Episodes
-
OPEN HEAVENS
MATALA LE LAGI MO LE ASO LUA 8 IULAI 2025
(tusia e Pastor EA Adeboye)
Manatu Autu: Aulelei moni (True beauty)
Tauloto – 1 Peteru 3:4 “A o le tagata lilo o le loto, ‘iā teua lea i le mea e le pala, o le loto agamalū ma le filemū, o le mea tau tele lava lea i luma a le Atua.”
Faitauga o le Tusi Paia: 1 Peteru 3:3-11
E lelei le tausia lelei o foliga, peitai e le talafeagai le avea ma se mea ua ave atoa iai le malosi. E tele tagata ua matua faamuamua le teuteu o foliga vaaia ma ua matua tele le taimi ma le tupe alu i lauulu faapipii, o le valiina o foliga, o ta’otoga e faaaulelei ai foliga, ma le faia o la’ei e faaaliali ai tino, ma le manatu ua fa’aopoopoina ai le aulelei. O ia vaega, e lē talafeagai ma tagata Kerisiano. Mo se faataitaiga, o le soona vali o foliga ma le faia o ta’otoga e suia ai foliga, o auala ua ta’u atu ai i le Atua, e sese foliga ua ia foai ia te oe. O lou la’eiina o ofu e fufusi ma faaaliali ai lou tino e faaalia ai, o oe o se tagata taugofie ma o loo avanoa mo soo se tasi. I lou tulaga o se Kerisiano faamaoni, o lou aulelei moni e lē fuaina i ou foliga vaaia ae e fuaina i lou tagata lilo i totonu.
E tatau ona faaalu na o sina taimi i ou foliga vaaia. Afai e tusa ma le tolu itula e sauni ai se tagata faatuatua i taeao uma , e taumate pe na iai sona taimi paganoa ma le Atua. Fai mai le Kolose 3:2, Ia ‘outou loto lava i mea i lugā, ‘ae lē o mea i le lalolagi. Fai mai le Mataio 6:21 o le mea ‘ua i ai lo ‘outou ‘oa, e i ai ‘atoa fo‘i ma o ‘outou loto. Afai ua tele ni au ala ‘oa o faaaoga e tapena ai ou foliga vaaia, e atagia ai le mea moni o iai lou loto ma mea ua ave iai lou faamuamua. O nisi Kerisiano ua latou faia ta’otoga e faamatagofie ai itu tino. O nisi ua faigata ona ositaulaga mo le Talalelei, peitai e malilie e lamatia o latou ola e fa’a aulelei ai foliga vaaia.
E lelei le teuteu ina ia aulelei ou foliga ae faamolemole, ave le faamuamua e faamatagofie mai totonu i lou tagata lilo i lo foliga vaaia i fafo. O le tulaga e faamatagofie ai se tagata, o ana amio ma galuega lelei e faatino. O Toreko sa matua tele ana galuega lelei ma e loto alofa tele. Sa maua’a lana mafutaga ma le Atua ma sa ia naunau ma alofa tele i le soifua manuia o tagata. Ina ua maliu, sa matuā mumusu tagata o lona nuu e tuu e maliu. Na latou aami ma saili Peteru e toe fa’aola ma fafagu ia te ia ona o le mata’utia o ana galuega lelei sa fai. (Galuega 9:36-42). O le mea moni ana faapea e na o ona foliga ma le fuaitino sa iloa ai o ia, e leai se tagata o le a alu fua e saili Peteru e toe faaola o ia mai le oti.
Le ‘au pele, a e ola mo le Atua, o le a matagofie moni lou olaga, ma a oo i le taimi e te alu atu ai i le ola e faavavau, o le a faamanuiaina pea tagata i au galuega lelei. Ia ave lau faamuamua i le aulelei moni ae lē na o foliga vaaia. O le matagofie ma le aulelei moni e maua i le tagata e silisili ona amio lelei, maualuga taiala e limatataitaina ai, ma e ta’uleleia e le toatele, i le suafa o Iesu, Amene.
-
OPEN HEAVENS
MATALA LE LAGI MO LE ASO GAFUA 07 IULAI 2025
(tusia e Pastor EA Adeboye)
Manatu Autu: Kerisiano moni? (Christian indeed?)
Tauloto – Iakopo 1:25 “A o lē matuā matamata i le tulafono o le sa‘olotoga ‘ua ‘ato‘atoa ‘ona lelei, ma ‘ua tumau i ai o ia, e lē se fa‘alogologo ma le fa‘agalogalo lenā tagata, a o lē ‘ana‘ana i le galuega, e manuia o ia i lona lava ‘ana‘ana.”
Faitauga o le Tusi Paia: Iakopo 1:21-27
E iai le eseesega o le taua o se kerisiano ma le avea o se kerisiano moni. E toatele tagata e faapea mai o kerisiano ae lē o atagia Keriso i o latou olaga. O le alu i le lotu, galue i totonu o le lotu, anapogi ma le tatalo, e mafai ona ta’ua ua nā o galuega faalelotu masani pe afai e lē atagia Keriso i lou olaga i aso uma. O le toatele o nisi tagata na tutupu ane i le lotu ma ua masani i galuega a le Ekalesia, peitai o loo latou ola pea i le agasala e pei o tagata lē faatuatua ma lē lolotu. O le auala e iloa ai pe moni e iai Keriso i lou olaga, o le vaaia lea o suiga I lou olaga talu ona e faaolaina. A faapea e maea le lua tausaga e lei suia au amioga mo le lelei i le taitaiga a Agaga Paia, o lona uiga e na o le auai lava i le lotu.
E iai tagata e tatalo e faitau itula, peitai e tumau pea le masani o le pepelo. O nisi e tauala mai ai vavega, peitai e iai le loto lē faamagalo i o latou loto. E ui o galuega e pei o le tatalo, anapogi, talai le Talalelei e matua taua, ae aua nei galo le tulaga pito taua, ia tatou faapei o Keriso. O na galuega uma i le Ekalesia e aoga aua le taunuuga ae lē sili atu i lou faapei o Keriso.
Fanau a le Atua, afai e fia avea moni oe e pei o Keriso, ia matua faatele lou taimi e suesue ma le filiga le Upu a le Atua. A e suesueina le Tusi Paia, o loo e mafuta vavalalata ma le Atua aua o ia o le Upu (Ioane 1:1). Fai mai le Ioane 17:17 o le faapaiaina, e sau mai le Upu, fai mai le Efeso 5:26 e faamamaina i tatou e le Upu, ae fai mai le Salamo 119:11, e tatou teuina le Upu a le Atua I o tatou loto, e taofia i tatou mai le faia o le agasala i le Atua. O le feliuaina moni e faatoa tupu pe a e mafuta ma le Atua e ala i lana Upu. E faatusa e Iakopo 1:23 le Upu a le Atua i se faata. A tilotilo le till Le tagata i lona ata i le faata, e siaki ona foliga ma mea uma poo lelei ona suia lea oni tulaga faaletonu. A e saili ma suesue i le Upu a le Atua, o lou naunautaiga ia suia e le Atua ou manatunatuga, amioga ma lou tagata e ala i le mana o lana Upu. Afai e masani ona vave lou ita ae e te lei faitauina le Tusi Paia, e mafai e le upu a le Atua ona aveesea lou loto ita ma suia oe i se tagata onosai ma le filemu. Afai na e faanoanoa ma loto mafatia, e tatau ona aveesea e lana Upu le faanoanoa ma le loto faavaivai ae suia i le viiga ma le olioli (Isaia 61:3).
Le au pele e, e tatau ona e faatagaina le Upu a le Atua e tupu ma ola i totonu ia te oe ma le poto (Kolose 3:16).
Tatalo
Tamā, faamolemole fesoasoani mai ia te au ia tumau Lau upu i lo’u loto ma ia ou ola ma savali e tusa ma lou finagalo i taimi uma, i le suafa o Iesu, Amene.
-
Missing episodes?
-
OPEN HEAVENS
MATALA LE LAGI MO LE ASO SA 6 IULAI 2025
(tusia e Pastor EA Adeboye)
Manatu Autu: O Le Faifa’atoaga (The Husbandman)
Tauloto – Luka 12:42 “Ona fetalai atu lea o le Ali‘i, “O ai fo‘i le ‘au‘auna e pule, ‘ua fa‘amaoni ma le mafaufau, ‘ua tofia e lona ali‘i e pule i ana ‘au‘auna, ‘ia avatu mea e ‘ai ‘iā te i latou e tusa ai ma le taimi?”
Faitauga o le Tusi Paia: Mataio 24:45-47
O se faifaatoaga o se tasi e galuea’ina le eleele ma tausi lelei fua i le faatoaga. I le lotu, o fai faatoaga o le ‘au galulue e fa’amautinoa e sologa lelei mea uma I le tovine a Keriso. A alu ae le tapuaiga I le Atua mai lona tovine, na te liligi ifo faamanuiaga ma o ē galulue e masani ona mua’i maua e i latou le fua (2 Timoteo 2:6).
Ina ua o’u auai I le Ekalesia RCCG, o le au galulue I totonu o le ekalesia sa faaigoa o fanau a le Atua. E mafua aua o fanau latou te fa’amautinoa e sologa lelei mea uma I le fale o lo latou tamā; na o tagata asiasi e omai ma toe o e aunoa ma se popole. O lea, e leai se tamā lelei o le a vaai atu o fia aai lana fanau ae alu fafaga isi tagata: o le fanau lava e mua’i selesele i se faamanuiaga o le āiga. Ina ua sau se fafine Kanana iā Iesu ma olega ia te Ia e faamalōlō lana tama teine na ulutinoina e temoni, na fai atu Iesu ia te ia, e lē tatau ona ave le meaai a le fanau ma lafo i ulī (Mataio 15:26). O nisi avanoa lelei ua faapitoa na o le fanau ma ua faapea fo’i ona na o le fanau a le Atua o e tapua’i ma auauna ia te Ia ma le loto atoa e agava’a i avanoa faapitoa mai le Atua.
I le 2 Timoteo 2:6, fai mai le Tusi Paia o lē galue i fanua e tatau ona mua’i maua e ia le fua. O lona uiga e i ai fai faatoaga e lē galulue. E i ai tulaga e silasila le Atua e tatau ona fai e le ‘au fai faatoaga. Muamua e tatau ona filigā a’o faatino o latou tiute mai le Atua e galulue ai I lana tovine. O nei tiute e mafai ona faatino i se lālā i totonu o le ekalesia; po o le faavasegaina o nofoa, fa’amamā fale le tāua, tausia o le fanau poo le faasinoina o nofoaga o tagata. Afai o oe o se fai faatoaga, poo le a lou tiute, fai ma le loto filigā. A e galue faamaoni, o le a e mua’i selesele i fua o faamanuiaga a le Atua.
E finagalo le Atua ia loto faamaoni ē galulue fanua (1 Korinito 4:2). A tofia oe e le Atua i se galuega e finagalo ia e faia faamaoni. O le faamaoni o le fa’amautinoa lea o oe lava ua tatau i ai le faamoemoe. E aofia ai fo’i le pulea lelei o meatotino. A e faamaoni o le a faamoemoeina oe e le Atua e tu’u atu ai tagata, o le mafaufau lelei, ma le oa. Na te talitonuina fo’i oe e te faia lona finagalo. A e faamaoni I mea iti e avatu e le Atua ia te oe, o le a ia avatu ia te oe mea e tele (Luka 16:10-11).
Le au pele e, fa’amautinoa e te galue filigā ma faamaoni o se galue fanua i le tovine a le Atua ina ia avea oe o sē mua’i maua ana faamanuiaga. Afai e le’i avea oe ma se tagata faigaluega i lou nuu, o le taimi lenei ua tatau ai ona e galue i totonu o lau ekalesia. Ina ia avea oe o se tagata e muamua tofo i manuia o le Atua, ua tatau ona e galue mo lou Alii o se galue fanua filigā ma le faamaoni I lana tovine, I le suafa o Iesu, Amene.
-
OPEN HEAVENS
MATALA LE LAGI MO LE ASO TOONAI 5 IULAI 2025
(tusia e Pastor EA Adeboye)
Manatu Autu: Faaeteete ma fai faatatau I Mea Uma (Be Moderate In All Things)
Tauloto – 1 Korinito 6:12 “Ua tataga mea uma ‘iā te a‘u,” a ‘ua lē aogā mea uma. “‘Ua tataga mea uma ‘iā te a‘u,” a o a‘u, e lē fa‘ato‘ilaloina a‘u i se tasi mea.”
Faitauga o le Tusi Paia: 1 Korinito 6:12-20
I le fuaiupu tauloto o le asō, fai mai Paulo e ui lava ua tataga mea uma ia te ia, e lē fa’ato’ilaloina ia e se mea fa’ale lalolagi. Na toe faapea mai fo’i Paulo I le 1 Korinito 9:25 o e ua faaolaina e tatau ona faaeteete ma fai faatatau i mea uma. O ne’i fuaiupu o le Tusi Paia ua fa’aali mai ai o le Atua e i ai lana fua faatatau mo mea uma a lana fanau e fai, e aofia ai ma upu e tautatala ai, o latou lavalava ma le va feagai ma isi. Paga lea o le toatele o kerisiano ua o latou faatagaina ala o fesootaiga, manatu o tagata ma aga masani e fai ai le fua fa’atatau o latou lavalava, taumafa, moe, ma ua faapea fo’i ia latou tapuaiga i le Atua.
O le a taumafai pea le tiapolo e fa’aaogā mana’oga o le tagata e fa’aleagaina ai i latou. E le o se agasala le mana’o i nisi o mea i le tino, peita’i e tatau ona e pulea lou naunau i nei mea. Fa’ata’ita’iga; o le lē mafai e Samasoni ona faatoilalo lona mana’o i le faitaaga na i’u ai ina fano o ia (Faamasino 16:1-31).
Le au pele e, tusa poo mea i le tino o loo e mana’o ai e tatau ma lelei, e tatau lava pea ona mafai ona e pulea ma taofi lou naunau i ai. O mea e te manatu e lelei ma agava’a mo oe e mafai ona ta’ita’ia oe i le agasala pe a ova atu ma tapula’a faa tulafonoina. Fa’ata’ita’iga; e ui e lē leaga le taumafa i meaai lelei, o le tele nauā o le taumafa, o se agasala aua e lē tusa ma fa’atonuga a le Atua ia faaeteete ma fai faatatau i mea uma (1 Korinito 9:25). Mo le toatele o tagata, o le inu tele ma ai tele ua faamativaina ai i latou (Fa’ataoto 23:21).
O se atali’i/afafine o le Atua, e tatau ona e faaeteete ma fuafua lelei i tulaga uma o le soifuaga. E tatau ona e faaeteete ma fuafua lelei i lau tautala aua o le tele o upu e i’u ina agasala ai (Fa’ataoto 10:19). Fa’ata’ita’iga, a fua tele mai le faatoaga a le tagata mauoa ae valea, e tupu tele lona fiafia ma i’u ina soona tautala tele ai o ia ma iloa ai le faamaualuga o lona loto, ma i’u ina fano ai o ia (Luka 12:16-20). E tatau fo’i ona e faaeteete i ou foliga vaaia. E lelei le fai lelei o ou laei; peita’i o le tele nauā o le faamuamua ma le fa’ataua o teuga ma le taitaina ma mulimulitu’i i so’o se mea fou e a’e mai o se faailoga o le laititi o le olaga fa’aleagaga. E fautuaina kerisiano ia taula’i lo latou fiafia i mea o i lugā ae lē o mea I le lalolagi (Kolose 3:1-2).
Le au pele e, o le ola faaeteete, o le tatau lea ona pulea o lou loto. Fai mai Solomona o se tagata ua lē pulea lona loto ua tusa ma se aai ua osofaia, ua leai se pa (Fa’ataoto 25:28). E le tatau ona e tuua se avanoa I le tino e fai ai le tuinanau (Roma 13:14). A e savali i la le Agaga ma tu’u lou loto I mea o i lugā ona lē faia lea e outou o tuinanauga o le tino (Kalatia 5:16, Kolose 3:2), ae ua outou ola i se olaga pulea lelei e fiafia i ai le Atua, I le suafa o Iesu, Amene.
-
OPEN HEAVENS
MATALA LE LAGI MO LE ASO FARAILE 4 IULAI 2025
(tusia e Pastor EA Adeboye)
Manatu Autu: Tatalo mo tagata matutua(Prayers for elders )
Tauloto – Levitiko 19:32 “Ia e tula‘i atu i luma o lē ‘ua ulu sinā, ‘ia e āva fo‘i i luma o le toeaina, ma ‘ia e mata‘u i lou Atua: O a‘u o le ALI‘I.”
Faitauga o le Tusi Paia: 1 Timoteo 5:17-19
Tatalo
Faafetai le Alii e, mo tagata matutua uma I lo’u siomaga. Faafetai mo le puipuiga i o latou soifua ma le avanoa ua ou maua e aoaoina mai iai latou. Tamā, faamolemole foai i tagata matutua uma i lo’u siomaga le soifua maloloina lelei i le tino ma le mafaufau. Ia mamao mai iai latou ma’i ma faama’i i le suafa o Iesu. Tamā, faamolemole ia siomia matou tagata matutua i le alofa. Aua nei latou faanoanoa ma maua lagona nofo toatasi, i le suafa o Iesu. Tamā, faamolemole foai i matou tagata matutua i le tino o Keriso le poto e taitai ma taiala i tupulaga talavou i le amiotonu. Ia maua uma aoaoga i le taitaiga a Agaga Paia, i le suafa o Iesu. Tamā faamolemole fesoasoani i le aumatutua e faailoa i tupulaga talavou le Talalelei ia Iesu Keriso. Ia avea a latou upu, tatalo ma galuega faatino e tauave le afi ina ia manumaloina agaga mo le malo o le Atua, i le suafa o Iesu. Tamā, faamolemole foai i le aumatutua le alofa tunoa e aoaoina ai tupulaga talavou i le poto na latou maua i mea na ui mai ai. Ia aua nei leiloa lenei poto pe a e valaau i o latou ola, i le suafa o Iesu. Tamā, faamolemole ia e faamagalo i mea sese na faia e matou tagata matutua, i le suafa o Iesu. Ia iai lou alofa mutimutivale iai latou faapea ma tupulaga e tutupu mai iai latou. Tamā, faamolemole foai i matou tagata matutua e lei faaolaina le avanoa e fetaiai ai ma oe ina ia latou iloa lou alofa e atoatoa faapea lau faaolataga. Fesoasoani iai latou e foai ma le atoatoa o latou ola ia te oe, i le suafa o Iesu. Tamā, faamolemole ia faasaoina ola ma soifua o matou tagata matutua, ia latou fiafia i fua o galuega o latou lima i le olioli ma le filemu seia oo i le aso e te valaau ai iai latou, i le suafa o Iesu. Le Alii e, faamolemole ia faasaoina galuega lelei na faia e matou tagata matutua. Fesoasoani iai latou ina ia latou faafaileleina tupulaga talavou e tauaveina ma faaauau a latou galuega lelei pea oo ina maliliu. Tamā faamolemole ia e foai mai le tamaoaiga e tausia lelei ai matou tagata matutua i lo’u siomaga. Fesoasoani mai ina ia avea au ma faamanuiaga iai latou, i le suafa o Iesu, Amene. Faafetai Tamā ua e faafofoga ia matou tatalo. Faafetai e te tali mai ia matou talosaga i lou alofa mutimutivale. Ia faamanū ma faneeneeina lou suafa e oo i le faavavau, faavavau lava, i le suafa o Iesu e tatalo atu ai, Amene. -
OPEN HEAVENS
MATALA LE LAGI MO LE ASO TOFI 3 IULAI 2025
(tusia e Pastor EA Adeboye)
Manatu Autu: O le Mana o le Faamanatuga Paia (The Power of the Holy Communion )
Tauloto – Kolose 3:13 “Ia fēfa‘apalepalea‘i, ma ‘ia fefa‘amāgāloa‘i ‘outou, pe ‘āfai ‘ua agaleagaina se tasi e se tasi; fa‘apei ‘ona fa‘amāgalo mai le Ali‘i ‘iā te ‘outou, ‘ia fa‘apea fo‘i ‘outou.”
Faitauga o le Tusi Paia: Ioane 6:53-58
I le tele o tausaga talu ai, na ma’i se tinā ae lē mafai e fomai ona maua se ma’i ia te ia. Na oo ina faapea mai o ia, ‘ave a’u I le sauniga o Agaga Paia’. Na aumai o ia i le nofoaga o sauniga i le aso ae lei oo i le sauniga ina ia maua sona avanoa i le pito i luma. Ona sa vave aumai, na auai atu foi i le sauniga o le Faamanatuga Paia, e faia i le afiafi o le aso e sosoo ma le sauniga o Agaga Paia. Ina ua maea le Faamanatuga Paia ma le polokalame i lea afiafi, ua toe taitai atu I lana taavale. Ao nofo i totonu o le taavale, na ia vaai atu i loi o fetolofi mai fafo o lona tino ona pepē lea. Na tilotilo atu i le fola o le taavale ua faulai mai loi ua pepē, e ui e leai ma ni loi i fafo o le taavale. Ua malolōina atoatoa o ia I lea po.
O le Faamanatuga Paia o se taumafataga e paia, peitai o se taumafaga e lamatia ai foi le tagata. Aua foi e matautia le mana i le toto ma le tino o Iesu Keriso. Fai mai le Faaaliga 12:11 “A ‘ua latou manumālō ‘iā te ia ‘ona o le toto o le Tama‘i Mamoe”. A e inu i le toto o le tamai mamoe ma le tatau, e mautinoa e maua lau tautinoga. Peitai afai e te ita ma lē loto faamagalo i ou uso ae e ai i le Faamanatuga Paia, e te ono oo i le oti. Afai e te ai i le areto ma le tatau, e te malolo ai ma afai e te inu i le uaina ma le tatau, e faasaolotoina ai oe.
Sa iai se fafine na ulufia e temoni e tautala i le leo o se tamaloa, e upu vale i le Atua ma lafo upu matuiā e faatatau ia Iesu Keriso. Sa ia leiloa le mafuaaga ae pe faapefea ona tuli ese nei temoni. Na sau I se tasi o matou sauniga, ma a taumafai e tatalo, e liu mai le temoni ma pule I lona leo, ona lafo lea o upu leaga i le Atua. Ina ua oo i le taimi o le Faamanatuga Paia, na faalogo mai le fafine ua ou faapea atu, ‘A e ai i lenei areto, o le tino lava o Keriso, e faamaloloina oe. A e inu i le uaina, e te manumalo i le tiapolo’. Na e ē le temoni i totonu ia te ia ma faapea mai, ‘aua nei e inu i lena uaina’. Ua amata i le fafine ona sii le faafetai i le Atua, ma o le taimi na inu ai i le uaina, na ee le temoni, alu ese ma è lei toe foi mai i le fafine lea.
Le au pele e, e matautia le mana o le Faamanatuga Paia ma è tatau ona e faamautinoa e te auai i le faamanatuga e pei ona poloai mai ai Iesu Keriso. Peitai e tatau ona e ‘aloese ma le loto lē faamagalo, mataua ma soo se ituaiga agasala pe afai e te le manao e faasagatau mai ia te oe lona mana matautia. E iai le mana matautia i le toto ma le tino o Iesu Keriso, i le suafa o Iesu, Amene.
-
OPEN HEAVENS
MATALA LE LAGI MO LE ASO LULU 2 IULAI 2025
(tusia e Pastor EA Adeboye)
Manatu Autu: E tusa ma lou agavaa 2 (According to your capacity 2)
Tauloto – Salamo 119:32 “Ou te momo‘e i le ala o au poloa‘iga, pe a o foa‘iina mai ‘iā te a‘u le loto matala.”
Faitauga o le Tusi Paia: Esoto 23:29-30
I le tele o tausaga talu ai, na savali mai se tagata ia te a’u ao ou ulufale atu i se potu ma uu lo’u lima ma faapea, ‘ua ou maua le faaluaina o lou faauuga’. Na ou savali ese lemū mai lea tagata ma ou faapea ia te a’u, ‘e lē faapea le auala e maua ai le faauuga’. Tusa pe faaloaloa ou lima i luga o se tagata e faamatuu atu le faauuga ia te ia, e fua le galue o le faauuga i lea tagata i lona agavaa faaleagaga.
O i latou e savavali i le lautele o le faauuga e tatau ona faia galuega e tusa ma le taitaiga a le Atua. E tatau ona vavaeeseina i latou e taitaia e le Atua, a leai, e aveesea e le Atua le faauuga aua o le faauuga e tosina mai i ai agaga. A tauave ese tagata le loloto o le faauuga ae lē opogi le ola vavaeeseina ma faamamaina e manaomia, e sili atu le afaina o lea tagata i le faauuga nai lo le manuia ai.
I le tele o tausaga talu ai, ou te lei anapogi e pei ona ou masani ai ae lei faia se sauniga o Agaga Paia. Ao faagasolo le polokalame, sa ou faia le galuega i le faauuga i le po atoa aua ua maea foai mai e le Atua. Peitai ina ua ou malolo atu i lo’u potu i le taeao po, ua tau le mafai ona ou tu mai le moega. Ua matua vaivai ponaivi o ou vae. Na ou aioi atu i le Atua e aumai le malosia e mafai ona ou auai atu ai i lei si au fono I lena aoauli. E lē faapea e manaomia le anapogi ona faatoa maua lea o le faauuga, peitai a leai le anapogi, e ono matua ou afaina i le faauuga. E le faatagaina oe e le Atua e te savali i le faauuga e sili atu i lou agavaa aua foi e ono faaumatia ai oe.
A e naunau e siitia le faauuga ia te oe, e tatau la ona faalautele atili lou agavaa i le faaleagaga. E le tuua e le Atua le lautele o le faauuga i se tagata e sili atu i le tulaga e na te gafatia. Ona o ia o se tamā lelei, e lē finagalo e avea lana mea alofa o se auala e faaumatia ai lea tagata, ma e na te lē tuuina atu ai. O le mafuta vavalalata ma le Atua o le ki lea e faatupuina ma faalautele lou agavaa faaleagaga. O le tele o lou latalata i le Atua o le tele foi lena o lou agavaa faaleagaga.
Le au pele e, e pei ona tatou vaaia i le faitauga mai le Tusi Paia o le asō, e manaomia e le Atua lana fanau e tuputupu ae pea, ina ia mafai ona ia foai atu mea uma ua ia saunia mo i latou. Atia’e lou agavaa faaleagaga e tauave le lautele ma le sili atu o le faauuga, e ala i le mafuta faifaipea ma le Atua I lona mamalu ma ola faapaiaina. O le tuputupu ae i lou tomai ma le agavaa faaleagaga, e manaomia lou mafuta faifaipea ma le Atua i lona nofoalii ma usitai i ana poloaiga, i le suafa o Iesu, Amene.
-
OPEN HEAVENS
MATALA LE LAGI MO LE ASO LUA 1 IULAI 2025
(tusia e Pastor EA Adeboye)
Manatu Autu: E tusa ma lou agavaa 1 (According to your capacity 1)
Tauloto – Kalatia 4:1 “Ou te fai atu fo‘i, o aso uma o itiiti ai le suli, e ui lava o ia e ana mea uma, e leai se mea e ‘ese ai o ia ma le pologa.
Faitauga o le Tusi Paia: Kalatia 4:1-2
E toatele tagata e ole atu i le Atua mo faamanuiaga; ae peitai, ana tali le Atua i le tele o nei tatalo i le taimi na ole atu ai, semanu e faaumatia i latou e vavega. Mo se faataitaiga, o se tama lelei, e tusa po o ia o se Pilionea, afai e tagi atu sona atalii 4 tausaga e fia ave taavale i se tasi o ana taavale, e na te teena aua e le mafai e lona atalii laitiiti ona fa’afoe le ta’avale. E faapena le Atua, e na te foai I lana fanau na o fa’amanuiaga e mafai ona latou fa’afoeina, faamanuiaga e lē fa’aumatia ai I latou. Le ‘au pele e, e mana’omia lou faatupuina o lou agavaa e mafai ai ona e tau’aveina fa’amanuiaga o lo’o e ole atu ai i le Atua. Afai e mana’o se tagata fa’atuatua e avea ma Peresetene o se atunuu, a e lē mafai ona ia pulea lelei tagata ma le tamaoaiga o se matagaluega o loo pule ai, e matua lamatia lea tagata pe a avea ma Peresetene o le atunuu i lena taimi. Aua foi a ‘avea ma Peresetene, e matua sili atu le taui ma le ogaoga o pulega leaga, o lona uiga, o le faasaoina o le tagata faatuatua mai ia tulaga, o le a lē faatagaina e le Atua e avea ma se Peresetene i lea taimi.
A valaau e le Atua tagata ma fa’aali iai fuafuaga mamao mo latou olaga, e taitai muamua e le Atua I ala e tapena lelei ai mo fuafuaga mamao ua ia fa’aali iai latou. Ina ua fa’aali e le Atua ia Iosefa, o le a avea ia ma ta’ita’i, (Kenese 37:5-10) na ia taitaia o ia mo le 13 tausaga, i aoaoga e tapena ai o ia. I totonu o ia tausaga, sa iai i tulaga taitai eseese, e saunia lelei ai o ia mo le tulaga o loo taitaia o ia e le Atua iai. (Kenese 39:1-4, 21-23) Ana faapea e avea ma taitai o Aikupito i le taimi fa’ato’a maea ai ana miti, semanū, e lē lava lona agavaa ma lē gafatia ona faia fa’aiuga atamai na ia faia.
I lona 40 tausaga, sa iloa lelei e Mose le mea sa finagalo le Atua e na te faia, peitai, ona e na te lei ausia le agava’a e fa’ataunuuina ai lona valaauina, o lea e sese le auala na ia fa’aaogaina, (Esoto 2:11-15). Na ave’eseina o ia e le Atua mai Aikupito ma tu’u e galue i le vao ia a’oa’oina i le onosai ma le poto a’o ia leoleo i lafu mamoe a le tamā a lona to’alua. (Esoto 3:1). Sa fa’apea foi Tavita, sa amata o se leoleo mamoe i lona talavou, ma sa ui I ala na saunia e le Atua e aoaoina ma tapena ai mo le 13 tausaga ina ua maea ona fa’au’uina e Samuelu e avea ma tupu o Isaraelu.
Le au pelē, ia a’oa’oina lou tagata e mafai ai ona e fa’afoeina fa’amanuiaga o lo’o e ole atu ai i le Atua. Ia e gauai i ta’iala a le Atua, ma ia e fa’atagaina le Atua e fesoasoani ia te oe ina ia faatupuina ou tomai ma agava’a, ma aveesea vaivaiga e fa’alavelave i le ‘ausia o faamoemoega mo lou olaga. Ua e maua tomai ma agava’a e fa’afoeina ai fa’amanuiaga o loo e ole atu ai i le Atua? I le suafa o Iesu, Amene.
-
OPEN HEAVENS
MATALA LE LAGI MO LE ASO GAFUA 30 IUNI 2025
(tusia e Pastor EA Adeboye)
Manatu Autu: Faamoemoega (Purpose)
Tauloto – Galuega 13:36 “O Tavita fo‘i, ‘ina ‘ua uma ‘ona ‘au‘auna i le finagalo o le Atua i lona lava tupulaga, ‘ua moe o ia, ma ‘ua fa‘atasiina atu i ona tamā, ‘ua o‘o fo‘i ‘iā te ia le pala.”
Faitauga o le Tusi Paia: Isaia 46:10-11
Ae e te lei fanau mai, e iai se galuega faapitoa ua atofa e le Atua ia te oe. Ua faamanino mai e Ieremia 1:5 e faapea “Na a‘u iloa oe a o le‘i faia oe e a‘u i le manava; na a‘u fa‘apa‘iaina oe a o le‘i fānau mai oe, na a‘u tofia oe e fai ma perofeta i nu‘u.”
Na tuuina oe e le Atua mo se faamoemoega faapitoa I le aiga na e fanau mai ai. Na ia tuuina oe i le nofoaga lena mo lana fuafuaga mo lou olaga mai le amataga. Ou te tatalo e fetalai atu le Atua ia te oe e tusa ma lou faamoemoega ma le mafuaaga ua ia tuuina ai oe i le aiga na e fanau mai ai.
O soo se tagata lava e iai lona faamoemoega autu na fanau ma ai i se aiga, nuu ma le atunuu. Mo se faataitaiga, i le Esoto 3:1-12, na faatonu faapitoa e le Atua Mose, ‘o lou faamoemoega o le aumaia o o’u tagata mai Aikupito, ina ia latou tapuai ia te a’u I lenei mauga’. I le Iosua 1:1-8, na fetalai le Atua ia Iosua o lana galuega o le vaevaeina o le laueleele I ona tagata. I le 1 Tupu 19:19-21, na faailoa e le Atua ia Elisaia, ‘o lau galuega i le taimi nei o le faifaatoaga, ma o loo lelei lau galue, peitai o le galuega ua ou tofia oe iai o la’u perofeta’.
A taofia le faamuamua o le tupe ae amata ona e faia le galuega na tuu ai oe e le Atua i le lalolagi nei, e le gata ina e maua tupe, ae maua foi mea e sili atu. Ua vave malolo ritaea Elisaia mai le faifaatoaga e avea ma perofeta, o le taunuuga o loo tusia i le 2 Tupu 4:12-13. Na avea ma tagata tautaua ma tauoloa na mafai ona ia fai atu i le fafine Sunema, ‘e te manao ou te talanoa i le tupu poo le palemia mo oe? O ai e te manao ou te talanoa iai mo oe?’ Ia e faatuatua i le Atua, e na te lei tuuina oe i le lalolagi nei e te puapuaga. A e maua loa le faamoemoega mo lou olaga, amata savali ai loa aua o le auala lena e te maua ai le loto malie ma le olioli mausalī. Fai mai i le Ieremia 29:11
“Auā o a‘u nei, ‘ua ‘ou iloa manatu ‘ua ‘ou manatu ai ‘iā te ‘outou, o manatu i le manuia, ‘ae lē o le malaia, o lo‘o fetalai mai ai le ALI‘I, e foa‘iina atu ‘iā te ‘outou le i‘uga e i ai le fa‘amoemoe.”
O le finagalo o le Atua ia e iloa ma silafia le faamoemoega o lou olaga ma savali ai. Afai e te lei iloa lava, ia e alu atu ia te ia i le Tatalo i le asō ma ole atu ia te ia. E na te faaali atu ia te oe ma avatu le alofa tunoa e faatino ai.
Tatalo
Tamā, faaali mai le faamoemoega mo lo’u olaga ma fesoasoani mai ia te a’u ina ia aua lava nei o’u alu ese ai, i le suafa o Iesu, Amene.
-
OPEN HEAVENS
MATALA LE LAGI MO LE ASO SA 29 IUNI 2025
(tusia e Pastor EA Adeboye)
Manatu Autu: Feagaiga faipaaga ma le Atua (Covenant Partnership with God)
Tauloto – 2 Nofoaiga Tupu 6:14“Ua fa‘apea atu fo‘i o ia, “Le ALI‘I e, le Atua o Isaraelu, e leai se Atua e tusa ma oe i le lagi, po o le lalolagi; o lo‘o tausia le feagaiga ma le alofa i au ‘au‘auna, o ē sāvavali i ou luma ma o latou loto ‘atoa;”
Faitauga o le Tusi Paia: 2 Tupu 4:8-37
I le faitauga o le Tusi Paia o le asō, na foai ma lulū le fafine Sunema e faifaipea i le soifuaga o Elia ma na faaosofia ai Elia e sueina o se mea e tauia ai o ia. Na iu lava ina maua e le fafine Sunema faamanuiaga na suia ai lona olaga. Ua ou iloa mai lenei tala, a e faamanuia i se faifeau moni o le Atua, ua e faia se feagaiga e fai paaga ai ma le Atua ma e te lē tau tatalo mo mea o loo e manaomia aua e saunia lava e le Atua.
E iai se vaega i totonu o le Ekalesia RCCG e taua o le ‘Paaga Faifeagaiga’. O tagata nei latou te siitia ma le filemu o’u lima i le itu tau tupe. Ou te fono ma i latou e faatasi i le tausaga, ma i se tasi o matou fono, na taitaiina a’u e Agaga Paia e faapea atu, ‘o outou uma sa siitia o’u lima, afai e iai se tasi o outou e iai se aitalafu, e totogi e le Atua lau aitalafu’. O se tasi o tamaloa na iai ua alaga leotele, Amene. E 50 ona tausaga ma sa faulai ana aitalafu. O le vaiaso na sosoo ai, na vili atu ai ia te ia le faletupe e fia maua se feiloaiga ma le pule sili. Na fesili mai le pule sili ia te ia , ‘lau susuga, e faapefea ona e totogiina lau aitalafu? Faataatia mai sau fuafuaga e mafai ona matou galulue atu iai.’ Ua ia tilotilo atu i le pule sili ma faapea atu, ‘tusa pe ou te totogiina atu le miliona tupe aferika mo aso uma talu ona ou fanau mai, e lē mafai ona ou totogiina lenei aitalafu.’ Ua faateia o ia ina ua logo atu e le faletupe mulimuli ane ua tusi esea ma faamagalo lana aitalafu. Ou te tatalo ia faia e lo’u tamā e ona lafu manu e faitau afe i luga o mauga(Salamo 50:10) mea tetele ma faulai mo oe e sili atu i ou manatunatuga uma, i le suafa o Iesu.
E malamalama lelei Aperaamo i feagaiga e fai paaga ma le Atua. Ina ua maea ona tau ma tupu e lima na tau ma Sotoma ma Komoro ma manumalo iai latou, na ia foai atu ia Mekisateko, le ositaulaga a le Atua maualuga, sefuluai o mea uma (Kenese 14:18-20). O lenei feagaiga faipaaga na siitia ai Aperaamo i se tulaga faulai ma ina ua oo atu ina matua, fai mai le Tusi Paia na faamanuia o ia e le Atua i mea uma (Kenese 24:1). O le auaunaga a Iosua ia Mose na faatulagaina ai o ia o se tasi na filifili e le Atua e taitai Isaraelu i le nuu na folafolaina (Esoto 33:11, Iosua 1:1-2). E faapena foi le auaunaga a Elisaia ia Elia na avea ai o ia ma se tagata na maua le faalua o le faauuga (2 Tupu 2:1-15).
Le au pele e, e finagalo le Atua e te sau ma faia se feagaiga e fai paaga ai ma ia e tauala mai taitai faaleagaga ua ia tofia mo oe. Ia e ava iai latou, e ala i lau foai ma le lagolago, e pei o le fafine Sunema, ma e saunia e le Atua mea uma o loo e manaomia ae e te lei ole atu ia te ia, i le suafa o Iesu, Amene.
-
OPEN HEAVENS
MATALA LE LAGI MO LE ASO TOONAI 28 IUNI 2025
(tusia e Pastor EA Adeboye)
Manatu Autu: Faatonuina O Au Vavega (Commanding Your Miracle)
Tauloto – Ioane 2:5“Ua fai ane lona tinā i ‘au‘auna, “O se mea lava e fai mai ai o ia ‘iā te ‘outou, ‘ia ‘outou faia.”
Faitauga o le Tusi Paia: Ioane 2:1-12
O loo faamatala mai ia i tatou i le tatou faitauga mai le Tusi Paia o le asō le tala i le faaipoipoga I Kana I Kalilaia. Ina ua uma le uaina o le faaipoipoga, na logo e Maria Iesu ma lona manatu o le a Ia fo’ia le faafitauli. Peita’i na tali Iesu e le’i o’o i lona itu aso. Atonu na ata Maria ma faapea ifo i lona loto, “Atali’i o lou taimi e o’o mai i le po ne’i.” Sa fai Maria i auauna ma lona mautinoa. “O se mea lava e fai mai ai o Ia ia te outou ia outou faia,” ma a’o le’i uma le aso, ‘o le le’i o’o mai’ ua avea ma ‘taimi nei.’
E mafai fo’i ona e poloaiina se vavega mai le Atua. E mafai ona e tatalo i se auala e te iloa ua fa’afofogaina e le Atua lau tatalo ma ua agai mai le vavega mo oe. O Iapese o se tagata sa faapea lana tatalo. Mo le tele o tausaga sa faaigoaina o ia o se pogai o le tigā ma le faanoanoa, seia o’o ina ia faapea mai, “lava ua lava.” Sa valaau Iapese i le Atua ia suia lona tulaga tigā i le manuia, ma na avatu e le Atua ia te ia le tali o lana tatalo.
Fai mai le Tusi 1 Nofoaiga A Tupu 4:10 “‘Ua vala‘au atu Iapesa i le Atua o Isaraelu, ‘ua fa‘apea atu, “E, fia manuia a‘u ‘iā te oe ma fa‘alauteleina lo‘u lau‘ele‘ele, ia ‘iā te a‘u fo‘i lou ‘a‘ao ma ‘ia e leoleo mai ‘iā te a‘u a‘i le leaga, ‘ina ne‘i tigāina a‘u.” Na avatu e le Atua ‘iā te ia le mea na ia fa‘atoga atu ai.”
Tatou te lē iloa poo le a le umi na tatalo ai Iapese ae tatou te iloa le tali o lana tatalo. Na feliuaina e le Atua lona talaaga. I le suafa e sili i suafa uma lava, soosemea ua leva ona e faatalitali i ai o le a o’o vave mai.
A poloaiina lau vavega, e tatau ona e iloa fa’aa’oa’o ma tumau i le tatalo faatauanau. Fai mai Iakopo 5:16 e aogā tele le tatalo fa‘atauānau a le tagata amiotonu. A o faia se sauniga o le Agaga Paia i le Aai o le Togiola. Sa talotalo o’u lima a’o o’u tula’i i luga o le Fata faitaulaga, ma sa amata tutupu ni vavega. E mafai ona faapea manatu o nisi o faifeau sa i ai ma vaai a’o tutupu ne’i vavega, “Aisea e le mafai ai fo’i ona lūlū o’u lima ma tutupu ni vavega? O le Atua e tasi o loo o’u auauna i ai e pei fo’i o lenei tagata; o’u te tatalo fo’i ma anapogi e lē aunoa.” Peita’i Atonu latou te lē iloa, a o lei o’o mai lea aso, e sefululima tausaga o o’u tatalo ia tutupu ni vavega i le lūlū o o’u lima. O nisi o mea o loo vaai tagata o tutupu I le RCCG o tali o a’u tatalo faifaipea I le Atua.
Le au pele e, aua e te vaivai e fa’atalitali i le Atua. Faatonu au vavega e o’o mai e ala i lou tatalo pea lava pea. A’o e tatalo, faalogo i le faatonu mai a Agaga Paia. Usitai i ai ona e maua vave lea o au vavega o loo e nofo tatalo ai.
Tatalo
Tamā faamolemole fesoasoani mai ia te a’u ia tumau le faifai pea o a’u tatalo e lē aunoa i le suafa o Iesu, Amene.
-
OPEN HEAVENS
MATALA LE LAGI MO LE ASO FARAILE 27 IUNI 2025
(tusia e Pastor EA Adeboye)
Manatu Autu: I lalo o lana faamalumaluga(Under his cover ).
Tauloto – Salamo 91:1 “O le nofo i le mea lilo o i ai lē Silisili‘ese, e mau o ia i le paolo o Lē e ona le malosi uma lava.”
Faitauga o le Tusi Paia: Salamo 91:1-16
A iai se faamalumaluga tau inisiua I se tagata poo se faalapotopotoga, e tatau i le kamupani inisiua ona faamautinoa e mafai ona totogi vaega leiloa pe faaleagaina o loo aofia ai pe a tupu. Peitai e lē faapei o le inisiua le Atua, o le faamalumaluga a le Atua e atoatoa ma mausali aua e taofia le tupu o le amioleaga.
O tagata uma, e i lalo o le puipuiga lautele a le Atua pe faaolaina pe leai. I le Mataio 5:45, e faia e le Atua, o lē na te fa‘aoso i lona lā i ē ‘ua amio leaga ‘atoa ma ē ‘ua amio lelei. A lē iai tagata lē faatuatua i lalo o le puipuiga lautele a le Atua, e lē mafai ona latou manava. A maua e tagata lē faatuatua ni vavega, e foai atu faaaitalafu, ma o se faailoga lea o le alofa o le Atua iai latou ma le fia avea ma ō latou tamā.
Peitai e iai puipuiga faapitoa tau lava o fanau a le Atua. Mo se faataitaiga, na fetalai Iesu i le Mareko 7:27 o le faamalologa o meaai a tamaiti. E faapena foi le puipuiga mai malosiaga o le pogisā, e faatoa maua pe afai o loo iai lea tagata i le vaega a Iesu. Fai mai le Kolose 1:13 ua ia lavea‘i mai ‘iā te i tatou nai le pule a le pouliuli, a ‘ua na ‘aumaia i tatou i le mālō o lona lava Alo pele. Afai e fia ola ma soifua se tagata i lalo o le puipuiga malu a le Atua Matautia, e tatau ona avea o ia ma ona atalii poo se afafine.
E pei lava o inisiua, e tatau I tagata faatuatua ona totogi se tau e tatala ai avanoa e maua uma ai faamanuiaga. Mo se faataitaiga, a sainia se inisiua a se tagata mo lana taavale, ma e totogi le tau o le tausaga e vaevae I masina uma peitai e na o le tasi le masina na totogi , e lē mafai e lea tagata ona maua le atoatoa o faamanuiaga pe a oo ina faaleagaina lana taavale. O le maua o faamanuiaga uma, e tatau i ē ona, ona faia le latou itu ma totogi le tau.
Le au pele e, o lou maua o puipuiga malu ma faapitoa a le Atua, o le maua o se mafutaga vavalalata ma le Atua. O lona uiga e tatau ona e suesue i lau Tusi Paia ma tatalo i aso uma, mafuta ma le au uso ma auauna i le Atua ma lou loto atoa. O le tele o kerisiano ua pauū atu i mailei a le fili ona ua latou leiloa mea i le agaga aua ua mamao ma le Atua mo se taimi umi. O lou mafuta faifaipea ma le Atua e te tumau ai i lalo o lana puipuiga faapitoa. O e nofo ea I le mea lilo o iai le Silisiliese pe na o lou alu i atu i totonu ma sau I fafo ? Afai e te fia maua le atoatoa o le puipuiga a le Atua, e tatau ona e tumau i lona mamalu, i le suafa o Iesu, Amene.
-
OPEN HEAVENS
MATALA LE LAGI MO LE ASO TOFI 26 IUNI 2025
(tusia e Pastor EA Adeboye)
Manatu Autu: Punaoa o le poto ma le malamalama(The source of wisdom and knowledge ).
Tauloto – Faataoto 2:6 “Auā o le ALI‘I na te foa‘i mai le poto mai lona fofoga le poto ma le fa‘autauta;”
Faitauga o le Tusi Paia: Isaia 33:5-6
O le poto ma le malamalama e matua taua tele i le olaga o so’o se tagata. E matua taua tele, fai mai le Faataoto 4:7 e faapea; “O le poto o le mea sili lea, ‘ia maua le poto; o mea uma ‘e te maua ia maua mai ai le atamai.”
O le poto o le sa’o o le faaaogaina o le malamalama. Afai e te maua mea uma i le lalolagi nei ma tele lou malamalama i le tele o mea ae lē sa’o le faaaogaina, e te lē o atoatoa lava. Fai mai le Hosea 4:6 “‘Ua fa‘aumatia lo‘u nu‘u ‘ina ‘ua leai se poto; o oe fo‘i na e tete‘e atu i le poto, o le mea lea ‘ou te tete‘e atu ai ‘iā te oe, e lē fai oe ma ositaulaga ‘iā te a‘u; ‘ua e fa‘agalogalo le tulafono a lou Atua, o a‘u fo‘i, ‘ou te fa‘agalogalo i lau fānau.”
O le fuaitau o loo taua i luga o loo faaalia ai ua faaumatia tagata o le Atua ona o le leai o se poto, o le taua lena o le poto ma le malamalama. O le fesili, e faapefea ona maua le poto ma le malamalama? I le taliina o lenei fesili, e tatau ona tatou suesue muamua le faapogai o le poto ma le malamalama. Fai mai le Tanielu 2:20, o le Atua e ona le poto ma le mana. O loo faaalia e le Iakopo 1:5, o le Atua e na te foai mai le poto, ao le Kolose 2:3 o loo faapea mai, o le poto ma le malamalama o loo lilo i le Atua. O loo manino, o le Atua le faapogai ma le punaoa o le poto, ua na o ia le Atua e poto. (1Timoteo 1:17).
I le taimi o a’u aoaoga maualuga i le Iunivesite, sa malaga i fafo le faiaoga e vaavaaia lau mataupu mo sina taimi. Ae lei malaga, sa ia aumaia se galuega faigata ou te faia. Ina ua toe foi mai ma vaai i le mamao ua oo iai lau suesuega, na tilotilo ma faapea mai, ‘Enoka, ou te iloa o oe o le kerisiano, ma è te lē pepelo ia te a’u. O le tulaga lea ou te tilotilo atu iai, e lē mafai ona e faia toatasi, ta’u mai, o ai na fesoasoani ia te oe?’. E ui na iloa e lo’u faiaoga e lē pepelo ni kerisiano, o ia o se Hindu ma e lē talitonu ia Iesu Keriso. Ana ou fai iai na fesoasoani mai Iesu Keriso, e lē talitonu i la’u tala. O lea na ou fai atu ai ia te ia, ‘na fesoasoani mai Polofesa Emanuelu’. Peitai na toe fesili mai, ‘Polofesa Emanuelu? O fea le vaega o le Iunivesite e iai?’
O polofesa pito popoto i le lalolagi, o lo latou tomai ma le poto e na o ni vaega taitasi aua e gata le poto ma le malamalama o le tagata. Peitai e silafia e le Atua so’o se mataupu, vaega ma so’o se mea i le lalolagi. A e fai paaga ma ia, e na te foai ma tatala atu avanoa i punaoa loloto o le poto ma le malamalama e fesoasoani ai ia te oe e ola ma soifua i se olaga e sili ona lelei, i le suafa o Iesu, Amene.
-
OPEN HEAVENS
MATALA LE LAGI MO LE ASO LULU 25 IUNI 2025
(tusia e Pastor EA Adeboye)
Manatu Autu: Mata’u tau o le Atua 2(Fear God Alone 2).
Tauloto – Isaia 8:12-13 “Aua tou te fai atu, O lē fouvale, i mea uma e ta‘ua o le fouvale i lenei nu‘u; ‘aua fo‘i tou te fefefe i mea latou te fefefe ai, ‘aua fo‘i tou te matata‘u. A o le ALI‘I o ‘au, ‘ia pa‘ia o ia ‘iā te ‘outou, o ia lava tou te fefefe ai, o ia fo‘i tou te matata‘u ai.”
Faitauga o le Tusi Paia: Salamo 112:1-10
E iai tagata e fefefe i taulaitu, ma isi malosiaga o le pogisa. O nisi e fefefe i latou pule, fefefe i lē manuia o mea latou te faia e oo foi ina fefefe i le manuia. E iai tagata e matua fefefe i ataata o i latou lava. Ou te iloa e toatele tagata, o meatotino, mea e tutupu e oo mai ai le fefe, peitai e tatau ona e malamalama, fai mai le 2 Timoteo 1:7
“Auā ‘ua lē foa‘iina mai e le Atua ‘iā te i tatou le Agaga e mata‘u ai, a o le Agaga e fa‘amalosi ai, ma alofa ai, ma pulea ai o tatou loto.”
O le Atua e pau lea o le Atua e tatau ona mata’u iai le lalolagi atoa. Na fetalai Iesu i le Mataio 10:28 “‘Aua fo‘i tou te matata‘u i ē fasioti le tino, ‘ae latou te lē mafaia ‘ona fasioti le agaga; ‘ae lelei ‘ona ‘outou matata‘u i lē ‘ua mafai ‘ona fano ‘iā te ia le agaga ‘atoa ma le tino i Kēna.”
A e fefe I tagata, o mea ua tutupu ma so’o se mea lava, e te lē o savali i le atoaga o le saolotoga na totogi e Iesu mo i tatou. Afai o loo e fefe lava i ni mea, o lona uiga e te lei malamalama ua faasaolotoina oe e Iesu ( Ioane 8:36). E le afaina pe e te mauoloa, poto, tautaua, ma lautele vaega e te pule ai, afai o loo e fefe pea, o loo e nofo ma le sauaina ma le saisaitiaga (1 Ioane 4:18).
A faasaoloto e Iesu se tagata, e na te foai atu i lea tagata mea uma e oo mai ai le ola ma le amio Atua, o so’o se mea e manaomia e le tagata e faasaoloto ai o ia (2 Peteru 1:3). Na afio mai Iesu e faasaolotoina i tatou mai le mata’u i le oti (Eperu 2:14-15). Ae o le taimi e sau ai lea tagata ia Iesu Keriso, e le tatau foi ona toe fefe i le oti.
Fai mai le Tusi Paia i le Salamo 112:1 “‘Ia ‘outou vivi‘i atu i le ALI‘I. ‘Amu‘ia le tagata o lē mata‘u i le ALI‘I, o lo‘o fiafia tele i ana poloa‘iga.”
O loo manino mai le fuaitau lea o tagata e matatau i le Atua e manuia . O le tagata e matau i le Atua e fiafia i ana tulafono. E le mafai ona e fai mai e te matau i le Atua ae inoino ma lē āva i ana poloaiga. A e matau i le Atua, e te fiafia i ana tulafono ma usitai iai.
Le au pele e, e lē tatau ona e fefe i se mea po’o se tagata. E nā o le Atua e tatau ona e matau iai. Faatuatua ia te ia ona ia faasaoloto lea o oe mai le fefe. Tuu mea uma i le Atua, olioli I lana Upu, usitai i ana poloaiga, ona ia avatu lea o le filemu i lou olaga atoa (Isaia 26:3). Faatuatua i le Atua ona ia faasaoloto lea o oe mai le fefe, i le suafa o Iesu, Amene.
-
OPEN HEAVENS
MATALA LE LAGI MO LE ASO LUA 24 IUNI 2025
(tusia e Pastor EA Adeboye)
Manatu Autu: Mata’u tau o le Atua 1(Fear God Alone 1).
Tauloto – Roma 13:3 “Auā o ali‘i, e lē se fa‘amata‘u i latou e amio lelei, na o ē amio leaga. O lo‘u mana‘o ‘ea ‘ia e lē fefe i le pule? ‘Ia e amio lelei, ‘ona ta‘uleleia mai lea o oe e ia.”
Faitauga o le Tusi Paia: Galuega 12:1-11
O loo tusia manino i le faitauga o le Tusi Paia o le asō, ia e amio lelei ma faia le mea tonu, aua e te fefe i le malò poo se faalapotopotoga. Mo se faataitaiga, a fefe se ave taavale pe a vaai atu i se leoleo, e leiloa poo ua ia solia se tulafono e pulea taavale afi. A e vevesi solo pe a ō mai tagata faigaluega mai le ofisa o lafoga, e leiloa pe le’i totogiina lafoga a le malo, ma na fetalai Iesu i le Mataio 22:21 “o mea a Kaisara (malo), ‘ia ‘outou avatu ‘iā Kaisara”. E lē sili ea le faia o le mea tonu i lō le fefe? Fai le mea tonu ona le taitai lea ona e fefe I tagata faigaluega a le malo.
E iai nisi atunuu, e fefefe tagata i tagata faigaluega a le malo, e lē faapea o latou faia mea sese ae ona o le faailoga lanu ma le taotaomia. A faaaoga e tagata o le malo lana pule e taufaafefe ai ia te oe, aua e te fefe I lena tagata. Tau i le ave lau mataupu i le Atua, e tau o ia mo oe. Peitai e tatau ona e masani i le faalagolago i le Atua ae lei oo mai puapuaga.
I le tele o tausaga talu ai, na ou faalogo o loo taupulepule le malo e pulea e fitafita e saisai atu a’u ma loka, ona na fai le autalaitu i le taitai’au, o a’u tatalo o loo faalavelave ia latou polokalame mo le malo. Sa ou fefe ina ua ou faalogo iai, ae I lena po, na ou lafoai lenei mataupu i le Atua, ma è lei atoa se vaiaso ae maliu lenei taitai o le malo. A e matau i le Atua ma è faia le mea tonu, e tau o ia mo oe.
I le Tanielu 3:16, e toatolu tama Iutaia na latou tetee i le poloaiga leaga a le tupu, ae na faasaoina i latou mai lenei pule saua. Na puipuia i latou e le Atua aua na latou filifili e matau i le Atua ae lē o le tagata. Ina ua amata e Herota sauaga i le Ekalesia, ua fasiotia Iakopo ae faafalepuipui Peteru, ma ua tatalo e lē aunoa le au kerisiano. Ua galueaina mai latou tatalo mea ofoofogia, ua faasaolotoina Peteru i le afiafi na tuu e fasiotia ai o ia, ao Herota ua aia e anufe.
Le au pele e, faamolemole ia e taumamao mai soo se tulaga e te ono fefe ai i le malo. Peitai afai e te lei faia se mea sese ae o loo sauaina pea oe e tagata o le malo e leai se mafuaaga, na o le tu’u atu lava o lau matautu I le Atua, e mautinoa e na te puipui ia te oe. Afai o loo e matau I le Atua ma faia le amiotonu, e lē tatau ona e fefe pe mata’u I se tagata, faalapotopotoga poo le malo, i le suafa o Iesu, Amene.
-
OPEN HEAVENS
MATALA LE LAGI MO LE ASO GAFUA 23 IUNI 2025
(tusia e Pastor EA Adeboye)
Manatu Autu: Taunuuga o miti (Achieving dreams).
Tauloto – Filipi 3:14 “Ou te tausisi atu i le fa‘ailoga, ‘ia maua ai le taui na vala‘auina ai a‘u mai lugā e le Atua ‘iā Keriso Iesu.”
Faitauga - Tusi Paia: 2 Nofoaiga Tupu 15:7-9
I le aso na ou faauu ai mai le Iunivesite i le tausaga 1967, sa iai se matai taua o le taulaga na tu ai le Iunivesite na faee iai le faailoga faapitoa maualuga (honorary doctorate). O se sauniga mamalu ma le matagofie. Na ou fai i la’u uo i lea aso, ‘e iai le aso e maua ai lo’u faailoga faapea mai le Iunivesite lenei’. Na tilotilo mai ia te a’u, ua ata ma faapea mai, ‘a faapea e mafai ona ausia i le aoaoga, ou te iloa e te mafaia ona e te poto, peitai e te lē agavaa ona e leai sou mamalu. O faailoga e avatu i tagata ona o le mamalu ( honourary doctorate degrees) e lē soona faae’e i soo se tagata’.
E moni lana faamatalaga i lea taimi, aua foi e lē o au o se tagata e ono agavaa i ia ituaiga faailoga. O maua ma lau uo ua na o ni tamaiti aoga o loo fiafia i le ma faauuga o lea aso, ma aai i meaai e maua i le matou nuu. Ua tele tausaga ua mavae, ma è iai le aso na maua ai se tusi mai le Iunivesite lava lea, ua filifilia e le komiti faatonu a le Iunivesite, e latou te tuuina mai se faailoga faapitoa maualuga (honorary doctorate degree) ia te a’u.
E leai se maualuga e te lē oo iai pe a e tumau ona latalata i le Atua ma galue malosi ina ia e ausia au fuafuaga mamao. I le Kenese 37:5-10, na miti Iosefa o le a avea o ia ma taitaisili. I lea taimi, e oo i lona tamā e lei manatu ua matua e mafai ona galue ma ona uso e leoleo mamoe. I le faasologa o lona olaga, na avea ma pologa, ae na matuā galue punouai ma faamautinoa e na te lē faia se mea e agasala ai i le Atua(Kenese 39:9). E lei leva, ae siitia mai le pagota i le avea ma palemia o se atunuu pito maualuga le tamaoaiga i lea vaitau.
I le 1 Samuelu, ina ua alu atu Samuelu e faauu le tupu mai atalii o Iese, sa lei iai Tavita i atalii o Iese. Peitai, e oo atu i le 2 Samuelu, ua nofo o ia i le nofoalii o le tupu o Isaraelu. Tusa pe na lamatia lona ola ona o Saulo, e lei toilalo pe faavaivai ai. O nisi tagata ua faaaoga ni luitau laiti e fai ma alofaga o le lē ausia o latou fa’amoemoega. O le avea o luitau ma alofaga e mo ē toilalo, ae o ē manumalo e faaaoga luitau e uunaia le alu i luma e ausia latou faamoemoega.
Le au pele e, o tagata e ausia latou faamoemoega ma miti, e tasi le autu e taulai iai le vaai. E latou te lē faatagaina so’o se mea e faalavelave i le ausia o vaega ua totoina i latou mafaufau. Taulai le vaai i au miti ma faamoemoega, galue malosi ma aua e te fiu gofie. Faatuatua i le Atua, e fesoasoani o ia ia te oe ina ia ausia au miti.
Tatalo
Tamā, faamolemole fesoasoani mai ina ia ou tumau i lo’u faamoemoe ma matuā latalata ia te oe a’o ou galue ia ausia a’u miti ua e tuuina i lo’u loto, i le suafa o Iesu, Amene.
-
OPEN HEAVENS
MATALA LE LAGI MO LE ASO SA 22 IUNI 2025
(tusia e Pastor EA Adeboye)
Manatu Autu: O se agaga sili ona lelei (An excellent spirit).
Tauloto – Tanielu 6:3 “A ‘ua sili lenei Tanielu i ali‘i silisili ma ali‘i sili, ‘ina ‘ua tele lona atamai, sa manatu fo‘i le tupu ‘ia tofia o ia e pule i le mālō uma.”
Faitauga - Tusi Paia: Roma 12:10-21
O Tanielu sa ia te ia se agaga sili ona lelei i ona luga. O le Agaga o le Atua na faaleleia nauā ia, na mana’o ai le tupu e tofia o ia e pule i le mālō uma (Tanielu 6:1-3). Sa leai se isi tagata I totonu o le mālō atoa sa mafai ona faatusa ia Tanielu. Sa iloa le auai faatasi o ia ma le Atua, ma lona atamai i so’o se mea na fealua’i ai.
E lelei lou lesitala e te aoga ma maua tusi pasi, a’o le Agaga Paia na te faaleleia atoa oe. A afio ifo le Agaga o le Alii I ou luga ma faamalumalu ia te oe, o le a toatele e sailia ma mana’omia oe. E lē tulia oe e se isi, ae o le a toatele tagata ma faalapotopotoga e saili ia o latou iloa ma masani ia te oe, ma o le a e filifili poo ai e te mana’o i ai.
Ina ua o matou fausia le ulua’i fale tele o le RCCG e lata ane I le auala taavale o Lagos Ibadan, na faapea o le fale aupito tele lea I totonu o Afelika i lea vaitaimi. Na omai nisi o la’u fanau ma fai mai ia te a’u e leai se mea matou te toe popole ai i se fale, ma sa o’u ata. E lua tausaga mulimuliane ae toe faatele lo matou fale ua lē ofi. E tasi le tausaga na sosoo ai a ua tatau ona faaluaina le tele o le fale, ma i le tausaga na sosoo na manaomia ona toe faatele atili le fale. Sa faaauau ona o matou faatele lo matou fale aua e lē mafai ona ou malie i se tulaga e itiiti ifo i le finagalo ma polokalame a le Atua mo i matou. O se uso e ia te ia se agaga lelei e lē mafai ona malie i se mea faatauvaa, ma ou te iloa le tulaga e tatau ona galulue agai i ai i matou, na faaali mai e le Atua ia te a’u. O tagata e i ai le agaga e sili ona lelei, e manana’o pea lava i mea e sili atu mai le Atua e lē aunoa. E lē faamalieina i latou i mafutaga o ananafi aua o le alofa mutimutivale o le Atua e fou i taeao uma (Auega 3:22-23).
O le sili ona lelei o Tanielu e lē gata ina iloa i lana galuega ma ona tiute fai; na faapena fo’i ona vaaia i le la mafutaga ma le Atua. Ina ua fai le poloaiga a le tupu, ua sā ona toe tapua’i i se isi e ese mai le tupu, sa lē mafai e Tanielu ona usita’i i lea poloaiga ona e mafana tele le la mafutaga ma le Atua. Atonu na faapea nisi uso, “o le poloaiga e na o le tolusefulu aso le umi; e uma fo’i le sā, toe amata a’u tatalo.” e lei faapea Tanielu. E lei mana’o e faaitiitia le taimi ma le Atua, ma o le tumau o lona naunautai i le Atua, ua avea ai o ia ma tagata sili ona lelei i vaega uma o le soifuaga.
Le au pele e, e lē mafai ona e fai mai e sili ona e lelei i lau galuega po o lau aoga pe afai e te pāiē i lau tautua I le Atua ma e faaletonu i le lua mafutaga ma Ia. Ou te tatalo ia avea le agaga o le sili ona lelei e faailogaina ai oe i so’ose vaega o le olaga, I le suafa o Iesu, Amene.
-
OPEN HEAVENS
MATALA LE LAGI MO LE ASO TOONAI 21 IUNI 2025
(tusia e Pastor EA Adeboye)
Manatu Autu: O le Peresitene o Peresitene (President of Presidents).
Tauloto – Salamo 119:113 “Ou te ‘ino‘ino i ē loto fetōa‘i, a ‘ou te naunau i lau tulafono.”
Faitauga - Tusi Paia: Tanielu 2:20-23
I a’u malaga taamilo i le lalolagi e lauga le talalelei, ua o’u maitaulia ai, e lē o peresitene uma e tutusa. Sa o’u asiasi i se atunuu laititi, o le aofa’i o leoleo I le atunuu e to’a luasefulu. O le mālō lea e amanaia e Mālō ‘aufaatasi, o lea la, a potopoto mālō I le fono tele a Mālō aufaatasi e auai ai fo’i ma le peresitene. Peita’i e lē mafai ona e faatusaina lea peresitene i le peresitene o se atunuu e silia i le 40,000 ona leoleo. E faapea fo’i ona lē mafai ona e fa’atusatusa Iesu i soose ta’ita’i fa’ale lalolagi. O Ia o le Peresitene o peresitene (Faaaliga 19:16).
Fai mai Tanielu 4:32; Ua pule lē Silisili ese i le mālō o tagata.
Afai e te mana’o e matalatala mai faitotoa ia te oe, e tatau ona e fa’auō ia Peresitene Iesu. E ia te Ia le suafa e sili i suafa uma lava ma o mea uma lava I le lagi ma le lalolagi ma lalo o le lalolagi e ao ona tootuli ma ifo pe a taua lona suafa (Filipi 2:9-11). Po’o le a le malosi o se peresitene, afai na te folafola se sā poo se tapu, e na o totonu lava o lona nu’u o nofo ai e aafia i le sā. Peita’i o Iesu, e pule o Ia i le lalolagi atoa, i le lagi e o’o fo’i I lalo ifo o le lalolagi. E tatau ona e naunau ia lua mafuta vavalalata ma Ia, aua a faapea, so’osemea e te i ai e matala faitotoa ia te oe faapei o Peresitene Iesu lava ia lea ua afio mai.
E mafai ona mafana le lua mafutaga ma le Atua pe a e tausi i ana tulafono. O Tavita o le tagata e tatau ma le finagalo o le Atua, ua faapea mai; “Ua tele lava lo’u naunau i lau tulafono; o’u te mafaufau i ai i le aso atoa,” (Salamo 119:97). A e alofa i se isi, e te naunau e lē aunoa e mafuta ma lea tagata. O tulafono a le Atua o ona ala ia ma e te maua i lana Upu. A o e manatunatu i ona ala ma faataga e faatumu ai lou loto, o le a atili mafana ai le lua mafutaga ma foliga ai i le Alii ma lona malosi ma lona mana. Na molimau fo’i Tavita; o e naunau I le tulafono a le Atua e tele lo latou filemu, e leai fo’i se mea e tausuai ai i latou (Salamo 119:165). Afai e leai se mea e te tausuai ai o lona uiga e leai fo’i se mea e luluina pe faapopoleina oe.
O Peresitene Iesu o le perenise o le filemu ma o i latou e mafuta vavalalata ma Ia e faafiafiaina i latou e lē aunoa i le filemu tusa poo a tulaga o si’osi’omia i latou. Poo le a le faaletonu e o’o I le tamāoaiga o se mālō, o i latou e nonofo faatasi ma se peresitene i lona fale e mautinoa e i ai pea lava meaai e aai ai. Afai e moni lea tulaga i peresitene fa’ale lalolagi, e sili mamao atu Peresitene Iesu, o lē o loo afio I le mālō o lona tamāoaiga e lē suia, e tupu pea e leai se mea e mativa ai. I le suafa o Iesu, Amene.
-
OPEN HEAVENS
MATALA LE LAGI MO LE ASO FARAILE 20 IUNI 2025
(tusia e Pastor EA Adeboye)
Manatu Autu: Aua e te taumafai e gaio mai le Atua (Don’t try to steal from God ).
Tauloto – Isaia 42:8 “O a‘u o le ALI‘I, o lo‘u igoa lea; o lo‘u mamalu fo‘i ‘ou te lē avatua lea i se tasi ma lo‘u vi‘iga ‘ou te lē avatua i tupua ‘ua ta.”
Faitauga - Tusi Paia: Tanielu 4:1-37
I tausaga ua leva, ao soifua lou tamā faaleagaga, na ia auina atu se faifeau e amata se au lotu i se tasi taulaga i Nigeria i sisifo. Ua amata ona tupu le aulotu ona manatu lea o Le faifeau, ona o ia na totōina, e mafai ona ia suia e avea ma ana lotu. Ua ia aveesea le igoa o le lotu Redeemed Christian Church of God(RCCG) i luga o le laupapa faailoilo ae suia i lana lotu fou. Ina ua faalogo iai lo’u tamā faaleagaga, na ia augani i le faifeau e aua le faia, ae musu. Ua ia faapea mai, ‘o le a le uiga? O a’u le faifeau iinei, na ou amataina le galuega, o tagata o a’u mamoe”. Fai mai lo’u tamā, ‘ae na matou faauuina oe, ma auina atu oe e amata le galuega i le igoa o le RCCG. E le gata i lea, e lē o oe o se faaola. O le lotu foi o le lotu a lō tatou faaola na faaolaina i latou. E lē o sau lotu poo sa’u lotu foi’. Peitai, na finau mai pea lenei faifeau. Ona faapea atu lea o lou tamā, ‘ua lelei, ae sei o ta tatalo’. Ao tatalo, na agi mai se matagi e pei o le a timu, e oo atu i le taeao na sosoo ai, ua ufitia uma le tino o le faifeau lea i le lepela mai lona ulu se’i o’o i tamaimaivae.
Afai o le tupu o tupu e ona se mea, aua e te avea e pei o oe e ona. A e faia, o loo e taalo i le afi. O le faifeau i le tala na ou faamatalaina, na manatu e mafai ona ia faoa se mea a le Atua ae leai se taui. Afai e iai se mea e na o le tasi le tagata e iai le aia tatau e pule ai, e le mafai e seisi tagata ona taumafai e faoa. O le Atua e ona ma pule i le lalolagi, ma mea o tumu ai atoa ma tagata uma o loo iai (Salamo 24:1). O lona uiga e pule i le lalolagi ma vaavaaia mea o tutupu ai. I le Luka 12:16-20, na talanoa mai le tagata na taua e Iesu e valea, i lona agaga e pei e pule ai, ae na uma lona ola I le pō lava lea.
E lē vaeluaina pe avatu le pule a le Atua i le lalolagi i seisi tagata, e faapena foi na te lē vaeluaina i se tagata lona mamalu. O lona mamalu e ia te ia lava, ma o so’o se tagata e taumafai e faoa mai ia te ia e iai lona taui. A faatino e le Atua se mea e tauala ia te oe, ia vave ona e faafoi le viiga ia te ia aua foi e lē tatau ona ia te oe. I le faitauga o le Tusi Paia i le asō, na taumafai Herota e faoa le viiga o le Atua mo ia lava, ma na avea o ia ma manu i le vaomatua mo le fitu tausaga. Na pa’i le Atua I lona loto ma suia i se loto o se manu, ona gata lea o ana folafolaga faamaualuga.
Le au pele e, e fuā le Atua i mea uma e pule ai. Ua e faoa ea le mamalu o le Atua mo oe lava? I le suafa o Iesu, Amene.
-
OPEN HEAVENS
MATALA LE LAGI MO LE ASO LULU 19 IUNI 2025
(tusia e Pastor EA Adeboye)
Manatu Autu: Faafoisia e le Atua (Divine Restoration ).
Tauloto – Ioelu 2:25 “Ou te taui atu ‘iā te ‘outou o tausaga na ‘aina e le sē akerise, ma le sē aleka, ma le se kasili, ma le sē kasama, o la‘u itūtau‘a tele na ‘ou ‘auina atu ‘iā te ‘outou.”
Faitauga - Tusi Paia: Mataio 12:9-13
Ao avea a’u ma faiaoga i le Iunivesite i Nigeria, e iai se tamaloa e lei siitia lona totogi ma le tulaga mo le 12 tausaga ona sa nānāina e se tagata le faila o ona faamaumauga. Ina ua faafoisia ma tauia e le Atua mea uma na leiloa, na suia le ulu o le matagaluega, ma na fesili le pule fou e fia vaai i i faila a tagata faigaluega uma. Na saili i le faila a lenei tamaloa seia iu ina maua mai le nofoaga na nānāina ai. Ina ua tatala lana faila, na iloa ai sa tatau ona faalua ona siitia lona totogi, ma sa faia loa le faaiuga, e faaluaina le siitia o lona totogi. E mafai e Le Atua ona toe faafoisia ma tauia tausaga uma ua misia ai. E mafai ona ia suia mea e foliga e lē mafai ona toe suia ma toe faafoisia avanoa ua misia. Na ulu atu Iesu i le malumalu ma tau atu i se tamaloa lima gase. Ae lei toe afio ese Iesu mai le malumalu I lena aso, na ia faamautinoaina na toe ola le lima gase ma ua toe faafoisia e Le Atua. I le suafa e sili i suafa uma lava, afai ua iai se mea ua gase i lou olaga, e toe faafoisia ma tauia i le asō.
O nisi o kerisiano, o latou savaliga ma le Atua e mafai ona faamatalaina ua gase. Mo se faataitaiga, a oo se kerisiano i se tulaga ua tau lē atoa se 30 minute o tatalo ae sa masani ona faitau itula o mafuta i le mamalu o Le Atua, ua gase lea ituaiga savaliga. O nisi o kerisiano sa masani ona tatalo ma faamalolo i ma’i ma tutuli temoni i le suafa o Iesu, ae o Le taimi nei, ua mama’i ma ulufia e temoni. Afai o e faalogo poo faitau i lenei faamalosiau ma ua e iloa ua gase lau savaliga ma le Atua, ou te tatalo ia toe faafoisia i le asō, i le suafa o Iesu. Ia avatu e Le Alii se manava fou ia te oe ina ia e maua se mamalu e sili atu i lō le muamua (Hakai 2:9).
Fai mai Iopu, tusa poo le a le leaga ua oo iai le laau ua tipi, afai lava o loo iai le ogalaau i le eleele ma maua sina vai, e iai lava le faamoemoe e toe ola (Iopu 14:7-9). Le au pele e, ona o lena e te soifua ma faitauina lenei faamalosiau, o lona uiga o loo iai le faamoemoega ia te oe e toe faaleleia Le tulaga o loo gase I lou olaga. E pau lau mea e tatau ona fai, o le gauai i lē mafai ona toe faafoisia mea uma, ma saili i ona fofoga mo se fesoasoani. E mafai ona ia oo atu i lou olaga ma toe faafoisia mea uma ua leiloloa i le suafa o Iesu. Afai lava o loo iai le manava ia te oe, e mafai e Le Atua ona toe faafoisia mea uma ua e leiloa, i le suafa o Iesu, Amene.
- Show more
