Episoder
-
بهاي الحلقة استضفنا هيا حنيني،أخصائية علاج وظيفي مختصة بالطعام والإطعام للأطفال، وصاحبة منصة “First Bite” الي بتضم مئات المنشورات وبتقدم للأهل نصائح وإرشادات حول طعام وإطعام أطفالهم، بهدف دعمهم في رحلة التغذية بأسلوب سليم, وبناء علاقة صحية بين أطفالهم والطعام.
حكينا مع هيا عن رحلتها المميزة في عالم الfeeding وكيف أن شغفها لهذا المجال وتقديم المساعدة للأهالي أثر بشكل عميق على أسلوبها والعلاقة الحلوة الي بتكونها مع الأهل والأطفال.
حكينا كمان عن الفكرة المغلوطة عليها أنها أم وكيف هي بتتعامل مع هاي الفكرة وعلى الرغم منها، كثير من الأهل برتاحولها, بثقوا فيها وبحبوا اسلوبها الي في كثير تفهم وتقبل.
تطرقنا لأهمية خلق بيئة داعمة بتساعد الأطفال على تطوير عادات غذائية صحية. من خلال قصص ومواقف يومية بسيطة بتواجهها في إرشاداتها- هيا شاركتنا استراتيجيات فعالة بتخلي تناول الطعام تجربة ممتعة وإيجابية للأطفال، بعيدًا عن أي أحكام مسبقة.
اسمعوا الحلقة لتتعرفوا على شخصية هيا أكثر وتسمعوا نصائح قيمة ومعلومات مهمة ممكن تساعد الأهالي على فهم كيف يدعموا أطفالهم في بناء عادات غذائية صحية.
-
في هاي الحلقة منلتقي مع الشيخ عبد الله بدير، ابن كفر قاسم, الناجي والشاهد على مجزرة كفر قاسم الي حصلت في 29 أكتوبر 1956، بوقتها كان عمره 11 سنة.
بشاركنا الشيخ ذكرياته المؤلمة من هذيك اللحظات الي غيرت حياته بشكل جذري، وكيف أثر هذا الحدث في تشكيل شخصيته, مهنته وتوجيهه كأب وجد. منتعرف على كيف انتقلت هاي التجربة القاسية من جيل لآخر، وكيف أثرت على تربية أبنائه وبناته، في جوانبها الواعية أو الغير واعية.
هاي الحلقة فيها سرد تفاصيل تاريخية، وتطرق لكيف هذا الحدث وما في من صدمة أثر وشكل علاقة الشيخ عبد الله مع عائلته وأجياله اللاحقة. منسمع كيف ممكن للأحداث التاريخية الكبيرة تمتد ويستمر تأثيرها لأجيال، وكيف الشخص بختار يتصالح مع التجربة المؤلمة وياخدها لمحل صمود وتشبت وعزيمة ومشاركة بهاي آلاليات مع محيطه - إن كان عائلته أو المجتمع الموسع.
أسمعوا الحلقة لأنها بتقدم درس مهم عن الصمود، الإرث النفسي للأحداث الكبيرة، وكيف ممكن الأفراد تحول تجاربهم الشخصية لمصدر قوة وحكمة للأجيال المقبلة.
-
Mangler du episoder?
-
في الجزء الثاني من حلقتنا مع ندى ومحمد جبارين، استمر الحوار على مواجهتهم لمرض طفلتهم شام وتأثيراته على حياتهم العائلية. حكينا عن الصعوبات الي واجهوها في التعامل مع تبعات المرض على شام، من الناحية الجسدية والعاطفية، وكيف قدموا الها الدعم خلال فترة تواجدها في المستشفى ورحلة تعافيها المستمرة لليوم.
بسأل ندى ومحمد عن كيف بحافظوا على توازن بين رعاية شام وتلبية احتياجاتها وبين واحتياجاتهم الشخصية والزوجية مع الحرص على استمرارية حياة العائلة واهتمامهم ببناتهم الأكبر - نادين ونصال.
حكينا عن التغيير في أدوارهم كأهل والدعم المتبادل بينهم وكيف تقاسموا المسؤوليات وواجهوا هاي المرحلة الصعبة ايد بايد. حكينا كمان عن الدعم الي اخذوا من العائلة والأقارب وقديش كان مهم وضروري.
اسمعوا الجزء الثاني لتتعرفوا كيف ندى ومحمد، رغم كل التحديات، نجحوا في تخطي أصعب اللحظات وحافظوا على دفء واستمرارية حياتهم العائلية بحب وصمود.
-
في هاي الحلقة، معي ندى ومحمد جبارين، أهل شام.
شام طفلة عمرها ٣ سنوات, على عمر النص سنة مرقت بأزمة صحية مفاجئة - من حم جسماني بسيط وعوارض رشح لتدهور سريع في حالتها وصعوبة في التنفس وتوقف عمل القلب.
الحدث حصل في 6.10.21 -من رحلة استجمام عائلية هادئة لايلات لنقل سريع عن طريق الهليكوبتر لمستشفى مركزي في البلاد لتلقي العلاج بأسرع وقت ممكن.
ندى ومحمد شاركوا معنا المحطات الصعبة والمصيرية اللي مروا فيها من لحظة تشخيص حالة شام الي امتدت لأيام ومواقف عديدة داخل سيرورة طويلة حسوا فيها انها راح تفارقهم عدة مرات, لكن ما فقدوا الايمان والامل ورافقتهم الآية- يُحْيِي الْعِظَامَ وَهِيَ رَمِيمٌ.
الحوار مع محمد وندى راح ينقسم لجزئين.
اسمعوا الجزء الاول لتتعرفوا على تجربة أهل بمواجهة اختبارات وقرارات حساسة كثير التي فرضتها حالة طفلتهن الصحية.
-
بهالحلقة استضفنا ريم الماضي شلبي، زوجة لأشرف وأم لأربعة مراهقين: عمر، لور، رنيم، وبدر.
ريم محامية ومرشدة في التربية الجنسية والإرشاد الأسري.
حكينا مع ريم عن تجربتها كأم بتربي ٤ مراهقين بأجيال ومراحل متنوعة، وكيف بتتعامل مع التحديات اليومية، بجانب اللحظات اللي مليانة حب وفرحة.
ريم شاركتنا إنه أول ولدين عندها في فرق جيل بينهم وبين الاصغر، ولما كبرو الأصغر، لاحظت إنه في أشياء ناقصتها بصندوق أدوات التربية، وإنها بحاجة لآليات جديدة عشان تقدر تتعامل معهم بطريقة أحسن. هون، قررت ريم تتعلم أكثر عن التربية والإرشاد عشان تقدر تبني علاقة صحية وقوية مع أولادها.
حكينا عن كيف هذا القرار أثر على حياتها وحياة عائلتها، وعن الرحلة اللي مرت فيها من محامية لإرشاد الأهل، وكيف هذا التغيير ساعدها تفهم أولادها المراهقين أكتر وتتعامل معهم بطرق مبتكرة وفعالة ومحبة.
الحلقة مليانة قصص واقعية عن التحديات والفرح اللي بتيجي مع تربية المراهقين، وعن كيف الأم ممكن تتطور وتتعلم على طول الطريق.
اسمعوا الحلقة لتتعرفوا أكثر على تجربة وأسلوب ريم بتربية مراهقين!
-
في هاي الحلقة الخاصة، استضفت عائلتي: أمي سعاد وأخوتي علي ودريد. حكينا عن قوالب التربية المختلفة الي نشأنا عليها وتأثيرها علينا. تحدثنا عن 3 أنواع من القوالب التربوية: المكررة، المرتجلة، والمصححة.
بدينا بتعريف هاي القوالب-
القوالب المكررة: هي السلوكيات والمعتقدات الي بتنتقل عبر الأجيال وبتكرر كيف ما هي (بشكل واعي او غير واعي).
القوالب المرتجلة: هي التعديلات العفوية الي منعملها, بالأساس نتيجة التكيف مع ظروف الحاضر.
القوالب المصححة: هي محاولات واعية لتغيير سلوك أو نهج ما عجبنا في تربية أهلنا.
وانتقلنا لحديث حول هاي القوالب من خلال مشاركات بقصص وتجارب عشناها.
أمي -سعاد شاركتنا في أبرز القيم والمعتقدات الي ورثتها من والدها ووالدتها واتبعتها في تربيتنا. علي حكى عن تجربته كأب، وكيف أثرت تربية والدينا، وخاصة أمي، على أسلوبه في تربية أبنه. حكى كمان عن الأنماط الي بشتغل على تغييرها بشكل واعي. دريد شارك وجهة نظره حول دوره في العائلة , والتغيير الي عمله بنفسه وتعمقه في عالم التنمية البشرية وكيف ساعدنا كلنا نعمل نوع من التصحيح لقالب التعبير عن المشاعر والتواصل مع المشاعر الصعبة بالاخص.
اسمعوا الحلقة عشان تكتشفوا كيف تأثير تربية أهلنا علينا، حتى لو حاولنا نغير أو نبتعد عن بعض الأساليب والأنماط في النهاية معظم سلوكيات التربية موروثة. بتستناكو حلقة مليانه بالتأملات العميقة واللحظات الحقيقية!
-
بهاء قطوف هو الجيل الرابع من عائلة قطوف - أصحاب مصلحة مجوهرات، هو المصمم الرئيسي ومدير المصنع.
مع بهاء حكينا عن كيف حافظت العائلة على إرثها والقيم الأساسية اللي رافقت تطورهم على مر السنين مثل العطاء والمصداقية والحب للمهنة.
بهاء بشاركنا كيف تم نقل الحرفة والإرث عبر الأجيال من الجد حنا الي بلش بسنة 1907 للجد بسيلا للجيل الثالث وللرابع اليوم وكيف هو بشوف الشغل ضمن مصنعة العائلة هي مسؤولية وامتياز كبير.
منحكي عن دعم العائلة لنمو الأجيال الجاية وكيف بعطو كامل الحرية والاختيار لكل فرد بأنه ينخرط في العمل أو يختار طريق مستقل. كمان منحكي عن ديناميكيات العمل ضمن العائلة, كيف بكون لما الزميل هو ابن العم والمدير هو الاب؟
اسمعوا الحلقة لتتعرفوا على قصة عائلة قطوف وكيف حافظوا على إرثهم وقيمهم على مر الأجيال، وكيف بهاء بوفق بين التقاليد والابتكار في صنعة العائلة.
-
سحر وفادي أهل كارول, شربل وجان.
هنه زوج رائع خاضوا تجربة التبني مع طفلتهن الأولى- كارول.
منحكي عن كيف بدأت فكرة التبني، وكيف أثرت هاي التجربة على مفهوم الوالدية عندهن. منحكي عن سيرورة التبني، التحديات العاطفية واللوجستية الي واجهوها وكيف مرقوها كزوج. سحر وفادي بشاركونا بمشاعرهم في اللحظة الأولى الي التقو فيها بكارول وكيف استقبلتها العائلة الموسعة والحارة. منتطرق كمان لكيف بتحدثوا مع كل الي حوليهن عن مفهوم ولغة التبني. واخيراً منحكي عن تأقلم العائلة للمفاجئات الي بتصير مع حضور أبناء جداد للعائلة- وكل واحد اجى بطريقته - سحر بتوصفهن بالاعجوبة!
اسمعوا الحلقة لتتعرفوا على سحر وفادي وكيف واجهوا كل التحديات وحولوا تجربتهن في التبني لرحلة مليانة بالدفء والأمل والسلام.
-
لينا عباس، زوجة وأم روما, مصممة فساتين أعراس وصاحبة استوديو لينا عباس.
في الحلقة مع لينا، منحكي عن تجربتها كأم لأول مرة بجانب دورها كمصممة أزياء مستقلة وصاحبة بزنس.
لينا بتشاركنا بتجربتها خلال الحمل، تحضيراتها للغياب بفترة الولادة وإجازة الولادة، وكيف قدرت تستمر في التصميم وإدارة الاستوديو بهديك الفترة.
منحكي كمان عن الرجعة للشغل وكيف قدرت توازن بين الأمومة وبين شغلها، والتغييرات اللي عملتها بأسلوب شغلها عشان توفق بين الشغل والاهتمام ببنتها.
لينا كمان بتشاركنا نصائحها للأمهات اللي عندهم مشاريع خاصة وعم بيمرقوا بتجربة الأمومة لأول مرة.
اسمعوا الحلقة لتتعرفوا على تجربة لينا الام والمصممة بنفس الوقت.
-
عبد هو أبو لور وزوج حنين اغبارية , ناشط سياسي من مدينة يافا ومقدم بودكاست الميدان في موقع عرب ٤٨.
في الحلقة مع عبد منحكي عن تجربته كأب لطفلة عمرها 3 سنوات, عن تربيتها وعن تربيته هو في منشأه يافا.
كمان منحكي عن بناء الهوية , كيف منعرف أطفالنا على تراثنا وانتمائنا بوجود العلاقة مع المجتمع الاسرائيلي والتربية في هاي السياق.
اسمعوا الحلقة لتتعرفوا على تجربة أب بربي بنته على المفاهيم الوطنية الي ربي عليها.
-
سميرة حاج يحيى أم لـ5 أولاد وبنات, صحافيه, أستاذة في الإعلام ومحررة صحيفة عبرية محلية.
ضياء حاج يحيى, اب لطفلين, صحفي, وابنها لسميرة.
مع سميرة وضياء منحكي عن توريث المهنة, انكشاف الاولاد على مهن الاهل والتأثر فيهن وقديش مهنة الصحافة كانت حاضرة في بيت سميرة وتربيتها لضياء.
منحكي كمان عن الصفات الي بورثورها الاولاد من مهن أهلهن ,بالاساس ايش ورث ضياء من والدته ووالده.
في الحلقة مننكشف لتجربة سميرة كست, وعلاقتها ونظرتها لأحفادها وكمان عن تجربة ضياء في دوره كأب.
اسمعوا الحلقة لتتعرفوا على تجربة جيلين من الأهل في نفس المهنة.
-
لينا هواري عفيفي , ام ل ٤ أولاد وبنات, معلمة انجليزي ومؤسسة مبادرة waysme
مع لينا منحكي عن وصفها لحياتها وكيف بتشوف حياتها كصندوق… والصندوق في رزم وهي أجزاء حياتها- أولاد, علاقة زوجية, شغل واحتياجات لينا الشخصية.
في الحلقة كمان منتطرق لكون لينا ام لتوأم أولاد , وكيف هاي الاضافة الكبيرة لحياتها غيرت امور كثيرة وكانت فرصة لأنها تبدأ اكثر تصغي لصوتها الداخلي.
اسمعوا الحلقة لتتعرفوا على تجربة أم في ترتيب مستمر لحياتها وأولوياتها.
-
محمود أبو ايلول وزوج رايه. محمود مدير قسم مبيعات ميدانيه بشركة هوت موبايل
في الحلقة مع محمود راح نحكي عن تجربة اب تزوج وخلف على عمر 25 وعن جهات نظر الرجال عن الابوة من خلال نظرته وتجربته الخاصة.
محمود بشاركنا بأسلوب التربيه الي بتبعه مع بنته , في كثير مزح ومرح وفرح.
اسمعوا الحلقة لتتعرفوا على تجربة اب شاب حقيقيه وصادقه.
-
اشواق كيال, معلمة, وأم
اشواق معها لقب أول في التربية وثاني في علم المجتمع والمهارات. اشواق كمان مفعله فعاليات كبار وصغار.
في الحلقة مع اشواق راح نحكي عن مسيرة أم تزوجت على عمر 20 و أنجبت 3 أولاد خلال سنين تعليمها وبناية مهنتها.
اشواق بتشاركنا بنظرتها الحقيقية والصادقة على حياتها واختياراتها وكيف كانت بتغييرهن لو هي بوعي وثقافة اليوم.
اسمعوا الحلقة لتنكشفوا على تجربة مميزة لأم بمرحلة مبكرة.
-
أحمد أبو عمر - 7 سنوات ونور - 5 سنوات وزوج اماني.
أحمد هو مبادر اجتماعي ومدير عام لشبكة قدرة.
في الحلقة مع أحمد منحكي عن تجربته كأب, مفهومه للأبوة - بالأساس انها مكتسبة ومختلفة عن الأمومة الي ممكن نوصفها بأنها بشكل كبير موروثة.
خلال الحديث مع أحمد, بشاركنا بتجارب ومواقف حقيقية كأب الي عن طريقها بفهم انه الابوة حجمها ومسؤولياتها بتكبر وهي لا تكتمل.
اسمعوا الحلقة لتتواصلوا مع تجربة أب حاضر لرعاية وعناية أطفاله.
-
أسماء هي شاعرة , كاتبة وصحافية فلسطينية وأم لسينا, طفل عمره تقريباً 3 سنوات.
في الحلقة مع أسماء منحكي عن تجربتها كأم اللي كانت رافضه فكرة الإنجاب.
منتطرق لأسلوبها المميز في تربية ابنها مع زوجها آدم, للتغييرات بتفكيرها وتوجهها للتربية والأمومة.
منحكي عن اهمية القراءة للطفل , عن دور الأهل في تشجيع استمرارية القراءة. منحكي عن عملها ككاتبة وكيف تغيير من بعد ما صارت أم.
اسمعوا الحلقة لتتعرفوا على تجربة أم غنية ومميزة.
-
رقية صباح وأنَس أبو دعابس، زوج وأهل كِندة
في الحلقة معهن منعرض افكار نمطية عالمية موجهة للأم وللأب ومنسأل عن هاي الافكار، هل بواجهوها وكيف بتعاملو معها.
*بحديثنا ما في أي حكم مسبق على اساليب تربية او أهل مختلفين.
اسمعوا الحلقة لتتعرفوا على أهل ملقبين ب "خارقي الافكار النمطية".
-
احلام عرو كبها, زوجة وأم لطفلين - جاد وسما. احلام مهندسة معمارية.
الحلقة مؤثرة وموضوعها حساس, منحكي عن تجربة احلام كأم ، وبالذات كيف تأثرت من بعد فقدان والدتها.
شكر كبير لأحلام على انه فتحتلنا قلبها, على صدقها, جرأتها وشجاعتها.
الله يرحم والدتها, منتمنى تكون في محل احسن ومنتمنى قدرنا شوي نكرم ذكراها في هاي الحلقة.
-
خلود واسماعيل, اخوة من يافا. خلود ام ليان وتمارا واسماعيل ابو انتصار وخلود.
في الحلقة معهن منحكي عن ديناميكية اخوة تقريباً بنفس العمر وبربوا بنات كمان بنفس الجيل.
منحكي عن المبادئ والقيم الي تربوا عليها بالبيت وكيف بنقلوها لبناتهم اليوم.
اسمعوا الحلقة لتتعرفوا على تجربة اخوة في التربية.
-
مروة ومنه, ام وبنتها, في الحلقة معهن منحكي عن تجربتهن في الانتقال للحياة في ميونخ, المانيا- تأثيرها على الديناميكية في العائله, حسناتها وصعوباتها.
كمان في الحلقة منحكي عن الرجعه للحياة في البلاد والتحديات الي بتواجهها منه وبالأخص في التأقلم.
اسمعوا الحلقة لتنكشفوا على مواقف وتجارب حقيقيه واجهوها الضيفات في مراحل الهجرة المختلفة.
- Se mer
