Episódios
-
OPEN HEAVENS
MATALA LE LAGI MO LE ASO LUA 27 ME 2025
(tusia e Pastor EA Adeboye)
Manatu Autu: Vaai lelei Lau fanau (Take charge of your children)
Tauloto – Faataoto 22:6 “A‘oa‘o ia i le tama e tusa ma lona ala; a o‘o ‘ina toeaina lava o ia, e le te‘a ‘ese ai.”
Faitauga - Tusi Paia: Teuteronome 6:1-7
Ina ua faapea mai Farao, “Ou te le tuua Isaraelu e ō”, sa lei talanoa mai e taofia i se nofoaga, sa talanoa mai i se isi ituaiga faapologaina (Esoto 5:2). O tagata e faapologaina i le tulaga o loo talanoa mai ai Farao, e oo i a latou fanau e le mafai ona latou vaaia ma pulea lelei (Esoto 1:1-22).
Afai e faatonu mai e le malo o se atunuu, e lē mafai e matua ona faatonu ma aoaoina a latou fanau i ala o le Alii, e tatau ona latou silafia lelei, e iai se faufauga amioleaga o lo’o i tua atu. O se tulaga pologa ma le saisaitia ma e le tatau ona fa’atagaina e soifua ai. E le tatau i matua ona faalagolago i se malo e a’oa’oina a latou fanau. Ae tatau ona tau solomua ona a’oa’o le malo i taiala mai le Upu a le Atua. Afai e finau pea le malo ma fa’asaina ona a’oa’oina e matua a latou fanau i le Upu moni, e tatau ona o ese mai i lena nofoaga ae o atu ise isi nofoaga e lē pologa ai.
E tatau i matua ona latou sa’ilia po’o a mataupu o a’oa’oina ai a latou fanau i le a’oga, ia mautinoa e le o aafia i aoaoga e tetee i le finagalo o le Atua. E tatau foi ona suesue taaloga i masini ma ata komi o lo’o matamata ai le fanau, aua e mafai ona tauala mai ai mea leaga e a’afia ai o latou mafaufau. A fai e te vaaia ma pulea lelei tamaiti ma talavou i lou siomaga, o le a faigata ona aafia i latou e ni fuafuaga amioleaga. Afai o oe o se matua, e tatau ona e fa’atulagaina taimi e te a’oa’oina ai lau fanau i ala o le Atua, ina ia latou iloa ma vavalalata ma le Atua a’o tuputupu a’e. Tuu iai le avanoa e mafuta ai ma isi tagata fa’atuatua, ma faia mea uma e fesosoani ia tutupu ae ma matutua o ni tagata o le Atua.
Ina ua matou siitia e nonofo i le Redemption City ma lo’u aiga, sa mamao le mea e a’o’oga ai la’u fanau, latou te usu i le a’oga ae le’i taina le 6 ile taeao ina ia aua ne’i tuai i le a’oga. Ina ia maua se matou mafutaga ma le fanau, sa matou a’ai faatasi i totonu o le matou ta’avale, pe a foi mai i le a’oga. Ao tuputupu ae, sa ou alu ma ave i matou talaiga o le Tala Lelei. E oo i le taimi ua oo i le Iunivesite, so’o se taimi ou te asia ai, ou te faamautinoaina e maua lelei se taimi matou te mafuta ai. Sa matou savalivali ma talanoa i le Tusi Pa’ia, ma ou ta’ita’ia i latou i poloaiga a le Atua.
Matua e, ia outou vaaia ma pulea lelei a outou fanau, ‘aua nei faatagaina le ti’apolo e manumalo ia i latou. O le a faamasinoina oe e le Atua i le fanau ua ia foa’iina atu, e pei ona ia faia ia Eli(1 Samuelu 2: 27-31).
Tulai mai, ma tau’ave le matafāioi o le tausia ma le a’oa’oina lelei o le fanau i ala o le Atua. ‘Aua ne’i tu’ulafoa’ina lau fanau i le ti’apolo i lou toilalo i ni taitaiga a le malo ma le aganuu, i le suafa o Iesu, Amene.
-
OPEN HEAVENS
MATALA LE LAGI MO LE ASO GAFUA 26 ME 2025
(tusia e Pastor EA Adeboye)
Manatu Autu: Malosiaga o le galue malosi ma le filigā (The power of diligence)
Tauloto – Faataoto 10:4 “E mativa lē ‘ua galue ma le lima vaivai; a o ē lima malosi e mau‘oa i latou.”
Faitauga - Tusi Paia: Mataio 25:14-30
Fai mai le Faataoto 22:29 “Ua e iloa le tagata ‘ua fa‘ata‘alise i ana galuega? E tu o ia i luma o tupu, ‘ae lē tu i luma o tagatanu‘u.”. O le galue malosi ma le filigā, o lona uiga o le faia o mea tonu e ausia ai se taunuuga i le lelei atoatoa, i le taimi vave ma ia faifaipea. I le Mareko 10:46-52, na ole atu Patimaio e lē faatasi, ae na tagi ma ole atu e faifaipea seia oo ina tali atu Iesu ia te ia. E faapena foi le fafine puna toto, na taumafai ma tulei atu pea seia pa’i atu ia Iesu (Luka 8:43-48). Afai e te manuia I soo se mea i le olaga nei, e tatau ona e galue malosi ma le filigā i le manumalo tusa poo ā luitau.
E iai se vaitau na ou tuuina atu ai se galuega e faia e se tagata i le amataga o le tausaga, ma sa ou fuafua e tuuina iai seisi galuega pe a maea lea galuega. Sa tatau ona ia faataunuuina le galuega i totonu o le tolu masina, peitai e oo atu ia Setema, o loo taumafai lava e faauma, ma e mautinoa ou te lē toe tuuina ia te ia seisi galuega. Sa tatala e le Atua le faitotoa o faamanuiaga tau tupe ia te ia, peitai sa lē galue malosi ma le filigā.
I le faitauga o le Tusi Paia o le asō, na faamatala e Iesu le faataoto i auauna e toatolu na maua taleni mai lo latou matai. O le toalua sa galulue malosi ma le filigā, ma e faaluaina lo la taui. Ina ua taliu mai lo la matai, na ia tauleleia nei auauna e toalua ma tauia lelei. Na ia faapea atu, “Ua lelei ia, le ‘au‘auna lelei e, ma le fa‘amaoni, ‘ua e fa‘amaoni i mea itiiti, ‘ou te tofia oe e pule i mea e tele; ‘inā ulufale mai ia i le fiafia o lou ali‘i.” Mataio 25:23
I le faataoto lava e tasi, o loo e vaai ai i le taui o le paie. O le auauna ma le taleni e tasi, na ia tanumia ma musu e fefaatauai. O le taui o le lē galue filigā, e le gata na aveesea le taleni ae na faanoanoa mo le olaga atoa. O le auauna galue malosi ma le filigā e le gata na amata i le lima taleni ae na faaiuina i le sefulutasi taleni, ao le auauna paie, na iu i le faanoanoaga. Na fetalai Iesu, “Auā o lē ‘ua i ai mea, e foa‘iina atu ‘iā te ia, e atili tele ai ana mea, a o sē lē i ai mea, e ‘ave‘eseina fo‘i ‘iā te ia le mea ‘ua ‘iā te ia.”Mataio 13:12 . O soo se tasi e galue malosi ma le filigā, e faaopoopoina iai mea, ao i latou e paie, e iu ina avesseina mea o loo i o latou lima.
Le au pele e, o le galue malosi ma le filigā, e faatulagaina ai oe ia maoae ma faulai i manuia. O soo se mea e te faia e tusa ma le finagalo o le Atua, ia faia ma le filigā i lou malosi atoa. Aua le faatuai, aua le musuā ona o luitau ma faafitauli. Ia e filigā i mea uma e te faia. Ou te tatalo ia tauia e le Atua lou galue malosi ma le filigā, i le suafa o Iesu, Amene.
-
Estão a faltar episódios?
-
OPEN HEAVENS
MATALA LE LAGI MO LE ASO SA 25 ME 2025
(tusia e Pastor EA Adeboye)
Manatu Autu: E i ai lava le auala (There is always a way)
Tauloto – Mareko 9:23 “Ona fetalai atu lea o Iesu ‘iā te ia, “‘Ai se mea ‘e te mafaia. Auā e mafaia mea uma lava i lē fa‘atuatua.”
Faitauga - Tusi Paia: Luka 8:43-48
Ou te lē talitonu e i ai se mea e lē mafai ona fai. O le mafuaaga lenā afai ou te fai i se isi e fai se galuega ae fai mai e faigatā tele e lē mafai ona fai, o le taimi lava lea ou te fai ai i se isi tagata e tago e fai.
A’o matou fausia le aai o le Togiola, sa faapea mai nisi e lē mafai ona fau se fale i ni aso se fitu, peita’i na mafai ona fai. Na o latou fai mai fo’i, o le a vave pa’ū ma malepe le fale, peita’i ua silia nei ma le fasefulu tausaga o fa’aaogā pea le fale. Ona fai mai lea o se fale fogāfaletasi auā o fale e tele fogāfale e ta’i fia masina o fai. Peita’i na o matou fausia se fale fogāfale lua i totonu o le sefulu valu aso. Ona fa’aauau lea ona o latou fai mai toeitiiti paū ma malepe le fale, a o lea ua silia ma le tolusefulu tausaga mulimuliane o loo tu pea le fale. I tulaga faapea, o le gaioiga na o matou faia, o le su’e o se auala e faatele ai itula faigaluega. Sa galulue le ‘au kamuta i le ao ma le po. O le auala lenā na mafai ai ona fai i le aso e tasi galuega o aso e lua. Fa’atasi ma le fesoasoani a Agaga Paia na faataunuuina ma le manuia, o le galuega lea ou te faaigoaina, o inisinia fa’alelagi. Tusa poo le a le foliga faigata o se mea, e lē mafai ona fai, afai e ‘au fa’atasi oe ma Agaga Paia ma e te talitonu ma galue punoua’i e fai, e i ai lava le auala.
I le tele o tausaga ua mavae, sa ou malaga ai i se atunuu mamao ou te lauga i se sauniga a Agaga Paia. O le nofoaga sa fa’aaogā mo le sauniga o se fale totogi, o lona uiga ina ia i ai se fale o’u te nofo ai ma tatalo a’o lei amatalia le sauniga, e tatau ona o latou aumaia se fale e fai ona uili. A o o’u tuua le fale o’u te agai atu mo la’u lauga, ma o loo taumafai fo’i le alii leoleo e fa’aavanoa le auala mo a’u, sa tamo’e atu i totonu o le fale fai uili se fafine ua tele tausaga e lē maua sana pepe(tulou) ma saofa’i i luga o le nofoa sa ou nofo ai. Na tuliloa atu e le alii leoleo le fafine ma aumai faavave I fafo mai le fale; a e le’i popole i ai le fafine aua ua talitonu lona loto ua ia maua le vavega sa ia sailia. Sa i ai lona faatuatua e avatu e le Atua ia te ia se tamaititi e ala i se vavega pe a tau lava o lona saofa’i i le nofoa o le fale o loo nofo ai lana auauna, ma na faamanuiaina le fafine i le masina lava lea.
O le fafine ma’i punatoto o loo tāua I le faitauga mai le Tusi Paia o le asō sa finau malosi e ui i faafitauli uma na faalavelave i lona pa’i atu i le pito o le ofu o Iesu. O nisi taimi, e te lua fesaga’i ma faafitauli o le soifuaga; peita’i e ao ona e iloa ma silafia, a lua ‘au faatasi ma le Atua, e leai se mea e lē mafaia. Faamoemoe ma faatuatua ia te Ia ma aua e te faavaivai, aua e Na te saunia le ala. A iai le Atua, e iai lava le auala, I le suafa o Iesu, Amene.
-
OPEN HEAVENS
MATALA LE LAGI MO LE ASO TOONAI 24 ME 2025
(tusia e Pastor EA Adeboye)
Manatu Autu: Faafoeina o Avanoa (Handling Opportunities)
Tauloto – Failauga 9:11 ‘Ua ‘ou toe iloa fo‘i i lalo o le lā ‘ua lē sini i le tausinioga ē ‘ua tele vavave, ‘ua lē mālō i le tau‘a ē ‘ua malosi, ‘ua lē i ai fo‘i i ē ‘ua popoto le mea e ‘ai, ‘ua lē i ai i ē ‘ua fa‘autauta le ‘oloa tele, ‘ua lē i ai fo‘i i ē ‘ua atamamai le alofaina mai; a o le tausaga ma le mea e tupu ai e o‘o ‘iā te i latou uma.
Faitauga - Tusi Paia: Failauga 9:10-11
O le tusitala sa ou tā’ua I le lesona o ananafi, o ia fo’i lea na fai mai, “O le olaga o se avanoa; tago e pu’e mau.” Ou te ‘au ai fo’i i lea manatu. E moni lava o le olaga o se avanoa ma e tatau ona e tago e pu’e lima lua.
Sa ou a’oa’oina se solo i le tausaga 1957 e faapea;
“E i ai se tai i le olaga o le tagata, a talia i le lolo, e taunuu atu i le manuia; a lē talia, o faigamalaga uma i o latou olaga o le a noatia i le tai papa’u ma le puapuaga.”
O le uiga o le solo ua tā’ua i luga e faapea; a talia e tagata avanoa ma fa’aaogā lelei e siitia o latou tulaga; peita’i afai latou te teena e ono lē toe maua. Talitonu mai ia te a’u, o le Atua e tu’u avanoa tutusa i tagata uma. O le a ia avatu ia te oe i le taimi e finagalo ai ni avanoa e te mana’omia e faataunuuina ai lou tulaga. O laasaga o totoe o lou soifua o le a faalagolago i lou fa’aaogaina o avanoa ua Ia tuuina atu ia te oe. Fai mai le fuaiupu tauloto o le asō, o taimi ma avanoa e o’o i tagata uma. O tagata uma lava, o le a i ai o latou taimi ma avanoa, peita’i o nisi latou te lē pu’ea ma fa’aaogā avanoa.
A pologa nisi tagata aemaise i latou ua matutua soifua, e masani ona fa’apogai mai i lo latou lē fa’aaogaina lelei o latou taimi ma avanoa a o laiti. Toatele tagata e lē mafai fo’i ona o latou iloa se avanoa pe a o’o mai. O le mafuaaga lea e tatau ai ona e mataala fa’aleagaga. Silasila fa’ale mafaufau pe faapenei o fea o o’u i ai pe ana ou lē fa’aaogaina le avanoa o lo’u auai I le ekalesia RCCG, pe ou te alu ese fo’i ma le ekalesia I sina fa’aosoosoga itiiti lava. O lenā taimi ailoga ou te iloaina, ma semanū ou te alu ese mai lo’u manuia.
O tagata e feita gofie e masani ona misi o latou avanoa auā o avanoa o isi taimi e omai o loo afīfī mai i totonu o puapuaga. Mo Samuelu o lona avanoa na maua i totonu o le fale o Eli ma ona atalii faalogogatā. A na ita ma musu Samuelu auā sa na o ia o se tamaititi ma fai i lona tinā ua toe fia fo’i atu i lo latou āiga, semanū e misi lona avanoa e avea ai ma perofeta a le Alii, ua lē mafai ia te ia ona i’uvale sina ana upu (1 Samuelu 3:19). Mo Tavita l, o lona avanoa na maua ina ua usita’i i le fa’atonuga a lona tamā e alu e ave meaai a ona uso sa i le togalauapi (1 Samuelu 17:14-20). O’u te tatalo ia e lagonaina ou avanoa uma ma fa’aaogā lelei i latou, i le suafa o Iesu.
Tatalo
Tamā, fesoasoani mai ia te a’u ia ou iloa avanoa uma ua e aumaia ia te a’u ma faamolemole ia faamalosia a’u e faaaogaina lelei, i le suafa o Iesu, Amene.
-
OPEN HEAVENS
MATALA LE LAGI MO LE ASO FARAILE 23 ME 2025
(tusia e Pastor EA Adeboye)
Manatu Autu: O le olaga o se luitai (Life is a challenge)
Tauloto – Faataoto 12:24 ‘E manumālō lima o ē filigā i galuega; a o lē paiē, e fai taulaga o ia.
Faitauga - Tusi Paia: Failauga 12:1-7
E iai se tusitala ua faapea mai, “O le olaga o se luitau; ia faafetauia” E mafai ona ou faaopoopo iai e faapea, “ia e sili atu I le luitau”. O nei aso, o le toatele o talavou ua saili I se olaga e filemu, e leai se olaga e filemu. A’o ou aoga i le tulagalua, na aoaoina a’u e lo’u faiaoga e faapea mai, o soo se tagata lava, na sau ma aumai sona aluga i le lalolagi nei, ma e tatau ona faaaoga ae lei tuua. Afai e le faaaogaina le aluga a’o talavou, e mautinoa e latou te faaaogaina pe a matutua. Fai mai le faiaoga, o lea aluga o luitau.
Afai e filifili e talavou e tuuese fiafiaga ae ui i luitau e pei o le toaga e fai meaaoga, galue malosi ma fuafua lelei tagata e mafuta iai ao talavou, e fiafia i latou pe a oo ina matutua. Peitai, a filifili e na o le pati ma faaalu vale le taimi ao talavou, e oo atu ina matutua, a lē nofo toatasi, e galue faifaipea ina ia mafai ona ai. O le mea na faaigoa e lo’u faiaoga o le aluga, o loo faaigoaina e le Tusi Paia o le ’amo’ i le Failauga 3:27 e faapea 'E lelei i le tagata ‘ina ‘ia tau‘ave e ia le amo ‘ina o taule‘ale‘a. '
Ia maitau mai, e le o faapea mai le Tusi Paia ‘o se amo’, ae ‘o le amo’. I nisi faaupuga, e iai le amo a so’o se tagata, ma e lelei i le tagata ona tauave lana amo a’o talavou. O tagata e latou te le mananao e tauave latou amo I le talavou, e paie. E iai nisi tagata na fananau mai I aiga o tupu, peitai e le mafai ona latou maua avanoa e pulea ma taitaia se atunuu pe a paie. O ai la e agavaa e pule? O soo se tagata e manao e pule, e tatau ona saunia e galue malosi. O I latou e fia maua le tulaga pule e tatau ona saunia e tauave le amo i lo latou talavou. Afai e te manao e ola I se olaga filemu i lou talavou, e le o saunia lou tagata e pule. O le pule ma le taitai, o se galuega fita ma e na o latou e galue filiga e pule, ma o loo faamaonia mai I le upu tauloto mai le Tusi Paia o le aso. E leai se auala faigofie i le manuia, o le tulaga moni, e le faapea na e fanau mai i se aiga manuia, ona faamautinoa ai lea e te manuia i le olaga nei.
Afai o oe o se talavou ma e naunau e nofo tupu i le olaga nei, alo ese ma le paie. Ia e manatua pea Le na faia oe i le taimi o le talavou ae lei oo mai aso faigata (Failauga 12:1). E te le pule I lou ola, tauave lou satauro ma mulimuli ia Iesu ina ia e manuia I aso uma o lou ola. O I latou e pule ma nofo tupu i le olaga nei o I latou e galulue ma le filiga, i le suafa o Iesu, Amene.
-
OPEN HEAVENS
MATALA LE LAGI MO LE ASO TOFI 22 ME 2025
(tusia e Pastor EA Adeboye)
Manatu Autu: Mai le faalogo i le maua o vavega (From hearing to experiencing miracles)
Tauloto – 1 Ioane 1:1 “O le mea sa iai talu le amataga, na matou fa‘alogologo i ai, na matou va‘ava‘ai atu i ai o matou mata, na matou matamata ai, na tagotago fo‘i o matou lima i le ‘Upu o le ola.”
Faitauga - Tusi Paia: Mareko 5:25-34
E leai se mea e faatusa i ai le avea ma molimau, faapea le maua o tautinoga. A e faitau i vavega tetele i le Tusi Paia, pe faʻalogo foi i molimau i mea tetele ua faia e le Atua mo ona tagata, e te ono lē malamalama atoatoa i lona matautia. Peitaʻi, e le tupu lena tulaga ia te oe, pe afai na e ui ma maua se vavega mai le Atua.
Ae leʻi o’o atu tagata Isaraelu e asiasi faalilolilo i Ieriko e pei ona taua i le Iosua 2:1-23, fai mai na faʻalogo Raava i vavega matautia na faia e le Atua. E lei vaai i nei vavega, ae na talitonu i iai, ma o lona faʻatuatua na ia maua ai nisi o vavega a le Atua. A e faʻalogologo i molimau pe faitau i mea na faia e le Atua I le Tusi Paia, ia faaaoga e faatupuina lou faʻatuatua. O le faatuatua e tupu mai tautinoga na e faalogo iai, e fesoasoani tele ia te oe, e te maua ai vavega, e pei o le tinā o loo taua i le faitauga o le Tusi Paia o le asō, na faalogo i faamatalaga ia Iesu (Mareko 5:27).
Na faigata ona ou talitonu i faamalologa o le tino i lo’u faatoa faaolaina. I nā aso, oo te ma’i lava i le malaria ma sa inu faifaipea fualaau. E iai se aso na ou vaai ai i se toeaina e masani ona savali faanounou, ua savali e sa’o lelei le patua i totonu o le falesa. Na ou naunau e fia iloa poo le a le mea na tupu ia te ia, a’o faasoa ma faia le tautinoga, fai mai sa alu e talai le Talalelei e pei ona masani ai, ae amata ona faifai ia te ia se tagata mai lona pitonuu. Na fai mai lea tagata, afai e mamana lona Atua, ua leva na tatau ona ia faamaloloina o ia. Ina ua faalogo iai lenei tamā matua, fai mai na oso lona ita ma tu sa’o loa. Na ia taua e ui na ia faalogo atu i le matuā tigā o lona tua, na tū sa’o ona e lē fia faalogo o ula mai se tasi i lona Atua. Fai mai e oo atu i le fale, ua matuā lē toe iai se tigā. Ina ua ou faʻalogo i lenei molimau, na faatupuina loʻu faatuatua ma ou iloa ai, e mafai ona maua le soifua maloloina lelei mai le Atua. Na ou faatagaina Iesu e avea ma aʻu fomaʻi, ma o lona alofa tunoa, e oo mai i le taimi lenei, ou te le o toe inu fualaau o le malaria. Na ou maua se vavega ona na tupu loʻu faatuatua, ina ua ou faʻalogo i se molimau a se tagata.
Le au pele e, afai e te faalogo i se tautinoga a se tagata i se ituaiga vavega o loo e faatuatua e foai mai e le Atua, ia avea e tupu ai lou faatuatua. E le faailoga tagata le Atua (Galuega 10:34), afai ua ia avatu se vavega i se tagata, e naunau ma mafai ona ia faia foi mo oe. O la’u tatalo, ia e maua se vavega matautia mai le Atua i le aso, i le suafa o Iesu. Ia e manatunatu i mea o loo e talitonu e faia e le Atua seia faatupu ai lou faatuatua, i le suafa o Iesu, Amene.
-
OPEN HEAVENS
MATALA LE LAGI MO LE ASO LULU 21 ME 2025
(tusia e Pastor EA Adeboye)
Manatu Autu: Na ia auina mai Lana Upu (He sent His Word)
Tauloto – Salamo 107:20 “Ua ia ‘auina atu lana afioga ma fa‘amālōlō ‘iā i latou ma lavea‘iina ai nai lo latou malaia.”
Faitauga - Tusi Paia: Ioane 5:1-9
O se tamaitai na fiu e sue le suega ave taavale ae lē pasi mo le 17 tausaga, na sau I se tasi o matou sauniga o le Agaga Paia. Ao faia le sauniga, na oo mai le Upu a le Atua e faapea, ‘e iai se tagata o loo iinei, e lē toe oo i le tulaga e lē pasi se suega’. O le Isi taimi na ia sue ai le suega ave taavale, na pasi.
A oo mai le Upu a le Atua, o soo se vaega lē manuia e iai le fememeai ma le tigā, o le a faamutaina. Ina ua maea ona sopoia e Iosua ma le fanauga a Isaraelu le Ioritana, na fetaiai ma seisi luitau: o Ieriko. O le taulaga e iai ona pa maualuluga, ma e tapunia ona faitotoa. Fai mai le Iosua 6:1
“Ua matuā puipuia Ieriko e le fānauga a Isaraelu, e leai se alu atu, e leai se sau ai.”
Ina ua oo mai le Upu a le Atua, na soloia le pa e pei o pepa o se pelē i luma o Isaraelu. Ou te folafola atu i le asō, o le Upu e te manaomia e manumalo ai, e oo mai ia te oe, i le suafa o Iesu. O le tamaloa ma’i i le vai i Petesa i le faitauga o le Tusi Paia o le asō, na ui I se auala fitā, lē mautonu, tigā ma le faanoanoa i le 38 tausaga.
Peitai ina ua oo mai le Upu a le Atua (Iesu) ia te ia, na maua lona faamalologa ma ua faasaolotoina mai se taamiloga lē manuia i lona siomaga. Ina ua oo mai le Upu a le Atua ia te ia, na liua mea uma i le lelei. I le suafa e sili i suafa uma, o le Upu e liua ai miti i le tino mai, ma suia soo se tulaga lē manuia o loo iai i lou olaga. Afai o loo e iai i se saisaitiaga, e faaumatia e le Atua soo se mea o loo saisaitia ai oe i le suafa o Iesu.
I le 2 Tupu 4:1-7, o le tala I le fafine ua oti lana tane, o le avā a se tasi o atalii o le au perofeta na suia mo le lelei. Ina ua maliu lana tane, na tuua I lona aiga se aitalafu tele na semanu e avea lana fanau o ni pologa e totogi ai. E faafetai e na te lei taofia nao ia ona faafitauli, ae na ia tagi atu i le sui vaaia o le Atua, o Elisaia, ma o lona tagi atu na auina mai ai se Upu mai le lagi, ma suia ai lona olaga. Na maua sana vavega na faasaoloto ai o ia mai aitalafu, ma tausia o ia ma lana fanau mo le olaga atoa.
Le au pele e, e mafai e le Atua ona auina atu lana Upu e faamalolo ia te oe ma faasaoloto oe mai soo se saisaitiaga o loo e iai pe afai e te tagi ma ole atu ia te ia mo se fesoasoani. Afai e te filemu, e leai se mea e suia i lou tulaga. Peitai, a e ole atu ia te Ia, e na te auina mai lana Upu e faasaoloto ia te oe.
Tatalo
Tamā, faamolemole auina mai Lau Upu ia te a’u i le asō, i le suafa o Iesu, Amene.
-
OPEN HEAVENS
MATALA LE LAGI MO LE ASO LUA 20 ME 2025
(tusia e Pastor EA Adeboye)
Manatu Autu: Mai le perofetaga I le folafolaga (From prophecy to decree).
Tauloto – Kenese 1:3 ‘Ua fetalai mai le Atua, “‘Ia malamalama;” ‘ona malamalama ai lea.
Faitauga - Tusi Paia: Salamo 33:6-9
O perofetaga e mafai ona iai ni aiaiga. O se faataitaiga I le tusi o Isaia 1:19 o loo faapea mai: "Āfai tou te gaua‘i ma ‘outou fa‘alogo, tou te ‘a‘ai ai mea lelei o le lau‘ele‘ele. O loo faapea mai foi le Isaia 3: 10, ’Fai atu ia i lē ‘ua amiotonu, e manuia o ia auā o le fua o a latou galuega latou te ‘a‘ai ai. Ae peita'i a oo mai i folafolaga, e le faia e le Atua ni aiaiga. I le tatou upu tauloto o le aso, o loo ia faapea mai: "la malamalama, ona malamalama ai lea."
Sa tele ni perofetaga e uiga ia Apera'amo e aofia ai ma perofetaga o le a avea o ia ma Tamā o ni malo se tele, ma o lana fanau e faitauina e pei o fetu o le lagi. Peita'i ane, i le Kenese 18:14 sa fetalai mai ai le Alii: "I le la tausaga, e fanau ai e Sara le tama tane." O se fa'ataitaiga manino lea o le perofetaga ua liua ma avea ma folafolaga."
I lou tulaga o se afafine poo se atalii o le Atua, e iai se tulaga e mana'omia ona e faia e liua ai perofetaga e 'avea ma folafolaga. A e faia se tulaga e taitaia ma faaosofia le Atua e fa'amanuia ia te oe, e na te ono liua perofetaga ua ia faia ia te oe e 'avea ma folafolaga. O le taitaia o le Atua e faia lea tulaga, e tatau ona e āva ma faamamalu ia te ia. O le āva ma le faamamalu i le Atua e le ono faaaogaina ai le tamaoaiga. E lei avea e Aperaamo ni meaalofa i tagata na asiasi mai ia te ia, sa ia ava ma avatu le mamalu i lona talimalo iai latou i lona fale. E mafai ona e faamamalu i le Atua i lou usitaia o ana poloaiga, e pei o le poloaiga e manumaloina agaga (Mataio 28:19-20). E mafai foi ona e faamamalu i le Atua e ala i lou galue i lau Ekalesia ma ava ia te ia i le uluai fua o mea uma ua e maua. (Fa'ata'oto 3:9).
O se isi auala e te ava ma faamamalu ai i le Atua, o lou fa'atuatua i lana Upu. I le Luka 7:1-10 ina ua auina atu e le taitai o le toaselau toeaina o lutaia e ole ia lesu, e maliu atu e fa' amalolo i lana auauna ua gasegase, sa sauni lesu e malaga iai, peitai ua ia auina mai ana uo ma le faamatalaga ia lesu: "Le Alii e, e te lē tau afio mai i lo’u fale aua ou te talitonu e malosi ma mamana lau Upu e pei ona iai le mana ia te oe. Tau lava o sau fetalaiga, ona maloloina lea o la'u auauna." (Luka 7:6-8). Sa matua ofo lesu i le fa'atuatua a lenei tagata, ma sa ia fa'amaloloina lana auauna i le taimi lava lena. O le avatu o le faafetai i le Atua, o se tasi lea o auala e te ava ma faamamalu ai i le Atua. I le Luka 17:12-19, e to'a sefulu lepela sa tauvalaau atu ia lesu mo lona alofa mutimutivale, ma sa ia fa'atonuina e o e fa'aali i latou i le au ositaulaga. Na maua lo latou faamalologa i le ala, ae na o le to'atasi na toe foi mai e faafetaia ma vivii i le Atua. Ona folafola lea e lesu ia te ia, ’ua e malōlō ma le atoatoa’ auā na toe foi mai e faafetai i le Atua.
Le 'au pele, a’o e mulimuli i nei ta'iala, ou te tatalo, o perofetaga uma e te maua, o le a avea ma folafolaga, i le suafa o lesu. E mafai ona e faaosofia le Atua, e liua ana perofetaga mo oe i folafolaga, e ala i lou ava ma faamamalu ia te ia, i le suafa o Iesu, Amene. -
OPEN HEAVENS
MATALA LE LAGI MO LE ASO GAFUA 19 ME 2025
(tusia e Pastor EA Adeboye)
Manatu Autu: Naunautaiga e loto alofa (The urge to be generous)
Tauloto – Eperu 13:2 “‘Aua le galo le alofa i tagata ‘ese; auā o lea ‘ua talia ai e isi o agelu ma le lē iloa.”
Faitauga - Tusi Paia: 2 Tupu 4:8-17
I le faitauga o le Tusi Paia o le asō, o le fafine Sunema le mafuaaga na afea ai lona fale e Elisaia mo meaai ao ui ane I lona taulaga. Sa tali malo pea o ia i le perofeta I lona fale I soo se taimi e ui ane ai i lona taulaga, ma na iu lava ina la fausia ma lona toalua se potu faapitoa i lo la fale e malolo ai le perofeta I soo se taimi e malaga atu ai. Ua maea sina taimi, ma ua faafetaia e Elisaia lo la agaga talimalo, ua valaau i le fafine ma folafola o le a maua se la pepe. Ua to ma ua fanau se tama tane e tusa ma le folafolaga a le perofeta, ona o le talimalo lelei.
E iai taimi, a oo i le taimi e oo mai ai lau vavega, e tei lava ua e lagonaina le loto fia foai ma le fia talimalo. O le a e naunau e faamanuia i tagata e sili atu muamua. Fai mai le tauloto mai le Tusi Paia o le asō ia aua nei galo ona e alofa i tagata ese aua e le iloa poo e alofa ini agelu e aunoa ma lou silafia. O Le mafuaaga ona e ono auina mai e le Atua se agelu e avatu lau vavega, pe ono sau o se tagata. Afai e te alofa I le agelu, e te maua lau vavega.
I le Kenese 18:1-14, na vaai Aperaamo ini tamaloloa se toatolu o ui ane I luma o lona faleie, na ia valaaulia i latou, ua latou aai, mulumulu o latou vae ma malolo mo sina taimi. Ina ua maea ona aai, na fesili se tasi oi latou mo Sarai, ma tau atu ia te ia o le a fanau mai ia te ia se atalii. O le leai o se tamaitiiti mo le tele o tausaga ua faamuta i lea aso ona ua faatino e Aperaamo lona naunautaiga e alofa, matamau ma talimalo ini tagata ese.
A e lagonaina le naunautaiga e loto alofa ma matamau e ese mai le tulaga masani, aua e te teena. E leiloa poo taumafai le Atua e uunaia oe e faatino se tulaga e te maua ai sau vavega. E tatau ona matuā faigata i le fafine ua oti lana tane i Sarefata le avatu ia Elia o lana aiga mulimuli sa fuafua mo ia ma lana tama. I le tulaga masani, e ono faapea mai se Tina loto alofa faapea, ‘ e mafai ona ou lē ai, ae le mafai ona ou foaia le meaai a lau tama’. Peitai na ia lagona le naunautaiga e loto alofa ma matamau e le masani ai, ma e lei tetee iai. O le taui, ua ia maua meaai ua lava ma totoe mo ia ma lana tama i le taimi atoa o le oge.
Le au pele e, a e maua se lagona e naunautai e foai atu, aua e te teena, e leiloa poo lenā foai e tatala ai le avanoa mo lou siitia i leisi tulaga. Tau ina tauia e le Atua lou agalelei ma le talimalo i isi tagata, ini tautinoga faulai e sili atu i manatunatuga uma o lou loto ma mea uma o loo e ole atu ai i le Atua, i le suafa o Iesu. A e lagonaina le naunautaiga e foai, fai loa, aua e te teena, i le suafa o Iesu, Amene.
-
OPEN HEAVENS
MATALA LE LAGI MO LE ASO SA 18 ME 2025
(tusia e Pastor EA Adeboye)
Manatu Autu: Na faia mo se faamoemoe (Created For A Purpose)
Tauloto – Isaia 46:11 “O lo‘o vala‘au i le manulele e fe‘ai mai sasa‘e; o le tagata mai le nu‘u mamao ‘ua ‘ou tofia. Na ‘ou fai atu ai, ‘ou te fa‘ao‘oina ai lava; na ‘ou fuafuatia, ‘ou te faia lava.”
Faitauga - Tusi Paia: Efeso 1:9-12
Afai o se tama na tuli e ona matua mo se feau faafuasei ma tāua ae alu atu taalo lakapi, o le a sou manatu i lagona o ona matua pe a la iloa le faalogogatā o le atalii?
E faapenā uma lava le tali atu a le toatele o tagata i polokalame a le Atua i o latou olaga. Na auina mai e le Atua tagata uma i le lalolagi e tofu ma le faamoemoe e tatau ona o latou faataunuu. Peita’i o le toatele ua faatuatuana’i le finagalo o le Atua ae amata fai le mea e manana’o ai.
A’o e lei fanau mai, na tapena e le Atua se galuega mo oe e te faataunuuina i luga o le fogaeleele. O i latou uma na faia e le Atua e tofu ma se faamoemoe (Efeso 2:10), ma e i ai le fuafuaga lautele a le Atua, o loo aofia ai i totonu lona finagalo tupito mo lou olaga.
I le Kalatia 1:13-16; fai mai Paulo na filifilia ia e le Atua mo Ia lava a o i ai i le manava o lona tinā. I le faaiuga o lona soifua fai mai Paulo, “Ua o’u tau le taua lelei, ua i’u ia te a’u le tausinioga, ua ou taofi i le faatuatua,” (2 Timoteo 4:7). Na iloa e Ioane le Papatiso na auina mai ia e le Atua e faalauleleia le ala mo Iesu ma folafola lona afio mai i le fanauga a Isaraelu (Ioane 1:29-36). Ina ua afio atu Iesu iā Ioane, na alaga o ia, “Faauta i le Tama’i mamoe a le Atua, na te aveesea le agasala a le lalolagi,” (Ioane 1:29). Auā na faia lelei le galuega a Ioane, na avatu ai e Iesu se ta’utinoga faatatau ia te ia “E moni ou te fai atu ia te outou, e lei tu mai i e na fananau i fafine sē sili ia Ioane le papatiso” (Mataio 11:11). O le a se ta’utinoga o le a faia e le Atua faatatau ia te oe? E iai lau galuega faapitoa i luga o le fogaeleele, ma e lē tatau ona e faatagaina se tulaga e taofia oe mai i le faataunuuina o lenei valaau. Tinoū ia aua ne’i faatagaina se mea e taofia oe i lou tula’i mai i le tofiga na tapena e le Atua mo oe.
E pei ona tatau i le tagata ona ia iloa le faamoemoe o le Atua, e tatau fo’i i lea uso ona faataunuu le faamoemoe o le Atua i ala o le Atua. Fa’ata’ita’iga o Mose na valaauina e lavea’i le fanauga a Isaraelu mai Aikupito, peita’i o le taimi muamua, na ia faia i ana lava ala ma lona lava loto ma toetoe a uma ai lona ola. Na faaui e le Atua Mose i se ala e a’oa’oina ai o ia ma fa’asa’o ai ona ala (Esoto 2:11-15).
Le au pele, e iai le faamoemoe patino a le Atua mo lou olaga ma o loo ia te Ia ta’iala e tatau ona e tausisia e fa’ataunu’uina ai. O le mafuaaga lea e lē tatau ai ona e taumamao ma Ia. O le mafana o le lua mafutaga ma le Alii e fua iai pe ete lua savavali faatasi ma Ia e faatino lona faamoemoe mo lou olaga pe leai. Ou te tatalo ia aua ne’i iai se mea e faalavelave ia te oe mai le faamoemoe o le Atua i lou olaga i le suafa o Iesu Amene.
-
OPEN HEAVENS
MATALA LE LAGI MO LE ASO TOONAI 17 ME 2025
(tusia e Pastor EA Adeboye)
Manatu Autu: E Lē Galo I Le Atua (God Does Not Forget).
Tauloto – Isaia 49:15 E galo ‘ea i le fafine lana tama ‘ua susu, na te lē alofa i le tama a lona lava manava? Ai lava e galo ‘iā te i latou, ‘ae lē galo lava oe ‘iā te a‘u.
Faitauga - Tusi Paia: 1 Samuelu 1:9-20
O fasi fuaitau pei o le, ‘Na manatua e le Atua,’ e pei ona vaaia i le faitauga mai le Tusi Paia o le asō, e ono foliga ese aua o le Atua na te silafia le taunuuga mai le amataga ma e lē mafai ona galo ia te Ia se mea. Peita’i ina ua fa’aaogā e le Tusi Paia lea fuaitau, e lē faapea ona ua galo i le Atua se mea, ae ona ua finagalo I lea taimi e faapitoa se vaega e silasila i ai. Afai na fai folafolaga le Atua ia te oe i le taimi ua te’a, Nofo ma lou mautinoa e lei galo ia te Ia. E mautinoa e faataunuuina i le taimi ua Ia fuafuaina.
I le tausaga 1979, na matou o ai ma lo’u tamā fa’aleagaga o Pa Josiah Akindayomi ma nisi i se mafutaga a Kenneth Hagin i Tulsa, Oklahoma, USA. Na uma le fonotaga i le Aso Toonai, ona matou lolotu lea i se lotu lata ane I le Aso Sa. Ona o le matou taimi muamua lea, na faanonofo ai matou i le pito I luma. A o fai le lauga, na faafuasei ona sau le failauga i lalo mai le la’oai, tula’i i luma o Pa Akindayomi ma fai mai, “Ua fetalai mai le Atua, ‘o la’u folafolaga na fai atu iā te oe o le a faataunuuina.’ “ O Pa Akindayomi e lē malamalama i le Gagana Peretania, o lea na fesili mai ai ia te a’u, “Fai mai e a le failauga?” Talu ai ou te lei mana’o e misi se vaega o le lauga, na ou fai atu ai, “Tamā, sei tatou o i le faletalimālō ona o’u faamatala atu lea.” Ina ua matou taunuu i le faletalimālō, na toe fesili mai Tamā ma ina ua uma ona ou fa’amatalaina i ai le tala a le failauga, sa maligi loimata o si o’u tamā. Na fai i ai le Atua i le tausaga 1952, “O le a o’u amataina se lotu e ala iā te oe, ma o le a so’o ai le lalolagi atoa.” O le taimi lea na o Saute Sisifo o Nigeria sa i ai le lotu. O le toeaina ua sauni e alu i le lagi, ma sa ia manatu ua galo I le Atua lana folafolaga. O le asō, ua 197 atunuu o le lalolagi ma o loo faaopoopoina pea, ua ave i ai e le Atua le lotu RCCG.
E i ai se mea na folafola e le Atua ia te oe? Ia e mautinoa o le a Ia faataunuuina lana folafolaga. Peita’i o ana folafolaga e faataunuuina i lana lava taimi. Na mavae le tele o tausaga o auauna ma le faamaoni Sakaria ma Elisapeta i le Atua, ae sa leai lava sa la tama, ma atonu na manatu ua galo i laua i le Atua. Peitai na manatua pea e le Atua lana folafolaga ma na āsia i laua e le Atua i lana lava taimi fuafuaina ma avatu ia i laua se atali’i (Luka 1:5-25). O le fuafuaga a le Atua, e avatu ia i laua se perofeta lelei, o lē e fa’alauleleia le ala mo Iesu. Ina ua manatu tagata ua siliga ona maua sa la tama, na fetalai le Atua, “O le taimi lenei e faataunuu ai le folafolaga mo Sakaria ma Elisapeta.”
Le au pele e, e mafai ona galo i tagata a latou folafolaga, a o le Atua e lē mafai ona Ia faagalo ina lana folafolaga i ia te oe. Tumau pea lou faamoemoe ia te Ia, ona Ia faataunuuina lea o ana folafolaga i lou olaga i lana taimi fuafuaina, I le suafa o Iesu, Amene.
-
OPEN HEAVENS
MATALA LE LAGI MO LE ASO FARAILE 16 ME 2025
(tusia e Pastor EA Adeboye)
Manatu Autu: Liliuina e le Atua (Divine turnaround )
Tauloto -Tusi Paia–Salamo 3:4 “Na ‘ou vala‘au i le ALI‘I i lo‘u leo; ‘ua fa‘afofoga mai fo‘i o ia ‘iā te a‘u mai lona mauga pa‘ia. Selā.”
Faitauga – Tusi Paia – Mareko 10:46-52
I le tausaga 1963, na asiasi atu ai le kovana sili o le malo i le taulaga o Ondo ao ou faiaoga ai i le aoga tulagalua. Sa faatualalua tagata o le taulaga atoa ao pasi ane le taavale a le Kovana Sili. Sa ou tu I tua o se toeaina matua sa faiaoga foi i le aoga lea. Ao alu ane le solo a taavale a le kovana sili, sa ia iloa atu le toeaina lea, o lē sa faiaoga i le aoga lea. Na ia faatu le taavale , ma savali mai ma tū I luma o le toeaina lea. Ou te leiloa poo a la tala na fai, ae ua ou vaaia le tagi o le toeaina. Mulimuli ane, ua matou iloa o le toeaina sa faiaoga i le aoga lea na aoga ai le kovana sili ma o ia le mafuaaga na tuli ese ai le Kovana Sili mai le aoga.
E mafai e Le Atua ona liliuina mea uma i lou siomaga ma a oo mai ou fili, e te faapea atu iai latou, ‘Vaai i mea ua faia e le Atua’. Ina ua liliuina e le Atua le tala o Isaraelu ina ua maea ona latou ole atu ia te ia, o le au Aikupito na inoino iai latou, na latou foai atu mea uma na latou ole atu ai. Fai mai le Esoto 12:36 “‘Ua fa‘atupuina, e le ALI‘I le alofa o Aikupito i le nu‘u; ‘ua latou ‘aumaia mea na fai atu ai; ‘ua latou fa‘amatitivaina ai Aikupito.”
Ou te manatu i le mea na tupu, o tagata Isaraelu ua tuitui i fale o tagata Aikupito sa avea ma o latou matai sa faasaua iai latou, ma faatonu e aumai ofu ma seevae poto lelei. O ē pule i auauna sa leai seisi mea e mafai o a latou faia, ae talia le talosaga aua foi ua iai le Atua i lea tulaga ia liliuina mea uma mo ona tagata. O Patimaio, na fanau mai e lei pupula, ma I le tele o tausaga sa ia nofonofo ai i tafatafaane o le auala ma ole atu mo mea e maua. Peitai e iai le aso ma afio atu iai Iesu.
Na silafia e Patimaio,o Iesu o le ki e mafai ona liliuina mea uma, ma sa ia alaga atu mo se fesoasoani. Ao ia alaga atu, sa valaau atu tagata ia te ia ia filemu. Faafetai e lei faalogo iai Patimaio. Ae na ia alaga atu ma le leo tele seia oo ina afio atu iai Iesu. Ina ua valaau le Atua ia te ia, o i latou na fai atu e aua le pisa, o i latou lava nei na faapea mai “Ia e loto tele, ‘ina tu ia, o lo‘o vala‘au o ia ‘iā te oe.” (Mareko 10:46-52).
Le au pele e, o le a lou fiaai ia liliuina le tulaga o loo e iai e le Atua? Afai e te manao iai, e tatau ona e naunau e iloa ma lagona mai oe e Iesu, e pei o Patimaio. Aua le taofia le valaau ia te ia i le faatuatua, e faamaoni ma alofa o Ia, ma e mafai ona Ia liliuina mea uma mo lou lelei. E mafai e Le Atua ona
Iliuina mea uma mo le lelei o ē latalata ia te ia, i le suafa o Iesu, Amene.
-
OPEN HEAVENS
MATALA LE LAGI MO LE ASO TOFI 15 ME 2025
(tusia e Pastor EA Adeboye)
Manatu Autu: Asiasiga mai le Atua 3 (Divine visitation 3)
Tauloto -Tusi Paia–2 Nofoaiga Tupu 20:20 “Ua latou ala tula‘i i le taeao ma ō atu i le vao o Tikoa; o lo‘o ō atu i latou, ‘ona tu atu lea o Iosefatu, ‘ua fa‘apea atu, “Iuta e ma ‘outou e nonofo i Ierusalema, fa‘alogologo mai ia ‘iā te a‘u. ‘Inā fa‘atuatua ia i le ALI‘I lo ‘outou Atua, ‘ona fa‘atumauina lea o ‘outou; ‘ia ‘outou fa‘atuatua i ana perofeta, ‘ona ‘outou manuia ai lea.”
Faitauga – Tusi Paia – 2 Nofoaiga Tupu 20:1-30
A’o ou faaiuina a’u faatalanoaga e uiga i asiasiga a le Alii i le asō, ou te fia ta’ua Isi tagata e tauala mai ai asiasiga a le Atoa, o faifeau a le Atua. I le 1 Samuelu 1:9-20 , sa iai Hana i Sailo e tatalo faatauanau, ma na auina atu e le Atua lana perofeta iā te ia. Sa na o le folafola lava e le perofeta o le Upu a le Atua, ona faamanuiaina lea o ia, i se pepe. I le 1 Samuelu 16:11-13 , na auina mai e le Atua se isi perofeta e asiasi ia Tavita ma faau’uina o ia e fai ma tupu. E lē gata i lea, i le 1 Tupu 19:15-21, ina ua oo i le taimi e faataunuuina ai e Elisaia le finagalo o le Atua, na auina mai e le Atua se perofeta, o Elia, ma lafo atu le ofu tele i ona luga.
So’o se taimi lava e auina atu ai e le Atua se tasi o ana faifeau ia te oe, talitonu i le feau o loo momoli atu. Ina ua folafola e Elisaia le upu a le Atua, ma faapea atu, o le a le toe i ai se oge i Samaria, o le a maua taumafa se tele, ma le taugofie. E le’i talitonu se tagata o le malo pe faapefea i se oge matautia na matua mafatia ai tagata e oo i fafine ua fasioti fanau e aai ai, ona suia i se aso se tasi.
Peitai, e leʻo tautala Elisaia ini ana upu; sa ia folafola le upu a le Atua, ma sa taunuu lava (2 Tupu 7: 1-16).
A auina atu e le Atua Lana upu e ala i ana faifeau, e mafaia soo se mea. O le lē talitonu o le Ofisa o le malo, o loo faʻamatalaina i le palakalafa i luga, na taofia ai lona maua o le vavega i le aso na sosoo ai. Na ia vaai i le vavega, ae na te lei maua ona sa ia tetee i le upu a le Atua (2 Tupu 7:17). Ou te tatalo ia e maua uma upu e auina mai e le Atua ia te oe e tauala i ana faifeau faatuatua, i le suafa o Iesu.
O le faitauga o le Tusi Paia o le asō, e te iloa ai ni atunuu se tolu ua tūtū faatasi e faasagatau ia Iosefatu ma tagata Iutaia. E mataʻutia le leaga o lea tulaga, ae e lei atuatuvale Iosefatu pe fefe, na ia faia se anapogi ma faamalosiau i tagata e anapogi ma ia. A o latou tatalo ma saʻili i fofoga o le Atua, na auina mai le upu mai i le Atua, e tauala mai ia Maretaelu, o le tasi o sa Levī. Na fetalai le Atua e malolo, aua e lē manaomia ona latou tauina le taua. Na ia faapea atu ia tutumau ma vaai atu i le olataga mai le Alii (2 Nofoaiga a Tupu 20: 14-17). A tatou mafaufau i ai, e valea le tūtū ae vaai atu ua siomia e ou fili. Peitaʻi, o Iosefatu ma tagata uma, na talitonu i afioga a le Atua ma perofeta na tauala atu ai.
Le au pele e, o le Upu a le Atua, e le mafai ona faamatalatalaina e se tagata, pe luiina e se tasi. O le Atua o ia o le Atua Silisiliese. A tuuina atu e se faifeau a le Atua, se Upu ia te oe, talitonu iai ma savali ai. Talitonu i perofeta a le Atua, ona e manuia lea ma faatumauina(2 Nofoaiga a Tupu 20:20). I le suafa o Iesu, Amene.
-
OPEN HEAVENS
MATALA LE LAGI MO LE ASO LULU 14 ME 2025
(tusia e Pastor EA Adeboye)
Manatu Autu: Asiasiga mai le Atua 2 (Divine visitation 2)
Tauloto -Tusi Paia–Faamasino 13:3 “Ua fa‘aali mai le agelu a le ALI‘I i le fafine, ‘ua fai mai ‘iā te ia, “Fa‘auta mai, o oe e pā, ‘e te le‘i fānau, o le a e tō ma e fānau se tama tane.”
Faitauga – Tusi Paia – Faamasino 13:2-3
Na amata ananafi le aoaoga pe a asiasi mai le Atua, ma na ou faapea atu e mafai e tagata ona maua se feiloaiga ma le Atua e ala i le Upu a le Atua. O le asō, o le a faaauau atu le aoaoga ma o le a ou faamatala ni auala e mafai ai e tagata faatuatua ona maua se asiasiga mai le Atua.
O loo taua i le Tusi Paia i le Eperu 1:13-14, o agelu o agaga e auina mai le Atua e aoao ma fesoasoani i tagata. E iai taimi a fia asiasi le Atua I lana fanau, e na te auina atu ana agelu e asiasi iai latou. Mo se faataitaiga, i le Faamasino 13:1-25, ina ua finagalo le Atua e logo Manoa ma lana avā o le a fanau mai iai laua Samasoni, na ia auina atu se agelu. E faapena foi i le Luka 1:8-20, ina ua finagalo le Atua e logo Sakaria o le a maua sona suli, na ia auina atu foi se agelu o se ave feau. E te ono fesili, “e faapefea ona ou iloa se agelu ua sau ia te a’u?”
E iai foi taimi, o le agelu e auina mai e le Atua o se tagata. Mo se faataitaiga, i le 2 Tupu 5:1-14, o le agelu na auina atu e le Atua ia Naamanu Ina ua oo i le taimi o se asiasiga mai le Atua o se auauna teine. O le teine na fai i lana avā e faapea, ‘ou te iloa le mea e maua ai e lo’u matai lona faamalologa’. E tele tala o tagata na faaaoga e le Atua e saunia nisi tagata mo le valaauina I o latou olaga. Ia auina vave atu e le Atua ia te oe nisi e fesoasoani Ina ia e ausia le faamoemoega o lou olaga, i le suafa o Iesu.
Le au pele e, e tatau ona e alofa i so’o se tasi e te lua feiloai. Aua foi e te lē iloa poo le agelu o le a auina atu e le Atua o se tagata. Fai mai le Eperu 13:2, “Aua le galo le alofa i tagata ‘ese; auā o lea ‘ua talia ai e isi o agelu ma le lē iloa.” E te manatu pe ana agaleaga le avā a Naamanu i le auauna fafine, semanū e leiloa pe oti Naamanu o se lepela. E iai nisi tagata ua latou tutuli ese agelu na auina atu e le Atua ona o latou amioga lē lelei, ‘aua e te faapei o latou. O loo faamanatu mai e le aposetolo o Paulo I le Kalatia 6:10 “O lenei, ‘ia tatou agalelei, ‘ia fa‘atatau i mea e tutupu i lea aso ma lea aso, i tagata uma lava, ‘ae maise i le ‘āiga o le fa‘atuatua.”
Le au pele e, e tatau ona e lelei i tagata uma, e aunoa ma le manatu i le atunuu e sau ai, lotu, tulaga i le tupe, tulaga i le nuu poo le matua, auā foi e te le leiloa poo ni agelu o loo auina mai ia te oe. O lou agalelei e ono tatalaina faitotoa o faamanuiaga faulai mo oe. Ou te tatalo e te faaalia lou agalelei i agelu a le Atua e auina atu ia te oe Ina ia e lē misia ai le asiasi mai o le Atua ia te oe. Ia e agalelei i tagata uma i le mafai e te mafai ai, i le suafa o Iesu, Amene.
-
OPEN HEAVENS
MATALA LE LAGI MO LE ASO LUA 13 ME 2025
(tusia e Pastor EA Adeboye)
Manatu Autu: Asiasiga mai le Atua 1 (Divine visitation 1)
Tauloto -Tusi Paia–Kenese 21:1 “Ua asiasi le ALI‘I ‘iā Sara e pei ‘ona ia fetalai mai, ‘ua faia fo‘i e le ALI‘I ‘iā Sara e pei ‘ona ia fetalai mai.”
Faitauga – Tusi Paia – Kenese 18:1-14
I le tatou tusi faitau o le aso, sa maua e Aperaamo se asiasiga mai le Atua na suia ma liliuina ai lona tala’aga mo le manuia. I ni tausaga se tele ae lei taunuu i lea taimi, sa fai e le Atua ni folafolaga ia te ia, ae sa ia fa’atalitali i le taimi e taunuu ai. O lona to’alua o Sara ua matua le toe iai se fa’amoemoe o le a taunuu. Peitai, ina ua tupu le asiasiga mai le Atua ona sosoo lea ma lona ‘ata’ata. Mo nai aso o loma nei, o le a ou faatalanoaina le asiasi mai o le Atua.
E tulaga ese ma uiga ‘ese le asiasiga fa’aleAtua na maua e Aperaamo. Fai mai le Tusi Pa’ia, na asiasi le Atua ia Aperaamo, ona sii ane lea o ona fofoga ma va’aia ni tamaloloa se to’atolu. Ou te talitonu o se tasi o ia tagata, o le Atua aua a e faitau mae’ae’a iai, e te mauaina ai o lo’o ta’ua le tasi o i latou o le “Alii” (Kenese 18 :13) O lona uiga e mafai e le Atua ona asia oe. Mo se faataitaiga, i le 2 Nofoaiaga Tupu 1:6-12 o le Atua lava sa fa’aali ia Solomona.
E te ono faapea ane: pe fa’apefea ona asiasi mai le Atua ia te a’u? I le tusi o Ioane 1:1, o loo faapea mai, “sa i le amataga le Upu, sa i le Atua le Upu, o le Atua foi o le Upu.” O le asiasiga faaleAtua ia te oe, e ono tauala mai I le Upu a le Atua. I le Salamo 107:2, o loo faapea mai sa auina mai e le Atua le Upu,ma faamalolo ia I latou, ma laveaiina ai nai lo latou malaia.” I le 1 Tupu 17: 2, fai mai le Atua na oo mai le Upu a le Atua ia Elia. I le 1 Tupu 18 :1 fai mai le Tusi Paia, na oo mai foi le Upu a le Atua ia Elia ma se faatonuga, “Aua ne’i toe ufiufia”. Ou te tatalo ia asiasi atu le Upu ia te oe i le aso, i le suafa o Iesu.
O nisi tagata sa tatalo, ma na faafofoga le Atua iai latou, peitai, o loo faatali le Atua ia latou suesu’e i latou Tusi Pa’ia, ina ia latou maua le Upu ua ia auina atu ia i latou, e maua ai o latou mana’oga ma fo’ia ai o latou faafitauli.
A auina mai e le Atua lana upu, e mulimuli mai ai faamalologa ma faasaolotoga, ma o mea uma sa foliga mai e le mafai ona tupu, o le a faafuase’ia ona mafaia. Po’o e silafia ua maea ona auina mai e le Atua lana Upu ia te oe ma o loo faapea mai lana Upu, o le a ia faaatoa mea uma e tusa ma le faulai o lona viiga, ia Keriso Iesu (Filipi 4:19)?
Le ‘au pele, e te le tau fa’atalia se sauniga toe fa’aolaola poo sauniga o vavega, e maua ai se feiloaiga ma le Atua. Ua maea ona auina mai e le Atua lana Upu ia te oe, e mafai ona e maua le pa’i atu o le Atua, pe a e suesueina itulau o le Tusi Pa’ia. O le mana a le Atua o loo tauave i lana Upu, ia e to’aga e faitau lana Upu ia faifaipea, e te lē misia le taimi e asiasia ai oe e le Atua, i le suafa o Iesu. E mafai ona e maua se asiasiga mai le Atua e ala i lou suesue i le Tusi Pa’ia ma le filigā, i le suafa o Iesu, Amene.
-
OPEN HEAVENS
MATALA LE LAGI MO LE ASO GAFUA 12 ME 2025
(tusia e Pastor EA Adeboye)
Manatu Autu: Mo lou lelei (For your good)
Tauloto -Tusi Paia–Roma 8:28 “Ua tatou iloa fo‘i e galue le Atua i mea uma lava mo le lelei fa‘atasi ma i latou o ē ‘ua alolofa atu ‘iā te ia, o ē ‘ua vala‘auina i lona finagalo.”
Faitauga – Tusi Paia – Salamo 112:1-10
I le Ieremia 1:5, na fetalai le Atua ia Ieremia, “Na a‘u iloa oe a o le‘i faia oe e a‘u i le manava” . E lē se tulaga lei fuafuaina lou fanau mai I lenei lalolagi, o lona uiga e lē faafuaseia foi la fuafuaga mo lou olaga. Afai lava o oe o se atalii poo se afafine o le Atua, o mea uma e tutupu ia te oe, pe lelei pe leaga, e galulue mea uma mo lou lelei, e pei ona tatou iloa i le faitauga o le Tusi Paia o le asō.
Afai e te manatu i mea uma ua faia e le Alii ina ia e latalata ia te ia, e te iloa ai e matuā lelei o ia. Talitonu mai, afai o loo e soifua pea I le asō, o lona uiga e lei maea le fuafuaga a le Atua mo lou olaga. Ae ete lei fanau mai, ua ia silafia mea uma e te ui ai ina ia faataunuuina le faamoemoega o lou olaga. O lona uiga, e malōlō lelei lou mafaufau aua o loo pulea e le Atua mea uma. O ona manatu ia te oe ia manuia, ‘ae lē o le malaia, e foa‘iina atu ‘iā te ‘outou le i‘uga e i ai le fa‘amoemoe (Ieremia 29:11).
E lei leva ona ou auai i le Ekalesia Redeemed Christian Church of God, na faailoa mai e le Atua ia te a’u o loo ou faatinoina le faamoemoega o lo’u olaga. Na ia matua faailoa mai, e ui e maualuga lo’u aaoaoina, e tatau ona ou mulimuli i se taitai faaleagaga e lei alu i se aoga. E iai le taimi na fautuaina a’u e le tagata na valaaulia au i le lotu ia suia seisi lotu ou te alu iai. Ina ua maea ma le manuia se tasi o polokalame tele a le Ekalesia na ou taitaia, na ia faapea mai, ‘o lenā ua iloa atu le vaega e te galue ai, e mafai loa ona e faia ae ou faatupeina, ta te lē toe manaomia lea lotu’. Peitai na ou ataata ma teena lana taumafai mai. E iai tagata na matuā faafaigataina lo’u olaga ona na ou filifili ou te tumau ma nofo pea i le Ekalesia lea. E tele avanoa na tatau ona ou alu ese ai ma le lotu, peitai sa tumau le alofa mutimutivale o le Atua, ma ua ia faailoa mai o loo ia faatulagaina a’u ina ia galulue mea uma mo lo’u lelei.
Le au pele e, e galulue mea uma mo lou lelei pe afai e te alofa I le Atua ma e tumau I lana fuafuaga. Peitai e le mafai ona e lē usitai ia te ia ma manatu o le a galulue mea uma mo lou lelei. E lē mafai ona e alu ese ma le nofoaga o loo faatonu oe e le Atua e te nofo ai, pe nofo foi i le nofoaga o loo faatonu oe e le Atua e te alu ese ai ma manatu e te fiafia ai i mea ua saunia e le Atua mo oe. Afai o loo e ola pea I le agasala, liliu i le Atua I le asō ma salamo. Tusa poo le a le faaletonu o taimi ua tuanai afai e te liliu ia te Ia, e faia e le Atua ia galulue mea uma mo lou lelei. E galulue mea uma mo le lelei o i latou e faamaopoopoina le faamoemoega o le Atua mo latou olaga, i le suafa o Iesu, Amene.
-
OPEN HEAVENS
MATALA LE LAGI MO LE ASO SA 11 ME 2025
(tusia e Pastor EA Adeboye)
Manatu Autu: Taimi a le Atua (God’s Timing).
Tauloto – Kenese 18:14''E i ai ‘ea se mea e faigatā i le ALI‘I? O ona pō ‘ua tu‘upoina ‘ou te toe fo‘i mai ai ‘iā te oe, i lelā tausaga, e maua mai ai e Sara, le tama tane.” Kenese 18:14
Faitauga - Tusi Paia: Genesis 21:1-2
O ala o le Atua e lelei atoatoa, ma e aofia ai ma lana taimi (2 Samuelu 22:31). I le Kenese 12:1-3, na folafola e le Atua iā Aperaamo, “E manuia fo’i ia te oe, o aiga uma o le lalolagi.” O le taimi lea e le’i i ai se fanau a Aperaamo, ma i le luasefulu lima (25) tausaga mulimuliane, e leai lava se mea na tupu. Peita’i o le tasi aso, a’o nofonofo Aperaamo i luma o lona faleie, ae o’o mai ai lona taimi filifilia. I le Galuega 2:1 fai mai le Tusi Paia, “. . . . ina ua o’o atu fo’i i le aso Penetekoso. . . .“ E lē faatuai pe vave mai fo’i le Atua i se minute se tasi. E faataunuuina e le Atua I lana taimi sa’o.
Le au Pele e, e I ai le taimi ua fuafuaina mo lau vavega. A o’o mai lea aso, atonu e lē iloa atu se tulaga ese pe faapitoa o tupu, peita’i e te lē misia lau vavega, e lē sopo loa ma oe. Atonu e fai a ou tiute masani i lea aso pei o Aperaamo, sa ia nofonofo i luma o lona faleie. Na o’o mai le taimi tofia o Mose a o i ai i tuafale o se toafa, o fai ona tiute leoleo mamoe (Esoto 3:1), ma na o’o mai le taimi o Peteru a o ia fa’atalitali i totonu o le afeafe aupitoaluga (Galuega 2). O Saulo o Tasesa na valaauina o ia a o malaga e fa’ao’o sauaga i tagata Kerisiano (Galuega 9).
Na o’u maua se perofetaga i le 1961 faapea o le a o’u faimalaga i atunuu e mamao mai lo’u atunuu e lē aunoa. O le vaitaimi lea, a ta’u le malaga i atunuu i fafo, o se tulaga ese i totonu o lo’u nu’u, ma o le taimi lea e o’o i le Setete o Lagos e tu ai le malae vaalele fa’avāomālō ou te le’i o’o i ai. Peita’i ina ua o’o i le taimi e amata faataunuuina ai le perofetaga, na sili atu na i loo mea na ou mafaufau ina. E lē gata i lea, ina ua avea a’u ma ta’ita’i aoao o le RCCG, sa o’u tuua lo’u toalua ma la’u fanau i Ilorin ae o’u nofo i se fale e tasi le potu moe i Mushin ( o se pitonuu mativa i totonu o Lagos). Sa ou mana’o e aumai lo’u aiga matou te nonofo faatasi, peita’i e lē mafai ona e la’ititi le fale. Sa o’u alu i le Atua i le tatalo ma faamatala i ai lu’itau sa o ma feagai. Sa ou fai i le Atua e fesoasoani mai ia te a’u ia maua so’u fale lelei. O le tali a le Atua, sa fa’ateia ai a’u. Na Ia fetalai, “Atali’i ua o’u manatu e fausia se aai mo oe.” Sa o’u tatalo mo se fale lapoa e ofi ai lo’u aiga a o lenei ua talanoa mai le Atua i le aai. O le asō, o le aai o le Togiola, o le tali ma le faataunuuina lea o le perofetaga. O ne’i perofetaga ma le tele o isi, sa foliga e lē mafai ona taunuu, i le taimi muamua na o’u faalogo ai i ai, peita’i ua faataunuuina e le Atua i lo’u olaga I lana lava taimi.
Le au pele e, afai na faia e le Atua ni folafolaga ia te oe, aua e te fa’avaivai pe afai e o’o mai i le taimi nei e lei taunuu. E lē pepelo le Atua; afai na Ia faia se folafolaga, e mautinoa na te faataunuuina (Numera 23:19). Faatali mo le taimi fuafuaina a le Atua. I le suafa o Iesu, Amene.
-
OPEN HEAVENS
MATALA LE LAGI MO LE ASO TOONAI 10 ME 2025
(tusia e Pastor EA Adeboye)
Manatu Autu: Vala’au a le Atua (God’s Call)
Tauloto – 1 Korinito 7:20 ''‘Ia ta‘itasi ma nofo pea i le mea ‘ua vala‘auina ai o ia’. 1 Korinito 7:20
Faitauga - Tusi Paia: 2 Nofoaiga Tupu 26:3-21
E talitonu le toatele, o le Atua, na o i latou e galulue i le laugaina o le Upu, na te valaauina - e lē sa’o lea manatu. Afai e valaau le Atua na o tagata e galulue mo Ia I le pulela’a, o lona uiga ua Ia tuua isi vaega taua o le soifuaga i le tiapolo. So’o se tagata kerisiano, e i ai lava le valaau a le Atua i se vaega o lona soifua. I le Tusi Paia, tatou te vaai ai i le valaauina e le Atua o tagata I totonu o le mālō. O Iosefa sa valaau e le Atua i le tulaga ta’ita’i, ma o lona usiusita’i na fa’asaoina ai ola o ona tagata (Kenese 45:7). O Tanielu sa tofia fo’i e le Atua e faasusulu atu ai lona malamalama i le mālō ifo i tupua, o Papelonia, ma na ia usitai. Sa auauna Tanielu i le tele o tupu ma faataunuu ai lona valaauina e faailoa le mana ma le mamalu auai o le Atua, e ala i ona tiute i totonu o le mālō (Tanielu 6:25-28). E faapenā fo’i Neemia, e le’i tofia o ia e avea ma ositaulaga, ae na valaauina na te toe fausia pa o Ierusalema, ma sa ia faia ma le loto olioli (Neemia 2:1-5). Sa galue Eseta i ona tiute i le maota o le mālō a o le’i valaauina e le Atua i le tulaga maualuga o le avea ma masiofo a le tupu (Eseta 2:16-17). O lona gaua’i i le Atua na laveaiina ai ola o le fanauga a Isaraelu ina ua taupulepule Hamanu lo latou fili e faaumatia i latou (Eseta 7).
E tofia fo’i e le Atua tagata e avea ma fai pisinisi. O Litia mai le nuu o Tuatira sa faatau ‘ie pauli, o se ie taugatā e laei ai tupu ma masiofo. Na o tagata mauoa e mafai ona gafatia le tau o ana oloa, ma na tuuina ia e le Atua i lea aai ia mafai ai ona fa’aaogāina ana oa mo le faalauteleina o le mālō o le Atua (Galuega 16:14).
E valaau e le Atua tagata e galulue i vaega eseese o le soifuaga. E te silafia le vaega ua Ia tofia oe e te galue ai? O tagata e nonofo pe o ese ma nofoaga na valaauina ai i latou, o le a leai se nofo filemu aua ua lē usiusita’i i le tofiga a le Atua i o latou olaga. I le 2 Nofoaiga Tupu 26:16-21; o loo faamatala mai ai e le Tusi Paia ia i tatou Usia le tupu o lē na mana’o i le galuega e le’i finagalo le Atua na te faia. Auā o ia o le tupu o Isaraelu, sa soifua fiafia i le alofa tunoa o le Atua ma ona manuia, seia o’o ina mana’o lona loto e fai le tofiga o le ositaulaga. Na alu Usia i totonu o le malumalu, e faamū ai mea manogi, ma na fo’i mai ua lepela, ma na faanofo esea. So’ose taimi e ola ai le tagata ma galue i galuega ma tofiga e le’i tofia ai e le Atua, e avea ai ma tagata nofo esea mai lona alofa tunoa ma lana foa’i.
Le au pele e, afai ua valaau le Atua ia te oe e te auauna iā te ia i so’ose vaega o le olaga, taula’i i le vaega ua tofia ai oe. Aua e te faatusa oe lava i isi tagata o loo ola manuia i isi vaega o le tovine. Usitai i le Atua ma lou loto atoa i lou tofiga ua valaau ai oe, ona e vaai lea ma iloa lona alofa tunoa faula’i, o lana foai ma lana tausiga ia te oe. I le suafa o Iesu, Amene.
-
OPEN HEAVENS
MATALA LE LAGI MO LE ASO FARAILE 9 ME 2025
(tusia e Pastor EA Adeboye)
Manatu Autu: Lou olaga atoa (Your lifetime)
Tauloto – Salamo 24:6 'O le tupulaga lenā e sā‘ili‘ili ‘iā te ia, o ē sā‘ili i fofoga o le Atua o Iakopo. Selā' Salāmo 24:6
Faitauga - Tusi Paia: Failauga 3:1-8
O le olaga atoa o se tagata, e aofia ai le taimi e amata mai i lona fanau mai seia o’o ina maliu. O le faitauga o le Tusi Paia o le asō o loo faapea mai e iai vaitau eseese I mea uma ma le taimi o soo se fuafuaga i lalo o le lagi. Ua tuuina mai fuafuaga mo tagata uma ao iai i le lalolagi nei, ma a mavae sina taimi, tusa pe na taunuu le fuafuaga mo lona olaga pe leai, ona oti lea. O le taimi a e te tuua ai lenei lalolagi, e amata mai ai seisi augatupulaga fou, ia ona faatino foi lea o le fuafuaga mo i latou e tusa ma le fuafuaga silisili a le Atua (Failauga 1:4). O le fesili, i lea vaitau e faatino ai lau pito laau, e iai se galuega lelei e te tuua I le lalolagi pe a mavae atu ou aso? E te faatinoina ea ia ausia lou taunuuga na fuafuaina pe na o lou faia lava o mea e masani ai?
Na mulimuli Tavita I le Atua ma le naunau tele, ua faaigoaina e le Atua “o le tagata e tusa ma lo‘u nei loto, na te faia o mea uma lava ‘ou te mana‘o i ai (Galuega 13:22). Leitioa soifua Tavita I se olaga e tautaua ona o mea lelei ma o loo faamauina o se tupu pito I maoae i Isaraelu e oo mai I le aso. O le isi alii o Metusela, na iloa o ia na o le aso na fanau ai ma le aso na maliu ai. O ia o le tagata pito I matua o loo faamauina i le Tusi Paia, ma e leai seisi mea o taua ai o ia ae na o le faamauina na iai ni ona atalii ma afafine (Kenese 5:25-27). Peitai o Enoka, na savavali ma le Atua ma na faitaulia lona olaga (Kenese 5:24). A savali se tagata ma le Atua ma faia lona finagalo e pei o Enoka ma Tavita, e faitauina le olaga o lea tagata. O le aafiaga lelei o le olaga o lea tagata o le a lagonaina ma iloa pea, tusa pe ua maliu ma alu atu i le lagi.
E saili e le Atua se tupulaga o tagata e matatau, alolofa ma mulimuli ia te ia ma o latou loto atoa. Na taua e Tavita lea augatupulaga, o le tupulaga lenā e sā‘ili‘ili ‘iā te ia, o ē sā‘ili i fofoga o le Atua (Salamo 24:6). Ao ou laitiiti, sa iai faleoloa o tagata e iai ni tamai avanoa i le faamalamalama e na o le lima e ofi ai. A fia faatau se tagata, e tuuina mai le lima o le faatauoloa e avatu le tupe ma aumai le oloa, e faaaoga ai le avanoa lea, a maea ona alu lea o le tagata. Peitai, a finau le tagata e fia vaai i le faatauoloa, ona faatoa tatala mai lea o le faitotoa e feiloa ai.
Le au pele e, e finagalo le Atua e te saili atu i ona fofoga ae lē na o faamanuiaga mai ona lima. Afai e ete manao e aoga lou olaga, aua e te faamuamua mea e te maua mai ia te ia, saili ona fofoga ina ia e maua o ia. Aua le na o le ole atu i le Atua mo mea e faamalie ai i tatou, ole atu e faaali atu ona fofoga ia te oe, aua a tilotilo atu le laolagi ia te oe, e latou te iloa ai le mamalu o le Atua (Esoto 34:28-35). Saili i fofoga o le Atua ma e soifua e tusa ma lona finagalo ina ia avea lou olaga e faitaulia i aafiaga lelei i le lalolagi nei, i le suafa o Iesu, Amene.
-
OPEN HEAVENS
MATALA LE LAGI MO LE ASO TOFI 08 ME 2025
(tusia e Pastor EA Adeboye)
Manatu Autu: Pe a finagalo le Atua e faamanuia (When God wants to bless )
Tauloto -Tusi Paia–Iopu 42:10“Ua uma ‘ona tatalo Iopu mo ana uō, ‘ona fa‘aa‘e ai lea e le ALI‘I o lana tāfeaga. ‘Ua toe ‘aumai fo‘i e le ALI‘I o mea ‘iā Iopu ‘ua fa‘ateleina, ‘ua lua mea i mea uma na mua‘i ‘iā te ia.”
Faitauga – Tusi Paia – Iopu 42:10-17
A finagalo le Atua e faamanuia I se tagata, e na te saunia mea uma ia manuia lea tagata. I le Iopu 1:8, na fai le Atua I le tiapolo poo ia mafaufau ea I lana auauna o Iopu. E ono manatu sa finagalo le Atua tau o lona viia o Iopu, peitai e oo atu i le iuga o le tala ia Iopu, e te silafia ai, sa saili e le Atua se auala e faamanuia ai ia te ia ia faaluaina mea uma na muai ia te ia e pei ona tusia i le Iopu 42:10 “Ua toe ‘aumai fo‘i e le ALI‘I o mea ‘iā Iopu ‘ua fa‘ateleina, ‘ua lua mea i mea uma na mua‘i ‘iā te ia.”
Na finagalo le Atua e faamanuia ia Iopu, peitai na finagalo e manumalo i se auala e faamaonia ai, e tatau ia te ia lea manuia.
I le Kenese 32:24-29, o loo tusia i le Tusi Paia na tuua toatasi Iakopo e tauivi ma se tagata seia tafa o ata o le taeao. Ina ua le mafai e le tamaloa (o lē sa fai ma sui o le Atua) ona faatoilalo ia te ia, na ia pa’i i le sui lapalapa o Iakopo, ona see lea o le faiga o le sui lapalapa. Sa fagatua pea Iakopo ma ia ae augani mai lea tagata e tuu ia e alu. Peitai na fai atu Iakopo e na te lē tuua o ia e alu seiloga e faamanuia atu ia te ia, ma na ia maua lava. O loo manino, o se tulaga na saunia e le Atua aua e le tatau ona mafai e Iakopo ona manumalo ia te ia. A finagalo le Atua e faamanuia ia te oe, e mafai ona ia faia mea e foliga mai e lē fetaui ma lou mafaufau faapea foi mafaufau o Isi tagata. Ou te tatalo mo oe i le asō, ia finagalo le Atua e faamanuia faapitoa ia te oe i lenei vaitau, i le suafa o Iesu.
Ina ua finagalo le Atua e faamanuia ia te a’u, na ia taitai ia te a’u i se Ekalesia laitiiti lava. I le taimi lea, o a’u e pito sili ona maualuga lo’u aoaoina i le aulotu , e laitiiti ma lē manaia le fale, ma e tele mafuaaga e tatau ai ona ou alu ese. O lo’u tamā faaleagaga e lei alu i se aoga, ao au e PhD lou faailoga. E foliga mai e na o le Ekalesia o loo manuia ona o loo ou auai ai, peitai o le mea moni, o a’u o loo manuia ai ona o loo ou iai i se mea o loo faatonu a’u e le Atua ou te nofo ai ina ia taunuu le faamoemoega mo lo’u olaga.
A finagalo le Atua e faamanuia ia te oe, o vaega uma e na te tuufaatasia e saunia ai lea faamanuiaga, e ono lē foliga mai o loo ia faia, peitai a e usitai ma galue ma ia, e uma ane le aso, o le a e fiafia i le faulai o ana faamanuiaga. A e naunau e gauai i ala ua ia saunia, e faaaogaina e le Atua avanoa uma e faamatagofie lou olaga i ana faamanuiaga, i le suafa o Iesu, Amene.
- Mostrar mais
