Episodes
-
OPEN HEAVENS
MATALA LE LAGI MO LE ASO SA 29 IUNI 2025
(tusia e Pastor EA Adeboye)
Manatu Autu: Feagaiga faipaaga ma le Atua (Covenant Partnership with God)
Tauloto – 2 Nofoaiga Tupu 6:14“Ua fa‘apea atu fo‘i o ia, “Le ALI‘I e, le Atua o Isaraelu, e leai se Atua e tusa ma oe i le lagi, po o le lalolagi; o lo‘o tausia le feagaiga ma le alofa i au ‘au‘auna, o ē sāvavali i ou luma ma o latou loto ‘atoa;”
Faitauga o le Tusi Paia: 2 Tupu 4:8-37
I le faitauga o le Tusi Paia o le asō, na foai ma lulū le fafine Sunema e faifaipea i le soifuaga o Elia ma na faaosofia ai Elia e sueina o se mea e tauia ai o ia. Na iu lava ina maua e le fafine Sunema faamanuiaga na suia ai lona olaga. Ua ou iloa mai lenei tala, a e faamanuia i se faifeau moni o le Atua, ua e faia se feagaiga e fai paaga ai ma le Atua ma e te lē tau tatalo mo mea o loo e manaomia aua e saunia lava e le Atua.
E iai se vaega i totonu o le Ekalesia RCCG e taua o le ‘Paaga Faifeagaiga’. O tagata nei latou te siitia ma le filemu o’u lima i le itu tau tupe. Ou te fono ma i latou e faatasi i le tausaga, ma i se tasi o matou fono, na taitaiina a’u e Agaga Paia e faapea atu, ‘o outou uma sa siitia o’u lima, afai e iai se tasi o outou e iai se aitalafu, e totogi e le Atua lau aitalafu’. O se tasi o tamaloa na iai ua alaga leotele, Amene. E 50 ona tausaga ma sa faulai ana aitalafu. O le vaiaso na sosoo ai, na vili atu ai ia te ia le faletupe e fia maua se feiloaiga ma le pule sili. Na fesili mai le pule sili ia te ia , ‘lau susuga, e faapefea ona e totogiina lau aitalafu? Faataatia mai sau fuafuaga e mafai ona matou galulue atu iai.’ Ua ia tilotilo atu i le pule sili ma faapea atu, ‘tusa pe ou te totogiina atu le miliona tupe aferika mo aso uma talu ona ou fanau mai, e lē mafai ona ou totogiina lenei aitalafu.’ Ua faateia o ia ina ua logo atu e le faletupe mulimuli ane ua tusi esea ma faamagalo lana aitalafu. Ou te tatalo ia faia e lo’u tamā e ona lafu manu e faitau afe i luga o mauga(Salamo 50:10) mea tetele ma faulai mo oe e sili atu i ou manatunatuga uma, i le suafa o Iesu.
E malamalama lelei Aperaamo i feagaiga e fai paaga ma le Atua. Ina ua maea ona tau ma tupu e lima na tau ma Sotoma ma Komoro ma manumalo iai latou, na ia foai atu ia Mekisateko, le ositaulaga a le Atua maualuga, sefuluai o mea uma (Kenese 14:18-20). O lenei feagaiga faipaaga na siitia ai Aperaamo i se tulaga faulai ma ina ua oo atu ina matua, fai mai le Tusi Paia na faamanuia o ia e le Atua i mea uma (Kenese 24:1). O le auaunaga a Iosua ia Mose na faatulagaina ai o ia o se tasi na filifili e le Atua e taitai Isaraelu i le nuu na folafolaina (Esoto 33:11, Iosua 1:1-2). E faapena foi le auaunaga a Elisaia ia Elia na avea ai o ia ma se tagata na maua le faalua o le faauuga (2 Tupu 2:1-15).
Le au pele e, e finagalo le Atua e te sau ma faia se feagaiga e fai paaga ai ma ia e tauala mai taitai faaleagaga ua ia tofia mo oe. Ia e ava iai latou, e ala i lau foai ma le lagolago, e pei o le fafine Sunema, ma e saunia e le Atua mea uma o loo e manaomia ae e te lei ole atu ia te ia, i le suafa o Iesu, Amene.
-
OPEN HEAVENS
MATALA LE LAGI MO LE ASO TOONAI 28 IUNI 2025
(tusia e Pastor EA Adeboye)
Manatu Autu: Faatonuina O Au Vavega (Commanding Your Miracle)
Tauloto – Ioane 2:5“Ua fai ane lona tinā i ‘au‘auna, “O se mea lava e fai mai ai o ia ‘iā te ‘outou, ‘ia ‘outou faia.”
Faitauga o le Tusi Paia: Ioane 2:1-12
O loo faamatala mai ia i tatou i le tatou faitauga mai le Tusi Paia o le asō le tala i le faaipoipoga I Kana I Kalilaia. Ina ua uma le uaina o le faaipoipoga, na logo e Maria Iesu ma lona manatu o le a Ia fo’ia le faafitauli. Peita’i na tali Iesu e le’i o’o i lona itu aso. Atonu na ata Maria ma faapea ifo i lona loto, “Atali’i o lou taimi e o’o mai i le po ne’i.” Sa fai Maria i auauna ma lona mautinoa. “O se mea lava e fai mai ai o Ia ia te outou ia outou faia,” ma a’o le’i uma le aso, ‘o le le’i o’o mai’ ua avea ma ‘taimi nei.’
E mafai fo’i ona e poloaiina se vavega mai le Atua. E mafai ona e tatalo i se auala e te iloa ua fa’afofogaina e le Atua lau tatalo ma ua agai mai le vavega mo oe. O Iapese o se tagata sa faapea lana tatalo. Mo le tele o tausaga sa faaigoaina o ia o se pogai o le tigā ma le faanoanoa, seia o’o ina ia faapea mai, “lava ua lava.” Sa valaau Iapese i le Atua ia suia lona tulaga tigā i le manuia, ma na avatu e le Atua ia te ia le tali o lana tatalo.
Fai mai le Tusi 1 Nofoaiga A Tupu 4:10 “‘Ua vala‘au atu Iapesa i le Atua o Isaraelu, ‘ua fa‘apea atu, “E, fia manuia a‘u ‘iā te oe ma fa‘alauteleina lo‘u lau‘ele‘ele, ia ‘iā te a‘u fo‘i lou ‘a‘ao ma ‘ia e leoleo mai ‘iā te a‘u a‘i le leaga, ‘ina ne‘i tigāina a‘u.” Na avatu e le Atua ‘iā te ia le mea na ia fa‘atoga atu ai.”
Tatou te lē iloa poo le a le umi na tatalo ai Iapese ae tatou te iloa le tali o lana tatalo. Na feliuaina e le Atua lona talaaga. I le suafa e sili i suafa uma lava, soosemea ua leva ona e faatalitali i ai o le a o’o vave mai.
A poloaiina lau vavega, e tatau ona e iloa fa’aa’oa’o ma tumau i le tatalo faatauanau. Fai mai Iakopo 5:16 e aogā tele le tatalo fa‘atauānau a le tagata amiotonu. A o faia se sauniga o le Agaga Paia i le Aai o le Togiola. Sa talotalo o’u lima a’o o’u tula’i i luga o le Fata faitaulaga, ma sa amata tutupu ni vavega. E mafai ona faapea manatu o nisi o faifeau sa i ai ma vaai a’o tutupu ne’i vavega, “Aisea e le mafai ai fo’i ona lūlū o’u lima ma tutupu ni vavega? O le Atua e tasi o loo o’u auauna i ai e pei fo’i o lenei tagata; o’u te tatalo fo’i ma anapogi e lē aunoa.” Peita’i Atonu latou te lē iloa, a o lei o’o mai lea aso, e sefululima tausaga o o’u tatalo ia tutupu ni vavega i le lūlū o o’u lima. O nisi o mea o loo vaai tagata o tutupu I le RCCG o tali o a’u tatalo faifaipea I le Atua.
Le au pele e, aua e te vaivai e fa’atalitali i le Atua. Faatonu au vavega e o’o mai e ala i lou tatalo pea lava pea. A’o e tatalo, faalogo i le faatonu mai a Agaga Paia. Usitai i ai ona e maua vave lea o au vavega o loo e nofo tatalo ai.
Tatalo
Tamā faamolemole fesoasoani mai ia te a’u ia tumau le faifai pea o a’u tatalo e lē aunoa i le suafa o Iesu, Amene.
-
Missing episodes?
-
OPEN HEAVENS
MATALA LE LAGI MO LE ASO FARAILE 27 IUNI 2025
(tusia e Pastor EA Adeboye)
Manatu Autu: I lalo o lana faamalumaluga(Under his cover ).
Tauloto – Salamo 91:1 “O le nofo i le mea lilo o i ai lē Silisili‘ese, e mau o ia i le paolo o Lē e ona le malosi uma lava.”
Faitauga o le Tusi Paia: Salamo 91:1-16
A iai se faamalumaluga tau inisiua I se tagata poo se faalapotopotoga, e tatau i le kamupani inisiua ona faamautinoa e mafai ona totogi vaega leiloa pe faaleagaina o loo aofia ai pe a tupu. Peitai e lē faapei o le inisiua le Atua, o le faamalumaluga a le Atua e atoatoa ma mausali aua e taofia le tupu o le amioleaga.
O tagata uma, e i lalo o le puipuiga lautele a le Atua pe faaolaina pe leai. I le Mataio 5:45, e faia e le Atua, o lē na te fa‘aoso i lona lā i ē ‘ua amio leaga ‘atoa ma ē ‘ua amio lelei. A lē iai tagata lē faatuatua i lalo o le puipuiga lautele a le Atua, e lē mafai ona latou manava. A maua e tagata lē faatuatua ni vavega, e foai atu faaaitalafu, ma o se faailoga lea o le alofa o le Atua iai latou ma le fia avea ma ō latou tamā.
Peitai e iai puipuiga faapitoa tau lava o fanau a le Atua. Mo se faataitaiga, na fetalai Iesu i le Mareko 7:27 o le faamalologa o meaai a tamaiti. E faapena foi le puipuiga mai malosiaga o le pogisā, e faatoa maua pe afai o loo iai lea tagata i le vaega a Iesu. Fai mai le Kolose 1:13 ua ia lavea‘i mai ‘iā te i tatou nai le pule a le pouliuli, a ‘ua na ‘aumaia i tatou i le mālō o lona lava Alo pele. Afai e fia ola ma soifua se tagata i lalo o le puipuiga malu a le Atua Matautia, e tatau ona avea o ia ma ona atalii poo se afafine.
E pei lava o inisiua, e tatau I tagata faatuatua ona totogi se tau e tatala ai avanoa e maua uma ai faamanuiaga. Mo se faataitaiga, a sainia se inisiua a se tagata mo lana taavale, ma e totogi le tau o le tausaga e vaevae I masina uma peitai e na o le tasi le masina na totogi , e lē mafai e lea tagata ona maua le atoatoa o faamanuiaga pe a oo ina faaleagaina lana taavale. O le maua o faamanuiaga uma, e tatau i ē ona, ona faia le latou itu ma totogi le tau.
Le au pele e, o lou maua o puipuiga malu ma faapitoa a le Atua, o le maua o se mafutaga vavalalata ma le Atua. O lona uiga e tatau ona e suesue i lau Tusi Paia ma tatalo i aso uma, mafuta ma le au uso ma auauna i le Atua ma lou loto atoa. O le tele o kerisiano ua pauū atu i mailei a le fili ona ua latou leiloa mea i le agaga aua ua mamao ma le Atua mo se taimi umi. O lou mafuta faifaipea ma le Atua e te tumau ai i lalo o lana puipuiga faapitoa. O e nofo ea I le mea lilo o iai le Silisiliese pe na o lou alu i atu i totonu ma sau I fafo ? Afai e te fia maua le atoatoa o le puipuiga a le Atua, e tatau ona e tumau i lona mamalu, i le suafa o Iesu, Amene.
-
OPEN HEAVENS
MATALA LE LAGI MO LE ASO TOFI 26 IUNI 2025
(tusia e Pastor EA Adeboye)
Manatu Autu: Punaoa o le poto ma le malamalama(The source of wisdom and knowledge ).
Tauloto – Faataoto 2:6 “Auā o le ALI‘I na te foa‘i mai le poto mai lona fofoga le poto ma le fa‘autauta;”
Faitauga o le Tusi Paia: Isaia 33:5-6
O le poto ma le malamalama e matua taua tele i le olaga o so’o se tagata. E matua taua tele, fai mai le Faataoto 4:7 e faapea; “O le poto o le mea sili lea, ‘ia maua le poto; o mea uma ‘e te maua ia maua mai ai le atamai.”
O le poto o le sa’o o le faaaogaina o le malamalama. Afai e te maua mea uma i le lalolagi nei ma tele lou malamalama i le tele o mea ae lē sa’o le faaaogaina, e te lē o atoatoa lava. Fai mai le Hosea 4:6 “‘Ua fa‘aumatia lo‘u nu‘u ‘ina ‘ua leai se poto; o oe fo‘i na e tete‘e atu i le poto, o le mea lea ‘ou te tete‘e atu ai ‘iā te oe, e lē fai oe ma ositaulaga ‘iā te a‘u; ‘ua e fa‘agalogalo le tulafono a lou Atua, o a‘u fo‘i, ‘ou te fa‘agalogalo i lau fānau.”
O le fuaitau o loo taua i luga o loo faaalia ai ua faaumatia tagata o le Atua ona o le leai o se poto, o le taua lena o le poto ma le malamalama. O le fesili, e faapefea ona maua le poto ma le malamalama? I le taliina o lenei fesili, e tatau ona tatou suesue muamua le faapogai o le poto ma le malamalama. Fai mai le Tanielu 2:20, o le Atua e ona le poto ma le mana. O loo faaalia e le Iakopo 1:5, o le Atua e na te foai mai le poto, ao le Kolose 2:3 o loo faapea mai, o le poto ma le malamalama o loo lilo i le Atua. O loo manino, o le Atua le faapogai ma le punaoa o le poto, ua na o ia le Atua e poto. (1Timoteo 1:17).
I le taimi o a’u aoaoga maualuga i le Iunivesite, sa malaga i fafo le faiaoga e vaavaaia lau mataupu mo sina taimi. Ae lei malaga, sa ia aumaia se galuega faigata ou te faia. Ina ua toe foi mai ma vaai i le mamao ua oo iai lau suesuega, na tilotilo ma faapea mai, ‘Enoka, ou te iloa o oe o le kerisiano, ma è te lē pepelo ia te a’u. O le tulaga lea ou te tilotilo atu iai, e lē mafai ona e faia toatasi, ta’u mai, o ai na fesoasoani ia te oe?’. E ui na iloa e lo’u faiaoga e lē pepelo ni kerisiano, o ia o se Hindu ma e lē talitonu ia Iesu Keriso. Ana ou fai iai na fesoasoani mai Iesu Keriso, e lē talitonu i la’u tala. O lea na ou fai atu ai ia te ia, ‘na fesoasoani mai Polofesa Emanuelu’. Peitai na toe fesili mai, ‘Polofesa Emanuelu? O fea le vaega o le Iunivesite e iai?’
O polofesa pito popoto i le lalolagi, o lo latou tomai ma le poto e na o ni vaega taitasi aua e gata le poto ma le malamalama o le tagata. Peitai e silafia e le Atua so’o se mataupu, vaega ma so’o se mea i le lalolagi. A e fai paaga ma ia, e na te foai ma tatala atu avanoa i punaoa loloto o le poto ma le malamalama e fesoasoani ai ia te oe e ola ma soifua i se olaga e sili ona lelei, i le suafa o Iesu, Amene.
-
OPEN HEAVENS
MATALA LE LAGI MO LE ASO LULU 25 IUNI 2025
(tusia e Pastor EA Adeboye)
Manatu Autu: Mata’u tau o le Atua 2(Fear God Alone 2).
Tauloto – Isaia 8:12-13 “Aua tou te fai atu, O lē fouvale, i mea uma e ta‘ua o le fouvale i lenei nu‘u; ‘aua fo‘i tou te fefefe i mea latou te fefefe ai, ‘aua fo‘i tou te matata‘u. A o le ALI‘I o ‘au, ‘ia pa‘ia o ia ‘iā te ‘outou, o ia lava tou te fefefe ai, o ia fo‘i tou te matata‘u ai.”
Faitauga o le Tusi Paia: Salamo 112:1-10
E iai tagata e fefefe i taulaitu, ma isi malosiaga o le pogisa. O nisi e fefefe i latou pule, fefefe i lē manuia o mea latou te faia e oo foi ina fefefe i le manuia. E iai tagata e matua fefefe i ataata o i latou lava. Ou te iloa e toatele tagata, o meatotino, mea e tutupu e oo mai ai le fefe, peitai e tatau ona e malamalama, fai mai le 2 Timoteo 1:7
“Auā ‘ua lē foa‘iina mai e le Atua ‘iā te i tatou le Agaga e mata‘u ai, a o le Agaga e fa‘amalosi ai, ma alofa ai, ma pulea ai o tatou loto.”
O le Atua e pau lea o le Atua e tatau ona mata’u iai le lalolagi atoa. Na fetalai Iesu i le Mataio 10:28 “‘Aua fo‘i tou te matata‘u i ē fasioti le tino, ‘ae latou te lē mafaia ‘ona fasioti le agaga; ‘ae lelei ‘ona ‘outou matata‘u i lē ‘ua mafai ‘ona fano ‘iā te ia le agaga ‘atoa ma le tino i Kēna.”
A e fefe I tagata, o mea ua tutupu ma so’o se mea lava, e te lē o savali i le atoaga o le saolotoga na totogi e Iesu mo i tatou. Afai o loo e fefe lava i ni mea, o lona uiga e te lei malamalama ua faasaolotoina oe e Iesu ( Ioane 8:36). E le afaina pe e te mauoloa, poto, tautaua, ma lautele vaega e te pule ai, afai o loo e fefe pea, o loo e nofo ma le sauaina ma le saisaitiaga (1 Ioane 4:18).
A faasaoloto e Iesu se tagata, e na te foai atu i lea tagata mea uma e oo mai ai le ola ma le amio Atua, o so’o se mea e manaomia e le tagata e faasaoloto ai o ia (2 Peteru 1:3). Na afio mai Iesu e faasaolotoina i tatou mai le mata’u i le oti (Eperu 2:14-15). Ae o le taimi e sau ai lea tagata ia Iesu Keriso, e le tatau foi ona toe fefe i le oti.
Fai mai le Tusi Paia i le Salamo 112:1 “‘Ia ‘outou vivi‘i atu i le ALI‘I. ‘Amu‘ia le tagata o lē mata‘u i le ALI‘I, o lo‘o fiafia tele i ana poloa‘iga.”
O loo manino mai le fuaitau lea o tagata e matatau i le Atua e manuia . O le tagata e matau i le Atua e fiafia i ana tulafono. E le mafai ona e fai mai e te matau i le Atua ae inoino ma lē āva i ana poloaiga. A e matau i le Atua, e te fiafia i ana tulafono ma usitai iai.
Le au pele e, e lē tatau ona e fefe i se mea po’o se tagata. E nā o le Atua e tatau ona e matau iai. Faatuatua ia te ia ona ia faasaoloto lea o oe mai le fefe. Tuu mea uma i le Atua, olioli I lana Upu, usitai i ana poloaiga, ona ia avatu lea o le filemu i lou olaga atoa (Isaia 26:3). Faatuatua i le Atua ona ia faasaoloto lea o oe mai le fefe, i le suafa o Iesu, Amene.
-
OPEN HEAVENS
MATALA LE LAGI MO LE ASO LUA 24 IUNI 2025
(tusia e Pastor EA Adeboye)
Manatu Autu: Mata’u tau o le Atua 1(Fear God Alone 1).
Tauloto – Roma 13:3 “Auā o ali‘i, e lē se fa‘amata‘u i latou e amio lelei, na o ē amio leaga. O lo‘u mana‘o ‘ea ‘ia e lē fefe i le pule? ‘Ia e amio lelei, ‘ona ta‘uleleia mai lea o oe e ia.”
Faitauga o le Tusi Paia: Galuega 12:1-11
O loo tusia manino i le faitauga o le Tusi Paia o le asō, ia e amio lelei ma faia le mea tonu, aua e te fefe i le malò poo se faalapotopotoga. Mo se faataitaiga, a fefe se ave taavale pe a vaai atu i se leoleo, e leiloa poo ua ia solia se tulafono e pulea taavale afi. A e vevesi solo pe a ō mai tagata faigaluega mai le ofisa o lafoga, e leiloa pe le’i totogiina lafoga a le malo, ma na fetalai Iesu i le Mataio 22:21 “o mea a Kaisara (malo), ‘ia ‘outou avatu ‘iā Kaisara”. E lē sili ea le faia o le mea tonu i lō le fefe? Fai le mea tonu ona le taitai lea ona e fefe I tagata faigaluega a le malo.
E iai nisi atunuu, e fefefe tagata i tagata faigaluega a le malo, e lē faapea o latou faia mea sese ae ona o le faailoga lanu ma le taotaomia. A faaaoga e tagata o le malo lana pule e taufaafefe ai ia te oe, aua e te fefe I lena tagata. Tau i le ave lau mataupu i le Atua, e tau o ia mo oe. Peitai e tatau ona e masani i le faalagolago i le Atua ae lei oo mai puapuaga.
I le tele o tausaga talu ai, na ou faalogo o loo taupulepule le malo e pulea e fitafita e saisai atu a’u ma loka, ona na fai le autalaitu i le taitai’au, o a’u tatalo o loo faalavelave ia latou polokalame mo le malo. Sa ou fefe ina ua ou faalogo iai, ae I lena po, na ou lafoai lenei mataupu i le Atua, ma è lei atoa se vaiaso ae maliu lenei taitai o le malo. A e matau i le Atua ma è faia le mea tonu, e tau o ia mo oe.
I le Tanielu 3:16, e toatolu tama Iutaia na latou tetee i le poloaiga leaga a le tupu, ae na faasaoina i latou mai lenei pule saua. Na puipuia i latou e le Atua aua na latou filifili e matau i le Atua ae lē o le tagata. Ina ua amata e Herota sauaga i le Ekalesia, ua fasiotia Iakopo ae faafalepuipui Peteru, ma ua tatalo e lē aunoa le au kerisiano. Ua galueaina mai latou tatalo mea ofoofogia, ua faasaolotoina Peteru i le afiafi na tuu e fasiotia ai o ia, ao Herota ua aia e anufe.
Le au pele e, faamolemole ia e taumamao mai soo se tulaga e te ono fefe ai i le malo. Peitai afai e te lei faia se mea sese ae o loo sauaina pea oe e tagata o le malo e leai se mafuaaga, na o le tu’u atu lava o lau matautu I le Atua, e mautinoa e na te puipui ia te oe. Afai o loo e matau I le Atua ma faia le amiotonu, e lē tatau ona e fefe pe mata’u I se tagata, faalapotopotoga poo le malo, i le suafa o Iesu, Amene.
-
OPEN HEAVENS
MATALA LE LAGI MO LE ASO GAFUA 23 IUNI 2025
(tusia e Pastor EA Adeboye)
Manatu Autu: Taunuuga o miti (Achieving dreams).
Tauloto – Filipi 3:14 “Ou te tausisi atu i le fa‘ailoga, ‘ia maua ai le taui na vala‘auina ai a‘u mai lugā e le Atua ‘iā Keriso Iesu.”
Faitauga - Tusi Paia: 2 Nofoaiga Tupu 15:7-9
I le aso na ou faauu ai mai le Iunivesite i le tausaga 1967, sa iai se matai taua o le taulaga na tu ai le Iunivesite na faee iai le faailoga faapitoa maualuga (honorary doctorate). O se sauniga mamalu ma le matagofie. Na ou fai i la’u uo i lea aso, ‘e iai le aso e maua ai lo’u faailoga faapea mai le Iunivesite lenei’. Na tilotilo mai ia te a’u, ua ata ma faapea mai, ‘a faapea e mafai ona ausia i le aoaoga, ou te iloa e te mafaia ona e te poto, peitai e te lē agavaa ona e leai sou mamalu. O faailoga e avatu i tagata ona o le mamalu ( honourary doctorate degrees) e lē soona faae’e i soo se tagata’.
E moni lana faamatalaga i lea taimi, aua foi e lē o au o se tagata e ono agavaa i ia ituaiga faailoga. O maua ma lau uo ua na o ni tamaiti aoga o loo fiafia i le ma faauuga o lea aso, ma aai i meaai e maua i le matou nuu. Ua tele tausaga ua mavae, ma è iai le aso na maua ai se tusi mai le Iunivesite lava lea, ua filifilia e le komiti faatonu a le Iunivesite, e latou te tuuina mai se faailoga faapitoa maualuga (honorary doctorate degree) ia te a’u.
E leai se maualuga e te lē oo iai pe a e tumau ona latalata i le Atua ma galue malosi ina ia e ausia au fuafuaga mamao. I le Kenese 37:5-10, na miti Iosefa o le a avea o ia ma taitaisili. I lea taimi, e oo i lona tamā e lei manatu ua matua e mafai ona galue ma ona uso e leoleo mamoe. I le faasologa o lona olaga, na avea ma pologa, ae na matuā galue punouai ma faamautinoa e na te lē faia se mea e agasala ai i le Atua(Kenese 39:9). E lei leva, ae siitia mai le pagota i le avea ma palemia o se atunuu pito maualuga le tamaoaiga i lea vaitau.
I le 1 Samuelu, ina ua alu atu Samuelu e faauu le tupu mai atalii o Iese, sa lei iai Tavita i atalii o Iese. Peitai, e oo atu i le 2 Samuelu, ua nofo o ia i le nofoalii o le tupu o Isaraelu. Tusa pe na lamatia lona ola ona o Saulo, e lei toilalo pe faavaivai ai. O nisi tagata ua faaaoga ni luitau laiti e fai ma alofaga o le lē ausia o latou fa’amoemoega. O le avea o luitau ma alofaga e mo ē toilalo, ae o ē manumalo e faaaoga luitau e uunaia le alu i luma e ausia latou faamoemoega.
Le au pele e, o tagata e ausia latou faamoemoega ma miti, e tasi le autu e taulai iai le vaai. E latou te lē faatagaina so’o se mea e faalavelave i le ausia o vaega ua totoina i latou mafaufau. Taulai le vaai i au miti ma faamoemoega, galue malosi ma aua e te fiu gofie. Faatuatua i le Atua, e fesoasoani o ia ia te oe ina ia ausia au miti.
Tatalo
Tamā, faamolemole fesoasoani mai ina ia ou tumau i lo’u faamoemoe ma matuā latalata ia te oe a’o ou galue ia ausia a’u miti ua e tuuina i lo’u loto, i le suafa o Iesu, Amene.
-
OPEN HEAVENS
MATALA LE LAGI MO LE ASO SA 22 IUNI 2025
(tusia e Pastor EA Adeboye)
Manatu Autu: O se agaga sili ona lelei (An excellent spirit).
Tauloto – Tanielu 6:3 “A ‘ua sili lenei Tanielu i ali‘i silisili ma ali‘i sili, ‘ina ‘ua tele lona atamai, sa manatu fo‘i le tupu ‘ia tofia o ia e pule i le mālō uma.”
Faitauga - Tusi Paia: Roma 12:10-21
O Tanielu sa ia te ia se agaga sili ona lelei i ona luga. O le Agaga o le Atua na faaleleia nauā ia, na mana’o ai le tupu e tofia o ia e pule i le mālō uma (Tanielu 6:1-3). Sa leai se isi tagata I totonu o le mālō atoa sa mafai ona faatusa ia Tanielu. Sa iloa le auai faatasi o ia ma le Atua, ma lona atamai i so’o se mea na fealua’i ai.
E lelei lou lesitala e te aoga ma maua tusi pasi, a’o le Agaga Paia na te faaleleia atoa oe. A afio ifo le Agaga o le Alii I ou luga ma faamalumalu ia te oe, o le a toatele e sailia ma mana’omia oe. E lē tulia oe e se isi, ae o le a toatele tagata ma faalapotopotoga e saili ia o latou iloa ma masani ia te oe, ma o le a e filifili poo ai e te mana’o i ai.
Ina ua o matou fausia le ulua’i fale tele o le RCCG e lata ane I le auala taavale o Lagos Ibadan, na faapea o le fale aupito tele lea I totonu o Afelika i lea vaitaimi. Na omai nisi o la’u fanau ma fai mai ia te a’u e leai se mea matou te toe popole ai i se fale, ma sa o’u ata. E lua tausaga mulimuliane ae toe faatele lo matou fale ua lē ofi. E tasi le tausaga na sosoo ai a ua tatau ona faaluaina le tele o le fale, ma i le tausaga na sosoo na manaomia ona toe faatele atili le fale. Sa faaauau ona o matou faatele lo matou fale aua e lē mafai ona ou malie i se tulaga e itiiti ifo i le finagalo ma polokalame a le Atua mo i matou. O se uso e ia te ia se agaga lelei e lē mafai ona malie i se mea faatauvaa, ma ou te iloa le tulaga e tatau ona galulue agai i ai i matou, na faaali mai e le Atua ia te a’u. O tagata e i ai le agaga e sili ona lelei, e manana’o pea lava i mea e sili atu mai le Atua e lē aunoa. E lē faamalieina i latou i mafutaga o ananafi aua o le alofa mutimutivale o le Atua e fou i taeao uma (Auega 3:22-23).
O le sili ona lelei o Tanielu e lē gata ina iloa i lana galuega ma ona tiute fai; na faapena fo’i ona vaaia i le la mafutaga ma le Atua. Ina ua fai le poloaiga a le tupu, ua sā ona toe tapua’i i se isi e ese mai le tupu, sa lē mafai e Tanielu ona usita’i i lea poloaiga ona e mafana tele le la mafutaga ma le Atua. Atonu na faapea nisi uso, “o le poloaiga e na o le tolusefulu aso le umi; e uma fo’i le sā, toe amata a’u tatalo.” e lei faapea Tanielu. E lei mana’o e faaitiitia le taimi ma le Atua, ma o le tumau o lona naunautai i le Atua, ua avea ai o ia ma tagata sili ona lelei i vaega uma o le soifuaga.
Le au pele e, e lē mafai ona e fai mai e sili ona e lelei i lau galuega po o lau aoga pe afai e te pāiē i lau tautua I le Atua ma e faaletonu i le lua mafutaga ma Ia. Ou te tatalo ia avea le agaga o le sili ona lelei e faailogaina ai oe i so’ose vaega o le olaga, I le suafa o Iesu, Amene.
-
OPEN HEAVENS
MATALA LE LAGI MO LE ASO TOONAI 21 IUNI 2025
(tusia e Pastor EA Adeboye)
Manatu Autu: O le Peresitene o Peresitene (President of Presidents).
Tauloto – Salamo 119:113 “Ou te ‘ino‘ino i ē loto fetōa‘i, a ‘ou te naunau i lau tulafono.”
Faitauga - Tusi Paia: Tanielu 2:20-23
I a’u malaga taamilo i le lalolagi e lauga le talalelei, ua o’u maitaulia ai, e lē o peresitene uma e tutusa. Sa o’u asiasi i se atunuu laititi, o le aofa’i o leoleo I le atunuu e to’a luasefulu. O le mālō lea e amanaia e Mālō ‘aufaatasi, o lea la, a potopoto mālō I le fono tele a Mālō aufaatasi e auai ai fo’i ma le peresitene. Peita’i e lē mafai ona e faatusaina lea peresitene i le peresitene o se atunuu e silia i le 40,000 ona leoleo. E faapea fo’i ona lē mafai ona e fa’atusatusa Iesu i soose ta’ita’i fa’ale lalolagi. O Ia o le Peresitene o peresitene (Faaaliga 19:16).
Fai mai Tanielu 4:32; Ua pule lē Silisili ese i le mālō o tagata.
Afai e te mana’o e matalatala mai faitotoa ia te oe, e tatau ona e fa’auō ia Peresitene Iesu. E ia te Ia le suafa e sili i suafa uma lava ma o mea uma lava I le lagi ma le lalolagi ma lalo o le lalolagi e ao ona tootuli ma ifo pe a taua lona suafa (Filipi 2:9-11). Po’o le a le malosi o se peresitene, afai na te folafola se sā poo se tapu, e na o totonu lava o lona nu’u o nofo ai e aafia i le sā. Peita’i o Iesu, e pule o Ia i le lalolagi atoa, i le lagi e o’o fo’i I lalo ifo o le lalolagi. E tatau ona e naunau ia lua mafuta vavalalata ma Ia, aua a faapea, so’osemea e te i ai e matala faitotoa ia te oe faapei o Peresitene Iesu lava ia lea ua afio mai.
E mafai ona mafana le lua mafutaga ma le Atua pe a e tausi i ana tulafono. O Tavita o le tagata e tatau ma le finagalo o le Atua, ua faapea mai; “Ua tele lava lo’u naunau i lau tulafono; o’u te mafaufau i ai i le aso atoa,” (Salamo 119:97). A e alofa i se isi, e te naunau e lē aunoa e mafuta ma lea tagata. O tulafono a le Atua o ona ala ia ma e te maua i lana Upu. A o e manatunatu i ona ala ma faataga e faatumu ai lou loto, o le a atili mafana ai le lua mafutaga ma foliga ai i le Alii ma lona malosi ma lona mana. Na molimau fo’i Tavita; o e naunau I le tulafono a le Atua e tele lo latou filemu, e leai fo’i se mea e tausuai ai i latou (Salamo 119:165). Afai e leai se mea e te tausuai ai o lona uiga e leai fo’i se mea e luluina pe faapopoleina oe.
O Peresitene Iesu o le perenise o le filemu ma o i latou e mafuta vavalalata ma Ia e faafiafiaina i latou e lē aunoa i le filemu tusa poo a tulaga o si’osi’omia i latou. Poo le a le faaletonu e o’o I le tamāoaiga o se mālō, o i latou e nonofo faatasi ma se peresitene i lona fale e mautinoa e i ai pea lava meaai e aai ai. Afai e moni lea tulaga i peresitene fa’ale lalolagi, e sili mamao atu Peresitene Iesu, o lē o loo afio I le mālō o lona tamāoaiga e lē suia, e tupu pea e leai se mea e mativa ai. I le suafa o Iesu, Amene.
-
OPEN HEAVENS
MATALA LE LAGI MO LE ASO FARAILE 20 IUNI 2025
(tusia e Pastor EA Adeboye)
Manatu Autu: Aua e te taumafai e gaio mai le Atua (Don’t try to steal from God ).
Tauloto – Isaia 42:8 “O a‘u o le ALI‘I, o lo‘u igoa lea; o lo‘u mamalu fo‘i ‘ou te lē avatua lea i se tasi ma lo‘u vi‘iga ‘ou te lē avatua i tupua ‘ua ta.”
Faitauga - Tusi Paia: Tanielu 4:1-37
I tausaga ua leva, ao soifua lou tamā faaleagaga, na ia auina atu se faifeau e amata se au lotu i se tasi taulaga i Nigeria i sisifo. Ua amata ona tupu le aulotu ona manatu lea o Le faifeau, ona o ia na totōina, e mafai ona ia suia e avea ma ana lotu. Ua ia aveesea le igoa o le lotu Redeemed Christian Church of God(RCCG) i luga o le laupapa faailoilo ae suia i lana lotu fou. Ina ua faalogo iai lo’u tamā faaleagaga, na ia augani i le faifeau e aua le faia, ae musu. Ua ia faapea mai, ‘o le a le uiga? O a’u le faifeau iinei, na ou amataina le galuega, o tagata o a’u mamoe”. Fai mai lo’u tamā, ‘ae na matou faauuina oe, ma auina atu oe e amata le galuega i le igoa o le RCCG. E le gata i lea, e lē o oe o se faaola. O le lotu foi o le lotu a lō tatou faaola na faaolaina i latou. E lē o sau lotu poo sa’u lotu foi’. Peitai, na finau mai pea lenei faifeau. Ona faapea atu lea o lou tamā, ‘ua lelei, ae sei o ta tatalo’. Ao tatalo, na agi mai se matagi e pei o le a timu, e oo atu i le taeao na sosoo ai, ua ufitia uma le tino o le faifeau lea i le lepela mai lona ulu se’i o’o i tamaimaivae.
Afai o le tupu o tupu e ona se mea, aua e te avea e pei o oe e ona. A e faia, o loo e taalo i le afi. O le faifeau i le tala na ou faamatalaina, na manatu e mafai ona ia faoa se mea a le Atua ae leai se taui. Afai e iai se mea e na o le tasi le tagata e iai le aia tatau e pule ai, e le mafai e seisi tagata ona taumafai e faoa. O le Atua e ona ma pule i le lalolagi, ma mea o tumu ai atoa ma tagata uma o loo iai (Salamo 24:1). O lona uiga e pule i le lalolagi ma vaavaaia mea o tutupu ai. I le Luka 12:16-20, na talanoa mai le tagata na taua e Iesu e valea, i lona agaga e pei e pule ai, ae na uma lona ola I le pō lava lea.
E lē vaeluaina pe avatu le pule a le Atua i le lalolagi i seisi tagata, e faapena foi na te lē vaeluaina i se tagata lona mamalu. O lona mamalu e ia te ia lava, ma o so’o se tagata e taumafai e faoa mai ia te ia e iai lona taui. A faatino e le Atua se mea e tauala ia te oe, ia vave ona e faafoi le viiga ia te ia aua foi e lē tatau ona ia te oe. I le faitauga o le Tusi Paia i le asō, na taumafai Herota e faoa le viiga o le Atua mo ia lava, ma na avea o ia ma manu i le vaomatua mo le fitu tausaga. Na pa’i le Atua I lona loto ma suia i se loto o se manu, ona gata lea o ana folafolaga faamaualuga.
Le au pele e, e fuā le Atua i mea uma e pule ai. Ua e faoa ea le mamalu o le Atua mo oe lava? I le suafa o Iesu, Amene.
-
OPEN HEAVENS
MATALA LE LAGI MO LE ASO LULU 19 IUNI 2025
(tusia e Pastor EA Adeboye)
Manatu Autu: Faafoisia e le Atua (Divine Restoration ).
Tauloto – Ioelu 2:25 “Ou te taui atu ‘iā te ‘outou o tausaga na ‘aina e le sē akerise, ma le sē aleka, ma le se kasili, ma le sē kasama, o la‘u itūtau‘a tele na ‘ou ‘auina atu ‘iā te ‘outou.”
Faitauga - Tusi Paia: Mataio 12:9-13
Ao avea a’u ma faiaoga i le Iunivesite i Nigeria, e iai se tamaloa e lei siitia lona totogi ma le tulaga mo le 12 tausaga ona sa nānāina e se tagata le faila o ona faamaumauga. Ina ua faafoisia ma tauia e le Atua mea uma na leiloa, na suia le ulu o le matagaluega, ma na fesili le pule fou e fia vaai i i faila a tagata faigaluega uma. Na saili i le faila a lenei tamaloa seia iu ina maua mai le nofoaga na nānāina ai. Ina ua tatala lana faila, na iloa ai sa tatau ona faalua ona siitia lona totogi, ma sa faia loa le faaiuga, e faaluaina le siitia o lona totogi. E mafai e Le Atua ona toe faafoisia ma tauia tausaga uma ua misia ai. E mafai ona ia suia mea e foliga e lē mafai ona toe suia ma toe faafoisia avanoa ua misia. Na ulu atu Iesu i le malumalu ma tau atu i se tamaloa lima gase. Ae lei toe afio ese Iesu mai le malumalu I lena aso, na ia faamautinoaina na toe ola le lima gase ma ua toe faafoisia e Le Atua. I le suafa e sili i suafa uma lava, afai ua iai se mea ua gase i lou olaga, e toe faafoisia ma tauia i le asō.
O nisi o kerisiano, o latou savaliga ma le Atua e mafai ona faamatalaina ua gase. Mo se faataitaiga, a oo se kerisiano i se tulaga ua tau lē atoa se 30 minute o tatalo ae sa masani ona faitau itula o mafuta i le mamalu o Le Atua, ua gase lea ituaiga savaliga. O nisi o kerisiano sa masani ona tatalo ma faamalolo i ma’i ma tutuli temoni i le suafa o Iesu, ae o Le taimi nei, ua mama’i ma ulufia e temoni. Afai o e faalogo poo faitau i lenei faamalosiau ma ua e iloa ua gase lau savaliga ma le Atua, ou te tatalo ia toe faafoisia i le asō, i le suafa o Iesu. Ia avatu e Le Alii se manava fou ia te oe ina ia e maua se mamalu e sili atu i lō le muamua (Hakai 2:9).
Fai mai Iopu, tusa poo le a le leaga ua oo iai le laau ua tipi, afai lava o loo iai le ogalaau i le eleele ma maua sina vai, e iai lava le faamoemoe e toe ola (Iopu 14:7-9). Le au pele e, ona o lena e te soifua ma faitauina lenei faamalosiau, o lona uiga o loo iai le faamoemoega ia te oe e toe faaleleia Le tulaga o loo gase I lou olaga. E pau lau mea e tatau ona fai, o le gauai i lē mafai ona toe faafoisia mea uma, ma saili i ona fofoga mo se fesoasoani. E mafai ona ia oo atu i lou olaga ma toe faafoisia mea uma ua leiloloa i le suafa o Iesu. Afai lava o loo iai le manava ia te oe, e mafai e Le Atua ona toe faafoisia mea uma ua e leiloa, i le suafa o Iesu, Amene.
-
OPEN HEAVENS
MATALA LE LAGI MO LE ASO LULU 18 IUNI 2025
(tusia e Pastor EA Adeboye)
Manatu Autu: O upu e mafai ona faamalōlō (Words can heal)
Tauloto – Kolose 4:6 “Ia lē aunoa a ‘outou ‘upu ma le alofa, ‘ia fa‘amāi i le masima, ‘ia iloa e ‘outou ‘ona fai fa‘atatau se tali i tagata e ta‘ito‘atasi uma.”
Faitauga - Tusi Paia: Ioane 8:1-11
I aso e lua ua mavae atu, sa ou talanoa ai I le mana o upu, o le asō, o le a ave le faamamafa I upu e mafai ona faamalōlō ai.
O se kerisiano e tatau lava ona iai le alofa tunoa i upu e tautala ai (Efeso 4:29). E tatau ona faatele upu e avatu e faamalosiau i tagata ma faia upu e siitia ai e pei o le ’Manaia le faiga o lou ulu’, e mafai ona aveesea se tagata mai le faanoanoaga ae liua i le ataata. O au upu e faamalosiau ai i tagata e tatau ona moni, aua e faasala e le Atua i latou e faaoleole i tagata i latou upu (Salamo 12:3).
I le Ruta 2:1, na faamatalaina Poasa o se tagata e mauoa tele. E lē pei Poasa o isi tagata mauoa e manatu maualalo i latou tagata faigaluega ma tautala faasausili iai latou, ae na faamalosiau Poasa i ana tagata faigaluega i ana upu, ma na talileleia o ia(Ruta 2:4). Ou te talitonu o le tasi lea o vaega na manuia tele ai pisinisi a Poasa. Afai o oe o se fai pisinisi e te fetuu, tautala faasausili ma vaai maualalo I au tagata faigaluega, o loo e fetuuina galuega a ou lima aua foi o I latou o loo faia galuega mo oe.
O Napota, e lē pei o Poasa, aua na tautala I upu lē lelei. Ina ua auina atu e Tavita lana autau ma ole atu ia te ia i se mea, o le matua leaga o lana tali mai. Na tautala faamaualuga i le autau na auina atu e Tavita, ma ana leai Apikaila lona toalua na faalavelave atu, ua ia tautala atu ia Tavita ma faamafanafana ia te ia i ana upu, semanu e faaumatia uma lona aiga. E ui ina matuia upu a Napota na faatupuina tele le ita o Tavita, o upu a Apikaila na faaleleia i le masima na taofia le faaumatia o lona aiga.
A e tautala, o le a le aafiaga o au upu? E latou te faamalōlō pe faaumatia? Fai mai Solomona, “O le oti ma le ola, o lo‘o i le pule a le laulaufaiva ia (Faataoto 18:21)”. Fai mai le aposetolo o Paulo I le tauloto mai le Tusi Paia o le aso, e tatau ona tatou faamautinoaina o upu tatou te tautala ai e iai pea le alofa tunoa ma faamāi i le masima. O mea faamanogi o mea e atili manogi ma lelei ai meaai I le ai. O le tagata e tautala i upu lelei ma faamalosiau, e tosina mai iai tagata aua foi e o lava tagata i nofoaga e faamalosiau ma faatupuina le naunau i isi tagata. Ina ua maua le fafine o faia le mulilua e pei ona tusia i le faitauga o le Tusi Paia o le aso, ma ua auina atu ia Iesu, e ui ina tele ni upu faifai ma faamasino na faia e tagata, na pau le upu a Iesu, ’Alu ia, aua e te toe agasala’ ma maua ai e ia lona faasaolotoga na ia manaomia (Ioane 8:11) .
Le au pele e, ia avea au upu e aumaia le au lē faatuatua ia Iesu ma faaali atu ai lona alofa tunoa iai latou. Aua nei avea au upu ma tulaga e teena ai e tagata le talalelei. Faaaoga au upu e siitia ma faamalosiau i tagata i aso uma, i le suafa o Iesu, Amene.
-
OPEN HEAVENS
MATALA LE LAGI MO LE ASO LUA 17 IUNI 2025
(tusia e Pastor EA Adeboye)
Manatu Autu: E malosi le mana i upu 2 (Words are powerful 2).
Tauloto – Faataoto 15:1 “O le tali filemū e liliu‘eseina ai le ita; a o le ‘upu fa‘atigā e tupu ai le ita.”
Faitauga - Tusi Paia: Kenese 3:1-13
E moni, o upu e malosi lona mana. O se fa’ataitaiga, afai ua e fa’aipoipo, e iai upu e le tatau ona e faia I lou to’alua ‘aua e tusa pe na te faamagaloina oe, se’iloga o le alofa tunoa o le Atua e ono mafai ai ona galo ia te ia, ma e ono afaina ai le lua faaipoipoga mo se taimi umi. Mo se faataitaiga, e lē tatau ona e fai i lou to’alua, ua e salamō i lou faaipoipo atu ia te ia. E lē tatau ona e fa’atusatusaina lou to’alua i se isi tagata, pe e te fa’apea atu iai, e leai so’u lumanai e maua ia te ia. O le afaina ma le aafiaga o ia ituaiga faamatalaga e ono lē mafaia ona toe faaleleia aua ua paū maualalo pe faaumatia lagona o lou toalua. So’o se taimi e te ita ai, e sili ai ona e filemu lelei nai lo le tautala i ni upu e te toe salamo ai mulimuli ane. Afai e tatau ona e tautala, ia mautinoa o loo e tautala i le mataupu o loo talanoaina ae lē o le tagata.
E matua fiafia le ti’apolo e faatupuina misa ma uuna’i tagata e faia tala e afaina leaga ai tagata o lo’o aafia. O le taumafai e tu’ua’ia tagata ma osofa’i i upu e lafo, e faatelē atili ai fa’afitauli. Fai mai le Kalatia 5:15;’Ae ‘āfai tou te feūta‘i ma fe‘aina‘i, ‘ia ‘outou ‘ina ne‘i fa‘aumatia ‘outou ‘iā te ‘outou.”
Afai e feūtai ma fe’aina’i tagata e faaaoga ai upu lē mafaufau ma le to’ilalo, e iu lava ina malepelepe ma faaumatia ai so’otaga lelei. E lē tatau i kerisiano ona faatalalē i mailei a le tiapolo ina ia aua nei manumalo ai le ti’apolo iai latou (2 Korinito 2:11). I le tele o taimi, e mana’o le ti’apolo e fa’atupu le vevesi ia sa’oloto ai lona faia o so’o se gaioiga, ma a faia e tagata upu ogaoga i isi tagata, e maua ai lona avanoa e faatupu atili ai le vevesi. Afai e te lē mana’o e iai le ti’apolo i mafutaga e te iai, ia aveese fafie o upu sese ma le ogaoga I taimi e te lua feeseeseai ai ma se tagata, aua foi a leai ni fafie, e pē le afi. Aua le faaaogaina upu malolosi pe afai e te lua feeseeseai ma se tagata, ae ia e taumafai e faaaoga upu filemu aua o le tali filemu e liliu’eseina ai le ita (Faata’oto 15:1).
Le ‘au pele, afai ua fai atu e se tasi e latalata ia te oe, ni upu faatigā i aso ua mavae, ou te ‘ai’oi atu, e fai ma sui o lena tagata, ia e faamagalo ia te ia. Fa’amolemole ‘aua e te faatagaina ni upu e faaumatia au lou tagata poo le sootaga vavalalata ma lena tagata. Afai o loo e iai i lea tulaga, ou te folafola atu lou faamalologa i le asō, ma afai ua ‘aveesea ni mafutaga ma ni tagata na aumaia e le Atua, ou te tatalo ia toe faafoisia uma e Le Atua I le suafa o Iesu. Aua e te tautala i ni upu matuia ma leaga, tusa lava pe tofotofoina oe, i le suafa o Iesu, Amene.
-
OPEN HEAVENS
MATALA LE LAGI MO LE ASO GAFUA 16 IUNI 2025
(tusia e Pastor EA Adeboye)
Manatu Autu: E malosi le mana i upu 1 (Words are powerful 1 ).
Tauloto – Iakopo 3:2 “Auā o mea e tele e sesē ai i tatou uma; a lē sesē se tasi i le ‘upu, o le tagata lea ‘ua sao, na te mafaia fo‘i ‘ona tāofi i le tino uma.”
Faitauga - Tusi Paia: Iakopo 3:2-13
Ina ua ou faaipoipo ma fai fanau, sa matua faigata mea uma i lo’u aiga i le amataga. Peitai ou te fai lava i lau avā, e faamalosi ma sauni, e lē faigata pea e faavavau. Sa ou lē faatagaina ni tautinoga lē lelei e aafia ai lo matou lumanai. Ina ua oti le tama a le fafine Sunema, sa ia lē faatagaina se upu faletonu e paū mai lona fofoga. E pau lana tala na fai o le faapea, ‘O le a lelei mea uma’ ma le ‘o loo manuia’(2 Tupu 4:23-26). Sa ia lē faatagaina ni upu lē lelei e tautala ai e tu’u avanoa ma fesoasoani i le mea o loo taumafai le tiapolo e ausia. Ae sa ia tautala i tulaga na ia naunau ia taunuu seia oo ina lelei ma manuia mea uma.
E malosi le mana o upu tatou te tautatala ai. I Aferika, fai mai toeaina, o upu e pei o ni fuamoa, a uma ona faalele, o lona aafiaga e lē mafai ona toe suia. E tatau ona e faaeteete I upu e te tautala ai ma le auala e faia ai. A e tautala ini upu lē lelei, e ono lē mafai ona toe faaleleia ona o aafiaga tusa pe ua e salamo moni. Aua e te tautala pe afai ua e ita tele, pe ua e fiafia tele i tei ua sesē se upu e te faia. E tatau foi ona e faaeteete i upu e te tautala ai pe a e faanoanoa ona e iai le mana I upu a lou laulaufaiva. O le oti ma le ola, o lo‘o i le pule a le laulaufaiva ia (Proverbs 18:21) ma e tatau ona e mafaufau lelei i upu e te tautala ai.
Fai mai le Faataoto 6:2 “ua maileia oe i ‘upu a lou gutu; ‘ua maua oe i ‘upu a lou gutu.” Poo le a lava le tulaga e iai, ia mafaufau muamua ae lei tautala. E tatau foi ona ō gatasi au upu ma le Upu a le Atua. O le upu a le Atua e malosi lona mana, e mafai ona ia faaumatia upu lē lelei ua i luga o lou olaga ma le lumanai. O Iapesa o se pepe meamea ae fai e lona tinā se folafolaga lē lelei i ona luga. Ua ia fuafuaina se olaga o faanoanoaga ma tigā mo Iapesa ona na fai ana tala i le taimi o ona tigā. Faafetai, na teena e Iapesa se olaga o faanoanoaga ma faigata, aua sa ia tagi atu i le Atua e faamanuia ia te ia, ma na suia e le Atua lona olaga mo le lelei (1 Nofoaiga Tupu 4:9-10).
Le au pele e, o so’o se upu e te faia o le tulaga lena e te oo iai, o lona uiga, faaaoga lelei lou laulaufaiva. Afai ua e faia ni folafolaga lē lelei i luga o lou olaga faapea ma lau fanau, ole atu i le Atua mo lona alofa tunoa ma amata ona toe tusia sou lumanai manuia e faaaga ai le Upu a le Atua. Ou te tatalo ia siitia pea oe i luga e le Upu a le Atua ma faamanuia i mea uma e te faia i le suafa o Iesu.
Tatalo
Le Alii e, faamolemole fesoasoani mai ia te a’u ina ia faaaoga ma le poto lo’u laulaufaiva, i le suafa o Iesu, Amene.
-
OPEN HEAVENS
MATALA LE LAGI MO LE ASO SA 15 IUNI 2025
(tusia e Pastor EA Adeboye)
Manatu Autu: Talanoa I Lou Tamā (Talk To Your Father).
Tauloto – Kalatia 4:6 “O atali‘i ‘outou, o le mea lea ‘ua ‘auina mai ai e le Atua le Agaga o lona Alo i o ‘outou loto, e vala‘au. “Ava, Le Tamā e.”
Faitauga - Tusi Paia: Roma 8:14-17
A o fai la’u taimi tatalo masani i taeao i le isi aso, sa ou manatuaina se tala mālie. Ona sa ou tapena mo se fonotaga a faifeau, o lea na ou taumafai ai e aveese le tala mālie mai lo’u mafaufau. Peita’i sa o’u lagonaina o loo finagalo le Atua e ta’u mai se feau ia te a’u e auala mai i le tala mālie lenei o lea na o’u manatunatu ai loa i le tala. I le taimi o le fonotaga sa o’u faamatala le tala mālie e faapea, o se tane ma lana avā sa tauaimisa mo se taimi umi. Na faatetele le misa ma o la faapea ai o le a lē toe fetautalaa’i. O se tasi po sa tusi ai e le tamaloa se tusi i lona toalua e faapea; Pele o le taimi o la’u malaga taeao I le vaalele o le 8 i le taeao. Faamolemole fafagu a’u pe a ta le 6 i le taeao.” Sa tuu e le tamaloa lana tusi i le itu o le moega e moe ai lona toalua ae moe. Ina ua ala a’e i le taeao na soso’o ai, ua ta le 8 ma ua alu lona toalua i le galuega. Na ita tele le tamaloa, ma le vaai atu i lana itu i luga o le moega o tu’u mai ai se tusi mai lona toalua. “Pele nofo i luga ua ta le 6.” Ina ua uma ona o’u fa’amatalaina le tala, na fetalai le Atua i lo’u loto, “Tau i o’u tagata o’u te lē toe talanoa atu i nisi o outou e lē tautatala mai ia te a’u.” E fiafia le Atua pe a e talanoa atu ia te Ia, ma a e talanoa atu, ua e valaaulia o Ia e fetalai mai ia te oe.
Ina ua fai le ‘auso’o ia Iesu e a’oa’o atu ia i latou e tatalo, o lana fetalaiga muamua e faapea; “A outou tatalo ia faapea, ‘Lo matou Tama e, o i le lagi,” (Luka 11:2). E leai se tamā e mana’o ma fiafia pe a le talanoa atu lana fanau ia te Ia. O a’u o se tamā, ma ou te fiafia tele pe a mafuta mai la’u fanau ia te a’u. Fai mai 1 Ioane 3:1; Faauta i le silisili o le alofa ua foaiina mai e lē Tamā ia te i tatou, ina ua taua i tatou o lana fanau. Ua molimau mai fo’i le Tusi a Ioane 8:35; o le auauna e lē tumau pea ia i le aiga, a o le atali’i e tumau pea lava ia e faavavau. Fa’apei o le atali’i faapelepele o le Atua, e avanoa pea mo oe i taimi uma. E mafai ona e valaau ia te Ia ma lua talanoa faatatau i so’ose mea e te mana’o ai, ma e tali mai lava o Ia.
Afai o oe o se atalii / afafine o le Atua, saili ia e iloa ma latalata atili i lou Tamā i aso uma (Filipi 3:10). Afai e lei avea oe ma atali’i/afafine o le Atua, o lona uiga e lē mafai ona e mafuta atu ia te Ia sei vagana ua e talia Iesu e avea ma Alii ma Fa’aola i lou olaga. Afai sa avea oe ma kerisiano a ua e toe fo’i i le agasala ma e faamamao ese oe lava mai le Atua pei o le atalii fa’amaumau ‘oa, (Luka 15:11-32), toe fo’i nei o loo faatalitali mai mo oe.
Le au Pele e, e naunau ma saili mai pea le Atua mo lana fanau, ia vivi’i ma tapua’i atu ia te Ia i le Agaga ma le faamaoni (Ioane 4:23). Tali atu i le naunau mai o lou Tamā e fia talanoa iā te oe i taimi uma e lē aunoa, I le suafa o Iesu, Amene.
-
OPEN HEAVENS
MATALA LE LAGI MO LE ASO TOONAI 14 IUNI 2025
(tusia e Pastor EA Adeboye)
Manatu Autu: Filemu i taimi o se Afa (Peace in a Storm)
Tauloto – Isaia 59:1-2 “Fa‘auta, e le‘i fa‘apu‘upu‘uina le ‘a‘ao o le ALI‘I, ‘ia lē mafa‘aola; e lē tutuli fo‘i ona taliga, ‘ia lē mafa‘afofoga. 2‘Ae peita‘i o a ‘outou amio leaga ‘ua fai ia ma pupuni i le vā o ‘outou ma lo ‘outou Atua, o a ‘outou agasala fo‘i ‘ua ‘alo ai ona fofoga ‘iā te ‘outou ‘ua ia lē fa‘afofoga mai ai.”
Faitauga - Tusi Paia: Mareko 4:35-41
I se afa, e masani ona tele nauā le vevesi ma le lē mautonu, peita’i i le ogatotonugalemū o le afā, e I ai le vaega e tau’a, ‘o le mata o le afa,’ e masani ona to’afilemū ma malū. A e pipi’i mau i le Atua Mata’utia, poo le a le tele o faafitauli e siosiomia oe, e te lagonaina pea le filemu ma le to’a.
I le 1 Tupu 17:1; na matutū vaitafe ma pagatia tagata. Sa matua’i tele le matelaina I le nu’u, ae sa fafagaina pea e le Atua Elia i aso uma. I se tasi taimi, na auina atu e le Atua oreva e molimoli atu ia te ia o areto ma aano o manu i le taeao faapea le afiafi. Ina ua mate le alia ona auina atu lea e le Atua o Elia i le fafine ua oti lana tane na te fafaga ia te ia (1 Tupu 17:9). A e pipi’i I le Tupu o Tupu, o le a ese le tulaga e te soifua ai mai isi o loo outou mafuta faatasi. Fa’ata’ita’iga, i taimi o se faaletonu o le tamāoaiga, a o popole tagata faatatau ia latou tupe, o le a toafilemū pea se atalii/ afafine o le Atua aua o loo ia iloa o lona tamāoaiga o loo i Siona, o le nuu e fausia i auro.
I le Faitauga mai le Tusi Paia o le asō, a’o faimalaga Iesu ma ona so’o i luga o le sami, na agi se afa, a o Iesu sa tofā pea o ia aua sa ia pipi’i I le Tamā. A’o matata’u le ‘auso’o ne’i fano i latou, a o loo tofā o ia pei se pepe i se aluga (Mareko 4:38). Na afatia fo’i Paulo i se afa tele, ma i le ogatotonu o le afa, a’o tautala isi o le pasese I le oti, sa talanoa Paulo I le ola ma le fa’asa’olotoga aua na auina atu e le Atua lana agelu e faailoa iā Paulo e saogalemu uma i latou (Galuega 27:20-25). O le la sootaga ma le Atua ua ia maua ai le mautinoa e leai se mea leaga e o’o iā te ia.
Le au pele e, afai o e afatia i se afa ma e te lē mana’o e lafotuina oe e peau, e ao ona e tumau i le Atua. O le auupega a le fili e talepeina lenei sootaga, o le agasala. Fai mai Isaia 59:1-2 ua i ai pea le pupuni i le va o le tagata agasala ma le Atua, ma e ui o ona aao e faavavau (Teuterenome 33;27) e lē o’o lava i le tagata agasala. A faataga e tagata le agasala i o latou olaga, latou te o ese ma le ogatotonu o le finagalo o le Atua o loo nofotupu ai le filemu ma le olioli.
Ina ua filifili Iona e sola i Tasesa i lona lē usitai i le Atua, na to se afa ma i’u ai i totonu o le manava o se i’a tele (Iona 1:1-17). O le agasala e faaleagaina pea se uso, ma o le mafuaaga lea e lē tatau ai ona e taalo i ai. O tamāoaiga ma mālō e mafai ona faatoilaloina peita’i afai e te mana’o e tumau ona e fua lauolaola ma lauusiusi i taimi leaga, e tatau ona e aloese I le agasala ae taofimau le sootaga vavalalata ma le Atua. O kerisiano e taofimau ma tutumau I le Atua e lauolaola i taimi o afa, I le suafa o Iesu, Amene.
-
OPEN HEAVENS
MATALA LE LAGI MO LE ASO FARAILE 13 IUNI 2025
(tusia e Pastor EA Adeboye)
Manatu Autu: Tatalo mo talavou (Prayers for youths).
Tauloto – 2 Timoteo 2:22“Ia e sola ‘ese i tu‘inanau o taulele‘a, ‘ia e tausisi i le amiotonu, ma le fa‘atuatua, ma le alofa, ‘atoa ma le filemū, fa‘atasi ma i latou o ē vala‘au i le Ali‘i ai le loto mamā.”
Faitauga - Tusi Paia: Failauga 11:9-10
Tatalo
Tamā, ou te faafetai i lau afio mo talavou kerisiano uma i le lalolagi. Faafetai mo lenei augatupulaga fou ua e filifilia e susulu atu ai lou viiga. Tamā, faamolemole ia galue atu lou Agaga Paia I loto ma agaga o talavou uma i lo matou nuu, atunuu ma le lalolagi atoa ina ia lafoai o latou ola ia te oe. Tamā, faamolemole taitai talavou uma ao faia a latou faaiuga e tusa ma latou aoaoga, galuega, o uo ma tagata e mafuta iai ma soo se vaega o Le olaga. Fesoasoani iai latou ina ia faia faaiuga tonu e tusa ma lou finagalo mo latou olaga, i le suafa o Iesu. Tamā, faamolemole ia taulai le vaai a talavou ia te oe. Fesoasoani iai latou ina ia matua alolofa ia te oe, i le suafa o Iesu. Tamā, faamolemole fesoasoani i talavou ina ia motusia faaletonu uma o loo tuufaasolo I augatupulaga. Ia aua lava nei o latou toe faia mea sesē a augatupulaga ua mavae atu, i le suafa o Iesu. Le Alii e, ou te faasagatau atu i so’o se polokalame a le fili i tupulaga uma i lou siomaga. E leai seisi e oti, ae e ola e faaalia le viiga o Le Atua ma avea ma ē e fefefe ai le malo o le pogisa, i le suafa o Iesu. Le Alii e, faamolemole fesoasoani i talavou ina ia manumalo i fuafuaga a le tiapolo e faaseseina o latou mafaufau i tu ma aganuu amioleaga. Ou te folafola atu, o nei aoaoga amiolega o le a lē afaina ma lē aafia ai i latou, i le suafa o Iesu. Tamā, faamolemole ia faamumūina le afi i talavou mo lau afio. Ia faatutuina i latou i so’o se vaega o le lalolagi, e tutula’i ma lauga atu mo oe ma manumaloina nuu uma mo lou malo, i le suafa o Iesu. Tamā, faamolemole ia iai lou agaga o Le atoatoa ona lelei i luga o talavou uma. Faamanuia iai latou i lou poto ma le mafaufau matala, ma ia avea i latou e taitaia suiga lelei i nuu ma atunuu, i le suafa o Iesu. Tamā, faamolemole ia e faamalosi i talavou uma ina ia manumalo i faaosoosoga, lē mautonu, atuatuvale ma le popole. Foai iai latou le soifua maloloina lelei ma le mafaufau lelei ma le poto e faia ai faaiuga tonu e manumalo ai i luitau o le olaga, i le suafa o Iesu. Tamā fesoasoani i talavou ona atinaeina le mafaufau lelei e faia galuega uma e a’otauina ai i latou e avea ma taitai e atoatoa ona lelei, i le suafa o Iesu. Tamā, ia e faamanuia i talavou uma o si o matou atunuu ma ia latou iloa mata’u ia te oe aua o le amataga lea o le poto, i le suafa o Iesu e tatalo atu ai nei, Amene. -
OPEN HEAVENS
MATALA LE LAGI MO LE ASO TOFI 12 IUNI 2025
(tusia e Pastor EA Adeboye)
Manatu Autu: ‘E inoino le Atua I le tete’a (God hates divorce).
Tauloto – Malaki 2:16 “Auā ‘ou te ‘ino‘ino i le alei, ‘ua fetalai mai ai le ALI‘I le Atua o Isaraelu; Auā ‘ua ufiufi e ia lona ‘ofu i le fa‘asauā, ‘ua fetalai mai ai le ALI‘I o ‘au. O le mea lea ‘ia ‘outou fa‘aeteete ai i o ‘outou loto, ‘ae ‘aua tou te fa‘a‘ole‘ole.”
Faitauga - Tusi Paia: Mareko 10:2-9
Na fuafua e le Atua le faaipoipoga e paia (Kenese 2:24), peitai e lē faapena le tilotilo a le lalolagi i nei aso. O le toatele o tagata ua faaipoipo e sili atu ona faapelepele i a latou pisinisi ma galuega i lo latou faaipoipoga, ma o le mafuaaga tonu lea o le maualuga o le fuainumera o le au tetea i le lalolagi. E inoino le Atua I le tete’a (Malaki 2:16), o lona uiga e lē tatau I lana fanau ona faataaalo iai. A tete’a se ulugalii o loo tetee i le poloaiga a le Atua e lē faatete’aina e seisi i laua ua tuufaatasia e le Atua.
Ou te iloa o nisi e saili e tete’a ona o latou faaipoipoga e matuā leaga e pei o seoli. E ui ou te alofa iai latou ia, o le mea moni, e leai se tigā i le lalolagi e faatusa i le iai i seoli e faavavau. O le tete’a e lē o le finagalo lea o le Atua, o le loto ma’a’a o tagata na faataga ai e Mose le tete’a (Mataio 19:3-9).
O le tigā o le tete’a e loloto. E aafia leaga ai aiga ma e oo atu i le fia augatupulaga. E tatala avanoa i le tele o tu ma aga faaletonu ua tatou vaaia i nei aso. Ioe, e tatau ona nofo eseese se ulugalii pe afai o lamatia o latou ola ona faamoemoe lea i le Atua e toe faaleleia le aiga.
O ulugalii faaipoipo e tatau ona tumau i faavae autu o le faaipoipoga (Efeso 5:22-33) e pei o tagata taaalo e fia manumalo pea, e tatau ona tumau i faavae o taaloga. O le alofa e lē faatuaoia ma le gauai, feāvata’i, ma le Upu a le Atua, o faavae ia o le faaipoipoga, afai e tumau ai ulugalii, e latou te maua le fiafiaga ma le filemu i latou faaipoipoga.
E tatau ona tatalo faatasi ma faifaipea se ulugalii faaipoipo. E tatau ona filigā ma aua nei faatuatuanai i mailei a le tiapolo ( 2 Korinito 2:11). E iai taimi, a mulimuli le tiapolo i se ulugalii faaipoipo ma le la fanau, o le autu e lē o le ulugalii, ae o le la fanau, aua ua ia iloa lelei, a malepe le aiga, e iai le aafiaga leaga o fanau. E tatau i ulugalii faaipoipo ona tau mo latou aiga ma ia puipuia fanau e ala i le fesoasoani a Agaga Paia.
Le au pele e, afai ua e faaipoipo, ia e tu i le va ma tatalo faifaipea. Ua toe faafoisia e le Atua le tele o faaipoipoga ua malepelepe, aua foi sa tutū a lē o le ulugalii poo se tasi o le ulugalii i le tatalo, ma faia e tusa ma lana Upu e faatatau i faaipoipoga. Afai o e fuafua e faaipoipo, e tatau ona e saili muamua i le taitaiga a le Atua e ala i le tatalo ae ete lei faaipoipo. O le manuia o faaipoipoga a le au kerisiano, e tatau i le ulugalii ona faamautinoa o loo mauaa le faavae i le Upu a le Atua, galulue faatasi ma tausia lelei faaipoipoga e ala i le fesoasoani a Agaga Paia.
Tatalo
Le Alii e, faamolemole ia e faamalolo i aiga uma ua oo atu i le tulaga lamatia e tete’a ai. Ia toe faafoisia nei faaipoipoga I lou alofa tunoa, i le suafa o Iesu, Amene.
-
OPEN HEAVENS
MATALA LE LAGI MO LE ASO LULU 11 IUNI 2025
(tusia e Pastor EA Adeboye)
Manatu Autu: ‘Faatasia e avea ma tino e tasi 3 (Cleave as one 3).
Tauloto – Mareko 10:8 “ona ‘avea lea o i lā‘ua ma tino e tasi.’ O lea e lē toe to‘alua ai i lā‘ua, ‘ae peita‘i ‘ua tino e tasi;”
Faitauga - Tusi Paia: Teuteronome 6:6-8
O le a faaiu atu le aoaoga i lenei mataupu i le faapea atu, e finagalo le Atua ia fiafia lana fanau i a latou faaipoipoga, e pei ona tatou vaaia i le tauloto mai le Tusi Paia o le asō. Peitai e faatoa tupu pe afai e te faatasi atu i lou toalua. A e manaomia le faapipii o ni mea se lua, e tatau ona felata’i. A nonofo se ulugalii i ni atunuu eseese mo se taimi umi, e matua aafia leaga a lā fanau ma e iu ane ua tausia e le matua e tasi poo nisi foi tagata. O loo faatonu e le Atua matua ia a’oa’o I a latou fanau (Faataoto 22:6) ma e lē mafai ona faatino lea tulaga mai luga o peau o le ea pe suia e seisi tagata.
O le iai o matua e tele lona aafiaga lelei i le atoaga o le aoaoina o le tamaitiiti, ma e faamalosia ai foi le sootaga o matua ma latou fanau. A nonofo faatasi matua i le fale e tasi ma latou fanau, e faigofie atu ona vaavaai ma faasa’o i latou pe a manaomia.
O le tala ia Seruia o se tala faamomoi loto i se aiga i le Tusi Paia. O Seruia o le tuafafine o Tavita ma è toatolu lana fanau tama o Ioapo, Apisai ma Asaeli. I le faasologa o le Tusi Paia, ua ou iloa ai, e lē o taua poo ai lo latou tamā (1 Nofoaiga Tupu 2:16) ma ou te manatu e lei tele sona sao i le aiga e pei ona tatau na iai se tamā lelei. E ui na tutupu ane nei tama ma avea ma tagata iloga o taua, na iai ni o latou vaivaiga na iu ina faatoilalo ai i latou. O Asaeli e saosaoa, ma e iai se taimi na tamoe ai lava ma oti ai (2 Samuelu 2:12-32). O le loto ita o Ioapo na iu ai ina faasagatau i lona taitai, le tuagane o lona tinā o Tavita, ma na fetuu ai e Tavita o ia (2 Samuelu 3:26-29). O Apisai na vavevave ona taumafai e fasioti i le tagata faauuina a le Atua , o Saulo ma na lapataia o ia e Tavita ( 1 Samuelu 26:5-12).
O se tasi tagata i le Tusi Paia e lei i’u lelei lana fanau, o Eli. I la’u suesuega, ua faaalia ai e lei taua se galuega na faia e lana avā i le tausia o nei tamaiti, ma ou te lē ofo la ina ua taua i laua, o tagata ulavavale, ‘ua la lē iloa le ALI‘I.” (1 Samuelu 2:12 ).
O le nonofo i nofoaga eseese e ono le mafai ona alofia e ulugalii i nisi o taimi. O le tausia o tamaiti e se tagata e toatasi e faigata ma ou te tatalo e foai atu e le Atua I tagata fai fanau taitoatasi, le poto ma le malosi e tausia ai fanau e tusa ma le finagalo o le Atua. Afai o soifua manuia uma matua, e taua tele le galulue faatasi ia tausia laua fanau ma agai atu i le Alii. E taua tele i matua le iai ma galulue faatasi i le tausia ma le aoaoina lelei o fanau i ala o le Alii, i le suafa o Iesu, Amene.
-
OPEN HEAVENS
MATALA LE LAGI MO LE ASO LUA 10 IUNI 2025
(tusia e Pastor EA Adeboye)
Manatu Autu: ‘Faatasia e avea ma tino e tasi 2 (Cleave as one 2).
Tauloto – Mataio 19:6 “O lea e lē toe to‘alua ai, a o le tino e tasi i lā‘ua; o lenei, o ē ‘ua fa‘atasia e le Atua, ‘aua ne‘i fa‘ate‘a‘eseina e se tagata.”
Faitauga - Tusi Paia: Salamo 133:1-3
O le asō, ou te fa’aauauina le fa’atalanoaga i le mafua’aga e tatau ona faatasia ulugalii faaipoipo. A nonofo ese’ese ulugalii faaipoipo mo se taimi umi o le a suia i la’ua e tusa ma o la si’osi’omaga, e aunoa ma lo la iloa. A fa’asolo ina matutua tagata ma ‘ausia ni tulaga fou, e mafai ona suia ai i latou, ma afai e le’o agai faatasi se ulugalii i ia tulaga fou, o le a avea ai loa la’ua pei ni tagata ua le masani. A o’o atu i le taimi ua toe feiloai nei ulugalii, e ono faateia i la’ua i o la eseesega.
E faigata ona faatasia e avea ma tino e tasi, pe a fai e le o nonofo faatasi. O le tulaga e latalata tele ai uso ma tuafafine, e le gata sa fananau mai i matua e tasi, ae sa latou ola ma tutupu ane faatasi ma sa ui faatasi i tulaga faasolo o le olaga. O le mafua’aga foi lena e tasi e mafanafana ai le sootaga ma le mafutaga a e sa uo mai o laiti. Afai e te naunau ia faatasia e avea ma tino e tasi ma lou toalua, e tatau ona lua ui faatasi i vaega eseese o le olaga nei. E te ono faapea mai: “Ma te talanoa i mea tutupu i le aso, i afiafi uma.” ae le tutusa lena ma le faasoa fesagai.
A e suesue I le Tusi Pa’ia, e te iloa ai o ulugalii, a siitia e nonofo i se seisi nofoaga, e ō faatasi. Ina ua malaga atu Aperaamo i Aikupito, sa la o ma Sara. (Kenese 13:1). Ina ua malaga atu Elimaleka i Moapi e saili manuia ai, sa ia malaga ma lona to’alua o Naomi (Ruta 1:1). E ui sa pagatia le la taunu’uga a’o le lesona taua, a siitia i seisi nofoaga, e tatau ona ō faatasi se ulugalii. Ina ua faaali atu le agelu ia Iosefa, e ave Iesu i Aikupito ona o le fuafuaga a Herota e fasiotia Iesu, sa malaga faatasi le aiga (Mataio 2:13-14). E ono iai ni tulaga le ma’alofia e tatau ai ona malaga atu muamua i seisi atunuu se tasi o se ulugalii, na o ia. Peita’i o ia tulaga e le tatau e se aiga ona nonofo eseese e silia ma le 6 masina, ona faatoa toe feiloai lea.
E lē manuia mo se ulugalii, ona nonofo eseese i le la faaipoipoga ona o le naunau e ō atu i seisi nofoaga e manatu o loo iai manuia e sili atu. O so’o se mea afaina ai le ‘lotogatasi o se ulugalii, e le tatau ona fa’atagaina pe tuu avanoa iai. E tatau i ulugalii ona faia soo se mea e nonofo faatasi ai, aua o le finagalo lea o le Atua (Mareko 10:9). A faatasi i laua, e faigofie ona tatalo faatasi ma malilie i nisi o mataupu. Peita’i, a fai e eseese ni atunuu ua nonofo ai ma eseese taimi, e faigata atu. O le faatasia ma lau tane poo le avā, e manaomia le fuafuaina lelei o ia taimi, ia mafuta, loto gatasi, ola ma ui faatasi i vaega uma o le olaga nei. E tāua i ulugalii fa’aipoipo ona fuafuaina lo la nonofo faatasi, ui ma ‘ausia fa’atasi tulaga uma o le olaga nei, i le suafa o Iesu, Amene.
- Show more
