Episódios
-
喺中世紀末，歐洲城市嘅邊陲，有一大片荒涼同無辦法長期居住嘅土地，呢片土地就好似包圍住城市嘅開放沙灘，呢個沙灘曾經居住住一種老舊嘅恐懼，以致到一般人唔會輕易靠近，被歸屬為非人（L’in-humain）嘅領域，為方便討論，我哋將呢種領域，稱之為「非人荒漠」。
你覺得「非人荒漠」過去擁有嘅恐懼係咩？
呢個恐懼嘅名極為古老，佢就係《聖經》當中提及到嘅「痲瘋病」。
歐洲人對「痲瘋病」避之則吉，認為得到「痲瘋病」嘅人（痲瘋病人）得到上帝嘅懲罰，於是喺城市嘅邊陲，建立被人詛咒嘅社區——痲瘋院，將痲瘋病人一個個送到痲瘋院（其中一個主要原因，係唔想被痲瘋病人傳染）。呢個做法，由中世紀前期已經開始。中世紀幾時開始，無一個定案，有人認為係西羅馬帝國最後一位皇帝被廢黜嘅年份——476年，象徵住蠻族擊倒西羅馬，西方文明要喺亂局當中以各自力量重建基督教文化。
Foucault指出，從中世紀前期，到十字軍東征結束為止（十字軍東征結束喺1270年），喺呢七百幾年間，歐洲大陸嘅痲瘋院數量不斷提升……
-
上集提到，尼采喺佢第一部作品——《悲劇的誕生》當中，將西方哲學分作兩個階段——蘇格拉底前同蘇格拉底後，而佢嘅詮釋，可謂改寫咗西方人對古希臘哲學嘅視角：以往，蘇格拉底被人推舉；尼采認為，蘇格拉底之後，就係思想嘅陷落。
雖然尼采呢種講法過於誇張（未見成熟），但係呢種講法的確令人重新審視柏拉圖哲學嘅來源同效用，我哋喺《西哲幼稚園》嘅第9集用《非理性的人》講過，現代學者認為柏拉圖可以象徵住神話轉向哲學嘅化身，由此，西方哲學陷入難以解開嘅矛盾。而尼采就係將呢個矛盾展露出嚟嘅人，開啟咗對古希臘哲學嘅重新審視。
從依家嘅視角睇嚟，尼采嘅《悲劇的誕生》帶嚟獨特見解，但喺《悲劇的誕生》呢部奇書問世之初，一般古典語言學教授都冷眼視之，有人仲批評《悲劇的誕生》係「完全胡說」，仲有一個語言學家寫咗一本小冊子譏笑《悲劇的誕生》，教授嘅批評，預示住尼采往後嘅孤獨。
而喺尼采教授嘅課程中，學生開始被人勸退，話唔好上尼采嘅堂。但尼采無放棄寫作，佢喺三年間寫咗四篇長文，分別係〈史特勞斯：懺悔者與作家〉（“David Strauss: The Confessor and Writer”）、〈歷史的利弊〉（“The Use and Disadvantage of History for Life”）、〈教育家叔本華〉（“Schopenhauer as Educator”）、〈華格納在拜壘〉（“Richard Wagner in Bayreuth”），四篇文合成一本書，叫做《不合時宜的觀察》（Untimely Meditations）。
從四篇長文嘅標題可以睇出，喺呢段時期，尼采主要係回應、承繼佢所鍾愛嘅思想家，亦即係我哋之前一直提到嘅叔本華同華格納。另外，既然現代文明身陷蘇格拉底之後嘅影響，咁就只有華格納嘅音樂先可以拯救呢種文化危機。佢講到：
「從狄奧尼索斯之源，德國精神力量崛起，它與蘇格拉底文化的原始條件並無任何共通之處……也就是說，德國音樂……在它浩瀚太陽系的運行軌道中，有巴哈到貝多芬，又從貝多芬到華格納。」（《悲劇的誕生》，見於《哲學的故事，尼采，III》）
尼采認為，德國精神，被華格納喚醒。今集，我哋就要接住尼采同華格納嘅故事講落去。
內容包括：
「戰亂之下」：尼采喺德國戰勝之際，見到德國陷入衰敗嘅可能，而華格納就係重振德國精神嘅支柱。 「再見華格納」：尼采之所以會離開佢嘅偶像，原來係同一首歌有關。 「燃燒生命」：我哋會睇下尼采喺”Why I Am So Wise”當中，點樣形容自己身體一步步衰弱，而意志一步步強大。 「飄泊中寫作」：講講尼采所遇到嘅愛情，以及佢嘅人生結局。佢童年被人稱為「聖殿的耶穌」，死後被人稱為「XX」，可謂係首尾呼應。另外，我會喺結語補充一個部分，「何愛尼采」。因為陳鼓應喺〈經典全新修訂版序〉當中提到尼采對佢生命嘅影響，就順便講埋。
-
Estão a faltar episódios?
-
依家，我哋主要會用蘇格拉底嘅朋友或者弟子嘅描述，了解蘇格拉底嘅事蹟同形象。但呢啲作品多數都係蘇格拉底死後先完成；喺蘇格拉底在生嘅時候（公元前423年），蘇格拉底已經喺年輕明星劇作家亞里斯多芬（Aristophanes）嘅作品——《雲》（Die Wolken）當中出現。呢個故事係一部喜劇，仲喺詩人比賽中得到第三名，個故事大概係咁：
有一個陷入財務危機嘅大地主拜蘇格拉底為師，想學習喺法庭上面對債權人嘅時候，為自己辯護嘅最佳方法。點知，大地主資質唔好，學極都學唔好，於是佢就將自己個仔送畀蘇格拉底教。點知大地主個仔學完之後，唔單止無幫父親辯護，仲反過嚟攻擊父親，仲話自己母親都應該被打。大地主見到蘇格拉底嘅壞影響，所以放火燒咗佢間屋。
荒唔荒謬？荒謬。喺《雲》呢部作品之下，蘇格拉底嘅形象同我哋依家所理解嘅詭辯家無咩分別，為權貴服務，仲指鹿為馬。好可能呢一切形象都唔係真確，但《雲》呢部作品卻好大機會顯示住當時嘅人，對於蘇格拉底嘅印象——蘇格拉底能夠用說話擾亂人心，帶嚟倫常混亂。
甚至，我哋可以想像，如果對於蘇格拉底嘅描述，就只有《雲》呢部作品，咁我哋今日應該唔會再記住蘇格拉底、將蘇格拉底稱為重要嘅西方哲學家。（《認識世界：西洋哲學史卷一》（臺北：商周出版，2021年3月），頁110）
好彩嘅係，我哋今日有科林斯嘅色諾芬（Xenophon）所寫嘅《蘇格拉底追思錄》，以及柏拉圖嘅種種作品。以致我哋可以還原蘇格拉底面對審判時候嘅情境（雖然都未必係真），而雅典民主殺死蘇格拉底嘅呢種講法，或者有啲粗淺，甚至，有人會話，蘇格拉底可以算係「自殺」……
-
如果你有試過讀莊子、老子嘅原文，睇睇下睇唔明，結果走去搵一本莊子、老子嘅註釋，咁你好可能會見過陳鼓應嘅作品，因為佢所編著嘅今註今譯系列，可以話係莊子、老子註譯嘅教科書。或者，大家對於陳鼓應嘅印象，就係一個道家研究者，尤其係佢提出「中國哲學道家主幹說」，指出中國文化嘅主軸同道家關係非常緊密，呢種講法，自成一家之言。
其實，陳鼓應早年對尼采思想非常著迷。喺19世紀60年代初到70年代初，當陳鼓應讀緊臺大研究所同喺大學做講師時期，就有著力於尼采思想｛呢點同臺灣大學嘅傅佩榮都幾似，傅佩榮早年受卡繆影響，之後先轉向研究中國哲學｝。喺1984年到1989年，陳鼓應喺北京大學哲學系講課嘅時候，再度研究尼采。「雖然期間時斷時續，但尼采哲學早已內化於我的思想，成為我生命的一部分。」（〈經典全新修訂版序〉）
對於尼采嘅著迷，使得佢喺1963年已經出版《悲劇哲學家尼采》，到2022年臺灣商務再搵陳鼓應出修訂版，佢都無諗住改書名（通常隔咁耐出修訂版都會改一改書名），因為陳鼓應認為「《悲劇哲學家尼采》是我在一九六三年出版的第一本書，書中內容集中體現了年輕時的我對尼采的熱情，這種熱情從來沒有消退過，這也是我仍然樂於沿用原書名並特別珍惜本書的原因。」
點解陳鼓應會對尼采有住咁強烈嘅熱愛？佢指出，「如果我沒有走進尼采的世界，我這一生肯定是完全不同的走向。」而佢喺《悲劇哲學家尼采》嘅〈前言〉提到，佢喺世上有兩本最愛好嘅書，一本係《莊子》，另一本就係《查拉圖斯特拉如是說》（Thus Spake Zarathustra），所以佢後嚟嘅研究，其實係要將莊子同尼采調和，佢喺《莊子思想散步》嘅前言提到，莊子同尼采「這兩者在思想解放和個性張揚方面有許多共同點，而尼采的激情投入與莊子的清明超脫，正有如希臘悲劇中戴歐尼索士（Dionysus；酒神）與阿波羅（Apollo；太陽神）的兩種精神力量的相互對立並又相互協調一樣，亦反映著歷代知識分子內心的種種衝突與求取平衡。」言下之意，就係因為兩者都關懷人類命運、宣揚人文精神、開展審美嘅人生觀……
講到呢度，相信大家都知點解我要講呢本書——之前喺《牛哥解經》用福永光司講緊莊子係中國古代嘅存在主義，依家就用陳鼓應所講嘅尼采，交畀你判斷莊子同存在主義嘅關係（尼采對於存在主義有莫大影響）。當你聽完尼采嘅生平，你會發現佢已經同佢嘅哲學二合為一。
今集，我會用《悲劇哲學家尼采》加埋《哲學的故事》嚟總結尼采生平，內容包括：
「出身」：尼采出身於基督教家庭，仲有經過嚴格嘅神學學術訓練，結果認為「上帝則是如此一個粗淺的解答」。點解佢會離開神學呢？我哋會睇下佢嘅自述。 「意志哲學：悲觀叔本華」：哲學家叔本華嘅作品，對「意志」有深刻刻畫，構建出尼采年輕時嘅精神世界。我哋會簡單睇下對叔本華哲學嘅簡介。 「悲劇再現：華格納音樂」：音樂家華格納嘅作品，尼采將西方哲學分作兩個階段——蘇格拉底前同蘇格拉底後。雖然尼采呢種講法過於誇張（未見成熟），但係呢種講法令人重新審視柏拉圖哲學嘅來源同效用，我哋喺《西哲幼稚園》第9集用《非理性的人》講過，現代學者認為柏拉圖可以象徵住神話轉向哲學嘅化身，由此，西方哲學陷入難以解開嘅矛盾。所以，尼采開啟咗對古希臘哲學嘅重新審視。由於《悲劇哲學家尼采》成書非常早，佢原本嘅內容仲係集中喺尼采本身，如果大家對於陳鼓應對比莊子同尼采有興趣，可以同我講聲，我睇下有無機會同大家分享陳鼓應另一本書，《尼采新論》。
按：正文講錯咗《悲劇的誕生》嘅完成年份，應為1872年，特此提醒，抱歉。
-
歡迎你嚟到《牛哥讀經》嘅第九集，今集係梁啟超系列嘅第一集。我哋講下梁啟超最勵志嘅演講——點解要返工。
梁啟超呢篇文章好出名，有時會出現喺教科書當中。我當然唔認為各位必須信服梁啟超嘅說話，只係人可以喺一生中搵到可敬、可樂嘅事物或者人物，的確會充實得多。
等我哋一齊重溫一下梁啟超點樣解釋「凡職業都是有趣味的，只要你肯繼續做下去，趣味自然會發生。」
https://zh.wikisource.org/wiki/%E6%95%AC%E6%A5%AD%E8%88%87%E6%A8%82%E6%A5%AD
-
若然參考一下從古時流傳落嚟嘅胸像，我哋就能夠知道蘇格拉底嘅樣——一個禿頭、面圓圓、突眼、扁鼻嘅樣，大概，你都唔會稱之為靚仔，甚至會話佢有啲樣衰。呢位相貌不凡嘅哲學家，係當時雅典青年最鍾意嘅導師。雖然佢係最出名嘅西方哲學家，但老實講，我哋對佢嘅認識唔多，總之，相比起有貴族氣派嘅柏拉圖，同具學者風範嘅亞里士多德，蘇格拉底總有種親切嘅感覺。無人知道佢係靠住乜嘢過日子，佢大概無工作過，亦都唔擔心聽日嘅生計，對於佢嘅妻子贊西佩（Xanthippe）嚟講，蘇格拉底可能只係一個遊手好閒、無出息嘅老公。
當然，蘇格拉底並唔係完全無嘢做。二千年前嘅雅典，總係有一個笨拙嘅身影從廣場漫步，著住同一件短袖束腰外衣，佢會走向青年，將青年帶到去神殿門廊嘅陰涼角落，要求佢哋定義自己所用嘅語詞。
跟住佢嘅青年，都有住唔同嘅熱情。有人會好似柏拉圖同阿爾西比亞德斯咁，學習老師用諷刺去分析雅典民主，有人會好似安提斯泰尼（Antisthenes）咁，企圖學習老師面對貧窮嘅態度，提出古希臘版嘅社會主義，有人會好似亞里士底布斯（Aristippus）咁，提出古希臘版嘅無政府主義，渴望一個無主人、無奴隸嘅世界。喺呢個小團體，經常都會出現激烈辯論，思索種種學問。
點解青年都愛好蘇格拉底呢？……
-
喺沙特哲學簡介（1），我哋提及到存在主義係為咗協助人恢復自我，而我哋亦都會見到沙特對於自由呢個概念非常著重。其實，沙特係用緊對自由嘅重新定義、理解，幫助人恢復自我。我哋可以喺《沉默的共和國》見到，沙特讚譽對極權說「不」嘅法國人，呢種向極權說「不」，係一種行動，而沙特哲學更想探討呢種否定，同自由之間嘅關係。
基於沙特對否定嘅重視，勞思光甚至將沙特稱為「否定哲學的哲學家」（「有人說沙特—《存有與空無》一書的作者——應該稱作「否定哲學的哲學家」，這是不算過份的。」（勞，頁88））若然話，笛卡兒嘅「我思故我在」，係用「懷疑」（「我思」）嚟作為佢嘅哲學嘅基石（詳情聽返笛卡兒嗰集），咁沙特就係用「否定」嚟作為佢嘅哲學嘅基石，因為佢認為人類最根本嘅活動，就係「否定」。我哋會喺正文慢慢講到沙特講述最根本嘅活動嘅引文。
今集，我哋會透過簡單對比唔同嘅西方思想點睇「nothing」呢個概念，以及沙特所舉出嘅著名例子——喺cafe見唔到Pierre，睇下沙特點睇「否定」，內容包括：
「荒謬與無有」：西方哲學喜愛透過理性分析研究概念，但沙特睇嚟唔覺得「荒謬」、「無有」係人可以靠理性捕捉嘅概念……
「對「存有」同「無有」之新解」：要明白沙特嘅創新，就要先明白傳統係點樣，我哋會簡單講講西方人原本點睇「無有」。仲會睇下沙特點形容喺cafe見唔到Pierre。以下分成兩個小部分：
「空無」：勞思光特登將沙特嘅nothing翻譯成「空無」，我哋會用「見唔到Pierre」嚟解釋「空無」嘅意思。 「存有」：沙特認為人係一種特別嘅存有，呢點，希望有機會用劉國英嘅作品補充一下。按：勞思光會繼續用情意我，大家大致上可以以「有執著嘅主體（感受）」嚟理解先。
-
我諗住用《哲學的故事》簡單講講柏拉圖思想，當作者威爾・杜蘭講希臘嘅文化背景嗰陣，特登提到希臘嘅地理，但佢無講得好詳細。所以我就結合一位推廣歷史嘅學者，張宏傑嘅《世界史座標下的中國》，講講希臘地理同佢嘅「弒父精神」嘅關係；既然要講「弒父精神」，咁就要用埋佛洛伊德嘅《文明與缺憾》。今集內容分成四個部分：
「地中海地理」：古希臘作家、歷史學家希羅多德講到，希臘係「一生下來就是由貧窮哺育的」，呢片貧瘠會引導希臘人走到邊度？
「海上貿易」：海上、貿易，呢兩個情況點樣影響希臘人嘅文化性格？
「神話內涵」：我哋會睇下佛洛伊德著名概念「伊底帕斯情結」嘅來源，一齊聽下伊底帕斯同希臘創世嘅故事。佛洛伊德仲用「殺父」說明希臘文明嘅發展。
「斷裂與征服」：希臘文化嘅「殺父」並唔係終點，而係要從「殺父」走向征服，最終要征服乜嘢？
Music:
delicates
https://soundcloud.com/blue-dot-sessions/delicates
thread-of-clouds
https://soundcloud.com/blue-dot-sessions/thread-of-clouds
P C III - The Family Breaks (Creative Commons Instrumental)
https://soundcloud.com/pipe-choir-2/p-c-iii-the-family-breaks-creative-commons-instrumental
P C III- Snow Ticket (creative commons instrumental)
https://soundcloud.com/pipe-choir-2/p-c-iii-snow-ticket-creative-commons-instrumental
Cherry Heath
https://soundcloud.com/blue-dot-sessions/cherry-heath
-
歡迎你嚟到《牛哥讀經》嘅第七集，今集係胡適系列嘅第六集。我哋講下胡適對《西遊記》嘅考證。
喺民國時期，有人從日本搵到一個南宋時期嘅《西遊記》版本，呢個版本引起唔少民國學者嘅注意，包括胡適同魯迅，魯迅喺《中國小說史略》講到：「還有現在新發現的一部書，叫《大唐三藏法師取經詩話》，──此書中國早沒有了，是從日本拿回來的——這所謂 「詩話」，又不是現在人所說的詩話，乃是有詩，有話；換句話說：也是註重「有詩為證」的一類小說的別名。」
而胡適就特登搵出《大唐三藏法師取經詩話》（下稱《取經詩話》）同依家《西遊記》嘅關係。藉由《取經詩話》，你會見到：
悟空初見唐僧，發現唐僧取西經團隊有x個人，然後以「白衣秀才」相出現，仲好了解唐僧嘅前世
悟空見到幡桃唔敢偷，點知唐僧竟然……胡適於是話「唐僧卻不大老實」
沙僧對應《取經詩話》嘅深沙神，佢所戴嘅頭骨，同唐僧前兩世有關；後嚟深沙神、唐僧、悟空仲嚟咗場詩歌battle
悟空大戰白虎精，立下鍾意入敵人個肚嘅戰術原型
有咗《取經詩話》嘅背景，你對於依家《西遊記》嘅某啲情節，會明白更多。
今次，我會直接由胡適嘅〈《西遊記》考證〉嘅第三章開始講。〈《西遊記》考證〉，原載1923年2月4日《讀書雜誌》第6期。
-
今集想同大家傾下職場心理學。我準備咗山口周嘅《哲學是職場上最有效的武器》，不過，要講職場心理學當然就唔能夠只係靠我，好開心搵到樹洞香港嘅Peter，喺百忙之中，抽時間上嚟同各位分享一下相關內容。
各位《牛哥講經》嘅聽眾，對Peter應該唔陌生（因為我哋之前都有一集試過對談，大家有興趣可以去聽返），Peter係樹洞香港嘅創辦人，依家youtube channel已經有超過十四萬人follow，身為一個具相當規模嘅團體嘅話事人，相信佢嘅分享，可以幫到大家用更立體嘅視角應對職場——亦即係一個管理層＋有企業培訓經驗＋具心理學知識嘅視角。今集起碼會問以下問題：
面試嘅時候，遇到「點解返呢份工」、 「點解要請你」可以點答？
返工返到頹……覺得自己好廢，好似白過咁，可以點應對？
／／點樣減低請假罪疚感？請假一來驚麻煩到人二來驚做唔晒啲嘢，後來發現其實係杞人憂天，但都無限loop，請問點改善呢種心態。／／
／／同事關係其實幾friend，但有時朋友關係又會影響到工作關係。兩者之間始終有張力，點調節好？網上主流都係話：千祈唔好同同事做朋友／／
／／點樣唔比hea既人針？例如你係hea人環境做得多野，會害到hea人多野做左／／
應該點樣同老細講加人工？
最近Peter仲會喺Sat Knowledge推出一個線上課程，教人用心理學解決職場難題，我都喺discord度邀請會員問唔同嘅問題，希望Peter可以幫下手指點迷津。我都會喺中途試下用《哲學是職場上最有效的武器》嚟回答（我相信哲學嘅回答會遠少少，而心理學嘅回答應該會貼近啲、pratical啲）。
music:
Piano Relax-The Most Beautiful & Relaxing Piano Pieces, Best Piano Cafe Music, Study
https://soundcloud.com/lam-nguyen-50766364/piano-relax-the-most-beautiful-relaxing-piano-pieces-best-piano-cafe-music-study?in=liu-lena/sets/piano-melody-partial
-------------------------
樹洞香港 x SAT.KNOWLEDGE 職場晉升心理學
8/15-9/23 預購期間低至5折⭐
輸入牛哥講經專屬優惠碼「COWGOR」再有$80折扣！
課程內容：https://hi.sat.cool/RsTcU
-
今次，我要同大家分享嘅書係勞思光所寫嘅《存在主義哲學新編》。呢本書並唔多人注意，不過對於華文世界其實有住深刻嘅影響（深刻到無人留意到）——根據臺灣大學傅佩榮嘅講法，用「荒謬」翻譯absurd係始於勞思光，而佢呢個翻譯已經深入民心，以致大家日常中都鍾意荒謬前荒謬後咁講嘢——換言之，勞思光係最早期將存在主義引入華文世界嘅學者（之一）。
牛某希望分享勞思光呢部小書畀大家，等大家可以跟隨勞思光嘅步伐，進入存在主義哲學嘅大門。而入手嘅哲學家，就係沙特。我會分兩集嚟講（但兩集係一個整體，建議兩集聽晒）。
今集會簡單啲，內容包括：
「由德國到法國：存在主義嘅內部轉變」：我哋會簡單講講時代同地域變化點樣影響到存在主義有唔同嘅展現，特別係德國嘅海德格哲學同法國嘅沙特哲學。 「沙特式自由」：下一集，我哋先會講到「無」同「自由」喺概念上嘅關係，今集講嘅「自由」，更多係沙特嘅背景、時代點影響到佢講出一種獨特嘅自由——從抵抗而講嘅自由。主要會睇下沙特喺《沉默的共和國》嘅講法。 -
歡迎你嚟到《牛哥讀經》嘅第六集，今集係芥川龍之介系列嘅第一集。點解無啦啦要講芥川龍之介呢？
我哋喺牛哥講經講緊禪宗，而禪宗嘅一大特色，就係對公案係非常喜愛。而我認為日本文學當中，都有唔少嘅作品係類似於禪宗嘅公案，不過由於體裁唔同，就會變成「長版公案」。禪宗本身嘅短公案固然有意思，但係「長版公案」又容易吸收啲。
今次，我揀咗芥川龍之介非常著名嘅作品——〈羅生門〉。我所採用嘅譯本，係魯迅弟弟周作人嘅翻譯。
震驚，搵資料嘅時候發現，〈羅生門〉原來真係同禪宗有關。芥川龍之介係從《今昔物語》搵出〈羅生門〉呢個故事再加以改編，而《今昔物語》其實係平安朝末期嘅民間傳說集，而佢係由印度佛教傳說講起，所以係一本講佛法嘅書……難怪我讀到〈羅生門〉嘅時候，就覺得要連住禪宗講。以下，我哋先補充一下背景。
所謂羅生門，意思係羅城門。羅城嘅意思好平常，就係城牆；而羅城門，就係「城牆的門」。只係因為日本大部分地方都無城牆，而唯有京都有城牆，於是羅城亦成為一個專有名詞。
今日叫嘅京都，以前叫做平安京。係八世紀嘅時候，桓武天皇第二次遷都，喺葛野興建新都，本身首都嘅名都會冠上地名，所以正路係叫做葛野京，但係因為希望呢次遷都能夠避免喺第一次遷都時候嘅混亂，於是許名為平安京。平安京沿用日本首都嘅習慣，分成左右兩京。平安京嘅左京模仿洛陽，右京模仿長安，中間以朱雀大道作為分隔，北邊有一個大內裹，即係皇城。皇城有一道門通往朱雀大道，叫做朱雀門，沿住長長嘅朱雀大道，就可以由朱雀門行到去城嘅最南邊城門，亦即係羅城門。
後嚟因為日文當中，「生」同「城」讀音相似，而「生」又易寫嘅「城」，於是傳抄途中，就寫成「羅生門」。
作為首都嘅南邊城門，理應係進入繁華嘅象徵。可惜嘅係，〈羅生門〉呢個故事發生喺平安時代嘅尾聲。所謂平安時代，其實係講緊日本喺以平安京作為首都嘅時代，以天皇作為權力中心。不過到平安時代尾聲，天皇勢力明顯退減，出現武家干涉政治嘅情形，到十二世紀末，鎌倉幕府取代天皇，成為權力中心，作為第一個幕府政權。
換言之，平安時代尾聲係一個大混亂嘅時段。〈羅生門〉中，據周作人翻譯，故事嘅主人翁係一位「家將」，其實係相當準確，其實大概就係從屬於某一個主人嘅下級武士（當時嘅武士仲未係一種特權階級），但我認為現代人對呢個概念已經太過陌生，所以使用一個同日文原文「下人」比較相似嘅「僕人」嚟代替。
另外，今次我都盡量跟住原文讀，只係有啲文句太難理解，我自己改動咗少少。
音樂來源：
P C III- Snow Ticket (creative commons instrumental)
https://soundcloud.com/pipe-choir-2/p-c-iii-snow-ticket-creative-commons-instrumental
15 Minutes Cinematic Piano Background Music
https://soundcloud.com/seraphswhisper/15-minutes-cinematic-piano-background-music
-
上集主要補充咗禪宗祖師嘅背景，以及胡適同鈴木大拙之間嘅基本差異，今集開始，我哋就要用《鈴木大拙禪學入門》嘅緒論，略略講下一個禪者覺得禪宗有咩特別。
今集內容包括：
「特別宗派：禪宗」：禪宗認為喺中土生根嘅佛教門派（大乘），確實同印度本土有所不同。 「禪與邏輯」：鈴木大拙理解下嘅禪宗，對邏輯有住「唔符合直覺」嘅態度，亦係因為呢個態度，使得鈴木大拙同胡適天各一方。 「坐禪與神秘主義（東亞神秘主義vs印度神秘主義）」：唔多學派會自認為神秘主義，鈴木大拙承認禪係一種神秘主義，基於佢對神秘主義有特別嘅定義，呢種神秘主義同東方精神有莫大關係，亦同印度精神相當唔同……鈴木大拙甚至講到：「然而，他們｛印度｝的神秘主義太重視思辨，太耽於冥想，太複雜了，而且似乎和我們居住的具體的現實世界沒有什麼真實或重要的關係。」 -
歡迎你嚟到《牛哥讀經》嘅第四集，今集係胡適系列嘅第四集，我哋要睇睇胡適對於中國禪學嘅睇法。上次講完胡適點睇人生，本來預備想同大家分享胡適點講五四，但適逢喺《牛哥講經》我哋講緊鈴木大拙同胡適嘅分別，我就搵咗胡適對北京師範大學師生嘅演講，作為一個直接嘅補充。
我哋必須要留意，印度佛教同中國佛教固然係相關，但係佢哋對於經典嘅理解、僧團風俗……都係相當大嘅差異。而呢種差異，係禪者自己都會意識到，所以喺《鈴木大拙禪學入門》，我哋會見到鈴木大拙自覺東方禪宗同印度精神有好大分別。至於分別喺邊，鈴木大拙就無細講。
我哋可以透過胡適好短嘅演講，睇下佢點樣用歷史視角睇印度禪，演講最後仲有兩個故事，係胡適用嚟總結中國禪同印度禪嘅分別。
〈中國禪學的發展〉（1934年12月，胡適喺北京師範大學嘅演講，吳奔星等筆記，原載於1935年4月30日《師大月刊》第18期）
音樂來源：
Sonata 1 Cello
https://musopen.org/zh-hant/music/2572-cello-sonata-no-1-op-5-no-1/
按：如果大家對呢個系列有興趣，歡迎到patreon試聽其他集數，或者直接加入會員！
-
佛教擁有好多各具特色嘅學派，其中，有一個學派總會引起眾人注意，佢對經典唔太著重，有住令人一聽就會皺起眉頭嘅公案，會嘲笑佛陀、三句唔埋兩句就要用棍打弟子——聽到呢度，相信答案已經呼之欲出，佢就係，禪宗。
點解禪宗睇落咁奇怪，當學者、僧人談論禪宗嘅時候，會咁津津有味呢？講白啲，就係點解咁騎呢嘅做法，居然無畀時代淘汰呢？
咁我哋就可以睇下喺現代將禪宗發揚光大、傳遍歐亞嘅禪師——鈴木大拙所寫嘅禪宗入門書，《鈴木大拙禪學入門》。呢本書喺西方世界有頗大影響，喺博客來嘅內容簡介更寫到：
「心理學大師榮格讚譽：『本書是西方世界最有影響力的禪學書籍。』
哲學家海德格讚嘆：『這就是我所有著作中想表達的事情。』」
要知道點解鈴木大拙會喺西方世界引嚟咁大迴響，睇佢生平就可以略知一二。
鈴木大拙，出生於1870年，大拙係佢嘅法號，本名係貞太朗。佢喺大學主修英文，青年時期主要從事將佛經、中國經典翻譯成英文嘅工作，二十七歲首次到美國，然後多次喺歐美各地演講、教學。到中年嘅時候，喺佢寫出一部佛教史《大乘佛教概論》之後，開始受到西方學界注意，除咗因為佢思想獨特，仲因為佢嘅作品大部分都係以英文書寫，又適逢歐洲經歷一戰、二戰嘅巨大創傷，急需新思想嘅修復，鈴木大拙嘅作品就順水推舟，成為西方人領略東方思想嘅階梯。
當中，「垮掉的一代」（Beat Generation）嘅傑克・凱魯亞克（Jack Kerouac）、埃爾文・艾倫・堅士堡（Irwin Allen Ginsberg）都係禪宗愛好者，不時手握住鈴木大拙嘅作品；「垮掉的一代」仲影響住後嚟嘅嬉皮文化……總之，鈴木大拙嘅作品喺西方獨有嘅社會氣氛之下，將禪宗推廣。鈴木大拙更被譽為「世界禪者」，喺1963年被提名諾貝爾和平獎。
你唔好以為佢係禪者就無學術地位，佢曾經做過東京帝國大學講師、大谷大學教授、美國哥倫比亞大學客座教授……今時今日西方人理解禪呢個概念嘅時候，亦因為鈴木大拙嘅影響力，而將禪翻譯成日文發音嘅Zen，而非普通話發音嘅Chán。呢點都有一個同胡適有關嘅故仔可以講。我哋正文再講。
今集內容包括：
「鈴木大拙與胡適」：鈴木大拙同胡適本來互相敬重，但係由於對研究禪嘅取態唔同，筆戰不斷。我哋會講講禪宗喺五祖之後嘅南宗北宗之爭，喺呢場爭鬥當中，出現咗家傳戶蹺嘅佛偈，「本來無一物，何處惹塵埃。」
放喺《牛哥講經》嘅〈禪學入門〉原本只有兩集，即係兩篇文稿，喺錄第一篇文稿嘅中途，發現太長，所以分開兩次嚟錄，所以依家成個〈禪學入門〉將會分成三集，而頭兩集係分享同一篇稿。今次錄音只會講述第一部分「鈴木大拙與胡適」，其餘部分，就下次再講埋。
-
上次，我哋提到《造神》呢本書會「大範圍咁探討信仰同宗教嘅歷史」，咁到底個範圍要去到幾大呢？
作者決定，由第一個人類開始講起（作者：亞當同夏娃嘅故事）。要了解人類同宗教嘅關係，就要使用唔同學者對洞穴壁畫嘅研究成果，從洞穴壁畫探察初民嘅心靈故事。
今集內容包括六個部分：
「智人與葬禮」：我哋會詮譯一下葬禮嘅意義，以及初民點解會發明葬禮。
「簡介薩滿教世界觀」：講宗教起源，一定離唔開薩滿教，我哋會一齊睇下薩滿教點樣將世界劃分為三層。
「沃爾普岩洞群」：喺法國南部有好多史前洞穴，入面有住大大小小嘅壁畫，其中，沃爾普岩洞群最引起作者嘅注意，我哋會一齊用聲音（即係我把聲）探索呢個洞穴群……
「手印」：洞穴壁畫上面嘅手印，原來有一個幾得意嘅共通點。
「壁畫」：有人話，洞穴壁畫就係畫緊初民狩獵嘅場境，作者提出異議……
「巫師」：我哋會將目光放喺一幅巨大而獨特嘅壁畫，佢好可能係第一幅乜乜……
-
呢一集，牛哥作為對心理學深感好奇嘅門外漢，邀請咗重量級嘉賓——《樹洞香港》嘅Peter。
樹洞香港 Podcast On Spotify
樹洞香港 Apple Podcast
呢次會訪問Peter對於心理學同哲學嘅睇法。兩人從心理學嘅不同學派發展，發現心理學與哲學呢兩門看似性格唔太相似嘅學科，其實有住「殊途同歸」嘅關懷——兩者都是為人展現一種「看世界的方式」。難怪Peter會話，「要成為一個好嘅psychologist，一定要識一啲哲學。」兩人亦討論咗喺成長過程中，學問（不論係哲學定係心理學）嘅角色，Peter更喺其中分享咗唔少閱讀心理學作品時候嘅心路歷程，萬勿錯過！
按：《樹洞香港》出咗個app 叫Mindforest，有興趣記得去試用一下！
-
松浦彌太郎嘅作品，大家行書店嘅時候都可能會見過，算係一個喺香港幾出名嘅日本作家，佢嘅作品都幾多，例如《今天也要用心過生活》、《只要我能跑，沒什麼不能解決的》。佢教人點樣處世、思考，聽落係一個成功人仕。
其實，松浦彌太郎年輕嘅時候唔算順利，佢喺高中嘅時候已經輟學，一句英文都唔識講，居然決定到美國闖一番天地。由時薪兩美金嘅工作慢慢做起，喺唔同行業之間穿梭，儲錢開咗間小書店，再進軍出版界，成為「COW BOOKS」嘅負責人（同牛某無關，只係緣份）。
喺呢段艱辛嘅成功之路，佢受到唔少前輩嘅提醒、從唔同情況累積到各種經驗，所以佢亦想寫一本書去提醒年輕人，嗰啲對未來感到不安、搵唔到夢想、感到迷惘嘅人。為咗作更親近嘅提議，佢嘗試設想：「如果我依家二十五歲，最想做嘅50件事。」今次要講嘅書，就係《松浦彌太郎說: 假如我現在25歲, 最想做的50件事》。
雖然書名表明係25歲，但我認為25歲只係一個象徵，象徵一個年輕、尚未走出迷霧、等待或渴望進步嘅心靈。我一開始睇呢本書嘅時候，有一種松浦彌太郎嘅建議睇落太過積極、上進嘅感覺，心諗會唔會只係一個滿懷希望嘅日本人所寫嘅鼓勵說話。但我越睇，我就開始明白點解松浦彌太郎要寫得咁積極。
依家嘅松浦彌太郎，唔會再好似書中咁諗嘢，但如果要依家嘅松浦彌太郎去提點二十五歲嘅松浦彌太郎，就應該要咁積極。點解？因為「放下」二字對唔少嘅年輕人係一劑毒藥。我哋總語再講。
今集會講以下四件事：
「以成為社會嘅齒輪為傲」──我會從馬克思嘅異化，分出「被動齒輪系統」同「自發齒輪系統」，幫助你明白「社會齒輪」呢個比喻嘅意義何在 「累積小小的成功」──小成功點解會累積成大成功？我哋要靠數學幫幫手。 「訓練自己喺三個月內成為領導者」──要成為領導者，首先要做個「老襯」 「養兵千日，用在一時」──提早返工，係一件令人感動嘅事按：如果你覺得呢集有意思，未必係因為松浦彌太郎。
另：作者係一個日本人，我哋感受下日本人點樣看待工作。
-
「真實生活比起小說劇情更為神奇」
雖然聽落係陳腔濫調，卻係《自私的基因》嘅作者，理查・道金斯(Richard Dawkins)嘅信念。佢認為人類就係尋求生存嘅機器，體內被輸入某種程式，用嚟保護名叫「基因」嘅自私分子。呢種諗法聽落好唔啱聽，但會唔會自有其道理呢？基因自私嘅諗法，同《進擊的巨人》當中嘅吉克・葉卡嘅諗法相差無幾，唔知諫山創有無睇過《自私的基因》呢？
另外，《自私的基因》同《裸猿》有幾分相似，因為兩本書嘅作者都係動物學家，一樣都係用生動嘅文筆以一般人為書寫對象，亦喺前言提到自己嘅表述同一般嘅學術著作唔同。同樣地，佢哋都著迷於詮釋達爾文嘅演化論。
《裸猿》嘅視角係針對喺人類由猿到裸猿嘅演化；今次所講嘅《自私的基因》視角就非常之大，理查・道金斯企圖描寫出由生命起源貫穿到依家嘅故事。我哋聽下道金斯自己點講《自私的基因》同達爾文理論嘅關係先：
「「自私的基因」理論是達爾文的理論，雖然他不曾從這觀點來表達，但我想他應該會讚同我的觀點。實際上，這是正統的新達爾文主義（neo-Darwinism)的邏輯延伸，而以某種新形象來表達。」
達爾文係將每一隻生物視為個體，再將相似嘅個體劃分成一個族群，然後搵出族群同族群之間嘅關係。「自私的基因」理論就唔著眼於個體，而係從基因嘅視角出發。雖然係唔同視角，但作者依然強調，只係一個理論用兩種視角嚟睇，「自私的基因」理論依然係分享住達爾文嘅演化論。
情況好似喺一張紙上面畫出一個Necker cube，其實即係喺平面畫3d嘅正方體，大家中學都一定畫過。你凝視呢一個正方體唔同嘅面，你就會覺得正方體係以唔同嘅面去面向你。我畫咗個正方體，將上面嗰面叫做A，將下面嗰面叫做B，當你凝視住A，見到一個正方體之後，你再凝視B幾秒，你會發現個正方體以另一個面面向你。人類嘅大腦真係好神奇。
總之，作者認為，以基因作為視點，同以個體作為視點，其實都係理解緊同一套演化理論。所以佢講到：「如果了解得很恰當，那它們是相等的──也就是對相同真理的兩種觀點。你可以從一種角度跳到另一種，但仍然是相同的新達爾文主義。」作者指出，呢種Necker cube只能夠表達到視角嘅轉變，但係視角嘅轉變仲會為理論本身帶嚟更高價值。換言之，以個體去睇演化論，已經有一定意義；但係以基因去睇演化論，會將演化論嘅意義昇華。就好似愛因斯坦對一套理論有興趣，然後佢用比喻去說明／思考呢套理論嘅時候，新視角可以點燃佢對呢套理論嘅思考。講到可以點燃思考咁把炮，咁就要睇下係咪真係咁勁。
今集內容主要係《自私的基因》嘅前言同定義，下集先會講道金斯點樣講述生命起源。
今集內容包括：
「基因自私，人唔自私？」：我會喺正文列表對比道金斯同荀子嘅講法，你會發現道金斯嘅諗法，同荀子太似。 「異於禽獸」：我哋會睇下道金斯對「自私」同「利他」嘅特殊定義 「群體選擇」：作者反對「個體為群體犧牲」嘅演化論詮釋，原因何在？ - Mostrar mais
