حتى اكتشف أنه المفاهيم العلمية لي كاتكون عادية عند الأطفال ديال العالم، ما كاتكونش واضحة عند الطفل المغربي باللغة الأم ديالو. قرر أنه يبدا يترجم الكتب العلمية ديال الماط و الفيزيك بالدارجة. و ملي كانقول بالدارجة، كانقصد حتى الكلمات العلمية كيترجمها. فاروق ترجم عدد ديال الكتوبا ديال الأطفال للدارجة بما فيهم قصص و كتوبا دراسية. فهاد الحلقة هضرت معاه على المسار ديالو و على المسيرة ديالو فالترجمة للدارجة و كيفاش حتى بدا هاد الخدمة. ثم ناقشنا بزاف ديال المواضيع لي عندها علاقة بالدارجة و حاولت نقدم لو جميع المشاكل لي كيطرحوها الناس لي معارضين الدارجة فالتدريس، باش يعطينا الجواب ديالو. فاروق عندو وجهة نظر مميزة، و ما عمري ما سمعت فحالها و كانظن أنه هاد الرأي يستحق يكون عندو بلاصة فالنقاش العام حول الدارجة.Farouk El Merrakchi - Professor, Académie de Toulouse

    https://archive.org/search.php?query=creator%3A%22Farouk+Elmerrakchi%22















  • فهاد الحلقة هضرت مع فوزي بكاوي مدير المعهد العالي للبحث الزراعي INRA فالمغرب. فوزي عندو تاريخ طويل فالبحث العلمي. بدا القراية ديالو فالمغرب و كملها ففرنسا ثم مشى لكندا. و تما خدم فبزاف ديال المراكز. خدم فالبحث العلمي و الصناعة. ثم انتقل لإدارة البحث العلمي مع الحكومة الكندية. أخر منصب كان عندو فكندا هو مدير ديال برنامج الدولة الكندية لتحسين مردودية القمح. من بعد هاد المسار كامل، قرر أنه يرجع للمغرب من بعد ما تعرض عليه منصب فجامعة محمد السادس. اليوم كيشغل كمدير لمركز البحث الزراعي منذ سنتين. هضرت معاه فهاد البودكاست على المسار ديالو. ثم هضرنا على تحديات الزراعة و البحث الزراعي و العلمي فالمغرب عموما. هضرنا كذلك على النباتات المعدلة جينيا، و دورها الحالي و المستقبلي فالزراعة، بالأخص من بعد ما بانت تقنية CRISPR-Cas9 لي كاتسهل التعديل الجيني. البداية ديال البودكاست بالدارجة و لكن فجزء كبير منو فوزي كيجاوب بالفرنسية لأنه المواضيع تقنية بزاف و مستحيل تهضر عليها بالدارجة مع الأسف.

    Faouzi Bekkaoui, PhD - Director, Institut National de Recherche Agronomique













  • هاد الحلقة هضرت مع الأستاذ الدكتور رشيد هكو. رشيد قرا فجامعة أكادير ثم كمل الدراسة ديالو و الدكتوراه ديالو فالمدرسة الوطنية الفرنسية للجولوجيا. من تما رجع المغرب و خدم مع جامعة القاضي عياض فمراكش. سي هكو خدم على مواضيع عندها علاقة بالتخلص من النفايات ديال المناجم و بالأخص مناجم النحاس و الفوسفاط فالمغرب. كيتعتبر اليوم من أكثر الناس معرفة و تخصصا فالعالم بمجال النفايات المنجمية. خدم على مناجم متعددة و الأبحاث ديالو داتو يعطي محاضرات فالعالم كامل، ففرنسا، فكيبيك، فووهان. توج العمل ديالو مؤخرا بجائزة David Hopper الكندية. فهاد الحلقة هضرنا على المسار ديالو و كيفاش حتى لقا راسو كيخدم على النفايات فالمغرب. هضرنا كذلك على الطريقة الي لقاها باش يحل مشكل النفايات ديال الفوسفاط و الخدمة الي كيقوم بها مع المكتب الشريف للفوسفاط. ثم ناقشنا مشاكل البحث العلمي فالمغرب ليوما و الحلول الي ممكن نتابعوها. الصراحة هاد المجال ما كنت كانعرف عليه والو. من بعد اكثر من ساعة مع دكتور هكو، فهمت بزاف ديال الخاجات، و فهمت بالضبط الأهمية ديال البحث العلمي فحل مشاكل حقيقية. نتمنى حتى نتوما تستافدو من هاد البودكاست.Rachid Hakkou, PhD - Professor, Cadi Ayyad University

  • هشام تيفلاتي من أكثر الناس الي تلاقيتهم معرفة بالمجال ديال التطرف الديني. زيادة على الرغبة ديالو فالبحث الي كاتبان فالهضرة ديالو، هشام عندو مسار ماشي اعتديادي. بدات الرحلة ديالو بالتعليم الابتدائي فالمغرب و ثم كون راسو و مشا كمل القراية ديالو فالميريكان ثم كمل الدكتوراه فجامعة كبيك فكندا. من تما خدم على أبحاث متعددة متعلقة بالتطرف الديني فالمريكان و كندا و حتى ألمانيا. كتب 2 كتوبا و عشرات الورقات العلمية على هاد مواضيع التطرف و ادماج المهاجرين متعددي الهويات. ليوما كيخدم أستاذ و باحث جامعي فمعهد جون أبوت فمونتريال و عندو مهام أخرى متعددة. فهاد الحلقة هضرت مع هشام على المسار ديالو و على الرأي ديالو فأسباب و حلول مشاكل التطرف و الهوية. ثم هضرنا شوية على تدخل السياسات اليسارية فعالم البحث الأكاديمي خصوصا فالعلوم الانسانية. الصراحة كنت متحمس لهاد البودكاست قبل ما يدوز بأسابيع و استمتعت بزاف بالهضرة مع د. تيفلاتي. نتمنى حتى نتوما تستمتعو بيه.Hicham Tiflati, PhD - Professor, John Abbott College

  • فهاد البودكاست هضرت مع عايدة قنديل الي عندها ليوما منصة ماي تيندي. شي وحدين منكم غادي يكونو عرفوها حيتاش شاركت فبرنامج شكون "يستثمر في مشروعي" و قدرات تقنع 4 ديال المستثمرين فالبرنامج أنهم يعطيوها الفلوس. عايدة كبرات ما بين المغرب و فرنسا و مشات تقرا فكندا فـ McGill، وحدة من أفضل الجامعات فالعالم. طورات عدة مشاريع ناجحة فالبيع فأنتيرنيت. استافدات من القراية ديالها و الخبرة باش ترجع المغرب و تفتح منصة ديال الصناع التقليديين. هاد المنصة ليوما فيها ألاف الصناع الي كيبيعو السلعة ديالهم. المنصة كاتبيع المنتوجات فالمغرب و فالعالم كامل و كاتعاون الصناع التقليديين أنهم يسوقوا السلعة ديالهم بلا ما يحتاجو حتى شي انسان فالوسط. فهاد الحلقة هضرنا على المسار ديالها و عطاتنا بزاف ديال المعلومات على كيفاش تفتح بيزنس ناجح ديال البيع فأنتيرنت، و كيفاش حتى بدات الفكرة، و شنو المحركات ديالها فالحياة. شكرا عايدة و نتمنى تستافدو من هاد البودكاست كيفما استفدت حتى أنا.Aida Kandil - Founder, MyTindy

  • فهاد الحلقة هضرت مع الدكتور كريم بوزوباع. الدكتور كريم قرا فالمغرب و كمل دكتوراه ديالو فكندا. هادشي فنهاية التسعينات. من ديك الوقت و هو كيخدم على مواضيع الذكاء الاصطناعي و علاقتها باللغة. الدكتور بوزباع رجع موراها للمغرب و ليوما خدام أستاذ جامعي فمدرسة المحمدية للمهندسين. كيخدم على مواضيع الذكاء الاصطناعي باستخدام التعلم العميق، و كيطبق هاد تكنولوجيات على اللغات العربية و الدراجة. هو كذلك مؤسس المجتمع المغربي لهندسة اللغة العربية. ألف زوج كتوبا و شارك فالعشرات ديال الأوراق العلمية. هضرنا فهاد البودكاست على المسار ديالو و البحث العلمي الي كيديرو من سنوات، و كيفاش يمكن لهاد التقنيات الجديدة تتطبق على الدارجة و العربية. ثم ناقشنا مواضيع عامة فحال الإدمان على مواقع التواصل الاجتماعي و استعمال الدارجة فالتعليم. البودكاست فيه تقريبا جوج ساعات لأنه عجباتني الهضرة معاه و بقينا كالسين، نتمنى يعجبكم حتى نتوما.Karim Bouzoubaa, PhD - Full Professor, Ecole Mohammadia d'Ingénieurs

  • فهاد الحلقة من البودكاست هضرت مع نيطع القايم و أميت هاي كوهن. بجوج بهم يهود مغاربة عايشين فالقدس. نيطع و أميت ربما كيعرفوهم أغلبية المغاربة بأنهم عاودو إحياء أعاني مغربية قديمة فحال أغنية زهرة الفاسية "هاك أ ماما". فهاد الحلقة من البودكاست هضرنا على بزاف ديال الحاجات من بينهم العلاقة الثقافية و التاريخية ديال اليهود الي فإسرائيل مع المغرب، و على الدور ديال الفنانين الجدادين فإحياء هاد العودة للأصل. الخدمة الي كيديرو نطع و أميت خدمة واعرة بزاف، و مؤخرا خرجوا 3 أغاني كيعاودو فيهم توزيع "هاك أ ماما" و "موحال ننساه" و "مويمة"، هضرنا عليهم تاهوما فالبودكاست. المهم كان حوار واعر و حسيت كأنني تعرفت على مغاربة من نوع أخر، كبروا بعادين علينا بألاف الكيلومترات و لكن ثقافتهم و إحساسهم ربما مغربي اكثر من بزاف ديال الناس كبرو فالمغرب.Neta Elkayam & Amit Hai Cohen - Moroccan Jewish Musicians

  • فهاد الحلقة هضرت مع عائشة الي عندها مسار دراسي أكاديمي طويل. قرات فالمغرب و باريس و ثم بروكسيل. عندها بحوث فمجالات الإعلام و السوسيولوجيا. هي ليوما باحثة فجامعة بروكسيل منذ 6 سنوات، و كاتخدم على مواضيع التطرف و الإرهاب فمجتمعات الهجرة فبلجيكا, بالإضافة للعمل الجمعوي ديالها و ترأسها لافتتاح متحف ديال تاريخ المهاجرين المغاربة فبروكسيل. فهاد الحوار هضرنا على المسار ديالها و ثم ناقشنا بزاف ديال المواضيع عندهم علاقة بالهجرة و التطرف و حتى السياسة. عائشة عندها نظرة مختلفة للأمور و كاتشوف الأحداث من بزاف ديال الزوايا بحكم عملها الأكاديمي و قصتها الشخصية. أنا اسمتعت بهاد الحوار و استفدت من الخبرة ديالها. نتمنى يعجبكم حتى نتوما.Aicha Bacha - Researcher, Université Libre de Bruxelles

  • علاء عندو فكرة كبيرة واخا هو باقي صغير فالسن. الحلم ديالو يربط طنجة بالمغرب فأقل من 5 دقايق بفضل تقنية الهايبرلوب. هضرنا فهاد البودكاست على القراية د علاء فالميريكان، و الخدمة ديالو على الشركة ديالو الي باغا تتطور تقنية الهايبرلوب فإفريقيا. الخدمة ديال علاء مهمة بزاف و غاتسمح لنا ربما فالمستقبل القريب نشوفو هاد التقنية فالمغرب و أوروبا. الهضرة على هاد الموضوع باقا طويلة و ربما خصنا نخصصوا بودكاست لعلاء من هنا واحد عام ولا عامين باش نشوفوه فين وصل.Alae Moudni - CEO & Co-founder, STMLoop International

  • فهاد الحلقة من البودكاست هضرت مع رضوان الي كيدير البحث العلمي فمجال الذكاء الاصطناعي المطبق على التغير المناخي. فهاد البودكاست ناقشت مع رضوان موضوع التغير المناخي و الاحتباس الحراري و كيفاش الذكاء الاصطناعي ممكن يحل هاد المشاكل. رضوان كيشارك كذلك فبزاف ديال التظاهرات الي كاتحاول تنشر التكنولوجيا و المعلوميات فالمغرب و إفريقيا. هضرنا على الدور الي ممكن تلعبو التكنولوجيا فهاد لبلايص و على تعلم المعلوميات بالدارجة. رضوان عندو طموحات كبيرة فمجال البحث العلمي و عندو رؤية إيجابية للحياة ممكن نستافدو منها كاملين.Redouane Lguensat, PhD - Researcher, IPSL

  • فهاد الحلقة من البودكاست استقبلت أشرف الي كيدير خدمة واعرة بزاف فمجال التسويق و التواصل الرقمي. الوكالة ديال أشرف شاركت فالعديد من المشاريع المعروفة من بينها مثلا ملق ترشيح المغرب 2026 و خدمات مع شركات كبيرة على مشاريعهم ديال التسويق. أشرف ما اكتفاش بهادشي، فتح مؤخرا أكبر موقع ديال بيع السيارات المستعملة فالمغرب. الشركات ديال أشرف ليوما كاتخدم كثر من 30 مغربي علما أنه انطلق من زيرو ف 2012. عطاني بزاف ديال المعلومات على البزنس فالمغرب و استفدت بزاف من المعرفة ديالو فمجال المقاولات.Achraf Lemnini - CEO & Co-founder, Share Conseil & Ocarz.ma

  • فهاد الحلقة هضرت مع عدنان عديوي. عدنان اسم تقريبا كلشي كيعرفو فمجال المقاولات الاجتماعية و عطانا عدد من المشاريع الهادفة الي عاونات بزاف ديال المغاربة و المغربيات. عدنان هو مؤسس المركز المغربي للتحديث و المقاولات الاجتماعية. هو فاعل فالمجال الجمعوي منذ سنوات رغم أنه باقي شاب. كيشغل حاليا كذلك منصب كعضو فاللجنة الملكية المكلفة بالنموذج التنموي و ربما هو من أصغر أعضاء اللجنة. هضرنا فهاد الحوار على كيفاش نقدرو نخلقو دينامية جديدة بفضل الأساليب و التكنولوجيا الجديدة. هضرنا على المسار ديالو و التاريخ ديالو و هضرنا حتى على المشاكل الي كيعاني منها المجال و الحلول الي ممكن تتطرح فالمستقبل. حوار واعر مع إنسان موهوب، خلاق و ذكي. نتمنى تستافدو منو. Adnane Addioui - Social Entrepreneur, Moroccan Center for Innovation and Social Entrepreneurship