Episodes
-
OPEN HEAVENS
MATALA LE LAGI MO LE ASO TOFI 15 ME 2025
(tusia e Pastor EA Adeboye)
Manatu Autu: Asiasiga mai le Atua 3 (Divine visitation 3)
Tauloto -Tusi Paia–2 Nofoaiga Tupu 20:20 “Ua latou ala tula‘i i le taeao ma ō atu i le vao o Tikoa; o lo‘o ō atu i latou, ‘ona tu atu lea o Iosefatu, ‘ua fa‘apea atu, “Iuta e ma ‘outou e nonofo i Ierusalema, fa‘alogologo mai ia ‘iā te a‘u. ‘Inā fa‘atuatua ia i le ALI‘I lo ‘outou Atua, ‘ona fa‘atumauina lea o ‘outou; ‘ia ‘outou fa‘atuatua i ana perofeta, ‘ona ‘outou manuia ai lea.”
Faitauga – Tusi Paia – 2 Nofoaiga Tupu 20:1-30
A’o ou faaiuina a’u faatalanoaga e uiga i asiasiga a le Alii i le asō, ou te fia ta’ua Isi tagata e tauala mai ai asiasiga a le Atoa, o faifeau a le Atua. I le 1 Samuelu 1:9-20 , sa iai Hana i Sailo e tatalo faatauanau, ma na auina atu e le Atua lana perofeta iā te ia. Sa na o le folafola lava e le perofeta o le Upu a le Atua, ona faamanuiaina lea o ia, i se pepe. I le 1 Samuelu 16:11-13 , na auina mai e le Atua se isi perofeta e asiasi ia Tavita ma faau’uina o ia e fai ma tupu. E lē gata i lea, i le 1 Tupu 19:15-21, ina ua oo i le taimi e faataunuuina ai e Elisaia le finagalo o le Atua, na auina mai e le Atua se perofeta, o Elia, ma lafo atu le ofu tele i ona luga.
So’o se taimi lava e auina atu ai e le Atua se tasi o ana faifeau ia te oe, talitonu i le feau o loo momoli atu. Ina ua folafola e Elisaia le upu a le Atua, ma faapea atu, o le a le toe i ai se oge i Samaria, o le a maua taumafa se tele, ma le taugofie. E le’i talitonu se tagata o le malo pe faapefea i se oge matautia na matua mafatia ai tagata e oo i fafine ua fasioti fanau e aai ai, ona suia i se aso se tasi.
Peitai, e leʻo tautala Elisaia ini ana upu; sa ia folafola le upu a le Atua, ma sa taunuu lava (2 Tupu 7: 1-16).
A auina atu e le Atua Lana upu e ala i ana faifeau, e mafaia soo se mea. O le lē talitonu o le Ofisa o le malo, o loo faʻamatalaina i le palakalafa i luga, na taofia ai lona maua o le vavega i le aso na sosoo ai. Na ia vaai i le vavega, ae na te lei maua ona sa ia tetee i le upu a le Atua (2 Tupu 7:17). Ou te tatalo ia e maua uma upu e auina mai e le Atua ia te oe e tauala i ana faifeau faatuatua, i le suafa o Iesu.
O le faitauga o le Tusi Paia o le asō, e te iloa ai ni atunuu se tolu ua tūtū faatasi e faasagatau ia Iosefatu ma tagata Iutaia. E mataʻutia le leaga o lea tulaga, ae e lei atuatuvale Iosefatu pe fefe, na ia faia se anapogi ma faamalosiau i tagata e anapogi ma ia. A o latou tatalo ma saʻili i fofoga o le Atua, na auina mai le upu mai i le Atua, e tauala mai ia Maretaelu, o le tasi o sa Levī. Na fetalai le Atua e malolo, aua e lē manaomia ona latou tauina le taua. Na ia faapea atu ia tutumau ma vaai atu i le olataga mai le Alii (2 Nofoaiga a Tupu 20: 14-17). A tatou mafaufau i ai, e valea le tūtū ae vaai atu ua siomia e ou fili. Peitaʻi, o Iosefatu ma tagata uma, na talitonu i afioga a le Atua ma perofeta na tauala atu ai.
Le au pele e, o le Upu a le Atua, e le mafai ona faamatalatalaina e se tagata, pe luiina e se tasi. O le Atua o ia o le Atua Silisiliese. A tuuina atu e se faifeau a le Atua, se Upu ia te oe, talitonu iai ma savali ai. Talitonu i perofeta a le Atua, ona e manuia lea ma faatumauina(2 Nofoaiga a Tupu 20:20). I le suafa o Iesu, Amene.
-
OPEN HEAVENS
MATALA LE LAGI MO LE ASO LULU 14 ME 2025
(tusia e Pastor EA Adeboye)
Manatu Autu: Asiasiga mai le Atua 2 (Divine visitation 2)
Tauloto -Tusi Paia–Faamasino 13:3 “Ua fa‘aali mai le agelu a le ALI‘I i le fafine, ‘ua fai mai ‘iā te ia, “Fa‘auta mai, o oe e pā, ‘e te le‘i fānau, o le a e tō ma e fānau se tama tane.”
Faitauga – Tusi Paia – Faamasino 13:2-3
Na amata ananafi le aoaoga pe a asiasi mai le Atua, ma na ou faapea atu e mafai e tagata ona maua se feiloaiga ma le Atua e ala i le Upu a le Atua. O le asō, o le a faaauau atu le aoaoga ma o le a ou faamatala ni auala e mafai ai e tagata faatuatua ona maua se asiasiga mai le Atua.
O loo taua i le Tusi Paia i le Eperu 1:13-14, o agelu o agaga e auina mai le Atua e aoao ma fesoasoani i tagata. E iai taimi a fia asiasi le Atua I lana fanau, e na te auina atu ana agelu e asiasi iai latou. Mo se faataitaiga, i le Faamasino 13:1-25, ina ua finagalo le Atua e logo Manoa ma lana avā o le a fanau mai iai laua Samasoni, na ia auina atu se agelu. E faapena foi i le Luka 1:8-20, ina ua finagalo le Atua e logo Sakaria o le a maua sona suli, na ia auina atu foi se agelu o se ave feau. E te ono fesili, “e faapefea ona ou iloa se agelu ua sau ia te a’u?”
E iai foi taimi, o le agelu e auina mai e le Atua o se tagata. Mo se faataitaiga, i le 2 Tupu 5:1-14, o le agelu na auina atu e le Atua ia Naamanu Ina ua oo i le taimi o se asiasiga mai le Atua o se auauna teine. O le teine na fai i lana avā e faapea, ‘ou te iloa le mea e maua ai e lo’u matai lona faamalologa’. E tele tala o tagata na faaaoga e le Atua e saunia nisi tagata mo le valaauina I o latou olaga. Ia auina vave atu e le Atua ia te oe nisi e fesoasoani Ina ia e ausia le faamoemoega o lou olaga, i le suafa o Iesu.
Le au pele e, e tatau ona e alofa i so’o se tasi e te lua feiloai. Aua foi e te lē iloa poo le agelu o le a auina atu e le Atua o se tagata. Fai mai le Eperu 13:2, “Aua le galo le alofa i tagata ‘ese; auā o lea ‘ua talia ai e isi o agelu ma le lē iloa.” E te manatu pe ana agaleaga le avā a Naamanu i le auauna fafine, semanū e leiloa pe oti Naamanu o se lepela. E iai nisi tagata ua latou tutuli ese agelu na auina atu e le Atua ona o latou amioga lē lelei, ‘aua e te faapei o latou. O loo faamanatu mai e le aposetolo o Paulo I le Kalatia 6:10 “O lenei, ‘ia tatou agalelei, ‘ia fa‘atatau i mea e tutupu i lea aso ma lea aso, i tagata uma lava, ‘ae maise i le ‘āiga o le fa‘atuatua.”
Le au pele e, e tatau ona e lelei i tagata uma, e aunoa ma le manatu i le atunuu e sau ai, lotu, tulaga i le tupe, tulaga i le nuu poo le matua, auā foi e te le leiloa poo ni agelu o loo auina mai ia te oe. O lou agalelei e ono tatalaina faitotoa o faamanuiaga faulai mo oe. Ou te tatalo e te faaalia lou agalelei i agelu a le Atua e auina atu ia te oe Ina ia e lē misia ai le asiasi mai o le Atua ia te oe. Ia e agalelei i tagata uma i le mafai e te mafai ai, i le suafa o Iesu, Amene.
-
Missing episodes?
-
OPEN HEAVENS
MATALA LE LAGI MO LE ASO LUA 13 ME 2025
(tusia e Pastor EA Adeboye)
Manatu Autu: Asiasiga mai le Atua 1 (Divine visitation 1)
Tauloto -Tusi Paia–Kenese 21:1 “Ua asiasi le ALI‘I ‘iā Sara e pei ‘ona ia fetalai mai, ‘ua faia fo‘i e le ALI‘I ‘iā Sara e pei ‘ona ia fetalai mai.”
Faitauga – Tusi Paia – Kenese 18:1-14
I le tatou tusi faitau o le aso, sa maua e Aperaamo se asiasiga mai le Atua na suia ma liliuina ai lona tala’aga mo le manuia. I ni tausaga se tele ae lei taunuu i lea taimi, sa fai e le Atua ni folafolaga ia te ia, ae sa ia fa’atalitali i le taimi e taunuu ai. O lona to’alua o Sara ua matua le toe iai se fa’amoemoe o le a taunuu. Peitai, ina ua tupu le asiasiga mai le Atua ona sosoo lea ma lona ‘ata’ata. Mo nai aso o loma nei, o le a ou faatalanoaina le asiasi mai o le Atua.
E tulaga ese ma uiga ‘ese le asiasiga fa’aleAtua na maua e Aperaamo. Fai mai le Tusi Pa’ia, na asiasi le Atua ia Aperaamo, ona sii ane lea o ona fofoga ma va’aia ni tamaloloa se to’atolu. Ou te talitonu o se tasi o ia tagata, o le Atua aua a e faitau mae’ae’a iai, e te mauaina ai o lo’o ta’ua le tasi o i latou o le “Alii” (Kenese 18 :13) O lona uiga e mafai e le Atua ona asia oe. Mo se faataitaiga, i le 2 Nofoaiaga Tupu 1:6-12 o le Atua lava sa fa’aali ia Solomona.
E te ono faapea ane: pe fa’apefea ona asiasi mai le Atua ia te a’u? I le tusi o Ioane 1:1, o loo faapea mai, “sa i le amataga le Upu, sa i le Atua le Upu, o le Atua foi o le Upu.” O le asiasiga faaleAtua ia te oe, e ono tauala mai I le Upu a le Atua. I le Salamo 107:2, o loo faapea mai sa auina mai e le Atua le Upu,ma faamalolo ia I latou, ma laveaiina ai nai lo latou malaia.” I le 1 Tupu 17: 2, fai mai le Atua na oo mai le Upu a le Atua ia Elia. I le 1 Tupu 18 :1 fai mai le Tusi Paia, na oo mai foi le Upu a le Atua ia Elia ma se faatonuga, “Aua ne’i toe ufiufia”. Ou te tatalo ia asiasi atu le Upu ia te oe i le aso, i le suafa o Iesu.
O nisi tagata sa tatalo, ma na faafofoga le Atua iai latou, peitai, o loo faatali le Atua ia latou suesu’e i latou Tusi Pa’ia, ina ia latou maua le Upu ua ia auina atu ia i latou, e maua ai o latou mana’oga ma fo’ia ai o latou faafitauli.
A auina mai e le Atua lana upu, e mulimuli mai ai faamalologa ma faasaolotoga, ma o mea uma sa foliga mai e le mafai ona tupu, o le a faafuase’ia ona mafaia. Po’o e silafia ua maea ona auina mai e le Atua lana Upu ia te oe ma o loo faapea mai lana Upu, o le a ia faaatoa mea uma e tusa ma le faulai o lona viiga, ia Keriso Iesu (Filipi 4:19)?
Le ‘au pele, e te le tau fa’atalia se sauniga toe fa’aolaola poo sauniga o vavega, e maua ai se feiloaiga ma le Atua. Ua maea ona auina mai e le Atua lana Upu ia te oe, e mafai ona e maua le pa’i atu o le Atua, pe a e suesueina itulau o le Tusi Pa’ia. O le mana a le Atua o loo tauave i lana Upu, ia e to’aga e faitau lana Upu ia faifaipea, e te lē misia le taimi e asiasia ai oe e le Atua, i le suafa o Iesu. E mafai ona e maua se asiasiga mai le Atua e ala i lou suesue i le Tusi Pa’ia ma le filigā, i le suafa o Iesu, Amene.
-
OPEN HEAVENS
MATALA LE LAGI MO LE ASO GAFUA 12 ME 2025
(tusia e Pastor EA Adeboye)
Manatu Autu: Mo lou lelei (For your good)
Tauloto -Tusi Paia–Roma 8:28 “Ua tatou iloa fo‘i e galue le Atua i mea uma lava mo le lelei fa‘atasi ma i latou o ē ‘ua alolofa atu ‘iā te ia, o ē ‘ua vala‘auina i lona finagalo.”
Faitauga – Tusi Paia – Salamo 112:1-10
I le Ieremia 1:5, na fetalai le Atua ia Ieremia, “Na a‘u iloa oe a o le‘i faia oe e a‘u i le manava” . E lē se tulaga lei fuafuaina lou fanau mai I lenei lalolagi, o lona uiga e lē faafuaseia foi la fuafuaga mo lou olaga. Afai lava o oe o se atalii poo se afafine o le Atua, o mea uma e tutupu ia te oe, pe lelei pe leaga, e galulue mea uma mo lou lelei, e pei ona tatou iloa i le faitauga o le Tusi Paia o le asō.
Afai e te manatu i mea uma ua faia e le Alii ina ia e latalata ia te ia, e te iloa ai e matuā lelei o ia. Talitonu mai, afai o loo e soifua pea I le asō, o lona uiga e lei maea le fuafuaga a le Atua mo lou olaga. Ae ete lei fanau mai, ua ia silafia mea uma e te ui ai ina ia faataunuuina le faamoemoega o lou olaga. O lona uiga, e malōlō lelei lou mafaufau aua o loo pulea e le Atua mea uma. O ona manatu ia te oe ia manuia, ‘ae lē o le malaia, e foa‘iina atu ‘iā te ‘outou le i‘uga e i ai le fa‘amoemoe (Ieremia 29:11).
E lei leva ona ou auai i le Ekalesia Redeemed Christian Church of God, na faailoa mai e le Atua ia te a’u o loo ou faatinoina le faamoemoega o lo’u olaga. Na ia matua faailoa mai, e ui e maualuga lo’u aaoaoina, e tatau ona ou mulimuli i se taitai faaleagaga e lei alu i se aoga. E iai le taimi na fautuaina a’u e le tagata na valaaulia au i le lotu ia suia seisi lotu ou te alu iai. Ina ua maea ma le manuia se tasi o polokalame tele a le Ekalesia na ou taitaia, na ia faapea mai, ‘o lenā ua iloa atu le vaega e te galue ai, e mafai loa ona e faia ae ou faatupeina, ta te lē toe manaomia lea lotu’. Peitai na ou ataata ma teena lana taumafai mai. E iai tagata na matuā faafaigataina lo’u olaga ona na ou filifili ou te tumau ma nofo pea i le Ekalesia lea. E tele avanoa na tatau ona ou alu ese ai ma le lotu, peitai sa tumau le alofa mutimutivale o le Atua, ma ua ia faailoa mai o loo ia faatulagaina a’u ina ia galulue mea uma mo lo’u lelei.
Le au pele e, e galulue mea uma mo lou lelei pe afai e te alofa I le Atua ma e tumau I lana fuafuaga. Peitai e le mafai ona e lē usitai ia te ia ma manatu o le a galulue mea uma mo lou lelei. E lē mafai ona e alu ese ma le nofoaga o loo faatonu oe e le Atua e te nofo ai, pe nofo foi i le nofoaga o loo faatonu oe e le Atua e te alu ese ai ma manatu e te fiafia ai i mea ua saunia e le Atua mo oe. Afai o loo e ola pea I le agasala, liliu i le Atua I le asō ma salamo. Tusa poo le a le faaletonu o taimi ua tuanai afai e te liliu ia te Ia, e faia e le Atua ia galulue mea uma mo lou lelei. E galulue mea uma mo le lelei o i latou e faamaopoopoina le faamoemoega o le Atua mo latou olaga, i le suafa o Iesu, Amene.
-
OPEN HEAVENS
MATALA LE LAGI MO LE ASO SA 11 ME 2025
(tusia e Pastor EA Adeboye)
Manatu Autu: Taimi a le Atua (God’s Timing).
Tauloto – Kenese 18:14''E i ai ‘ea se mea e faigatā i le ALI‘I? O ona pō ‘ua tu‘upoina ‘ou te toe fo‘i mai ai ‘iā te oe, i lelā tausaga, e maua mai ai e Sara, le tama tane.” Kenese 18:14
Faitauga - Tusi Paia: Genesis 21:1-2
O ala o le Atua e lelei atoatoa, ma e aofia ai ma lana taimi (2 Samuelu 22:31). I le Kenese 12:1-3, na folafola e le Atua iā Aperaamo, “E manuia fo’i ia te oe, o aiga uma o le lalolagi.” O le taimi lea e le’i i ai se fanau a Aperaamo, ma i le luasefulu lima (25) tausaga mulimuliane, e leai lava se mea na tupu. Peita’i o le tasi aso, a’o nofonofo Aperaamo i luma o lona faleie, ae o’o mai ai lona taimi filifilia. I le Galuega 2:1 fai mai le Tusi Paia, “. . . . ina ua o’o atu fo’i i le aso Penetekoso. . . .“ E lē faatuai pe vave mai fo’i le Atua i se minute se tasi. E faataunuuina e le Atua I lana taimi sa’o.
Le au Pele e, e I ai le taimi ua fuafuaina mo lau vavega. A o’o mai lea aso, atonu e lē iloa atu se tulaga ese pe faapitoa o tupu, peita’i e te lē misia lau vavega, e lē sopo loa ma oe. Atonu e fai a ou tiute masani i lea aso pei o Aperaamo, sa ia nofonofo i luma o lona faleie. Na o’o mai le taimi tofia o Mose a o i ai i tuafale o se toafa, o fai ona tiute leoleo mamoe (Esoto 3:1), ma na o’o mai le taimi o Peteru a o ia fa’atalitali i totonu o le afeafe aupitoaluga (Galuega 2). O Saulo o Tasesa na valaauina o ia a o malaga e fa’ao’o sauaga i tagata Kerisiano (Galuega 9).
Na o’u maua se perofetaga i le 1961 faapea o le a o’u faimalaga i atunuu e mamao mai lo’u atunuu e lē aunoa. O le vaitaimi lea, a ta’u le malaga i atunuu i fafo, o se tulaga ese i totonu o lo’u nu’u, ma o le taimi lea e o’o i le Setete o Lagos e tu ai le malae vaalele fa’avāomālō ou te le’i o’o i ai. Peita’i ina ua o’o i le taimi e amata faataunuuina ai le perofetaga, na sili atu na i loo mea na ou mafaufau ina. E lē gata i lea, ina ua avea a’u ma ta’ita’i aoao o le RCCG, sa o’u tuua lo’u toalua ma la’u fanau i Ilorin ae o’u nofo i se fale e tasi le potu moe i Mushin ( o se pitonuu mativa i totonu o Lagos). Sa ou mana’o e aumai lo’u aiga matou te nonofo faatasi, peita’i e lē mafai ona e la’ititi le fale. Sa o’u alu i le Atua i le tatalo ma faamatala i ai lu’itau sa o ma feagai. Sa ou fai i le Atua e fesoasoani mai ia te a’u ia maua so’u fale lelei. O le tali a le Atua, sa fa’ateia ai a’u. Na Ia fetalai, “Atali’i ua o’u manatu e fausia se aai mo oe.” Sa o’u tatalo mo se fale lapoa e ofi ai lo’u aiga a o lenei ua talanoa mai le Atua i le aai. O le asō, o le aai o le Togiola, o le tali ma le faataunuuina lea o le perofetaga. O ne’i perofetaga ma le tele o isi, sa foliga e lē mafai ona taunuu, i le taimi muamua na o’u faalogo ai i ai, peita’i ua faataunuuina e le Atua i lo’u olaga I lana lava taimi.
Le au pele e, afai na faia e le Atua ni folafolaga ia te oe, aua e te fa’avaivai pe afai e o’o mai i le taimi nei e lei taunuu. E lē pepelo le Atua; afai na Ia faia se folafolaga, e mautinoa na te faataunuuina (Numera 23:19). Faatali mo le taimi fuafuaina a le Atua. I le suafa o Iesu, Amene.
-
OPEN HEAVENS
MATALA LE LAGI MO LE ASO TOONAI 10 ME 2025
(tusia e Pastor EA Adeboye)
Manatu Autu: Vala’au a le Atua (God’s Call)
Tauloto – 1 Korinito 7:20 ''‘Ia ta‘itasi ma nofo pea i le mea ‘ua vala‘auina ai o ia’. 1 Korinito 7:20
Faitauga - Tusi Paia: 2 Nofoaiga Tupu 26:3-21
E talitonu le toatele, o le Atua, na o i latou e galulue i le laugaina o le Upu, na te valaauina - e lē sa’o lea manatu. Afai e valaau le Atua na o tagata e galulue mo Ia I le pulela’a, o lona uiga ua Ia tuua isi vaega taua o le soifuaga i le tiapolo. So’o se tagata kerisiano, e i ai lava le valaau a le Atua i se vaega o lona soifua. I le Tusi Paia, tatou te vaai ai i le valaauina e le Atua o tagata I totonu o le mālō. O Iosefa sa valaau e le Atua i le tulaga ta’ita’i, ma o lona usiusita’i na fa’asaoina ai ola o ona tagata (Kenese 45:7). O Tanielu sa tofia fo’i e le Atua e faasusulu atu ai lona malamalama i le mālō ifo i tupua, o Papelonia, ma na ia usitai. Sa auauna Tanielu i le tele o tupu ma faataunuu ai lona valaauina e faailoa le mana ma le mamalu auai o le Atua, e ala i ona tiute i totonu o le mālō (Tanielu 6:25-28). E faapenā fo’i Neemia, e le’i tofia o ia e avea ma ositaulaga, ae na valaauina na te toe fausia pa o Ierusalema, ma sa ia faia ma le loto olioli (Neemia 2:1-5). Sa galue Eseta i ona tiute i le maota o le mālō a o le’i valaauina e le Atua i le tulaga maualuga o le avea ma masiofo a le tupu (Eseta 2:16-17). O lona gaua’i i le Atua na laveaiina ai ola o le fanauga a Isaraelu ina ua taupulepule Hamanu lo latou fili e faaumatia i latou (Eseta 7).
E tofia fo’i e le Atua tagata e avea ma fai pisinisi. O Litia mai le nuu o Tuatira sa faatau ‘ie pauli, o se ie taugatā e laei ai tupu ma masiofo. Na o tagata mauoa e mafai ona gafatia le tau o ana oloa, ma na tuuina ia e le Atua i lea aai ia mafai ai ona fa’aaogāina ana oa mo le faalauteleina o le mālō o le Atua (Galuega 16:14).
E valaau e le Atua tagata e galulue i vaega eseese o le soifuaga. E te silafia le vaega ua Ia tofia oe e te galue ai? O tagata e nonofo pe o ese ma nofoaga na valaauina ai i latou, o le a leai se nofo filemu aua ua lē usiusita’i i le tofiga a le Atua i o latou olaga. I le 2 Nofoaiga Tupu 26:16-21; o loo faamatala mai ai e le Tusi Paia ia i tatou Usia le tupu o lē na mana’o i le galuega e le’i finagalo le Atua na te faia. Auā o ia o le tupu o Isaraelu, sa soifua fiafia i le alofa tunoa o le Atua ma ona manuia, seia o’o ina mana’o lona loto e fai le tofiga o le ositaulaga. Na alu Usia i totonu o le malumalu, e faamū ai mea manogi, ma na fo’i mai ua lepela, ma na faanofo esea. So’ose taimi e ola ai le tagata ma galue i galuega ma tofiga e le’i tofia ai e le Atua, e avea ai ma tagata nofo esea mai lona alofa tunoa ma lana foa’i.
Le au pele e, afai ua valaau le Atua ia te oe e te auauna iā te ia i so’ose vaega o le olaga, taula’i i le vaega ua tofia ai oe. Aua e te faatusa oe lava i isi tagata o loo ola manuia i isi vaega o le tovine. Usitai i le Atua ma lou loto atoa i lou tofiga ua valaau ai oe, ona e vaai lea ma iloa lona alofa tunoa faula’i, o lana foai ma lana tausiga ia te oe. I le suafa o Iesu, Amene.
-
OPEN HEAVENS
MATALA LE LAGI MO LE ASO FARAILE 9 ME 2025
(tusia e Pastor EA Adeboye)
Manatu Autu: Lou olaga atoa (Your lifetime)
Tauloto – Salamo 24:6 'O le tupulaga lenā e sā‘ili‘ili ‘iā te ia, o ē sā‘ili i fofoga o le Atua o Iakopo. Selā' Salāmo 24:6
Faitauga - Tusi Paia: Failauga 3:1-8
O le olaga atoa o se tagata, e aofia ai le taimi e amata mai i lona fanau mai seia o’o ina maliu. O le faitauga o le Tusi Paia o le asō o loo faapea mai e iai vaitau eseese I mea uma ma le taimi o soo se fuafuaga i lalo o le lagi. Ua tuuina mai fuafuaga mo tagata uma ao iai i le lalolagi nei, ma a mavae sina taimi, tusa pe na taunuu le fuafuaga mo lona olaga pe leai, ona oti lea. O le taimi a e te tuua ai lenei lalolagi, e amata mai ai seisi augatupulaga fou, ia ona faatino foi lea o le fuafuaga mo i latou e tusa ma le fuafuaga silisili a le Atua (Failauga 1:4). O le fesili, i lea vaitau e faatino ai lau pito laau, e iai se galuega lelei e te tuua I le lalolagi pe a mavae atu ou aso? E te faatinoina ea ia ausia lou taunuuga na fuafuaina pe na o lou faia lava o mea e masani ai?
Na mulimuli Tavita I le Atua ma le naunau tele, ua faaigoaina e le Atua “o le tagata e tusa ma lo‘u nei loto, na te faia o mea uma lava ‘ou te mana‘o i ai (Galuega 13:22). Leitioa soifua Tavita I se olaga e tautaua ona o mea lelei ma o loo faamauina o se tupu pito I maoae i Isaraelu e oo mai I le aso. O le isi alii o Metusela, na iloa o ia na o le aso na fanau ai ma le aso na maliu ai. O ia o le tagata pito I matua o loo faamauina i le Tusi Paia, ma e leai seisi mea o taua ai o ia ae na o le faamauina na iai ni ona atalii ma afafine (Kenese 5:25-27). Peitai o Enoka, na savavali ma le Atua ma na faitaulia lona olaga (Kenese 5:24). A savali se tagata ma le Atua ma faia lona finagalo e pei o Enoka ma Tavita, e faitauina le olaga o lea tagata. O le aafiaga lelei o le olaga o lea tagata o le a lagonaina ma iloa pea, tusa pe ua maliu ma alu atu i le lagi.
E saili e le Atua se tupulaga o tagata e matatau, alolofa ma mulimuli ia te ia ma o latou loto atoa. Na taua e Tavita lea augatupulaga, o le tupulaga lenā e sā‘ili‘ili ‘iā te ia, o ē sā‘ili i fofoga o le Atua (Salamo 24:6). Ao ou laitiiti, sa iai faleoloa o tagata e iai ni tamai avanoa i le faamalamalama e na o le lima e ofi ai. A fia faatau se tagata, e tuuina mai le lima o le faatauoloa e avatu le tupe ma aumai le oloa, e faaaoga ai le avanoa lea, a maea ona alu lea o le tagata. Peitai, a finau le tagata e fia vaai i le faatauoloa, ona faatoa tatala mai lea o le faitotoa e feiloa ai.
Le au pele e, e finagalo le Atua e te saili atu i ona fofoga ae lē na o faamanuiaga mai ona lima. Afai e ete manao e aoga lou olaga, aua e te faamuamua mea e te maua mai ia te ia, saili ona fofoga ina ia e maua o ia. Aua le na o le ole atu i le Atua mo mea e faamalie ai i tatou, ole atu e faaali atu ona fofoga ia te oe, aua a tilotilo atu le laolagi ia te oe, e latou te iloa ai le mamalu o le Atua (Esoto 34:28-35). Saili i fofoga o le Atua ma e soifua e tusa ma lona finagalo ina ia avea lou olaga e faitaulia i aafiaga lelei i le lalolagi nei, i le suafa o Iesu, Amene.
-
OPEN HEAVENS
MATALA LE LAGI MO LE ASO TOFI 08 ME 2025
(tusia e Pastor EA Adeboye)
Manatu Autu: Pe a finagalo le Atua e faamanuia (When God wants to bless )
Tauloto -Tusi Paia–Iopu 42:10“Ua uma ‘ona tatalo Iopu mo ana uō, ‘ona fa‘aa‘e ai lea e le ALI‘I o lana tāfeaga. ‘Ua toe ‘aumai fo‘i e le ALI‘I o mea ‘iā Iopu ‘ua fa‘ateleina, ‘ua lua mea i mea uma na mua‘i ‘iā te ia.”
Faitauga – Tusi Paia – Iopu 42:10-17
A finagalo le Atua e faamanuia I se tagata, e na te saunia mea uma ia manuia lea tagata. I le Iopu 1:8, na fai le Atua I le tiapolo poo ia mafaufau ea I lana auauna o Iopu. E ono manatu sa finagalo le Atua tau o lona viia o Iopu, peitai e oo atu i le iuga o le tala ia Iopu, e te silafia ai, sa saili e le Atua se auala e faamanuia ai ia te ia ia faaluaina mea uma na muai ia te ia e pei ona tusia i le Iopu 42:10 “Ua toe ‘aumai fo‘i e le ALI‘I o mea ‘iā Iopu ‘ua fa‘ateleina, ‘ua lua mea i mea uma na mua‘i ‘iā te ia.”
Na finagalo le Atua e faamanuia ia Iopu, peitai na finagalo e manumalo i se auala e faamaonia ai, e tatau ia te ia lea manuia.
I le Kenese 32:24-29, o loo tusia i le Tusi Paia na tuua toatasi Iakopo e tauivi ma se tagata seia tafa o ata o le taeao. Ina ua le mafai e le tamaloa (o lē sa fai ma sui o le Atua) ona faatoilalo ia te ia, na ia pa’i i le sui lapalapa o Iakopo, ona see lea o le faiga o le sui lapalapa. Sa fagatua pea Iakopo ma ia ae augani mai lea tagata e tuu ia e alu. Peitai na fai atu Iakopo e na te lē tuua o ia e alu seiloga e faamanuia atu ia te ia, ma na ia maua lava. O loo manino, o se tulaga na saunia e le Atua aua e le tatau ona mafai e Iakopo ona manumalo ia te ia. A finagalo le Atua e faamanuia ia te oe, e mafai ona ia faia mea e foliga mai e lē fetaui ma lou mafaufau faapea foi mafaufau o Isi tagata. Ou te tatalo mo oe i le asō, ia finagalo le Atua e faamanuia faapitoa ia te oe i lenei vaitau, i le suafa o Iesu.
Ina ua finagalo le Atua e faamanuia ia te a’u, na ia taitai ia te a’u i se Ekalesia laitiiti lava. I le taimi lea, o a’u e pito sili ona maualuga lo’u aoaoina i le aulotu , e laitiiti ma lē manaia le fale, ma e tele mafuaaga e tatau ai ona ou alu ese. O lo’u tamā faaleagaga e lei alu i se aoga, ao au e PhD lou faailoga. E foliga mai e na o le Ekalesia o loo manuia ona o loo ou auai ai, peitai o le mea moni, o a’u o loo manuia ai ona o loo ou iai i se mea o loo faatonu a’u e le Atua ou te nofo ai ina ia taunuu le faamoemoega mo lo’u olaga.
A finagalo le Atua e faamanuia ia te oe, o vaega uma e na te tuufaatasia e saunia ai lea faamanuiaga, e ono lē foliga mai o loo ia faia, peitai a e usitai ma galue ma ia, e uma ane le aso, o le a e fiafia i le faulai o ana faamanuiaga. A e naunau e gauai i ala ua ia saunia, e faaaogaina e le Atua avanoa uma e faamatagofie lou olaga i ana faamanuiaga, i le suafa o Iesu, Amene.
-
OPEN HEAVENS
MATALA LE LAGI MO LE ASO LULU 07 ME 2025
(tusia e Pastor EA Adeboye)
Manatu Autu: E mafai ona ia suia (He can change it )
Tauloto -Tusi Paia–Efeso 1:11“O ia lava ‘ua matou maua ai le tofi, o i matou na tofia anamua, e tusa ma le finagalo o lē ‘ua matuā galue i mea uma lava, e tusa ma le pule a lona finagalo;”
Faitauga – Tusi Paia – Ieremia 18:1-6
I aso e tolu talu ai, sa ou talanoa atu i mea uma i le lalolagi e galulue e tusa ma fuafuaga a le Atua, ma o tatou uma, o loo iai I totonu o lenei tala. Aua o le Atua o le tusitala o lenei tala, e mafai ona ia suia nisi o vaega o le tala e pei o tagata, o mea e tutupu, o le aafiaga ma mea faapena ina ia fetaui ma le vaai mamao i le lumanai. Mo se faataitaiga, i le 1 Samuelu 2:30 na ia fai ia Eli, “O le mea lea ‘ua fetalai mai ai le ALI‘I le Atua o Isaraelu: ‘Na ‘ou fai atu lava i lou ‘āiga ma le ‘āiga o lou tamā latou te feoa‘i i o‘u luma e fa‘avavau;’ a o lenei, ‘ua fetalai mai le ALI‘I, ‘‘Ia mamao lea mea ‘iā te a‘u, . O le faataitaiga tonu lea o le suia e le Atua o tagata e faaaogaina e faataunuuina lana fuafuaga mamao. O le Atua o le Tusitala ma le faatonu o le tala o lou olaga, ma o le vave ona lafoai o lou ola ia te ia o le lelei foi lea mo oe. Ou te tatalo ia aua nei e faia se mea e suia ai le finagalo o le Atua e tusa ma le fuafuaga lelei mo lou olaga.
I Lona tulaga faatonu o lou olaga, e mafai e le Atua ona suia vaega o lou olaga e lē o ō gatasi ma le fuafuaga o lou olaga. I le faitauga o le Tusi Paia o le asō, na fetalai le Atua ia Ieremia e alu i le fale o lē faiipu omea ona ia fetalai mai lea I lea nofoaga. Ana o a’u o Ieremia ou te faapea atu, ‘Tamā, a lea ta te talanoa, faaauau pea le ta talanoaga iinei’. Faafetai o Ieremia o se tagata usitai, ae pei ona ou taua i aoaoga faatoa uma atu nei, o le usiusitai e te tumau ai i le ogaototonu o le finagalo o le Atua. Na vave ona tulai Ieremia ma alu i le fale o le fai ipu omea, ma na fetaui ai ma le fai ipu omea o loo galue i le fausiaina o se ipu. Ao matamata iai Ieremia, na faaleagaina le ipu i lima o le fai ipu omea, ma è lei tiaieseina, na toe faaaoga e le fai ipu omea e faia ai seisi ipu. Ina ua maea, e lei foliga mai o se ipu na faaleagaina muamua. Fai mai le Ieremia 18:4
“‘Ua leaga le ipu na ia faia i le ‘omea i le lima o le fai ipu ‘omea; ‘ona toe fai ai lea e ia o le tasi ipu e tusa ma le manatu o le fai ipu ‘omea ‘ona fai.” Ieremia 18:4
Le au pele e, e mafai e le Atua ona suia vaega o lou olaga lena ua faaleagaina pe afai e te lafoai lou ola ia te ia. E mafai ona ia toe fausia oe i seisi ipu e fetaui lelei ma lana uluai fuafuaga faavae mo lou olaga. Aua e te lafoai folafolaga a le Atua ua ia faia ia te oe poo se ata foi ua e iloa o lou lumanai matagofie ona o ni mea leaga ua tutupu poo ni mea sesē I taimi ua tuanai. E mafai ona ia suia mea uma ma faia lou olaga o se tala matagofie ona o lona alofa tunoa, na o le tuu lava o lou faatuatua ia te ia.
Tatalo
Tamā, ou te tuuina atu lo’u ola ia te oe. Ia fai au ma ipu e fetaui lelei ma au fuafuaga ma lou finagalo, i le suafa o Iesu, Amene.
-
OPEN HEAVENS
MATALA LE LAGI MO LE ASO LUA 6 ME 2025
(tusia e Pastor EA Adeboye)
Manatu Autu: Molī, Meapu’eata, Faatino 3 (Lights, Camera, Action 3)
Tauloto -Tusi Paia–Salamo 33:11 “E tu le pule a le ALI‘I e o‘o i le fa‘avavau; o mafaufauga a lona finagalo e a le tu a le tu lava.”
Faitauga – Tusi Paia – Kenese 50:16-20
A o faai’u atu le a’oa’oga na ou amataina i le lua aso talu ai, ou te naunau ia e mata’ituina lelei le tauloto o le aso. E ta’u mai ai o mafaufauga o lona finagalo e tumau e faavavau. E atagia ai, e tusa poo a ni faiga e taumafai iai se tagata, e le suia ai le fuafuaga a le Atua mo lou soifua. Fai mai le Isaia 46:10: “….. E tu la’u pule, ou te faia foi mea uma ou te loto i ai.”
A oo i taimi ua tutupu mai ni mea e foliga mai ua le ō gatasi ma fuafuaga a le Atua mo lou soifua, aua le atugalu, fa’atuatua i le Atua ma ia e loto tele, na te mafai ona fa’agalulue mea uma, mo lou lelei.
O se faataitaiga, i le Tusi Pa’ia sa faaalia e le Atua ia Iosefa se vaega o lana fuafuaga mo ia i ni miti se lua (Kenese 37:5-9). Ae peitai, sa le gūgū Iosefa, a ua alu atu ma fa’amatala ana miti i ona uso ma ona matua. Ona feitai lea o ona uso ma latou faatauina atu Iosefa e avea ma pologa. Sa latou manatu ua latou fa’aumatia ia te ia, a ua latou le silafia, ua latou fesoasoani e fa’ataunuuina le fuafuaga a le Atua mo ia. Ina ua auina atu Iosefa i le maota a Potifara ,ona tupu ai lea o le isi mala, ma ua i’u ina falepuipui ai. E le taumate, i lena taimi, ua ataata le ti’apolo ma fa’atauemu iai faapea:
“O fea la ua o’o iai au miti tetele?” Peita’i, e lē taitai ona lē fa’ataunuina e le Atua lana Upu. E mataala o ia e fa’ataunu’uina vave lana upu. (Ieremia 1:12). O le telē o se luitau, o le telē foi lea o le fa’aalia o lona mana matautia.
Sa tapena e le Atua se lumanai maoa’e mo Tavita, a o le taimi sa pa’i ai le suau’u i lona ulu ma ua fa’au’u e avea ma tupu, ua matua sasao loa le tele o mea mata’utia ona leaga. Sa avea Tavita o se tagata sulufai solo mo le 13 tausaga, sa solasola ma saili solo ni mea e lafi ai. I Salamo a Tavita, sa ia fa’amauina ai ona lagona mai lea vai tausaga i le isi. (Salamo 88:15, Salamo 25:16). Ae peitai e ui i le tele o mea sa feagai ma ia, o ia lava o le Tupu o Isaraelu sa faau’uina e le Atua. Ou te mautinoa o le mafua’ga lena o lana tala, “E tala lava mea leaga e oo i le ua amiotonu; ae laveaiina o ia e le Alii ai ia mea uma.” (Salamo 34:19)
Le ‘au pelē, e tusa poo a le tele o mea e faia e le fili e punitia ai le ‘ausiaina o le fuafuaga mamalu ua saunia e le Atua mo oe, ou te fia fa’ailoa atu, e galue le Atua i mea uma lava mo le lelei fa‘atasi ma i latou o ē ‘ua alolofa atu ‘iā te ia (Roma 8:28). O lou alofa moni i le Atua, o lona uiga e te usita’ia uma ana tulafono (Ioane 14:15). ‘Aua nei e fa’ama’amulu i le fa’amoemoe pe a tutupu mai mea faaletonu i ou ala. Fa’amoemoe i le Atua, usitai i ana poloa’iga, ona aumaia lea e le Atua ia te oe,se iuga maoa’e ma le manuia, faatasi ma ia. E tusa po’o a ni faafitauli o feagai ma oe i lou olaga, e mafai e le Atua ona faia mea uma ina ia galulue faatasi mo lou lelei ma le manuia, i le suafa o Iesu, Amene.
-
OPEN HEAVENS
MATALA LE LAGI MO LE ASO GAFUA 5 ME 2025
(tusia e Pastor EA Adeboye)
Manatu Autu: Molī, Meapu’eata, Faatino 2 (Lights, Camera, Action 2)
Tauloto -Tusi Paia–1 Samuelu 15:22 “Ua fai atu Samuelu, “E tusa, ‘ea ‘ona fiafia o le ALI‘I i taulaga mū ma taulaga, i lona fiafia i le fa‘alogo i le si‘ufofoga o le ALI‘I? Fa‘auta o le fa‘alogo e sili lea i le taulaga ma le usiusita‘i e sili lea i le ga‘o o mamoe po‘a.”
Faitauga – Tusi Paia – 1 Samuelu 15:1-28
O ananafi, na ou ta’ua le tāua o le usiusitai i le Atua I taimi uma aua na ia tusia le tala o lou olaga. E le gata na ia tusia le tala, o ia foi le faatonu o fuafuaina le faataunuuina o lea tala. Fai mai le Salamo 33:11, “E tu le pule a le ALI‘I e o‘o i le fa‘avavau; o mafaufauga a lona finagalo e a le tu a le tu lava.” O vaega uma na tusia e le Atua I lana tala o loo tatou faatinoina nei.
O tagata e faatinoina le tala, e le faapea e latou te faia soo se mea e mananao ai i le taimi e faatino ai le tala, e tatau ona latou faatino mea uma na tusia e le tusitala. A faafaigata tagata o loo faatinoina le tala, e pau le mea e faia e le faatonu o le tala, o le suia o i latou i nisi tagata. E tele faataitaiga o tagata i le RCCG sa iai a latou matafaioi e faia i le fuafuaga a le Atua, a lē ua ō ese ma le Ekalesia poo ua faia se latou faaiuga e lē usitai i le Atua. Aua foi e tatau ona faataunuuina le galuega a le Atua, na ona suia lava o i latou e le Atua, ae ua latou lē maua mea uma na fuafuaina e le Atua mo i latou.
E lē taitai ona leai ni faaleoleo a le Atua. O le taimi e na te valaau ai i se tagata e faia se mea ae lē usitai lea tagata, e na te saunia seisi tagata e na te faia. O se faataitaiga o le tupu o Saulo, o le taimi na ia amata ai ona lē usitai i faatonuga a le Atua, na auina atu e le Atua Samuelu e faau’u ia Tavita o se tupu e sui ai o ia (1 Samuelu 16:1). A taaalo tama soka I se taaloga, ae iai se tasi ua amata ona faaletonu le amio poo ua le taalo e tusa ma fuafuaga faataatitia e le taitai o le ‘au, e vave lava ona sui atu e seisi tagata.
O le lē usitai e vave suia ai tagata e isi tagata. I le faitauga o le Tusi Paia o le asō, na tuuina atu e le Atua ia Saulo se galuega faapitoa ma ni faatonuga maoti e faatino ai. Ae na ia lē usitai ma ia faia e tusa na lona manatu. O lona lē usitai o se agasala I luma o le Atua ma na suia o ia i seisi tagata. O seisi tagata na suia ona o lona lē usitai i faatonuga mai le Atua o Eli. E ui na tuuina atu e le Atua I ona tamā o Fineaso, o le feagaiga o le ositaulaga sili e faavavau i le Numera 25:11-13, peitai na toe faaleaogāina e le Atua ona ua faia e Eli e tusa ma ona ala (1 Samuelu 2:27-36). Na iu lava ina suia e Samuelu, o lē sa ia aoaoina(1 Samuelu 3:11-20).
Le au pele e, e alofa tele le Atua ia te oe, ae amata loa ona e lē usitai ma le iloa, ana faatonuga, ua e tetee i lona finagalo. O i latou e faaauau pea ona lē usiusitai i le Atua, e oo lava ina suia i latou e nisi tagata pe a lē salamō. Aua e te faapei o i latou. Mulimuli i faatonuga a le Atua, o lē taitai ia te oe, faatino le vaega e tatau ona e faia ma le usiusitai, ona e maua lea o lona mamalu i soo se vaega o lou olaga. Faasoa atu lenei faamalosiau i isi tagata, i le suafa o Iesu, Amene.
-
OPEN HEAVENS
MATALA LE LAGI MO LE ASO SA 4 ME 2025
(tusia e Pastor EA Adeboye)
Manatu Autu: Molī, Meapu’eata, Faatino 1 (Lights, Camera, Action 1)
Tauloto -Tusi Paia–Ieremia 29:11 “Auā o a‘u nei, ‘ua ‘ou iloa manatu ‘ua ‘ou manatu ai ‘iā te ‘outou, o manatu i le manuia, ‘ae lē o le malaia, o lo‘o fetalai mai ai le ALI‘I, e foa‘iina atu ‘iā te ‘outou le i‘uga e i ai le fa‘amoemoe.”
Faitauga – Tusi Paia – Salamo 139:13-17
Ina ua o’u fa’aolaina I le silia ma le limasefulu tausaga talu ai, sa tele ni a’u fesili aua o a’u o se tagata a’oa’oina I le poto salalau. E pei o se kerisiano pepe, sa tele nauā a’u fesili, ma o’u te talitonu semanū ua lē lavā e la’u faifeau faalogo ia te a’u pe ana o’u faaleo uma nei fesili. Sa faapenei a’u fesili, “E moni e silafia e le Atua le taunuuga mai le amataga? Afai e Ioe, na ia silafia o le a ai e Atamu ma Eva le fua o le laau sa fa’asāina? Afai na te silafia le taunuuga mai le amataga, sa tatau la ona Ia silafia o le a ai e Atamu ma Eva le fua o le laau. Afai na Ia silafia o le a o la aai I le fua o le laau, aisea na Ia totoina ai le laau? Afai na Ia totō le laau ma aai ai Atamu ma Eva e pei ona Ia silafia o le a aai ai, aisea sa avea ai ma faafitauli?” Sa tele a’u fesili faapea, ma na i’u ina o’u liliu i le Atua ma faapea, “Tamā e te silasila i lo’u loto; e te silafia o’u te le’o la’u atu ia te oe ni fesili. Ua na o lou mana’o o’u te malamalama lelei i lau upu. E mafai ona e tali mai i nei fesili faamolemole?” Na i’u ina tali mai le Atua. Na o’u a’oa’oina mai ia te Ia, o le lalolagi atoa o se tulaga maualuga tatou te tutū ai, ma o i tatou uma o e faatinoina gaioiga, e pei lava ona tusia e se tusitala Peretania o Shakespeare; E i ai se tala na tusia e le Atua Silisiliese lava Ia, ma o le tala lea o loo fai mai ai Eperu 10:7 faatatau ia Iesu.
“Ona ‘ou fai ane lea, ‘Le Atua e, silasila mai ia, ‘ou te alu atu e faia lou finagalo, pei ‘ona tusia ‘iā te a‘u i le tusi ta‘ai.” Eperu 10:7
Fai mai le Tusi o Galuega 15:18 “Ua silafia e le Atua ana galuega uma lava talu mai le vavau.” Ae e te le’i fanau mai, na tusia e le Atua se tala ma o oe ma a’u o tagata e faatinoa le tala. O Ia o le pule faatonu, faatonu ma o ia fo’i le pule, ma e tatau ona o tatou usitata’i i ana fa’atonuga e mafai ai ona gaioi ma le tatau ma faatino a tatou pitolaau e tusa ma lana polokalame ma lona finagalo. E mafai ona e nofo ma le mautinoa o ana fuafuaga mo oe e matagofie. O le Upu tauloto o le asō fai mai o manatu o le Atua mo oe o manatu i le manuia ae lē o le malaia, e foaiina atu ia te outou le iuga e i ai le faamoemoe.
Le au pele e, e I ai le polokalame lelei a le Atua mo lou olaga ma e finagalo o Ia ia e fa’ataunu’uina ia polokalame ia e fiafia ai i lona filemu. Peita’i e ao ona e mulimuli i lona finagalo e pei ona i totonu o lana Upu. Faamoemoe ma usita’i i lana Upu ona Ia avatu lea o oe i se taunuuga manuia. I le suafa o Iesu. Amene
-
OPEN HEAVENS
MATALA LE LAGI MO LE ASO TOONAI 3 ME 2025
(tusia e Pastor EA Adeboye)
Manatu Autu: Silisili ona Lelei e ala i le Agaga (Excellence By The Spirit).
Tauloto -Tusi Paia–Tanielu 6:3 “A ‘ua sili lenei Tanielu i ali‘i silisili ma ali‘i sili, ‘ina ‘ua tele lona atamai, sa manatu fo‘i le tupu ‘ia tofia o ia e pule i le mālō uma.”
Faitauga – Tusi Paia – Galuega 6:1-8
A fai mai tagata, “E mafai ona e faia e sili atu I le tulaga aupito lelei,” o le uiga o a latou faamatalaga, o lea tagata e mafai lava ona ia fa’aleleia atili e sili atu I le tulaga silisili ua ia ausia. Peita’i, a o tatou talanoa i le aupito lelei, o lona uiga o se tulaga ua matua’i iloga le lelei ua gata ai le mafai.
I le Luka 1:31-32; na faailoa e le agelu iā Maria, o le pepe o le a ia tauaveina e silisili. I le Filipi 2:9-11; fai mai le Tusi Paia na avatu e le Atua ia te ia le suafa e sili i suafa uma lava. Ua faapea mai fo’i le tusi o Ioane 3:34; na avatu e le Atua iā Iesu le Agaga Paia e lē faatatauina. O le mafana o le mafutaga a se uso ma Agaga Paia I le taimi nei o le malosi lea o lona soifua fa’aleagaga i le lumanai. O Iesu sa atoatoa lona lelei aua sa tumu atoatoa o Ia i le Agaga Paia.
Sa sau se tasi o la’u fanau ma fesili mai ia te a’u, “Tamā e te silafia lelei le Tusi Paia? O ai Prochorus?”
Sa ou fesili, “O se igoa lenā I le Tusi Paia?”
Ona fai mai lea o lo’u atalii, “faapea a’u na e fai mai e te silafia le Tusi Paia,” sa toe fesili mai, “O ai Nicanor?”
Sa ou tali i lo’u atali’i o’u te lē iloa, ma o’u toe fesili atu i ai, “o ai Timon?”
Na tali mai lo’u atali’i, “o le uiga o lau fesili o Simon?”
“Leai o Timon.” Sa ou tali i lo’u atali’i o’u te lē iloa Timon.
Ona fai mai lea o lo’u atali’i o igoa uma na ia ta’u mai o nisi o tiakono muamua e to’afitu. Ua fa’aali mai ai, i totonu o se faalapotopotoga o ni tagata ua filifilia, e tutusa faailoga taualoa ma tomai, o nisi o i latou e tulaga ese ona o le lelei atoatoa. Sa tutusa uma o latou faailoga taualoa na ausia; peita’i a fesili e lau mai igoa o tiakono muamua I le Tusi Paia o le toatele o tagata, pau igoa latou te iloa o Setefano ma Filipo.
I le faitauga mai le Tusi Paia o le asō, o loo tatou faitau ai o Setefano sa tulaga ese le lelei ma na ia faia mea tetele ma vavega mo tagata aua sa fa’atumulia I le faatuatua, mana ma le Agaga Paia. O le fa’atumulia I le Agaga Paia e eseese vaega, ma o le maualuga o lou galala e fua i ai le maualuga o le fa’au’uga e te galue ma soifua ai. Le au Pele e, ina ia e maua le lelei nauā, faamuamua lou naunau ia faatumu oe e Agaga Paia i taimi uma. Fai se lua mafutaga ma le Atua i lona mamalu, vivi’i ma tapua’i ia te Ia. A faapea ona e fai o le a fa’atumulia oe e Agaga Paia ma o le a e maua le malosi e fai ai mea sili ma o’o ina sili atu na i loo i latou ua iloga le lelei.
Tatalo
Agaga Paia faamolemole faatumu a’u seia tumu taumasuasua I le suafa o Iesu, Amene.
-
OPEN HEAVENS
MATALA LE LAGI MO LE ASO FARAILE 2 ME 2025
(tusia e Pastor EA Adeboye)
Manatu Autu: O le faigamalaga o le olaga nei (The journey of life)
Tauloto -Tusi Paia–Salamo 36:9 “Auā o lo‘o ‘iā te oe le puna o le ola, o lou malamalama matou te iloa ai le malamalama.”
Faitauga – Tusi Paia – Salamo 32:8-9
I le Kenese 47:7-9, na fesili Farao ia Iakopo, ‘E fia ea tausaga o lou olaga ?’. Na tali Iakopo, ‘sa ou faimalaga mo le 130 tausaga, ae sili atu o’u tamā’. O le fesili, ‘e fia ou tausaga?’, o lona uiga, o le ā le umi ua iai lau faigamalaga i le olaga nei? O le taimi e te fanau ai, e amata ai lau faigamalaga i le lalolagi nei. Peitai a e maliu, e gata loa le faigamalaga, ona e faafesagai loa lea ma le faavavau, a lē o seoli o le lagi, e fua pe na e talia Iesu Keriso i lou olaga pe leai.
E fia faia atu la’u fesili, a’o e feagai ma le faigamalaga i le lalolagi nei, o e malaga i le ala tonu? O e silafia le taunuuga o fuafua e le Atua mo oe?
O le asō, e toatele o faimalaga i le olaga nei e aunoa ma le saili ia iloa le finagalo o le Atua mo lo latou taunuuga, e le tatau ona e faia lea tulaga. E iai le mafuaaga ma le faamoemoega autu na e fanau mai ai, a lē taunuu lea faamoemoega, e te tali I Lē na foai atu le ola o loo e ola ai nei. O au faaiuga e faia, pe telē pe laitiiti, e fua iai lo’u taunuuga i le olaga nei. I le Kenese 13:10-11, na faia le faaiuga a Lota e aumau i se nofoaga e fua i lona matagofie i le vaai e aunoa ma le saili o le finagalo o le Atua. O lenā faaiuga e tasi na suia ai le taunuuga o lona olaga faapea uma suli na tupuga mai ia te ia e faavavau.
Le au pele e, o Lē na tuua oe I lenei faigamalaga ua maea ona ia saunia le taunuuga mo oe, ma tusia le faafanua o le ala e te taunuu ai iai. Na ia fetalai i le Ieremia 29:11, e na te foaiina atu le iuga e iai le faamoemoe. E moni e faaalia atu e le Atua le taunuuga, ae na te lē auiliiliina atu i le taimi e tasi. Na ia fetalai ia Aperaamo, ‘ia e tuua le fale o lou tamā ae alu i le nuu o le a ou faaali atu ia te oe’. Na ia faailoa I le fanauga a Isaraelu, ‘o le a ou taitai ia te oe i le nuu na folafolaina’. Na ia faaali ia Iosefa o le a avea o ia ma taitai tautaua ma sa ia fai foi ia Peteru o le ia faia o ia ma faifaiva I tagata. O nei tagata uma, na latou iloa se vaega o lo latou taunuuga, ae o le faafanua o le ala e agai ai o loo tumau I le Atua. O le faafanua ma le ala e te oo ai i le taunuuga, o loo i le Atua, a e mafuta latalata ia te ia, e na te taitai ia te oe ia e taunuu iai. Fai mai Tavita i le Salamo 119:105
“O lau afioga o le sulu lea i o‘u vae, ma le malamalama i lo‘u ala.”
Le au pele e, a faamuta le lua mafutaga ma le Atua, e te leiloa foi le faafanua o le ala iai, ma è te ono taunuu i se taunuuga sesē. Faalatalata i le Atua, ma faataga o ia e taitai i ou laasaga uma i le faigamalaga o le olaga nei.
Tatalo
Tamā, faamolemole fesoasoani mai ia te a’u ina ia ou latalata pe ia te oe e faavavau Ina ia ou ausia le taunuuga ua e fuafuaina mo lo’u olaga i le suafa o Iesu, Amene.
-
OPEN HEAVENS
MATALA LE LAGI MO LE ASO TOFI 1 ME 2025
(tusia e Pastor EA Adeboye)
Manatu Autu: Tulaga e luluina le eleeele (Earthshaking events)
Tauloto -Tusi Paia–Galuega 4:31 “Ua mavae atu la latou tatalo, ‘ona lūlūina lea o le mea ‘ua fa‘apotopoto ai i latou; ‘ua tūtūmu fo‘i i latou uma i le Agaga Pa‘ia, ‘ina ‘ua tautala atu i le afioga a le Atua ma le loto tele.
Faitauga – Tusi Paia – Galuega 16:25-26
I le aso o le Penetekoso, sa potopoto faʻatasi le au soʻo i se potu ma le loto gatasi, na faʻafuaseʻi ona agi se matagi malosi (Galuega 2: 1-4). Na lulu e le matagi le fale, ma e o’o mai i le taimi nei, e lei toe malosi le lalolagi mai lena tulaga. Pe e te talitonu i ai pe leai, o le a lūlūina e le Atua le lalolagi atoa. Ua oo mai le faaolaolaga, ma e mafai ona e auai ai.
I le 1979, sa ou auai i se fonotaga a Kenneth E Hagin i le setete o Tulsa, Oklahoma, ma loʻu tamā faaleagaga ma isi o le auuso e toafa. Sa matou nonofo i le faletalimalo o Mayo, ma i se tasi o taeao po, na feau mai matou e lo matou tamā. Ina ua matou o’o atu i lona potu, na matou vaʻai atu o tatalo i le Agaga Paia, e loloto atu i le tulaga e masani ona matou vaai iai. O le fono tonu lava lea na ia tau mai ai se tala na matuā matou ofo tele. Fai mai, ua lata ona valaau le Alii ia te ia, ma o le a avea a’u o le taitai o le Ekalesia e sui ia te ia. Ina ua ia saunoa mai faapenei, na matou tatalo faatauanau i le Alii. A’o matou tatalo, na faafuaseʻi, ona tuʻituʻi mai e le inisinia o le faletalimoa le faitotoa o le potu. Talu ai o a’u na pito i le faitotoa, sa ou tatalaina le faitotoa. Na fesili le inisinia o le faletalimalo, "O ā mea fai faili o loo tou tāina?’.Sa ou tali atu, "Matou te le o faaaogaina ni mea fai faili, o loo matou tatalo’. E leʻi talitonu ia te aʻu, o lea na ia ulufale i le potu ma suesue vaega uma. Ina ua savali i fafo, na ia toe fesili mai, "O le a foi lau tala i mea sa outou faia?" Sa ou tali atu, "O lea sa matou tatalo." Na ou fesili i lea alii, "E i ai se mea o faaletonu?" Na ia tali mai, "O lo’o lūlūina le faletalimalo, o le mafuaaga e foliga mai e afua atu i le potu lenei." Sa suesue e inisinia le faavae o le faletalimalo i se taumafaiga e suʻe le mafuaʻaga o le lūlūina, ma e leai se mea na maua. Ina ua matou o ese, na tapunia le faletalimalo ona sa i ai ni popolega i le lūlūina ma le saogalemu o le fale. Talu ai e lei mafai ona maua le mafuaʻaga o le lūlūina o le faletalimalo, ae lē taitai ona talitonu o ni tatalo na mafua ai, o lea na tapunia ai loa le faletalimalo mo le 30 tausaga. O lenei tulaga, o le amataga lea o le faaaolaolaga tele o loo molimauina nei i le Ekalesia RCCG i aso nei.
A tatalo faatasi tagata faatuatua ma le lotogatasi, e tele tulaga matautia e mafai ona tupu. E mafai ona tatou taitaiina le lalolagi ma manumaloina agaga e tele mo lona malo, i se taimi vave. Le au pele, afai e te manaʻo e te iai i le faaaolaolaga e luluina ai le lalolagi ma faʻaalia ai le mamalu o le Atua, e tatau ona e faamasani e tatalo faatauanau i le loto gatasi ma le au uso faatuatua. O tatalo faatauanau i le loto gatasi ma i si tagata faatuatua e fanau mai ai tulaga e lūlūina ai le eleele faapea ma faaolaolaga matautia, i le suafa o Iesu, Amene.
-
OPEN HEAVENS
MATALA LE LAGI MO LE ASO LULU 30 APERILA 2025
(tusia e Pastor EA Adeboye)
Manatu Autu: E inoino le Atua I le fevaevaea’i (God hates disunity)
Tauloto -Tusi Paia–Mataio 12:25 “A ‘ua silafia e Iesu o latou manatu, ‘ona fetalai atu ai lea o ia ‘iā te i latou, “O mālō uma ‘ua fevaevaea‘i e fa‘aumatia ia; o ‘a‘ai uma fo‘i po o ‘āiga e fevaevaea‘i e lē tumau ia.”
Faitauga – Tusi Paia – Salamo 133:1-3
E tele fuaitau o le Tusi Paia o loo faailoa mai ai e inoino le Atua I le fevaevaea’i, ae e fiafia o ia pe a loto gatasi lana fanau. Na ia fetalai i le Ioane 13:35, o le faaali o le alofa o le tasi i le isi e iloa ai e tagata o I latou o ona soo. E matua faataua lelei e le Atua le loto gatasi, na ia fetalai a e sau ia te ia ma se taulaga ae e manatua e iai se tulaga o loo lua vā ai ma le uso, e tatau ona e alu e faia le faaleleiga ma ia, ona faatoa e sau lea e avatu le taulaga (Mataio 5:23-24).
E finagalo le Atua I lana fanau e loto gatasi aua o loo ia silafia e itiiti se tulaga e mafai ona tatou ausia pe a faia taitoatasi. E na te silafia o le taimi e amata ai ona faia taitoatasi, e faigofie i le tiapolo ona ulu mai I ō tatou siomaga, ona lē mafai lea ona tatou faia se mea e taofia ai o ia. Fai mai le Failauga 4:12“‘Āfai fo‘i e fa‘amanumālō mai se tasi i so lā‘ua, e tete‘eina atu o ia e lē to‘alua; o le maea fo‘i e sautuatolu e lē vave motusia.”
E tele kerisiano ma faalapotopotoga a kerisiano i le lalolagi atoa. O le mea moni o le Ekalesia kerisiano o se faatuatuaga e pito tautaua i le lalolagi. Aisea la e faia ai e malo ma atunuu faiga faavae e tetee ai i kerisiano ma sauaina i latou? O le mafuaaga ona o le toatele o kerisiano o loo tutū taitoatasi. A tatou o mai faatsi ma faia se folafolaga, e taunuu lava. A tatou o mai faatasi ma filifili e liliuina le lalolagi atoa mo Keriso, e le mafai e se tagata ona taofia i tatou.
A e vaai I taimi na fai ai ni matou faaolaolaga i tausaga ua tea, e tasi se vaega taua o le a e iloa ai, na loto gatasi se vaega e toatele o le ekalesia. I le afeafeaupitoaluga, ina ua loto gatasi le au soo, na afio mai Agaga Paia ma è 3000 agaga na faaolaina I lea aso. Na tusia i le Galuega 2:46-47, na loto gatasi le au soo ma na faaopooopo pea tagata i le Ekalesia I aso uma.
Silasila I lau ekalesia, e iai se loto gatasi ? Silasila i le siosiomaga o le nofoaga o le lotu, o galulue lau Ekalesia ma le loto gatasi ma Isi Ekalesia i le tou nuu? Ana mafai ona tuuese tatou feeseeseaiga ae o mai faatasi ma tutū e faasagatau i le tiapolo, o le a tatou iloa ai, e leai se mea e lē mafaia. Tatalo ia loto gatasi ekalesia uma i lou nuu faapea ma le tino o Keriso I lona aotelega, i le suafa o Iesu, Amene.
-
OPEN HEAVENS
MATALA LE LAGI MO LE ASO LUA 29 APERILA 2025
(tusia e Pastor EA Adeboye)
Manatu Autu: Puipui lou sa’olotga e tapuai (Guard your freedom to worship)
Tauloto -Tusi Paia–Salamo 124:7 “Ua sōsōla i tatou e pei o le manu nai le matāsele a ē fai manu; ‘ua motu le matāsele, i lē ‘ua sōsōla i tatou.”
Faitauga – Tusi Paia – Salamo 100:1-5
Afai e le sa’oloto tagata e tapua’I I le Atua i le auala e tatau ai, o lona uiga ua saisatia o latou agaga. Mo se faataitaiga,ina ua auina e le Atua Mose ia Farao ia faasa’oloto tagata Isaraelu, sa ia faapea atu: “Ia tuu’ina mai o’u tagata ia mafai ona latou tapuai ia te a’u.” (Esoto 5:1).
Ou te faafetai i le Atua mo le sa’olotoga e tapua’i ai i nisi o atunuu. I se vaaiga lautele, e mafai e tagata i ia atunuu ona ō I le Lotu i so’o se taimi ma tapua’i i le Atua, i so’o se auala latou te finagalo iai. Peitai, i totonu o isi atunuu e pulea malosi e le malo tulaga e mafai ona faatino e ekalesia, faapea ma tulaga e faasaina. O se faataitaiga, latou te faamalosia faife’au e faia faaipoipoga a itupā tutusa I totonu o le lotu. O se faifeau o le RCCG i se tasi o atunuu sa taofia e leoleo ona sa faapea atu, “Alii ma Tamaitai”, ua tuua’ia ona e lē o tagata uma na iai o ni alii ma tama’itai. O le sini autu o nei faiga, ina ia suia faamalosi le auala e tapuai ai tagata i le Atua, ma faamalosia i latou e tapua’i e tusa ma talitonuga ma aga a tagata e lē faatuatua i le Atua.
Le ‘au pele, o loo tumau ma e le suia tapulaa a le Atua. E le tatau ona e savali I ala o ē amioleaga aemaise i totonu o le Lotu, ona o ni faatonuga a taitai. Afai e te savali ma fa’aaogaina, o le pologa le mea lena. O le avea ma pologa i lona uiga faigofie, o so’o se mea e taofia oe mai le ola i se olaga manuia faulai e auauna ai I le Atua ma lou loto atoa. So’o se taimi e te iloa atu ai ia mea i lou si’omaga, puipui malu lou loto ma lou siosiomaga.
E tele kerisiano ua latou faia ma masani nei faiga a le lalolagi, ona o taiala e amio lē Atua, ma e tatau ona e tatalo ia vave ona motusia nei saisaitiaga. Ina ua gausia le amo o le pologa i ‘Aikupito, o le mea aupito taua na faapea mai ai Farao: ‘O atu e tapuai i le Atua I le auala tou te loto ai.”
I le tele o taimi, e iai faiga faavae e lamatia ai agaga o tagata, e foliga mai e leai sona afaina i le amataga. O le mafuaaga lena e tatau ai ona tatou mataala ma filigā o tagata faatuatua. Ia tatou faaeteete ma mata’ituina mea tatou te faataga i o tatou si’osi’omaga. E toatele le ‘au faatuatua e faapea mai: “E lē afaina…” seia oo ina mū o latou loto i le u’amea aasa o le amioleaga ma le pogisa (1 Timoteo4:2). Afai e lē o gatasi ma le finagalo a le Atua, e taua i le Atua, ma e tatau foi ona e faatauaina.
Le ‘au pele, afai ua saisaitia oe ua lē mafai ona e toe auauna i le Atua ma le loto atoa, ou te tatalo ia faasaolotoina oe e le Atua, i le asō. E sola ese lou agaga e pei o le manu mai le matasele (Salamo 124:7) ma ia e olioli i le sa’olotoga e te tapuai ai i le Atua i le Agaga ma le faamaoni, i le suafa o Iesu. Faafetai i le Atua pe afai e te tapuai sa’oloto ia te ia ma ia e tatalo mo le fa’asaolotoina o i latou ua latou lē maua lea sa’olotoga tutusa.
-
OPEN HEAVENS
MATALA LE LAGI MO LE ASO GAFUA 28 APERILA 2025
(tusia e Pastor EA Adeboye)
Manatu Autu: Alo ese mai misa (Avoiding strife)
Tauloto -Tusi Paia–Iakopo 3:16 “Auā o le mea e i ai le mata‘u‘a ma le misa, o i ai le fē‘avaua‘i ma mea leaga uma.”
Faitauga – Tusi Paia – Kenese 13:1-18
E matuā lamatia misa, e faaleagaina mafutaga ma faaumatia aiga aemaise pe a faataga e faaauau pea. Ina ua ave e Aperaamo le atalii o lona uso, o Lota, i le nuu na folafolaina e le Atua ia te ia, e lei manatu e iai ni faafitauli o le a fotuai mai i lō la va. Na fiafia Lota i faamanuiaga a le Atua ona o Aperaamo, peitai e lei poto ma faatonu ana tagata faigaluega e faaaloalo i le aufaigaluega a Aperaamo. E ui I lea tulaga, e lei to’atamai ai Aperaamo. Ae na ia fofōina le faafitauli i lo la va ma Lota. Na ia valaau ia Lota ma fai iai, ‘Faamolemole ia aua nei iai se misa i lo ta va ona o taua o le auuso’. Na faatauaina e Aperaamo le la mafutaga ma le Atua faapea lona auuso e sili atu i faafitauli o loo latou feagai. Na faamaualaloina o ia ma ole atu ia Lota e filifili poo fea e fia alu iai muamua. Na malamalama Aperaamo i se tulaga e tele ina lē malamalama ai le toatele, ua ia silafia, o le taimi e te faatagaina ai misa, ua e tuu avanoa i le tiapolo.
Ao faagasolo le polokalame o le ola i le Ekalesia RCCG i Lonetona, sa iai se ulugalii mai Polani sa faatalitali mo se la tama, na faia se la tautinoga ina ua faamanuia le Atua iai laua ma ua maua se la tama. Ao faia le tautinoga a le tamā, ona o le gagana Peretania e lē o sana gagana faavae, na faapea mai, ‘na ou sau i le tausaga talu ai ona e iai se tagata na fai mai o so’o se tagata e pai iai le taitai aoao e tō’. Sa nofo lau avā i ou talane ua ata ma faapea mai, ‘aua e te pai mai ia te a’u. Ou te lē toe fia tō’. Na matou taliē i le tala a le tamaloa sa faia aua o loo matou malamalama ia te ia ma le atunuu e sau ai. Peitai e ono faauiga seseina e nisi ona o upu na ia faaaogaina. E moni e iai ni faafitauli e lavelave ma faigata atu ona oni feeseeseaiga i le va o ni tagata se toalua ona latou te lē o taumafai e malamalama i faamatalaga atoaatoa i le mea e sau ai lea tagata.
Le au pele e, ia aoaoina oe e suesue lelei poo fea e o mai ia tagata ao e taumafai e fesootai ma i latou, e fesoasoani lea ia te oe e te ‘alo ese ai ma ni feeseeseaiga e lē manaomia. E iai tagata e o mai mai nofoaga, ua ou matua e pei o latou tamā poo le tamā o latou tamā, a ō mai e matou te feiloai, ou te manatu e tatau ona latou tootuli ma faaaloalo mai e pei o a matou aganuu. Ae e iai foi tagata ou te lē manatu e tootuli ma faaaloalo mai ona o atunuu ma nofoaga e o mai ai, o le mea moni ou te ofo pe a latou faia. O se ala e faafeiloai ai i Isi aganuu ma atunuu, e te ono manatu o loo faaonoono atu ia te oe, e ono faatupuina lou ita ma faamisa ai, ma tuu atu ai le avanoa i le tiapolo. ‘Alo ese mai le misa e pei o se faama’i pipisi, aua o se faitotoa i le tiapolo, i le suafa o Iesu, Amene.
-
OPEN HEAVENS
MATALA LE LAGI MO LE ASO SA 27 APERILA 2025
(tusia e Pastor EA Adeboye)
Manatu Autu: Ta’utinoga Lē Talitonuina (Unbelievable Testimonies)
Tauloto -Tusi Paia–Salamo 126:1 “Na fa‘afoisia mai e le ALI‘I o Siona nai le tāfeaga, ‘ona tusa ai lea o i tatou ma tagata ‘ua fai a latou miti.”
Faitauga – Tusi Paia – Salamo 126:1-3
Fai mai le upu tauloto o le asō, ina ua faafoisia e le Atua, Siona mai le tafeaga, sa peiseaī o se miti. A faia e le Atua mo oe ni ta’utinoga, atonu e te manatu i nisi taimi pe moni ea pe ua na o se miti. I le Salamo 23:5; fai mai Tavita, “E te laulau mai meaai i le la’oai ma a’u i luma o e ita mai ia te a’u.” Ua lava ma totoe lea ta’utinoga peita’i na ia toe faapea mai, “Ua e fa’au’uina lo’u ulu i le suāu’u, ua taumasuasua la’u ipu.” Ou te mautinoa sa fesili ni tagata na latou nonofo faatasi, “O le a lea ituaiga ta’utinoga faapenei? Uso, e te mautinoa e te le o faatele?”
O le a o’u faamatala atu ia te oe se tasi o ia ituaiga ta’utinoga. A’o o’u faiaoga i le Iunivesite o Ilorin, sa i ai le ma tipoti ma lo’u toalua, e ofi ai iputi e lima. Soose taimi ma te mananao ai e inu se ma ti e faatumu a le tipoti. A uma a ma iputi ta’i lua, o le tagata e muamua uma lana iputi lona lua e masani ona inu ina le iputi mulimuli. O le tasi aso sa faatumu le tipoti e pei ona masani ai, ma ina ua uma a mā iputi ta’i lua, sa ma maitauina ua uma le ti. A o ma vaavaai le tasi I le isi ma le lē mautonu, sa fetalai le Alii ia te a’u, “A o e tatalo, sa e faapea mai le Alii e, faamanuia i nei taumafa, afio mai tatou talisua faatasi, sa ou manatua sa e valaaulia a’u.” Sa o’u fiafia sa o matou talisua faatasi ma le Alii o Iesu, peita’i ina ua o’u faamatala lea ta’utinoga, sa vaavaai mai le ‘auuso ia te a’u pei ua leaga lo’u ulu ona ua o’u fai atu sa taumafa e Iesu le iputi. Sa avea ma mea sa ou matamuli ai. O lea na o’u tagi ai i le Atua e faaali mai se mea na tupu e tutusa ma la’u ta’utinoga mai lana Afioga Paia. Na ia faaali mai ia te a’u le tala o I le Ioane 21, ina ua uma ona toe soifua mai Iesu mai le tuugamau na Ia faaali i lona ‘auso’o, ma na latou faatasi ma Ia i le auvai ma o latou taumamafa faatasi i i’a ma falaoa. Na fetalai le Alii ina ua uma ona Toetū mai o Ia mai le oti, sa mafai ona Ia taumafa i’a ma falaoa, ma ana i ai sa latou suātī semanū e tausami ai fo’i faatasi ma i latou.
Le a’u Pele e, e mafai e le Atua ona faia mea e faasilisili i mea uma e te mafaufau i ai (Efeso 3:20). Ou te tatalo mo oe i le asō ia foai atu e le Atua ia te oe ta’utinoga o le a faigatā i tagata ona talitonu ai pe a e faamatala ia i latou, i le suafa o Iesu, Amene.
-
OPEN HEAVENS
MATALA LE LAGI MO LE ASO TOONAI 26 APERILA 2025
(tusia e Pastor EA Adeboye)
Manatu Autu: Ta’utinoga i luga a’e ma tala atu (Testimonies Above and Beyond).
Tauloto -Tusi Paia–Efeso 3:20 “O lenei, ‘ia ‘iā te ia o lē na te mafaia ‘ona faia o mea uma le fa‘asilisili lava i mea tatou te ole atu ai ma mafaufau i ai, e tusa ma le mana o lo‘o matuā galue i totonu ‘iā te i tatou,”
Faitauga – Tusi Paia – 1 Korinito 15:57-58
E lelei tele le fa’asoa o ta’utinoga faatatau I le agalelei o le Atua ia te oe, aua e faaosofia ai le faatuatua o isi ma atili faamanuia ai le Atua ia te oe. Peita’i e I ai nisi ta’utinoga, a le faigatā i tagata ona talitonu i ai, poo le manatu faapea o le Atua e alofa faapito. I le tele o tausaga ua mavae, na asiasi mai se tasi o o’u atalii fa’aleagaga ia te a’u ma amata faamatala ana ta’utinoga faatatau i faamanuiaga a le Atua ia te ia, lona aiga ma lana galuega. Na alu alu le faamatalaga taofi ma fai mai, “Tamā na o a’u a lea e tautala; e lei faia sau faamatalaga i mea o loo faia e le Atua mo oe.” Sa o’u tali atu; “Atalii, afai ou te tau atu ia te oe mea uma na faia e le Atua mo a’u, o le a e faapea mai o le Atua e faapito.” O’u te tatalo i le suafa o Iesu ia avatu e le Atua ia te oe ni ta’utinoga e faapea mai ai tagata, “na o oe o loo auauna i le Atua?”
Ina ia e maua ni ta’utinoga e i luga a’e ma tala atu, e tatau ona e gaua’i e tautua le Atua ia maualuga ae ma tala atu o le mea masani. E tatau fo’i ona e fiafia e tatalo ma anapogi e lē aunoa. I le 2 Korinito 11;27 fai mai Paulo “. . . . . O le anapogi soo, . . . “ I le 1 Tesalonia 5:17; o loo apoapoai mai, “ia tatalo e lē aunoa.” Leitioa a fai mai le Tusi Paia na faia e le Atua vavega sili i lima o Paulo (Galuega 19;11-12). Na faaaoga e le Atua Paulo mo vavega e lē masani ai le toatele aua na ia tuuina atu lona tagata e tautua ai i le Atua i auala e sili atu I faiga masani. A e luluina lau tautua i le Atua lē faatuaoia o le a tele fo’i vavega e selesele mai (2 Korinito 9:6). Peita’i afai e te ofo atu oe lava e te auauna i le finagalo o le Atua, ma e galue i lou malosi atoatoa, o le a e maua ta’utinoga e sili atu I mea e te mana’o ma manatunatu iai.
Sa iai se tamaita’i sa taofi mau lona faamoemoe I le Atua mo sona toalua, seia o’o ina te’a tausaga e mafai ai ona maua se fanau. A o fai se tasi o matou sauniga, sa ou fai i tagata uma sa iai, e ta’u i le Atua sona manaoga. Sa fai lana Tala i le Atua “Sa o’u faatali ia te oe mo se taimi umi mo se toalua, peita’i e leai se isi na maua; ui i lea, e lē afaina, aua o le a o’u auauna ia te oe i aso uma o lo’u ola”. I nai aso mulimuli ane ae alu atu se alii talavou e fia faaipoipo ia te ia. Sa pupula to’a le tamaita’i i lenei alii ma faapea atu iai “Ua e mautinoa? E sili lou toe alu e tatalo”. Na tali le alii “Ua o’u mautinoa; ua uma na ou tatalo”. Fai mai le tamaita’i “e te lē fia fai fanau? Ua ou pasi ma le taimi e maua ai se fanau”, na tali le alii “Ua maliu lo’u toalua ma o loo ia te a’u le ma fanau”. Ina ua uma na la faaipoipo, na manuia le tamaita’i ma fanau mai se masaga. Na silasila le Atua i lona loto ma foai ia te ia se ta’utinoga e maualuga mamao atu nai loo lona mana’o. Ia e maua ni vavega e i luga a’e ma tala atu o mea uma e te manatunatu iai, i le suafa o Iesu Amene.
- Show more
