Folgen
-
【英國Gín-á古】Niáu鼠á Thí-thih Kah Niáu鼠á Thá-thih︱Titty Mouse And Tatty Mouse 原作︱Flora Annie Steel 翻譯︱蔡逸民 BuLuhSuh／柯王炳勳 Bí-leng 講古︱柯王炳勳 Bí-leng 配樂︱陳曉怡 Niau-tāu 人聲編輯︱蔡逸民 BuLuhSuh／柯王炳勳 Bí-leng 字幕︱林于真 A-chin 校對︱蔡逸民 BuLuhSuh 圖︱AI製圖 影片︱陳姿樺 Ko͘-chiáu 訂閱做工á人Youtube頻道：https://www.youtube.com/@chokangalang 完整ê英文／漢羅／POJ對照文稿khǹg ti官方網站：https://cho-kang-a-lang.github.io/ 漢羅全文： Niáu鼠á Thí-thih Kah Niáu鼠á Thá-thih Niáu鼠á Thí-thih kah Niáu鼠á Thá-thih lóng tòa tī kāng 1間厝內底。 Niáu鼠á Thí-thih去田--ni̍h khioh穗，ah Niáu鼠á Thá-thih mā去田--ni̍h khioh穗。 所pái in 2 ê lóng去田--ni̍h khioh穗。 Niáu鼠á Thí-thih去khioh tio̍h 1穗番麥á，ah Niáu鼠á Thá-thih mā去khioh tio̍h 1穗番麥á。 所pái in 2 ê lóng去khioh tio̍h 1穗番麥á。 Niáu鼠á Thí-thih去做1 ê phú-lìn，ah Niáu鼠á Thá-thih mā去做1 ê phú-lìn。 所pái in 2 ê lóng去做1 ê phú-lìn。 Niáu鼠á Thá-thih kā伊ê phú-lìn hē落去oe-á--ni̍h beh煮ho͘滾。 M̄-koh Niáu鼠á Thí-thih beh kā伊ê phú-lìn hē--lòe ê時，oe-á soah chhia-chhia--倒，kā伊燙燙--死，Niáu鼠á Thá-thih to̍h坐落來哭。 Koh來三脚椅á to̍h問講：「Thá-thih，你是án-chóaⁿ leh哭？」 「Thí-thih死--去-ah，」Thá-thih koh ìn講：「所以我leh哭。」 「Án-ne，」三脚椅á講：「我to̍h beh跳，」三脚椅á chŏaⁿ開始跳。 Koh來tī房間ê角--á有1支掃帚問講：「三脚椅á，你是án-chóaⁿ leh跳？」 「喔！」三脚椅á ìn講：「Thí-thih死--去-ah，Thá-thih leh哭，所以我to̍h開始跳。 」 「Án-ne，」掃帚講：「我to̍h beh掃，」掃帚chŏaⁿ開始掃。 Koh來門to̍h問講：「掃帚，你是án-chóaⁿ leh掃？」 「喔！」掃帚ìn講：「Thí-thih死--去-ah，Thá-thih leh哭，三脚椅á leh跳，所以我to̍h開始掃。 」 「Án-ne，」門講：「我to̍h beh īⁿ-oāiⁿ叫，」門chŏaⁿ開始īⁿ-oāiⁿ叫。 Koh來窗á to̍h問講：「門，你是án-chóaⁿ leh īⁿ-oāiⁿ叫？」 「喔！」門ìn講：「Thí-thih死--去-ah，Thá-thih leh哭，三脚椅á leh跳，掃帚leh掃，所以我to̍h īⁿ-oāiⁿ叫。 」 「Án-ne，」窗á講：「我to̍h beh khi̍h-kho̍k叫，」窗á chŏaⁿ開始khi̍h-kho̍k叫。 Chit-chūn厝外口有1隻舊椅liâu，tī窗á teh khi̍h-kho̍k叫 ê時，椅liâu問講：「窗á，你是án-chóaⁿ leh khi̍h-kho̍k叫？」 「喔！」窗á ìn講：「Thí-thih死--去-ah，Thá-thih leh哭，三脚椅á leh跳，掃帚leh掃，門leh īⁿ-oāiⁿ叫，所以我to̍h khi̍h-kho̍k叫。 」 「Án-ne，」舊椅liâu講：「我to̍h beh se̍h chit間厝kho̍k-kho̍k-chông，」舊椅liâu chŏaⁿ開始se̍h厝kho̍k-kho̍k-chông。 厝邊--á有1叢生tio̍h真將才ê大胡桃樹，胡桃樹對椅liâu講：「椅liâu，你是án-chóaⁿ leh se̍h chit間厝kho̍k-kho̍k-chông？」 「喔！」椅liâu ìn講：「Thí-thih死--去-ah，Thá-thih leh哭，三脚椅á leh跳，掃帚leh掃，門leh īⁿ-oāiⁿ叫，窗á leh khi̍h-kho̍k叫，所以我to̍h se̍h厝kho̍k-kho̍k-chông。 」 「Án-ne，」胡桃樹講：「我to̍h beh lak葉á，」胡桃樹chŏaⁿ開始hō͘伊美麗青leng ê葉á lóng總lak--落-來。 有1隻細隻鳥á hioh tī胡桃樹ê 1枝樹oe頂koân，tī所有ê葉á lóng lak--落-來ê時，伊問講：「胡桃樹，你是án-chóaⁿ beh hō͘你ê葉á lak--落-來？」 「喔！」胡桃樹ìn講：「Thí-thih死--去-ah，Thá-thih leh哭，三脚椅á leh跳，掃帚leh掃，門leh īⁿ-oāiⁿ叫，窗á leh khi̍h-kho̍k叫，舊椅liâu leh se̍h厝間kho̍k-kho̍k-chông，所以我hō͘我ê葉á lak--落-來。 」 「Án-ne，」細隻鳥á講：「我to̍h beh kā我ê毛草thǹg--落-來，」細隻鳥á chŏaⁿ開始kā伊花血ê毛草lóng總thǹg--落-來。 有1 ê細漢chŏ͘-gín-á ùi ē脚行--過，手--ni̍h kōaⁿ 1罐牛奶，是暗頓beh hō͘ in小弟小妹lim--ê，伊去看tio̍h hit隻苦憐ê細隻鳥á kā伊ka-tī ê毛草lóng總thǹg--落-來ê時，伊講：「細隻鳥á，你是án-chóaⁿ beh kā ka-tī ê毛草lóng總thǹg--落-來？」 「喔！」細隻鳥á ìn講：「Thí-thih死--去-ah，Thá-thih leh哭，三脚椅á leh跳，掃帚leh掃，門leh īⁿ-oāiⁿ叫，窗á leh khi̍h-kho̍k叫，舊椅liâu leh se̍h厝間kho̍k-kho̍k-chông，胡桃樹leh lak葉á，所以我kā我ê毛草lóng總thǹg--落-來。 」 「Án-ne，」細漢chŏ͘-gín-á講：「我to̍h beh kā我ê牛奶chhia倒了了，」細漢chŏ͘-gín-á chŏaⁿ kā牛奶罐á tàn--leh，牛奶to̍h chhia--倒-ah。 有1 ê老人to̍h tī附近，khiā tī 1支梯頂koân，伊tng teh kā草pû khàm茅草，tī伊看tio̍h細漢chŏ͘-gín-á chhia倒牛奶ê時，伊講：「細漢chŏ͘-gín-á，你是án-chóaⁿ beh kā牛奶chhia--倒？Án-ne你ê小弟小妹暗頓to̍h無thang食--ah。」 細漢chŏ͘-gín-á ìn講：「Thí-thih死--去-ah，Thá-thih leh哭，三脚椅á leh跳，掃帚leh掃，門leh īⁿ-oāiⁿ叫，窗á leh khi̍h-kho̍k叫，舊椅liâu leh se̍h厝間kho̍k-kho̍k-chông，胡桃樹leh lak葉á，細隻鳥á kā伊ê毛草lóng總thǹg--落-來，所以我to̍h kā牛奶chhia倒了了。 」 「喔，」老人講：「án-ne我to̍h beh對梯頂koân摔--落-來，kā我ê ām-kún-á摔ho͘斷。」 伊chŏaⁿ ùi梯頂koân摔--落-來，ām-kún-á摔斷--去；to̍h tī老人ām-kún-á摔斷--去ê時，大胡桃樹phiáng--1-ē倒--落-來，kā舊椅liâu kah厝間lòng kah總péng--過，厝間倒--落-來ê時，窗á mā ho͘ lòng kah飛--走，窗á koh kā門lòng--倒，門koh去lòng倒掃帚，掃帚koh去lòng倒三脚椅á，ah苦憐ê Niáu鼠á Thá-thih to̍h去hông tâi tī破磚á瓦ē底--ah。 Pe̍h-ōe-jī choân-bûn: Niáu-chhí-á Thí-thih Kah Niáu-chhí-á Thá-thih Niáu-chhí-á Thí-thih kah Niáu-chhí-á Thá-thih lóng tòa tī kāng 1 keng chhù lāi-té. Niáu-chhí-á Thí-thih khì chhân--ni̍h khioh sūi, ah Niáu-chhí-á Thá-thih mā khì chhân--ni̍h khioh sūi. Só͘-pái in 2 ê lóng khì chhân--ni̍h khioh sūi. Niáu-chhí-á Thí-thih khì khioh tio̍h 1 sūi hoan-be̍h-á, ah Niáu-chhí-á Thá-thih mā khì khioh tio̍h 1 sūi hoan-be̍h-á. Só͘-pái in 2 ê lóng khì khioh tio̍h 1 sūi hoan-be̍h-á. Niáu-chhí-á Thí-thih khì chò 1 ê phú-lìn, ah Niáu-chhí-á Thá-thih mā khì chò 1 ê phú-lìn. Só͘-pái in 2 ê lóng khì chò 1 ê phú-lìn. Niáu-chhí-á Thá-thih kā i ê phú-lìn hē lo̍h-khì oe-á--ni̍h beh chú ho͘ kún. M̄-koh Niáu-chhí-á Thí-thih beh kā i ê phú-lìn hē--lòe ê sî, oe-á soah chhia-chhia--tó, kā i thǹg-thǹg--sí, Niáu-chhí-á Thá-thih to̍h chē lo̍h-lâi khàu. Koh lâi saⁿ-kha-í-á to̍h mn̄g kóng: “Thá-thih, lí sī án-chóaⁿ leh khàu?” “Thí-thih sí--khì-ah,” Thá-thih koh ìn kóng: “Só͘-í góa leh khàu.” “Án-ne,” saⁿ-kha-í-á kóng: “góa to̍h beh thiàu,” saⁿ-kha-í-á chŏaⁿ khai-sí thiàu. Koh lâi tī pâng-keng ê kak--á ū 1 ki sàu-chhiú mn̄g kóng: “Saⁿ-kha-í-á, lí sī án-chóaⁿ leh thiàu?” “O͘h!” Saⁿ-kha-í-á ìn kóng: “Thí-thih sí--khì-ah, Thá-thih leh khàu, só͘-í góa to̍h khai-sí thiàu.” “Án-ne,” sàu-chhiú kóng: “Góa to̍h beh sàu,” sàu-chhiú chŏaⁿ khai-sí sàu. Koh lâi mn̂g to̍h mn̄g kóng: “Sàu-chhiú, lí sī án-chóaⁿ leh sàu?” “O͘h!” Sàu-chhiú ìn kóng: “Thí-thih sí-khì--ah, Thá-thih leh khàu, saⁿ-kha-í-á leh thiàu, só͘-í góa to̍h khai-sí sàu.” “Án-ne,” mn̂g kóng: “Góa to̍h beh īⁿ-oāiⁿ-kiò,” mn̂g chŏaⁿ khai-sí īⁿ-oāiⁿ-kiò. Koh lâi thang-á to̍h mn̄g kóng: “Mn̂g, lí sī án-chóaⁿ leh īⁿ-oāiⁿ-kiò?” “O͘h!” Mn̂g ìn kóng: “Thí-thih sí--khì-ah, Thá-thih leh khàu, saⁿ-kha-í-á leh thiàu, sàu-chhiú leh sàu, só͘-í góa to̍h īⁿ-oāiⁿ-kiò.” “Án-ne,” thang-á kóng: “Góa to̍h beh khi̍h-kho̍k-kiò,” thang-á chŏaⁿ khai-sí khi̍h-kho̍k-kiò. Chit-chūn chhù gōa-kháu ū 1 chiah kū í-liâu, tī thang-á teh khi̍h-kho̍k-kiò ê sî, í-liâu mn̄g kóng: “Thang-á, lí sī án-chóaⁿ leh khi̍h-kho̍k-kiò?” “O͘h!” Thang-á ìn kóng: “Thí-thih sí-khì--ah, Thá-thih leh khàu, saⁿ-kha-í-á leh thiàu, sàu-chhiú leh sàu, mn̂g leh īⁿ-oāiⁿ-kiò, só͘-í góa to̍h khi̍h-kho̍k-kiò.” “Án-ne,” kū í-liâu kóng: “góa to̍h beh se̍h chit keng chhù kho̍k-kho̍k-chông,” kū í-liâu chŏaⁿ khai-sí se̍h chhù kho̍k-kho̍k-chông. Chhù piⁿ--á ū 1 châng seⁿ tio̍h chin chiòng-châi ê tōa ô͘-thô-chhiū, ô͘-thô-chhiū tùi í-liâu kóng: “Í-liâu, lí sī án-chóaⁿ leh se̍h chit keng chhù kho̍k-kho̍k-chông?” “O͘h!” Í-liâu ìn kóng: “Thí-thih sí--khì-ah, Thá-thih leh khàu, saⁿ-kha-í-á leh thiàu, sàu-chhiú leh sàu, mn̂g leh īⁿ-oāiⁿ-kiò, thang-á leh khi̍h-kho̍k-kiò, só͘-í góa to̍h se̍h chhù kho̍k-kho̍k-chông.” “Án-ne,” ô͘-thô-chhiū kóng: “góa to̍h beh lak hio̍h-á,” ô͘-thô-chhiū chŏaⁿ khai-sí hō͘ i bí-lē chheⁿ-leng ê hio̍h-á lóng-chóng lak--lo̍h-lâi. Ū 1 chiah sè-chiah chiáu-á hioh tī ô͘-thô-chhiū ê 1 ki chhiū-oe téng-koân, tī só͘-ū ê hio̍h-á lóng lak--lo̍h-lâi ê sî, i mn̄g kóng: “Ô͘-thô-chhiū, lí sī án-chóaⁿ beh hō͘ lí ê hio̍h-á lak--lo̍h-lâi?” “O͘h!” Ô͘-thô-chhiū ìn kóng: “Thí-thih sí--khì-ah, Thá-thih leh khàu, saⁿ-kha-í-á leh thiàu, sàu-chhiú leh sàu, mn̂g leh īⁿ-oāiⁿ-kiò, thang-á leh khi̍h-kho̍k-kiò, kū í-liâu leh se̍h chhù-keng kho̍k-kho̍k-chông, só͘-í góa hō͘ góa ê hio̍h-á lak--lo̍h-lâi.” “Án-ne,” sè-chiah chiáu-á kóng: “góa to̍h beh kā góa ê mn̂g-chháu thǹg--lo̍h-lâi,” sè-chiah chiáu-á chŏaⁿ khai-sí kā i hoe-hiat ê mn̂g-chháu lóng-chóng thǹg--lo̍h-lâi. Ū 1 ê sè-hàn chŏ͘-gín-á ùi ē-kha kiâⁿ--kòe, chhiú--ni̍h kōaⁿ 1 koàn gû-leng, sī àm-tǹg beh hō͘ in sió-tī sió-mōe lim--ê, i khì khòaⁿ tio̍h hit chiah khó͘-liân ê sè-chiah chiáu-á kā i ka-tī ê mn̂g-chháu lóng-chóng thǹg--lo̍h-lâi ê sî, i kóng: “Sè-chiah chiáu-á, lí sī án-chóaⁿ beh kā ka-tī ê mn̂g-chháu lóng-chóng thǹg--lo̍h-lâi?” “O͘h!” Sè-chiah chiáu-á ìn kóng: “Thí-thih sí--khì-ah, Thá-thih leh khàu, saⁿ-kha-í-á leh thiàu, sàu-chhiú leh sàu, mn̂g leh īⁿ-oāiⁿ-kiò, thang-á leh khi̍h-kho̍k-kiò, kū í-liâu leh se̍h chhù-keng kho̍k-kho̍k-chông, ô͘-thô-chhiū leh lak hio̍h-á, só͘-í góa kā góa ê mn̂g-chháu lóng-chóng thǹg--lo̍h-lâi.” “Án-ne,” sè-hàn chŏ͘-gín-á kóng: “góa to̍h beh kā góa ê gû-leng chhia-tó liáu-liáu,” sè-hàn chŏ͘-gín-á chŏaⁿ kā gû-leng koàn-á tàn--leh, gû-leng to̍h chhia--tó-ah. Ū 1 ê lāu-lâng to̍h tī hū-kīn, khiā tī 1 ki thui téng-koân, i tng teh kā chháu-pû khàm hm̂-chháu, tī i khòaⁿ tio̍h sè-hàn chŏ͘-gín-á chhia-tó gû-leng ê sî, i kóng: “Sè-hàn chŏ͘-gín-á, lí sī án-chóaⁿ beh kā gû-leng chhia--tó? Án-ne lí ê sió-tī sió-mōe àm-tǹg to̍h bô-thang chia̍h--ah.” Sè-hàn chŏ͘-gín-á ìn kóng: “Thí-thih sí--khì-ah, Thá-thih leh khàu, saⁿ-kha-í-á leh thiàu, sàu-chhiú leh sàu, mn̂g leh īⁿ-oāiⁿ-kiò, thang-á leh khi̍h-kho̍k-kiò, kū í-liâu leh se̍h chhù-keng kho̍k-kho̍k-chông, ô͘-thô-chhiū leh lak hio̍h-á, sè-chiah chiáu-á kā i ê mn̂g-chháu lóng-chóng thǹg--lo̍h-lâi, só͘-í góa to̍h kā gû-leng chhia-tó liáu-liáu.” “O͘h,” lāu-lâng kóng: “án-ne góa to̍h beh ùi thui téng-koân siak--lo̍h-lâi, kā góa ê ām-kún-á siak ho͘ tn̄g.” I chŏaⁿ ùi thui téng-koân siak--lo̍h-lâi, ām-kún-á siak-tn̄g--khì; to̍h tī lāu-lâng ām-kún-á siak-tn̄g--khì ê sî, tōa ô͘-thô-chhiū phiáng--1-ē tó--lo̍h-lâi, kā kū í-liâu kah chhù-keng lòng kah chóng péng--kòe, chhù-keng tó--lo̍h-lâi ê sî, thang-á mā ho͘ lòng kah poe--cháu, thang-á koh kā mn̂g lòng--tó, mn̂g koh khì lòng tó sàu-chhiú, sàu-chhiú koh khì lòng tó saⁿ-kha-í-á, ah khó͘-liân ê Niáu-chhí-á Thá-thih to̍h khì hông tâi tī phòa-chng-á-hiā ē-té--ah. --Hosting provided by SoundOn
-
【英國Gín-á古】金球︱The Golden Ball 原作︱Flora Annie Steel 翻譯︱蔡逸民 BuLuhSuh／柯王炳勳 Bí-leng 講古／配樂︱陳曉怡 Niau-tāu 人聲編輯︱蔡逸民 BuLuhSuh／柯王炳勳 Bí-leng 字幕︱林于真 A-chin 校對︱蔡逸民 BuLuhSuh 圖︱AI製圖 影片︱陳姿樺 Ko͘-chiáu 角色演出： Mǹg-sǹg--ê︱蔡逸民 BuLuhSuh 少年--ê︱柯王炳勳 Bí-leng 處刑人︱蔡逸民 BuLuhSuh Chô͘-gín-á︱陳曉怡 Niau-tāu 老母︱林于真 A-chin 老爸︱蔡逸民 BuLuhSuh 訂閱做工á人Youtube頻道： https://www.youtube.com/@chokangalang 完整ê英文／漢羅／POJ對照文稿khǹg ti官方網站：https://cho-kang-a-lang.github.io/ 漢羅全文： 金球 Éng過，有2 ê姑娘á，in是1對姊妹á，in ùi商展beh轉厝ê時，看tio̍h 1 ê有夠緣投ê少年人，khiā tī in頭前ê 1間厝門口。In 2 ê從來to m̄-bat看過chiah-nī-á緣投ê少年人。伊ê帽á頂有金á妝thāⁿ，chéng-thâu-á頂有kòa金á，頷頸á頂有phoa̍h金á，腰--ni̍h koh有hâ金á！伊ê雙手--ni̍h mā lóng有1粒金球。伊hō͘ in 2 ê姑娘á sûi人1粒金球，交帶in to̍h ài ka顧ho͘好；nā是去ho͘ phah-ka-la̍uh--去，in to̍h ē hông吊--死。 Taⁿ，in 2 ê姑娘á內底細漢--ê hit ê kā球創phàng見--ah，he tāi-chì是án-ne：伊tī 1 ê花園ê籬笆邊，khian伊ê球teh chhit-thô，球ná khian ná koân，ná khian ná koân，尾--á soah飛ùi籬笆對面--去；伊peh起lih籬笆beh chhōe球ê時，球soah liàn過青青ê草phiâⁿ，直直liàn去1棟厝ê門脚口，koh liàn入去厝--ni̍h，來to̍h無khoàiⁿ--ah。 Só͘-pái，伊to̍h hông lia̍h--走，koh來to̍h ē hông吊頷頸吊到無khùi，因為伊kā伊ê球創phàng見--ah。 M̄-koh chit ê姑娘á有1 ê愛人á，伊講伊ē去kā hit粒球the̍h--轉-來。Só͘-pái伊to̍h去hit ê花園ê大門口，m̄-koh門是關--leh-ê；來伊to̍h peh起lih籬笆，to̍h tī伊peh到siāng koân ê所在ê時，1 ê老阿婆ùi伊面頭前ê溝á--ni̍h浮--起-來，ka講，nā是伊想beh the̍h tio̍h球，伊to̍h ài tī hit間厝內底睏3暝：伊to̍h ìn好。 To̍h án-ne，暗頭á伊to̍h入去hit間厝，四界chhōe hit粒球，m̄-koh lóng chhōe無，厝內mā lóng無人；不而過到半暝á，伊感覺講伊有聽tio̍h埕--ni̍h有mǹg-sǹg--ê teh lōa-lōa-sô；伊to̍h ùi窗á hia去看外口，koh有影，kui ê埕--ni̍h lóng是mǹg-sǹg--ê！ 無jōa久伊to̍h聽tio̍h有peh樓梯--起-來ê脚步聲，伊chŏaⁿ走去門後壁bih，像niáu鼠á án-ne kek ho͘無聲無soeh。Chit時，有1 ê身長是chit ê少年--ê ê 5倍koân ê巨人--入-來，四界看四界siòng；m̄-koh伊啥to̍h無看--tio̍h，伊to̍h行去窗á邊，àⁿ落去看外口；to̍h tī伊kā手khiau thuh tī窗á門，探頭出去看埕--ni̍h ê mǹg-sǹg--ê ê時chūn，少年--ê ùi巨人kha-chiah後行--過，劍hut 1 ē to̍h kā伊chám做2 koe̍h，伊ê頂半身chŏaⁿ lak落去埕--ni̍h，ah下半身koh kán-ná原在khiā tī窗á口teh看外面。 Ái-io͘h！Hia ê mǹg-sǹg--ê看tio̍h巨人ê半身piàng落來到in面頭前ê時，in háu kah chiok大聲，koh hoah講：「Goán半ê主人來--ah；kā另外1半hō͘--goán。」 來少年--ê to̍h講：「你chit雙脚無khah-choa̍h，孤1 ê khiā tī窗á邊，mā無目睭thang看，去kah你ê兄哥做夥--lah。」伊to̍h kā巨人ê下半koe̍h phiaⁿ--出-去，ho͘ tòe頂半koe̍h ê後壁--去。Hia ê mǹg-sǹg--ê得tio̍h kui隻ê巨人了後，in to̍h lóng tiām--去-ah。 隔日ĕng，少年--ê koh去hit間厝過暝，chit遍，第2 ê巨人ùi門--入-來，伊tú行入門，少年--ê to̍h kā伊phut做2 koe̍h；m̄-koh hit雙脚繼續行入去壁爐，直接peh ùi煙筒kóng--起-lih。 少年--ê對巨人ê頭講：「去--lah！Tòe你ê脚--去，」sòa--lòe mā kā巨人ê頂半koe̍h tàn入去煙筒kóng。 Taⁿ第3暝，啥to̍h無發生，só͘-pái少年--ê to̍h peh起lih眠床beh睏--ah；m̄-koh tī伊睏--去進前，伊聽tio̍h mǹg-sǹg--ê tī眠床脚teh chhia-poa̍h-péng，伊真好玄in teh創啥。Só͘-pái伊to̍h ka偷看，看tio̍h講球to̍h tī in hia，in tng teh sńg球，phà-suh--過-來koh phà-suh--過-去。 過1時á，有1隻mǹg-sǹg--ê kā脚ùi眠床底chhun--出-來，少年--ê脚手koh不止á緊，劍sûi phut--落-去，斷脚。接sòa，另外1隻mǹg-sǹg--ê kā手ùi眠床另外1 pêng chhun--出-來，目sut-á少年--ê劍koh phut--lòe，斷手。Tāi-chì to̍h照chit-lō版路繼續行，直透到siōng尾伊kā hia ê mǹg-sǹg--ê lóng變做khôe脚pái手，kui tīn哀pē叫母哭kah悽慘落魄離開房間，soah kā球放bē記--ah！少年--ê sûi to̍h ùi眠床peh--起-來，chhōe tio̍h hit粒球，即時to̍h去chhōe伊ê真愛--ah。 Taⁿ hit ê姑娘á去hông押去Yò͘-khuh beh ka吊--死；伊hông chhōa去絞台，處刑人講：「Chit-má，姑娘á，你ài hông吊頷頸，直透到你無khùi。」M̄-koh姑娘á大聲hoah講： 「Tòng--leh，且tòng--leh，我ká-ná看tio̍h goán老母來--ā！ 阿母--á ôe，你kám是有chah我ê金球來， Beh來放我自由？」 In老母ìn講： 「我無kā你ê金球chah--過-來 Mā m̄是beh來放你自由， M̄-koh我是來chia看你hông吊 吊死tī chit ê絞架頂。」 了後，處刑人講：「好--ah，姑娘á，頌你ê祈禱詞，因為你決定ài死。」M̄-koh姑娘á講： 「等--leh，sió等--leh，我ká-ná看tio̍h goán老爸來--ā！ 阿pâ ôe，你kám是有chah我ê金球來， beh來放我自由？」 In老pē ìn講： 「我無kā你ê金球chah--過-來 Mā m̄是beh來放你自由， M̄-koh我是來chia看你hông吊 吊死tī chit ê絞架頂。」 了後，處刑人講：「你祈禱soah--ah bē？好--ah，姑娘á，kā你ê頭chhun入去liù束á--ni̍h。」 M̄-koh姑娘á講：「Mài--lah，m̄-thang--lah，我ká-ná看tio̍h goán小弟來--ā！」伊kāng款koh吟1遍伊hit條短詩，m̄-koh in小弟mā ìn伊kāng款ê話。Koh來伊mā用kāng款ê話問in阿姊，阿叔，阿姨，表--ê。M-koh in ê回應mā lóng kāng款： 「我無kā你ê金球chah--過-來 Mā m̄是來放你自由， M̄-koh我是來chia看你hông吊 吊死tī chit ê絞架頂。」 了後，處刑人講，「我bē koh等--你-ah，你teh kă創治。的確to̍h ài sûi kā你吊--起-來。」 M̄-koh chit-má，姑娘á總算是看tio̍h伊ê愛人á ùi人tīn--ni̍h過--來，só͘-pái伊kā處刑人hoah講： 「停，緊停--落-來，我看tio̍h我ê愛人á來--ā！ 心愛--ê，你kám是有chah我ê金球來， beh來放我自由？」 Sòa--落-來，伊ê愛人á kā伊ê金球the̍h ho͘ koân-koân，大聲hoah講： 「Tio̍h，我kā你ê金球chah--來-ah Beh來放你自由； 我m̄是beh來看你hông吊 吊死tī chit ê絞架頂。」 To̍h án-ne，伊當場to̍h chhōa伊轉厝，sòa--落-來，in to̍h一直歡歡喜喜過in ê日子--ah。 Pe̍h-ōe-jī choân-bûn: Kim-kiû Éng-kòe, ū 2 ê ko͘-niû-á, in sī 1 tùi chí-mōe-á, in ùi siong-tián beh tńg chhù ê sî, khòaⁿ tio̍h 1 ê ū-kàu iân-tâu ê siàu-liân-lâng, khiā tī in thâu-chêng ê 1 keng chhù mn̂g-kháu. In 2 ê chiông-lâi to m̄-bat khòaⁿ kòe chiah-nī-á iân-tâu ê siàu-liân-lâng. I ê bō-á téng ū kim-á chng-thāⁿ, chéng-thâu-á téng ū kòa kim-á, ām-kún-á téng ū phoa̍h kim-á, io--ni̍h koh ū hâ kim-á! I ê siang-chhiú--ni̍h mā lóng ū 1 lia̍p kim-kiû. I hō͘ in 2 ê ko͘-niû-á sûi lâng 1 lia̍p kim-kiû, kau-tài in to̍h ài ka kò͘ ho͘ hó; nā sī khì ho͘ phah-ka-la̍uh--khì, in to̍h ē hông tiàu--sí. Taⁿ, in 2 ê ko͘-niû-á lāi-té sè-hàn--ê hit ê kā kiû chhòng phàng-kiàn--ah, he tāi-chì sī án-ne: i tī 1 ê hoe-hn̂g ê lî-pa piⁿ, khian i ê kiû teh chhit-thô, kiû ná khian ná koân, ná khian ná koân, bóe--á soah poe ùi lî-pa tùi-bīn--khì; i peh khí-lih lî-pa beh chhōe kiû ê sî, kiû soah liàn kòe chheⁿ-chheⁿ ê chháu-phiâⁿ, ti̍t-ti̍t liàn khì 1 tòng chhù ê mn̂g-kha-kháu, koh liàn ji̍p-khì chhù--ni̍h, lâi to̍h bô khoàiⁿ--ah. Só͘-pái, i to̍h hông lia̍h--cháu, koh lâi to̍h ē hông tiàu ām-kún tiàu kàu bô khùi, in-ūi i kā i ê kiû chhòng phàng-kiàn--ah. M̄-koh chit ê ko͘-niû-á ū 1 ê ài-jîn-á, i kóng i ē khì kā hit lia̍p kiû the̍h--tńg-lâi. Só͘-pái i to̍h khì hit ê hoe-hn̂g ê tōa-mn̂g-kháu, m̄-koh mn̂g sī koaiⁿ--leh-ê; lâi i to̍h peh khí-lih lî-pa, to̍h tī i peh kàu siāng koân ê só͘-chāi ê sî, 1 ê lāu a-pô ùi i bīn-thâu-chêng ê kau-á--ni̍h phû--khí-lâi, ka kóng, nā sī i siūⁿ beh the̍h tio̍h kiû, i to̍h ài tī hit keng chhù lāi-té khùn 3 mê: i to̍h ìn hó. To̍h án-ne, àm-thâu-á i to̍h ji̍p-khì hit keng chhù, sì-kè chhōe hit lia̍p kiû, m̄-koh lóng chhōe bô, chhù lāi mā lóng bô lâng; put-jî-kò kàu pòaⁿ-mê-á, i kám-kak kóng i ū thiaⁿ tio̍h tiâⁿ--ni̍h ū mǹg-sǹg--ê teh lōa-lōa-sô; i to̍h ùi thang-á hia khì khòaⁿ gōa-kháu, koh ū-iáⁿ, kui ê tiâⁿ--ni̍h lóng sī mǹg-sǹg--ê! Bô jōa kú i to̍h thiaⁿ tio̍h ū peh lâu-thui--khí-lâi ê kha-pō͘ siaⁿ, i chŏaⁿ cháu khì mn̂g āu-piah bih, chhiūⁿ niáu-chhí-á án-ne kek ho͘ bô-siaⁿ-bô-soeh. Chit-sî, ū 1 ê sin-tn̂g sī chit ê siàu-liân--ê ê 5 pōe koân ê kū-jîn--ji̍p-lâi, sì-kè khòaⁿ sì-kè siòng; m̄-koh i siáⁿ to̍h bô khòaⁿ--tio̍h, i to̍h kiâⁿ khì thang-á piⁿ, àⁿ lo̍h-khì khòaⁿ gōa-kháu; to̍h tī i kā chhiú-khiau thuh tī thang-á-mn̂g, thàm thâu chhut-khì khòaⁿ tiâⁿ--ni̍h ê mǹg-sǹg--ê ê sî-chūn, siàu-liân--ê ùi kū-jîn kha-chiah-āu kiâⁿ--kòe, kiàm hut 1 ē to̍h kā i chám chò 2 koe̍h, i ê téng pòaⁿ-sin chŏaⁿ lak lo̍h-khì tiâⁿ--ni̍h, ah ē pòaⁿ-sin koh kán-ná goân-chāi khiā tī thang-á-kháu teh khòaⁿ gōa-bīn. Ái-iò͘! Hia ê mǹg-sǹg--ê khòaⁿ tio̍h kū-jîn ê pòaⁿ-sin piàng lo̍h-lâi kàu in bīn-thâu-chêng ê sî, in háu kah chiok tōa-siaⁿ, koh hoah kóng: “Goán pòaⁿ ê chú-lâng lâi--ah; kā lēng-gōa 1 pòaⁿ hō͘--goán.” Lâi siàu-liân--ê to̍h kóng: “Lí chit siang kha bô-khah-choa̍h, ko͘ 1 ê khiā tī thang-á piⁿ, mā bô ba̍k-chiu thang khòaⁿ, khì kah lí ê hiaⁿ-ko chò-hóe--lah.” I to̍h kā kū-jîn ê ē pòaⁿ koe̍h phiaⁿ--chhut-khì, ho͘ tòe téng pòaⁿ koe̍h ê āu-piah--khì. Hia ê mǹg-sǹg--ê tit-tio̍h kui chiah ê kū-jîn liáu-āu, in to̍h lóng tiām--khì-ah. Keh-ji̍t ĕng, siàu-liân--ê koh khì hit keng chhù kòe-mê, chit piàn, tē 2 ê kū-jîn ùi mn̂g--ji̍p-lâi, i tú kiâⁿ ji̍p mn̂g, siàu-liân--ê to̍h kā i phut chò 2 koe̍h; m̄-koh hit siang kha kè-sio̍k kiâⁿ ji̍p-khì piah-lô͘, ti̍t-chiap peh ùi ian-tâng-kóng--khí-lih. Siàu-liân--ê tùi kū-jîn ê thâu kóng: “Khì--lah! Tòe lí ê kha--khì,” sòa--lòe mā kā kū-jîn ê téng pòaⁿ koe̍h tàn ji̍p-khì ian-tâng-kóng. Taⁿ tē 3 mê, siáⁿ to̍h bô hoat-seng, só͘-pái siàu-liân--ê to̍h peh khí-lih bîn-chhn̂g beh khùn--ah; m̄-koh tī i khùn--khì chìn-chêng, i thiaⁿ tio̍h mǹg-sǹg--ê tī bîn-chhn̂g kha teh chhia-poa̍h-péng, i chin hòⁿ-hiân in teh chhòng siáⁿ. Só͘-pái i to̍h ka thau-khòaⁿ, khòaⁿ tio̍h kóng kiû to̍h tī in hia, in tng teh sńg kiû, phà-suh--kòe-lâi koh phà-suh--kòe-khì. Kòe 1-sî-á, ū 1 chiah mǹg-sǹg--ê kā kha ùi bîn-chhn̂g té chhun--chhut-lâi, siàu-liân--ê kha-chhiú koh put-chí-á kín, kiàm sûi phut--lo̍h-khì, tn̄g kha. Chiap-sòa, lēng-gōa 1 chiah mǹg-sǹg--ê kā chhiú ùi bîn-chhn̂g lēng-gōa 1 pêng chhun--chhut-lâi, ba̍k-sut-á siàu-liân--ê kiàm koh phut--lòe, tn̄g chhiú. Tāi-chì to̍h chiàu chit-lō pán-lō͘ kè-sio̍k kiâⁿ, ti̍t-thàu kàu siāng-bóe i kā hia ê mǹg-sǹg--ê lóng piàn-chò khôe-kha-pái-chhiú, kui tīn ai-pē-kiò-bú khàu kah chhi-chhám-lo̍k-phek lī-khui pâng-keng, soah kā kiû pàng bē-kì--ah! Siàu-liân--ê sûi to̍h ùi bîn-chhn̂g peh--khí-lâi, chhōe tio̍h hit lia̍p kiû, chek-sî to̍h khì chhōe i ê chin-ài--ah. Taⁿ hit ê ko͘-niû-á khì hông ah khì Yò͘-khuh beh ka tiàu--sí; i hông chhōa khì ká-tâi, chhú-hêng-lâng kóng: “Chit-má, ko͘-niû-á, lí ài hông tiàu ām-kún, ti̍t-thàu kàu lí bô-khùi.” M̄-koh ko͘-niû-á tōa-siaⁿ hoah kóng: “Tòng--leh, chhiáⁿ tòng--leh, góa ká-ná khòaⁿ tio̍h goán lāu-bú lâi--ā! A-bú--á ôe, lí kám sī ū chah góa ê kim-kiû lâi, Beh lâi pàng góa chū-iû?” In lāu-bú ìn kóng: “Góa bô kā lí ê kim-kiû chah--kòe-lâi Mā m̄ sī beh lâi pàng lí chū-iû, M̄-koh góa sī lâi chia khòaⁿ lí hông tiàu Tiàu sí tī chit ê ká-kè téng.” Liáu-āu, chhú-hêng-lâng kóng: “Hó--ah, ko͘-niû-á, siōng lí ê kî-tó-sû, in-ūi lí koat-tēng ài sí.” M̄-koh ko͘-niû-á kóng: “Tán--leh, sió-tán--leh, góa ká-ná khòaⁿ tio̍h goán lāu-pē lâi--ā! A-pâ ôe, lí kám sī ū chah góa ê kim-kiû lâi, beh lâi pàng góa chū-iû?” In lāu-pē ìn kóng: “Góa bô kā lí ê kim-kiû chah--kòe-lâi Mā m̄ sī beh lâi pàng lí chū-iû, M̄-koh góa sī lâi chia khòaⁿ lí hông tiàu Tiàu sí tī chit ê ká-kè téng.” Liáu-āu, chhú-hêng-lâng kóng: “Lí kî-tó soah--ah bē? Hó--ah, ko͘-niû-á, kā lí ê thâu chhun ji̍p-khì liù-sok-á--ni̍h.” M̄-koh ko͘-niû-á kóng: “Mài--lah, m̄-thang--lah, góa ká-ná khòaⁿ tio̍h goán sió-tī lâi--ā!” I kāng-khoán koh gîm 1 piàn i hit tiâu té-si, m̄-koh in sió-tī mā ìn i kāng-khoán ê ōe. Koh lâi i mā iōng kāng-khoán ê ōe mn̄g in a-chí, a-chek, a-î, piáu--ê. M-koh in ê hôe-èng mā lóng kāng-khoán: “Góa bô kā lí ê kim-kiû chah--kòe-lâi Mā m̄ sī lâi pàng lí chū-iû, M̄-koh góa sī lâi chia khòaⁿ lí hông tiàu Tiàu sí tī chit ê ká-kè téng.” Liáu-āu, chhú-hêng-lâng kóng, “Góa bē koh tán--lí-ah, lí teh kă chhòng-tī. Tek-khak to̍h ài sûi kā lí tiàu--khí-lâi.” M̄-koh chit-má, ko͘-niû-á chóng-sǹg-sī khòaⁿ tio̍h i ê ài-jîn-á ùi lâng-tīn--ni̍h kòe--lâi, só͘-pái i kā chhú-hêng-lâng hoah kóng: “Thêng, kín thêng--lo̍h-lâi, góa khòaⁿ tio̍h góa ê ài-jîn-á lâi--ā! Sim-ài--ê, lí kám sī ū chah góa ê kim-kiû lâi, beh lâi pàng góa chū-iû?” Sòa--lo̍h-lâi, i ê ài-jîn-á kā i ê kim-kiû the̍h ho͘ koân-koân, tōa-siaⁿ hoah kóng: “Tio̍h, góa kā lí ê kim-kiû chah--lâi-ah Beh lâi pàng lí chū-iû; Góa m̄ sī beh lâi khòaⁿ lí hông tiàu Tiàu sí tī chit ê ká-kè téng.” To̍h án-ne, i tong-tiûⁿ to̍h chhōa i tńg chhù, sòa--lo̍h-lâi, in to̍h it-ti̍t hoaⁿ-hoaⁿ-hí-hí kòe in ê ji̍t-chí--ah. --Hosting provided by SoundOn
-
Fehlende Folgen?
-
A郎ê bàng-gah來--lio͘h，全新配樂，希望ta̍k-ke ē kah意。 [Podcast] SoundOn https://bit.ly/ChKaL_SO Spotify https://spoti.fi/48jD2tI KKBOX Podcast https://bit.ly/ChKaL_KK Apple Podcast https://apple.co/3HZyfD3 YouTube Podcast https://bit.ly/ChKaL_YT [社交平台 Siā-kau Pêⁿ-tâi] YouTube https://bit.ly/ChKaL_YT Facebook https://bit.ly/ChKaL_FB Instagram https://www.instagram.com/chokangalang/ X (Twitter) https://twitter.com/chokangalang 方格子 https://vocus.cc/salon/cho-kang-a-lang --Hosting provided by SoundOn
-
【英國Gín-á古】2姊妹 下集︱The 2 Sisters Part 2 原作︱Flora Annie Steel 翻譯︱蔡逸民 BuLuhSuh／柯王炳勳 Bí-leng 講古︱薇安卡 Bî-án-khah 配樂︱陳曉怡 Niau-tāu 人聲編輯︱蔡逸民 BuLuhSuh／柯王炳勳 Bí-leng 字幕︱林于真 A-chin 校對︱蔡逸民 BuLuhSuh 圖︱AI製圖 影片︱陳姿樺 Ko͘-chiáu 訂閱做工á人Youtube頻道：https://www.youtube.com/@chokangalang 完整ê英文／漢羅／POJ對照文稿khǹg ti官方網站：https://cho-kang-a-lang.github.io/ 漢羅全文： 2姊妹 下集 Sòa--lòe，老女術士iû-koh走m̄ tio̍h pêng，chŏ͘-gín-á to̍h koh 1遍ùi in tau hit pêng走--去，m̄-koh to̍h tī伊tú走到hang-pháng窯hia ê時，to̍h聽tio̍h hit ê恐怖ê老女術士iû-koh ùi伊kha-chiah後飛--過-來；só͘-pái伊to̍h chhui盡磅走去hang-pháng窯邊--á，大聲hoah講： 「Hang-pháng窯！Hang-pháng窯--ah！Kă藏ho͘好， Hō͘ hit ê女術士chhōe我無， 我nā去ho͘ chhōe--tio̍h，伊to̍h ē chhńg我ê骨， Koh kā我tâi tī花園á ê石頭ē底ut。」 Hang-pháng窯to̍h ìn講，「真歹勢，我chia恐驚á無所在thang hō͘你bih，chit-má有另外1 phoe pháng tng teh hang；m̄-koh做pháng師傅tī hia，你去ka問。」 伊to̍h去問做pháng師傅，師傅ìn講：「當然mā無問題。你kā我ê頂1 phoe pháng救--起-來，hō͘ in無臭火ta；só͘-pái你緊ka走入去做pháng間內底，你tī hia ē真安全，我ē kā你tàu處理hit ê女術士。」 Chŏ͘-gín-á to̍h bih入去做pháng間，nā慢1脚步to̍h bē赴，因為老女術士chit-má人已經tī hia，氣phut-phut hoah講： 「Eh，cha-po͘人！Cha-po͘人！ 你kám有看tio̍h我hit ê chiān-thâng ê細漢chŏ͘-kán-á Kha-chhng花搖--leh搖--leh koh phāiⁿ 1脚大袋， 伊偷the̍h我ê錢，koh 1遍lóng總the̍h！」 做pháng師傅to̍h ka ìn講：「看hang-pháng窯內底有--無，伊有可能bih tī hin。」 女術士to̍h ùi掃帚頂跳--落-來，探頭去siòng hang-pháng窯內；m̄-koh lóng無看tio̍h人。 「爬--入-去，去看siōng內底ê角角，」做pháng師傅奸詭，án-ne ka講，女術士to̍h爬--入-去，sòa--lòe⋯ Póng！ 伊kā門tng hit ê女術士ê面關--起-來，女術士to̍h án-ne tī內底hang。等到伊hâm pháng做夥出窯ê時，kui seng-khu hông hang kah變咖啡色，koh酥酥脆脆，伊to̍h ài用siāng緊ê速度piàⁿ轉去厝，kā kui seng-khu lóng kô͘涼涼ê藥膏chiah ē-sái--chit。 Ah咱chit ê好心koh愛kâng tàu-saⁿ-kāng ê chŏ͘-gín-á，to̍h án-ne hâm伊hit袋錢做夥安全轉到厝。 到chia來，chit ê pháiⁿ性地ê姊--á真怨妒伊有chit款好運，決心講ka-tī mā beh the̍h tio̍h 1袋金á。Só͘-pái to̍h換伊去款1 ê包袱á，mā照in小妹行ê hit條路去chhōe頭路，m̄-koh tī伊行來到hang-pháng窯ê時，hia ê pháng拜托伊kā in the̍h--出-來，因為in已經hông hang 7冬，差不多to̍h beh臭ta--去-ah，伊soah頭hàiⁿ-hàiⁿ--leh講： 「Siāng好是án-ne--lah，bē輸我to̍h ài為tio̍h beh救lín ê pháng皮，去燙tio̍h我ka-tī ê指頭á--leh。真多謝neh，我chiah無ài！」 伊講soah to̍h koh行--落-去，一直行到伊tú tio̍h hit隻khiā tī脚桶邊等人ka lu̍t乳ê牛á。M̄-koh牛á講： 「姑娘á！姑娘á！Kā我tàu lu̍t乳！拜托--leh，kā我tàu lu̍t乳！我等人來kā我lu̍t乳已經等7冬--a⋯」 伊to̍h kan-na笑笑ìn講：「你koh等7冬mā無我ê代誌。我to m̄是你ê lu̍t乳工á ko̍h！」 伊講soah to̍h koh行--落-去，一直到kah hit叢蘋果樹頭前，he果子生kah siuⁿ chē，hō͘樹á kiōng-beh chih載bē-tiâu。M̄-koh tng-tong樹á ka拜托講，to̍h ài kā伊ê樹oe搖搖--leh ê時，伊to̍h kan-na ki̍h-ko̍k笑，koh bán 1粒到分ê蘋果，ìn講： 「我1粒to̍h有夠--ah，chhun--ê你ka-tī留--leh。」伊to̍h沿路蘋果pō͘ kah kha̍uⁿh-kha̍uⁿh叫，行去到女術士ê厝。 Chit-chūn，sui-bóng講老女術士已經無像tú ùi hang-pháng窯出--來ê時án-ne，hang kah變咖啡色koh酥酥脆脆，m̄-koh伊iáu是對所有ê細漢女僕lóng真火大，mā hē決心講絕對bē koh hō͘ chit ê騙--去。Só͘-pái有1段kài長ê時間老女術士lóng無離開過厝；m̄-chiah chit ê歹性地ê阿姊根本to無法度照伊本底設想--ê án-ne，探頭去看煙筒內。無法--伊，伊mā kan-na ē-tàng piàⁿ命chhéng eng-ia，piàⁿ厝內，lù物件，掃土脚，直透到伊kiōng-beh thiám--死。 M̄-koh有1 kang，tī女術士去花園tâi骨頭ê時，伊to̍h趁chit ê勢，探頭去看煙筒內，果然，to̍h有1袋金á lak tī伊大腿--ni̍h！ Só͘-pái，伊sûi to̍h kā hit袋金á the̍h--leh做伊soan，一直走一直走，走去到蘋果樹hia ê時，伊聽tio̍h女術士已經tī伊kha-chiah後。伊to̍h學in小妹án-ne hoah講： 「蘋果樹！蘋果樹，kā我chhàng ho͘好 hō͘ hit ê老女術士chhōe我無， 我nā去ho͘ chhōe--tio̍h，伊to̍h ē斷我ê骨， A̍h無to̍h是kā我tâi tī花園á ê石頭ē底ut。」 M̄-koh蘋果樹ìn講： 「無位--ā-lah！我chia siuⁿ chē蘋果--ah。」 Só͘-pái伊to̍h kan-na ē-tàng繼續衝；ah hit ê女術士飛到tè ê時hoah講： 「我ê樹á！我ê樹á ôe！ 你kám有看tio̍h 1 ê chiān-thâng ê細漢chŏ͘-kán-á， Kha-chhng花搖--leh搖--leh koh phāiⁿ 1脚大袋， 伊偷the̍h我ê錢，koh 1遍lóng總the̍h！」 蘋果樹ìn講： 「有neh，親愛ê阿婆， 伊走ùi hit pêng--去-ah。」 Sòa--lòe，女術士to̍h tòe tī伊後壁，ka掠--起-來，kā伊phah kah鮮尺鮮尺，koh kā hit袋錢the̍h--轉-來，了後to̍h hiàm伊轉厝，ah hia-ê chhéng eng-ia，掃土脚，lù物件，piàⁿ厝內ê工錢，伊連1角銀to無la̍p--伊。 Pe̍h-ōe-jī choân-bûn: Nn̄g Chí-mōe Hā-chi̍p Sòa--lòe, lāu lú-su̍t-sū iû-koh cháu m̄ tio̍h pêng, chŏ͘-gín-á to̍h koh 1 piàn ùi in tau hit pêng cháu--khì, m̄-koh to̍h tī i tú cháu kàu hang-pháng-iô hia ê sî, to̍h thiaⁿ tio̍h hit ê khióng-pò͘ ê lāu lú-su̍t-sū iû-koh ùi i kha-chiah-āu poe--kòe-lâi; só͘-pái i to̍h chhui chīn-pōng cháu khì hang-pháng-iô piⁿ--á, tōa-siaⁿ hoah kóng: “Hang-pháng-iô! Hang-pháng-iô--ah! Kă chhàng ho͘ hó, Hō͘ hit ê lú-su̍t-sū chhōe góa bô, Góa nā khì ho͘ chhōe--tio̍h, i to̍h ē chhńg góa ê kut, Koh kā góa tâi tī hoe-hn̂g-á ê chio̍h-thâu ē-té ut.” Hang-pháng-iô to̍h ìn kóng, “Chin pháiⁿ-sè, góa chia khióng-kiaⁿ-á bô só͘-chāi thang hō͘ lí bih, chit-má ū lēng-gōa 1 phoe pháng tng teh hang; m̄-koh chò-pháng-sai-hū tī hia, lí khì ka mn̄g.” I to̍h khì mn̄g chò-pháng-sai-hū, sai-hū ìn kóng: “Tong-jiân mā bô būn-tê. Lí kā góa ê téng 1 phoe pháng kiù--khí-lâi, hō͘ in bô chhàu-hóe-ta; só͘-pái lí kín ka cháu ji̍p-khì chò-pháng-keng lāi-té, lí tī hia ē chin an-choân, góa ē kā lí tàu chhú-lí hit ê lú-su̍t-sū.” Chŏ͘-gín-á to̍h bih ji̍p-khì chò-pháng-keng, nā bān 1 kha-pō͘ to̍h bē-hù, in-ūi lāu lú-su̍t-sū chit-má lâng í-keng tī hia, khì-phut-phut hoah kóng: “Eh, cha-po͘-lâng! Cha-po͘-lâng! Lí kám ū khòaⁿ tio̍h góa hit ê chiān-thâng ê sè-hàn chŏ͘-kán-á Kha-chhng-hoe iô--leh iô--leh koh phāiⁿ 1 kha tōa-tē, I thau the̍h góa ê chîⁿ, koh 1 piàn lóng-chóng the̍h!” Chò-pháng-sai-hū to̍h ka ìn kóng: “Khòaⁿ hang-pháng-iô lāi-té ū--bô, i ū khó-lêng bih tī hin.” Lú-su̍t-sū to̍h ùi sàu-chhiú téng thiàu--lo̍h-lâi, tham-thâu khì siòng hang-pháng-iô lāi; m̄-koh lóng bô khòaⁿ tio̍h lâng. “Pê--ji̍p-khì, khì khòaⁿ siōng lāi-té ê kak-kak,” chò-pháng-sai-hū kan-kúi, án-ne ka kóng, lú-su̍t-sū to̍h pê--ji̍p-khì, sòa--lòe… Póng! I kā mn̂g tng hit ê lú-su̍t-sū ê bīn koaiⁿ--khí-lâi, lú-su̍t-sū to̍h án-ne tī lāi-té hang. Tán kàu i hâm pháng chò-hóe chhut-iô ê sî, kui seng-khu hông hang kah piàn ka-pi-sek koh so͘-so͘ chhè-chhè, i to̍h ài iōng siāng kín ê sok-tō͘ piàⁿ tńg-khì chhù, kā kui seng-khu lóng kô͘ liâng-liâng ê io̍h-ko chiah ē-sái--chit. Ah lán chit ê hó-sim koh ài kâng tàu-saⁿ-kāng ê chŏ͘-gín-á, to̍h án-ne hâm i hit tē chîⁿ chò-hóe an-choân tńg kàu chhù. Kàu chia lâi, chit ê pháiⁿ-sèng-tē ê ché--á chin oàn-tò͘ i ū chit khoán hó-ūn, koat-sim kóng ka-tī mā beh the̍h tio̍h 1 tē kim-á. Só͘-pái to̍h ōaⁿ i khì khoán 1 ê pau-ho̍k-á, mā chiàu in sió-mōe kiâⁿ ê hit tiâu lō͘ khì chhōe thâu-lō͘, m̄-koh tī i kiâⁿ lâi kàu hang-pháng-iô ê sî, hia ê pháng pài-thok i kā in the̍h--chhut-lâi, in-ūi in í-keng hông hang 7 tang, chha-put-to to̍h beh chhàu-ta--khì-ah, i soah thâu hàiⁿ-hàiⁿ--leh kóng: “Siāng hó sī án-ne--lah, bē-su góa to̍h ài ūi-tio̍h beh kiù lín ê pháng-phôe, khì thǹg tio̍h góa ka-tī ê chéng-thâu-á--leh. Chin to-siā neh, góa chiah bô ài!” I kóng soah to̍h koh kiâⁿ--lo̍h-khì, it-ti̍t kiâⁿ kàu i tú tio̍h hit chiah khiā tī kha-tháng piⁿ tán lâng ka lu̍t-leng ê gû-á. M̄-koh gû-á kóng: “Ko͘-niû-á! Ko͘-niû-á! Kā góa tàu lu̍t-leng! Pài-thok--leh, kā góa tàu lu̍t-leng! Góa tán lâng lâi kā góa lu̍t-leng í-keng tán 7 tang--a…” I to̍h kan-na chhiò-chhiò ìn kóng: “Lí koh tán 7 tang mā bô góa ê tāi-chì. Góa to m̄ sī lí ê lu̍t-leng-kang-á ko̍h!” I kóng soah to̍h koh kiâⁿ--lo̍h-khì, it-ti̍t kàu kah hit chhâng phōng-kó-chhiū thâu-chêng, he kóe-chí seⁿ kah siuⁿ chē, hō͘ chhiū-á kiōng-beh chih-chài bē-tiâu. M̄-koh tng-tong chhiū-á ka pài-thok kóng, to̍h ài kā i ê chhiū-oe iô-iô--leh ê sî, i to̍h kan-na ki̍h-ko̍k-chhiò, koh bán 1 lia̍p kàu-hun ê phōng-kó, ìn kóng: “Góa 1 lia̍p to̍h ū kàu--ah, chhun--ê lí ka-tī lâu--leh.” I to̍h iân-lō͘ phōng-kó pō͘ kah kha̍uⁿh-kha̍uⁿh-kiò, kiâⁿ khì kàu lú-su̍t-sū ê chhù. Chit-chūn, sui-bóng kóng lāu lú-su̍t-sū í-keng bô chhiūⁿ tú ùi hang-pháng-iô chhut--lâi ê sî án-ne, hang kah piàn ka-pi-sek koh so͘-so͘-chhè-chhè, m̄-koh i iáu sī tùi só͘-ū ê sè-hàn lú-po̍k lóng chin hóe-tōa, mā hē koat-sim kóng choa̍t-tùi bē koh hō͘ chit ê phiàn--khì. Só͘-pái ū 1 tōaⁿ kài tn̂g ê sî-kan lāu lú-su̍t-sū lóng bô lī-khui kòe chhù; m̄-chiah chit ê pháiⁿ-sèng-tē ê a-ché kin-pún to bô-hoat-tō͘ chiàu i pún-té siat-sióng--ê án-ne, tham-thâu khì khòaⁿ ian-tâng lāi. Bô-hoat--i, i mā kan-na ē-tàng piàⁿ-miā chhéng eng-ia, piàⁿ chhù-lāi, lù mi̍h-kiāⁿ, sàu thô͘-kha, ti̍t-thàu kàu i kiōng-beh thiám--sí. M̄-koh ū 1 kang, tī lú-su̍t-sū khì hoe-hn̂g tâi kut-thâu ê sî, i to̍h thàn chit ê sè, tham-thâu khì khòaⁿ ian-tâng lāi, kó-jiân, to̍h ū 1 tē kim-á lak tī i tōa-thúi--ni̍h! Só͘-pái, i sûi to̍h kā hit tē kim-á the̍h--leh chò i soan, it-ti̍t cháu it-ti̍t cháu, cháu khì kàu phōng-kó-chhiū hia ê sî, i thiaⁿ tio̍h lú-su̍t-sū í-keng tī i kha-chiah-āu. I to̍h o̍h in sió-mōe án-ne hoah kóng: “Phōng-kó-chhiū! Phōng-kó-chhiū, kā góa chhàng ho͘ hó Hō͘ hit ê lāu lú-su̍t-sū chhōe góa bô, Góa nā khì ho͘ chhōe--tio̍h, i to̍h ē tn̄g góa ê kut, A̍h bô to̍h sī kā góa tâi tī hoe-hn̂g-á ê chio̍h-thâu ē-té ut.” M̄-koh phōng-kó-chhiū ìn kóng: “Bô ūi--ā-lah! Góa chia siuⁿ chē phōng-kó--ah.” Só͘-pái i to̍h kan-na ē-tàng kè-sio̍k chhiong; ah hit ê lú-su̍t-sū poe kàu-tè ê sî hoah kóng: “Góa ê chhiū-á! Góa ê chhiū-á ôe! Lí kám ū khòaⁿ tio̍h 1 ê chiān-thâng ê sè-hàn chŏ͘-kán-á, Kha-chhng-hoe iô--leh iô--leh koh phāiⁿ 1 kha tōa-tē, I thau the̍h góa ê chîⁿ, koh 1 piàn lóng-chóng the̍h!” Phōng-kó-chhiū ìn kóng: “Ū neh, chhin-ài ê a-pô, I cháu ùi hit pêng--khì-ah.” Sòa--lòe, lú-su̍t-sū to̍h tòe tī i āu-piah, ka lia̍h--khí-lâi, kā i phah kah chhiⁿ-chhioh chhiⁿ-chhioh, koh kā hit tē chîⁿ the̍h--tńg-lâi, liáu-āu to̍h hiàm i tńg chhù, ah hia-ê chhéng eng-ia, sàu thô͘-kha, lù mi̍h-kiāⁿ, piàⁿ chhù-lāi ê kang-chîⁿ, i liân 1 kak-gîn to bô la̍p--i. --Hosting provided by SoundOn
-
【英國Gín-á古】2姊妹 上集︱The 2 Sisters Part 1 原作︱Flora Annie Steel 翻譯︱蔡逸民 BuLuhSuh／柯王炳勳 Bí-leng 講古︱薇安卡 Bî-án-khah 配樂︱陳曉怡 Niau-tāu 人聲編輯︱蔡逸民 BuLuhSuh／柯王炳勳 Bí-leng 字幕︱林于真 A-chin 校對︱蔡逸民 BuLuhSuh 圖︱AI製圖 影片︱陳姿樺 Ko͘-chiáu 訂閱做工á人Youtube頻道：https://www.youtube.com/@chokangalang 完整ê英文／漢羅／POJ對照文稿khǹg ti官方網站：https://cho-kang-a-lang.github.io/ 漢羅全文： 2姊妹 上集 Éng過，有2 ê姊妹á生kah chiok sio-siâng，to bē輸是kāng 1 ngeh荷蘭豆ngeh內底ê 2粒荷蘭豆kāng款--leh；m̄-koh 1 ê人好siàng，另外1 ê性地bái。Taⁿ in ê老爸無頭路，só͘-pái in 2 ê chŏ͘-gín-á有leh 考慮beh去做人ê chŏ͘-kán-á。 「我seng去piàⁿ看ē有啥成果--無，」hit ê小妹歡頭喜面án-ne講，koh講：「nā我運氣bē-bái，阿姊你chiah tòe leh來to̍h好。」 Só͘-pái，伊包袱á款--leh，相辭了後，to̍h開始去chhōe頭路；m̄-koh庄--ni̍h無人想beh chhiàⁿ 1 ê chŏ͘-gín-á，伊to̍h koh ùi jú hn̄g ê草地所在--去。Tī路--ni̍h，伊tú tio̍h 1 ê烘pháng窯，窯--ni̍h有真chē塊pháng tng teh烘。伊beh行--過ê時，hia ê pháng齊聲hoah講： 「姑娘á！姑娘á！Kā goán the̍h--出-來！拜托--leh，kā goán the̍h--出-來！Goán已經tī chia烘7冬--a，lóng無人來kā goán the̍h--出-來。緊Kā goán the̍h--出-來，nā無goán sûi to̍h ē臭火ta--a！」 伊是1 ê善良koh熱心kâng tàu-saⁿ-kāng ê chŏ͘-gín-á，só͘-pái伊停脚，包袱á hē--leh，kā pháng lóng the̍h--出-來，sòa--lo̍h ná繼續行伊ê路ná講： 「Án-ne lín to̍h ē khah爽快--ah。」 Koh過1時á，伊來到1隻奶牛hia，奶牛khiā tī空柴桶邊ma-ma吼，he牛á kā伊講： 「姑娘á！姑娘á！Kā我tàu lu̍t乳！拜托--leh，kā我tàu lu̍t乳！我已經等7冬--a，m̄-koh lóng無人來kā我tàu lu̍t乳！」 咱chit ê好心ê chŏ͘-gín-á to̍h停脚，包袱á hē--leh，kā chit隻牛ê乳lu̍t入去脚桶--ni̍h，beh koh chiūⁿ路ê時，伊kā牛á講： 「Án-ne你to̍h ē ke khah爽快--ah。」 Koh過無jōa久，伊行來到1叢蘋果樹頭前，he樹á頂生kah全全lóng蘋果，樹oe to kiōng-beh ho͘ teh斷--去，蘋果樹對伊hoah講： 「姑娘á！姑娘á！拜托你kā我ê樹oe搖搖--leh，chia-ê果子á siuⁿ重--ā，已經teh kah我lóng歪腰--a！」 咱chit ê好心ê chŏ͘-gín-á to̍h停脚，包袱á hē--leh，去kā樹oe搖搖--leh hō͘ he蘋果lak--落-來，án-ne樹á to̍h khiā ē直--ah。伊sòa lŏe beh繼續行ê時koh講： 「Án-ne你to̍h ē ke真爽快--ah。」 伊to̍h koh直直行--去，一直到伊行來kah 1間厝，有1 ê老女術士tòa tī hin。Tú好chit ê女術士需要1 ê女僕，mā保証講待遇bē-bái。Só͘-pái，chŏ͘-gín-á to̍h答應伊beh留--落-來，試看伊ka-tī kám ē kah意chit ê khang-khòe。伊tio̍h ài掃土脚，ài kā厝內保持ho͘清氣koh整齊，壁爐ê火ài燒kah光iāⁿ koh sù-sī。M̄-koh有1件代誌女術士叫伊千萬m̄-thang做；hit件代誌to̍h是探頭去看煙筒kóng內底！ 女術士講：「Nā是你án-ne做，to̍h ē有物件lak tī你ê身軀，到時你to̍h無好尾。」Só͘-pái，chŏ͘-gín-á to̍h掃土脚，chhéng eng-ia，起火顧火；m̄-koh伊連半sián工錢mā無khoàiⁿ。Taⁿ chŏ͘-gín-á想beh轉厝--ah，伊無kah意koh做女術士ê使用人；因為hit ê女術士慣勢kā紅嬰á煮來做暗頓，koh kā骨頭tâi tī花園á ê 1-kóa石頭ē脚。M̄-koh伊koh無想beh袋磅子轉去厝，só͘-pái伊to̍h暫且留tī hia掃土脚，chhéng eng-ia，盡伊ê本份，bē輸伊kài kah意做kāng款。尾--á有1 kang，伊tng teh piàⁿ掃壁爐ê時，有1-kóa土炭hu lak--落-來，伊soah bē記chit伊hông教講bē-tàng看煙筒kóng內底，伊to̍h探頭hiòng頂面看，想beh看he土炭hu是ùi tó位來--ê。Oah，nah chiah好khang！1大lok ê金á hiông-hiông lak tī伊大腿--ni̍h。 Tú好chit-chūn hit ê女術士出門去辦in術士ê khang-khòe；só͘-pái chŏ͘-gín-á感覺che是1 ê liu-soan轉去厝ê好時機。 伊to̍h kā裙láng--起-來，用走--ê beh轉厝；m̄-koh伊chiah走無jōa hn̄g，to̍h聽tio̍h女術士騎掃帚飛來teh jiok。進前hit叢伊有ka tàu-saⁿ-kāng，hō͘伊khiā ē直ê蘋果樹to̍h tú好tī附近，伊to̍h走去樹á hia，大聲hoah講： 「蘋果樹！蘋果樹，kā我chhàng ho͘好 hō͘ hit ê老女術士chhōe我無， 我nā去ho͘ chhōe--tio̍h，伊to̍h ē chhńg我ê骨， Koh kā我tâi tī花園á ê石頭ē底ut。」 蘋果樹to̍h ìn講：「當然是無問題。你kā我tàu-saⁿ-kāng，hō͘我khiā ē直，好來好去是應該。 」 來蘋果樹to̍h用伊青翠ê樹ōe kā chŏ͘-gín-á藏kah好勢好勢；koh來hit ê女術士飛經過ê時問講： 「我ê樹á！我ê樹á ôe！ 你kám有看tio̍h我hit ê chiān蟲ê細漢chŏ͘-kán-á， Kha-chhng花搖--leh搖--leh koh phāiⁿ 1脚大袋， 伊偷the̍h我ê錢，koh 1遍lóng總the̍h！」 蘋果樹ìn講： 「無neh，親愛ê阿婆， Chit 7冬lóng無看--過！」 To̍h án-ne，女術士飛m̄ tio̍h pêng--去，chŏ͘-gín-á peh落樹，好禮á kā樹á seh多謝，來to̍h koh開始走。M̄-koh伊走到奶牛khiā tī柴桶邊--á hit tah ê時，iû-koh聽tio̍h女術士飛teh-beh到，só͘-pái伊to̍h走去牛á邊--á，大聲hoah講： 「牛á！牛á！Kā我藏ho͘好， Hō͘ hit ê女術士chhōe我無， 我nā去ho͘ chhōe--tio̍h，伊to̍h ē chhńg我ê骨， Koh kā我tâi tī花園á ê石頭ē底ut！」 牛á to̍h ìn講：「當然是無問題。你kám m̄是有kā我tàu lu̍t乳，hō͘我真輕鬆？Bih去我ê seng-khu後壁，你to̍h ē真安全。 」 女術士飛經過ê時，to̍h kho͘牛á過來講： 「我ê牛á！我ê牛á ôe！ 你kám有看tio̍h我hit ê chiān-thâng ê細漢chŏ͘-kán-á Kha-chhng花搖--leh搖--leh koh phāiⁿ 1脚大袋， 伊偷the̍h我ê錢，koh 1遍lóng總the̍h！」 牛á ka ìn講： 「無neh，親愛ê阿婆， Chit 7冬lóng無看--過！」 Pe̍h-ōe-jī choân-bûn: Nn̄g Chí-mōe Siōng-chi̍p Éng-kòe, ū 2 ê chí-mōe-á seⁿ kah chiok sio-siâng, to bē-su sī kāng 1 ngeh hô-lân-tāu-ngeh lāi-té ê 2 lia̍p hô-lân-tāu kāng khoán--leh; m̄-koh 1 ê lâng hó-siàng, lēng-gōa 1 ê sèng-tē bái. Taⁿ in ê lāu-pē bô thâu-lō͘, só͘-pái in 2 ê chŏ͘-gín-á ū leh khó-lī beh khì chò lâng ê chŏ͘-kán-á. “Góa seng khì piàⁿ khòaⁿ ē ū siáⁿ sêng-kó--bô,” hit ê sió-mōe hoaⁿ-thâu-hí-bīn án-ne kóng, koh kóng: “Nā góa ūn-khì bē-bái, a-ché lí chiah tòe leh lâi to̍h hó.” Só͘-pái, i pau-ho̍k-á khoán--leh, sio-sî liáu-āu, to̍h khai-sí khì chhōe thâu-lō͘; m̄-koh chng--ni̍h bô lâng siūⁿ beh chhiàⁿ 1 ê chŏ͘-gín-á, i to̍h koh ùi jú hn̄g ê chháu-tē só͘-chāi--khì. Tī lō͘--ni̍h, i tú tio̍h 1 ê hang-pháng-iô, iô--ni̍h ū chin chē tè pháng tng teh hang. I beh kiâⁿ--kòe ê sî, hia ê pháng chê-siaⁿ hoah kóng: “Ko͘-niû-á! Ko͘-niû-á! Kā goán the̍h--chhut-lâi! Pài-thok--leh, kā goán the̍h--chhut-lâi! Goán í-keng tī chia hang 7 tang--a, lóng bô lâng lâi kā goán the̍h--chhut-lâi. Kín kā goán the̍h--chhut-lâi, nā bô goán sûi to̍h ē chhàu-hóe-ta--a!” I sī 1 ê siān-liông koh jia̍t-sim kâng tàu-saⁿ-kāng ê chŏ͘-gín-á, só͘-pái i thêng-kha, pau-ho̍k-á hē--leh, kā pháng lóng the̍h--chhut-lâi, sòa--lo̍h ná kè-sio̍k kiâⁿ i ê lō͘ ná kóng: “Án-ne lín to̍h ē khah sóng-khoài--ah.” Koh kòe 1-sî-á, i lâi kàu 1 chiah leng-gû hia, leng-gû khiā tī khang chhâ-tháng piⁿ ma-ma-háu, he gû-á kā i kóng: “Ko͘-niû-á! Ko͘-niû-á! Kā góa tàu lu̍t-leng! Pài-thok--leh, kā góa tàu lu̍t-leng! Góa í-keng tán 7 tang--a, m̄-koh lóng bô lâng lâi kā góa tàu lu̍t-leng!” Lán chit ê hó-sim ê chŏ͘-gín-á to̍h thêng-kha, pau-ho̍k-á hē--leh, kā chit chiah gû ê leng lu̍t ji̍p-khì kha-tháng--ni̍h, beh koh chiūⁿ-lō͘ ê sî, i kā gû-á kóng: “Án-ne lí to̍h ē ke khah sóng-khoài--ah.” Koh kòe bô jōa kú, i kiâⁿ lâi kàu 1 châng phōng-kó-chhiū thâu-chêng, he chhiū-á téng seⁿ kah choân-choân lóng phōng-kó, chhiū-oe to kiōng-beh ho͘ teh tn̄g--khì, phōng-kó-chhiū tùi i hoah kóng: “Ko͘-niû-á! Ko͘-niû-á! Pài-thok lí kā góa ê chhiū-oe iô-iô--leh, chia-ê kóe-chí-á siuⁿ tāng--ā, í-keng teh kah góa lóng oai-io--a!” Lán chit ê hó-sim ê chŏ͘-gín-á to̍h thêng-kha, pau-ho̍k-á hē--leh, khì kā chhiū-oe iô-iô--leh hō͘ he phōng-kó lak--lo̍h-lâi, án-ne chhiū-á to̍h khiā ē ti̍t--ah. I sòa lŏe beh kè-sio̍k kiâⁿ ê sî koh kóng: “Án-ne lí to̍h ē ke chin sóng-khoài--ah.” I to̍h koh ti̍t-ti̍t kiâⁿ--khì, it-ti̍t kàu i kiâⁿ lâi kah 1 keng chhù, ū 1 ê lāu lú-su̍t-sū tòa tī hin. Tú-hó chit ê lú-su̍t-sū su-iàu 1 ê lú-po̍k, mā pó-chèng kóng thāi-gū bē-bái. Só͘-pái, chŏ͘-gín-á to̍h tah-èng i beh lâu--lo̍h-lâi, chhì khòaⁿ i ka-tī kám ē kah-ì chit ê khang-khòe. I tio̍h ài sàu thô͘-kha, ài kā chhù-lāi pó-chhî ho͘ chheng-khì koh chéng-chê, piah-lô͘ ê hóe ài sio kah kng-iāⁿ koh sù-sī. M̄-koh ū 1 kiāⁿ tāi-chì lú-su̍t-sū kiò i chhian-bān m̄-thang chò; hit kiāⁿ tāi-chì to̍h sī tham-thâu khì khòaⁿ ian-tâng-kóng lāi-té! Lú-su̍t-sū kóng: “Nā sī lí án-ne chò, to̍h ē ū mi̍h-kiāⁿ lak tī lí ê sin-khu, kàu-sî lí to̍h bô hó-bóe.” Só͘-pái, chŏ͘-gín-á to̍h sàu thô͘-kha, chhéng eng-ia, khí-hóe kò͘-hóe; m̄-koh i liân pòaⁿ sián kang-chîⁿ mā bô khoàiⁿ. Taⁿ chŏ͘-gín-á siūⁿ beh tńg-chhù--ah, i bô kah-ì koh chò lú-su̍t-sū ê sú-iōng-lâng; in-ūi hit ê lú-su̍t-sū koàn-sì kā âng-eⁿ-á chú lâi chò àm-tǹg, koh kā kut-thâu tâi tī hoe-hn̂g-á ê 1-kóa chio̍h-thâu ē-kha. M̄-koh i koh bô siūⁿ beh tē-pōng-chí tńg-khì chhù, só͘-pái i to̍h chiām-chhiáⁿ lâu tī hia sàu thô͘-kha, chhéng eng-ia, chīn i ê pún-hūn, bē-su i kài kah-ì chò kāng-khoán. Bóe--á ū 1 kang, i tng teh piàⁿ-sàu piah-lô͘ ê sî, ū 1-kóa thô͘-thòaⁿ-hu lak--lo̍h-lâi, i soah bē-kì-chit i hông kà kóng bē-tàng khòaⁿ ian-tâng-kóng lāi-té, i to̍h tham-thâu hiòng téng-bīn khòaⁿ, siūⁿ beh khòaⁿ he thô͘-thòaⁿ-hu sī ùi tó-ūi lâi--ê. Oah, nah chiah hó-khang! 1 tōa lok ê kim-á hiông-hiông lak tī i tōa-thúi--ni̍h. Tú-hó chit-chūn hit ê lú-su̍t-sū chhut-mn̂g khì pān in su̍t-sū ê khang-khòe; só͘-pái chŏ͘-gín-á kám-kak che sī 1 ê liu-soan tńg-khì chhù ê hó sî-ki. I to̍h kā kûn láng--khí-lâi, iōng cháu--ê beh tńg-chhù; m̄-koh i chiah cháu bô jōa hn̄g, to̍h thiaⁿ tio̍h lú-su̍t-sū khiâ sàu-chhiú poe lâi teh jiok. Chìn-chêng hit chhâng i ū ka tàu-saⁿ-kāng, hō͘ i khiā ē ti̍t ê phōng-kó-chhiū to̍h tú-hó tī hù-kīn, i to̍h cháu khì chhiū-á hia, tōa-siaⁿ hoah kóng: “Phōng-kó-chhiū! Phōng-kó-chhiū, kā góa chhàng ho͘ hó hō͘ hit ê lāu lú-su̍t-sū chhōe góa bô, Góa nā khì ho͘ chhōe--tio̍h, i to̍h ē chhńg góa ê kut, Koh kā góa tâi tī hoe-hn̂g-á ê chio̍h-thâu ē-té ut.” Phōng-kó-chhiū to̍h ìn kóng: “Tong-jiân sī bô būn-tê. Lí kā góa tàu-saⁿ-kāng, hō͘ góa khiā ē ti̍t, hó-lâi-hó-khì sī eng-kai.” Lâi phōng-kó-chhiū to̍h iōng i chheⁿ-chhùi ê chhiū-ōe kā chŏ͘-gín-á chhàng kah hó-sè hó-sè; koh-lâi hit ê lú-su̍t-sū poe keng-kòe ê sî mn̄g kóng: “Góa ê chhiū-á! Góa ê chhiū-á ôe! Lí kám ū khòaⁿ tio̍h góa hit ê chiān-thâng ê sè-hàn chŏ͘-kán-á, Kha-chhng-hoe iô--leh iô--leh koh phāiⁿ 1 kha tōa-tē, I thau the̍h góa ê chîⁿ, koh 1 piàn lóng-chóng the̍h!” Phōng-kó-chhiū ìn kóng: “Bô neh, chhin-ài ê a-pô, Chit 7 tang lóng bô khòaⁿ--kòe!” To̍h án-ne, lú-su̍t-sū poe m̄ tio̍h pêng--khì, chŏ͘-gín-á peh lo̍h chhiū, hó-lé-á kā chhiū-á seh to-siā, lâi to̍h koh khai-sí cháu. M̄-koh i cháu kàu leng-gû khiā tī chhâ-tháng piⁿ--á hit tah ê sî, iû-koh thiaⁿ tio̍h lú-su̍t-sū poe teh-beh kàu, só͘-pái i to̍h cháu khì gû-á piⁿ--á, tōa-siaⁿ hoah kóng: “Gû-á! Gû-á! Kā góa chhàng ho͘ hó, Hō͘ hit ê lú-su̍t-sū chhōe góa bô, Góa nā khì ho͘ chhōe--tio̍h, i to̍h ē chhńg góa ê kut, Koh kā góa tâi tī hoe-hn̂g-á ê chio̍h-thâu ē-té ut!” Gû-á to̍h ìn kóng: “Tong-jiân sī bô būn-tê. Lí kám m̄ sī ū kā góa tàu lu̍t-leng, hō͘ góa chin khin-sang? Bih khì góa ê sin-khu āu-piah, lí to̍h ē chin an-choân.” Lú-su̍t-sū poe keng-kòe ê sî, to̍h kho͘ gû-á kòe-lâi kóng: “Góa ê gû-á! Góa ê gû-á ôe! Lí kám ū khòaⁿ tio̍h góa hit ê chiān-thâng ê sè-hàn chŏ͘-kán-á Kha-chhng-hoe iô--leh iô--leh koh phāiⁿ 1 kha tōa-tē, I thau the̍h góa ê chîⁿ, koh 1 piàn lóng-chóng the̍h!” Gû-á ka ìn kóng: “Bô neh, chhin-ài ê a-pô, Chit 7 tang lóng bô khòaⁿ--kòe!” --Hosting provided by SoundOn
-
【英國Gín-á古】巨人殺手Jia̍k 第5-7 Pha︱Jack the Giant Killer Part 5-7 原作︱Flora Annie Steel 翻譯︱蔡逸民 BuLuhSuh／柯王炳勳 Bí-leng 講古／校對︱蔡逸民 BuLuhSuh 配樂︱陳曉怡 Niau-tāu 人聲編輯︱柯王炳勳 Bí-leng 字幕︱林于真 A-chin 圖︱AI製圖 影片︱陳姿樺 Ko͘-chiáu 訂閱做工á人Youtube頻道：https://www.youtube.com/@chokangalang 完整ê英文／漢羅／POJ對照文稿khǹg ti官方網站：https://cho-kang-a-lang.github.io/ 漢羅全文： V M̄-koh，khah án-chóaⁿ講to̍h無法度hō͘咱ê英雄滿足，伊真緊to̍h koh出發去走chhōe巨人。Taⁿ，伊iáu-bē走jōa hn̄g，to̍h去tú tio̍h 1 ê巨人，坐tī暗bong-bong ê山洞洞口ê 1塊chiok大塊ê柴kho͘頂頭。伊的確是siāng恐怖ê巨人。伊ê目睭thó͘-thó͘ ná炎phà-phà ê土炭，歹面chhiuⁿ烏hng烏hng看tio̍h ē起雞母皮；伊ê嘴phòe ná親像真大phiáⁿ ê煙肉，頂面koh moa 1 iân嘴鬚節á，1支1支tēng-khiauh-khiauh bē輸鉛線，hit kóa sàm tī伊勇壯ê肩胛頂頭ê頭毛，看tio̍h真sêng un-lun-khûn ê蛇a̍h是si-si叫ê毒蛇。伊手gia̍h 1支尾á 1瘤ê鐵棍，伊喘氣ê聲是大kah連1英里遠ê所在to聽ē tio̍h。Hiah-nī恐怖ê情境，Jia̍k lóng無chùn-būn，伊落馬，kā伊ê隱身裘á穿--leh，行óa過巨人，輕聲á講：「Eh，是你hōⁿ？Koh免jōa久我to̍h ē-tàng khiú你ê嘴鬚kā你la̍k tiâu-tiâu。」 話chiah講soah，Jia̍k大力劍gia̍h--leh to̍h ùi巨人ê頭斬--落-去，m̄-koh，m̄知是án-chóaⁿ手歪1 ē，soah錯手kā巨人ê鼻á齊齊削--落-來，ná teh kho͘-si-á án-ne lóng bē soa-sap！驚倒人！He巨人哀pē叫母phǹg-phǹg叫，kán-ná teh tân雷公有夠大聲。巨人起siáu狂，有瘤ê鐵棍sa leh四界烏白hut，to bē輸去hō͘惡鬼附身kāng款。M̄-koh Jia̍k穿隱身裘á，輕輕鬆鬆to̍h閃過伊ê攻擊，1 ē se̍h身走去巨人kha-chiah後，1劍出力tu̍h入去伊ê kha-chiah-phiaⁿ，chhun劍柄koh tī外口，巨人to̍h即時piáng--1-ē倒tī土脚死giān-giān，ngia̍uh to bē ngia̍uh。 Sòa--落-來，Jia̍k kā巨人ê頭tok--落-來，專工chhiàⁿ 1 ê馬車夫送去王Á-sò hia。了後，伊開始chhiau-chhōe巨人ê山洞，beh chhōe巨人ê寶貝。伊經過真chē彎彎oat-oat ê路á，尾--á來到1間曠闊ê大廳，大廳ê土脚kah厝頂lóng是用砂岩起--ê。遠遠ê hìn頭有1座真大ê壁爐，內底koh吊1脚鐵鍋á，Jia̍k透世人to m̄-bat看過hiah大khian ê鍋á。鍋á內tng teh滾，siâⁿ人流嘴nōa ê芳氣一直chhèng--出-來；鍋á ê正手pêng有1塊厚tut-tut ê大塊桌á，桌á頂排--ê lóng是大sài-suh ê盤á kah bì-luh杯á。Chia to̍h是進前巨人in teh食飯ê所在。Koh行ùi khah頭前--leh，Jia̍k看tio̍h ká-ná是1扇窗á，用鐵枝封tiâu--leh，ùi窗á ka看--入-去，to̍h看tio̍h 1大堆hông掠來關ê苦憐人。 In看tio̍h Jia̍k ê時hoah講：「Ái-iò͘！僥倖--ò͘！少年家，你kám是beh來kah goán做夥關tī chit ê驚--人ê監牢--ni̍h？」 Jia̍k ìn講：「He to̍h看情形--lah，m̄-koh lín kám ē-tàng先kā我講lín是為怎樣ē hông關tī chia？」 In sûi hoah講：「Goán a̍h無做啥歹tāi-chì！Goán是去hō͘粗殘ê巨人掠來關tī chia，koh kā goán飼kah肥chut-chut，一直到hit kóa怪物想beh ài食chheⁿ-chhau ê時。Hit-chūn in to̍h ē揀hit幾ê-á siāng有肉--ê，kā in食--去。 」 聽in講了，Jia̍k sûi kā監牢ê門鎖開--開，hō͘ chit kóa苦憐ê人自由。了後伊去chhiau-chhōe巨人ê金庫，kā內底ê金銀pêⁿ-pun hō͘ in chit kóa hông掠--來-ê，為in受ê苦難來還in 1-kóa公道，sòa--落-去koh chhōa in去附近ê 1棟城堡，辦1頓有夠chheⁿ-chhau--ê來kā in款待。 VI To̍h tī ta̍k-ê lóng teh慶祝in hông救--出-來，koh tng teh o-ló Jia̍k ê猛勇ê時，1 ê報馬á來報告講，有1 ê叫做雷公谷ê巨人，高長大漢koh生2粒頭，伊聽講伊ê親堂死--去-ah，tng teh ùi北部ê山谷piàⁿ來beh報仇，已經chhun 1-2哩路to̍h ē到城堡，庄脚ê百姓kā牛羊精牲á hiàm--leh，tī伊ê面頭前四散逃走，to bē輸米糠隨風iāⁿ-iāⁿ飛。 Taⁿ，咱chit棟城堡kah花園是坐落tī 1粒細粒島頂面，島ê四pêng邊--á hō͘ 20尺闊，30尺深，溝墘真kiā ê城溝圍--leh。城溝頂有吊橋hāⁿ--過。Jia̍k 1刻to無iân-chhiân，吩咐人kā吊橋中段雙pêng邊--á ê橋面鋸hìⁿ-sak，kan-na留1片枋á無鋸，伊to̍h穿伊hông看bē tio̍h ê隱身裘á，手gia̍h神奇ê大力劍，sī-sōa去接陣。 雖bóng講巨人當然mā看bē tio̍h Jia̍k，m̄-koh伊鼻ē tio̍h，因為巨人in lóng是好鼻獅。Só͘-pái雷公谷to̍h用he kah伊ê名kāng款，ná親像teh tân雷公ê聲hoah講： 「Fi̍h！Fa̍ih！Fo̍͘h！Fa̍mh！ 我鼻tio̍h英國人ê血ê hiàn。 不管伊是活--ê a̍h死--ê， 我to beh kā伊ê骨géng粉做pháng來gè。」 「有影--無？」Jia̍k kah平素時kāng款笑笑á ka ìn，koh講：「Án-ne你決定是1 ê恐怖ê磨房頭家！」 聽到chia，巨人四界siòng，想beh看1-ē-á伊ê冤仇人，koh hoah講： 「你，to̍h是hit ê thâi死我幾nā-ê親堂ê歹狗hōⁿ？Án-ne，我to̍h beh用嘴齒kā你拆ho͘碎碎，kā你ê血吸ho͘ ta-ta，koh kā你ê骨頭géng kah粉粉。」 「Án-ne你to̍h ài先掠tio̍h我chiah ē-sái--chit。」Jia̍k án-ne笑笑á ka ìn，了後，隱身裘á phiaⁿ--leh，緊猛su-lí-pah穿--leh，動作猛掠，開始ín-chhōa巨人做夥跳精彩ê舞步，伊ná輕báng-báng ê羽毛án-ne tiô跳se̍h-lin-long，ah巨人to kán-ná ē-hiáu行路ê koân塔kāng款，脚步沉重tòe tī後壁jiok，ta̍k脚步頓tī土脚lóng bē輸teh地動--leh。Tī邊--á teh看鬧熱--ê，看Jia̍k teh戲弄巨人lóng笑kah腹肚kiōng-beh li̍h--開，直直到Jia̍k伊感覺sńg有夠氣--ah，伊to̍h ùi吊橋走--過，三兩步to̍h通過hit塊無鋸掉ê枋á，去到橋ê另外1頭，用刁工beh kā伊ê對手創治ê姿勢khiā leh等--伊。 巨人chŏaⁿ全速衝--過-去，伊氣kah嘴角起白pho，氣kah手頭ê棍á烏白but。M̄-koh to̍h tī伊衝到吊橋中央ê時，伊he重錘錘ê體重當然mā是ē kā枋á teh kah斷--去，巨人chŏaⁿ倒頭栽poa̍h落城溝，像海翁án-ne phah-phún滾絞，poa̍h過來poa̍h過去，to̍h是無法度peh出城溝報仇。 看lāu-jia̍t--ê看巨人hiah狼狽leh滾liòng，ta̍k ê to笑哈哈，Jia̍k頭起先是暢1 ē過頭，kan-na知影thang ka恥笑。M̄-koh，尾手伊mā是the̍h 1條索á，ka khian去套tī巨人ê 2粒頭，了後叫1隊馬來tàu拖去岸邊，路尾大力劍「chho̍p chho̍p」2聲，tāi-chì收soah。 VII 歡歡喜喜chhit-thô 1-chām-á了後，Jia̍k心內iû-koh leh ngia̍uh-ngia̍uh-chǹg，伊to̍h hâm伊ê朋友弟兄sio辭，koh開始新ê冒險--ah。 伊行chiok緊，也行真遠，行過大樹林，山谷hâm山崙，路尾，tī 1 ê半暝半，伊行到1棟khiā tī大山山脚孤單稀微ê厝頭前。伊去lòng門，來ka開門ê是1 ê頭毛白chhang-chhang ê老歲á。 「伯--á，」Jia̍k講話ê氣口ûn-ná kah平素時kāng款真好禮，「你kám ē-tàng收留1 ê tī半暝半chhōe無路ê出外人？」 老歲á ìn講：「好ā，無問題，歡迎你來我chit間m̄-chiâⁿ厝á。」 聽老歲á án-ne講，Jia̍k to̍h入去厝--ni̍h，食飯飽in 2 ê to̍h坐--leh，親hòⁿ-hòⁿ tī hia話東話西。Hit chūn，老歲á看tio̍h Jia̍k ê腰帶，知影伊是hit ê kài出名ê巨人殺手，伊to̍h講： 「少年家--ah！你是phah倒邪惡怪物ê gâu人。現此時，附近to̍h有tòa 1隻怪物，真值得你去發揮你ê實力。Tī hit支大山頂koân，有1棟hông放符á ê城堡，teh把守--ê是1 ê名號做Ga-li-gián-thòa ê巨人，伊有1 ê奸奸鬼鬼ê老術士teh ka tàu-saⁿ-kāng，kā bē少美麗ê女士kah勇敢ê騎士騙入去城堡，來in to̍h tī hia hông變做種種ê鳥á kah野獸，有ê koh khah害，去hông變做魚á a̍h是蟲thōa。In hông關kaⁿ實在真悽慘；m̄-koh siōng hō͘我割腸割肚--ê是，有1 ê公爵ê cha-bó͘-kiáⁿ，伊tī in老pē ê花園á hông縛--去，用1台火龍拖--ê to̍h火--ê戰車載來tī chia。伊去hông變做1隻白色ê鹿á母；sui-bóng講已經有kài chē勇敢ê騎士piàⁿ性命beh phah破魔法thang ka解救，m̄-koh無人成功；因為，你ka看，城堡ê門嘴口有2隻可怕ê獅身鷹，in ē kā ta̍k ê想beh通過ê人chóng消滅。」 Chit chūn，Jia̍k去想tio̍h hit領進前kā伊tàu-saⁿ-kāng真chē ê隱身裘á，sòa--lòe伊koh kā khiáu帽á tì--起-來，sûi to̍h知影ka-tī ài án-chóaⁿ做--ah。隔工透早，天chiah phah-phú-á光，Jia̍k to̍h精神，kā伊ê隱身裘á kah緊猛su-lí-pah穿--khài。目nih-á，伊to̍h到山頂--ah！Hit 2隻獅身鷹to̍h tī hia，kā城堡ê門嘴顧tiâu-tiâu，in是恐怖ê活物，舌kah尾á lóng有pit叉。M̄-koh因為Jia̍k穿隱身裘á，in 2隻lóng看bē tio̍h伊，só͘-pái伊to̍h kui叢好好ùi in seng-khu邊行--過，連缺角to無。 伊tī城門頂，看tio̍h 1支金色ê lah-pah，用銀鍊á吊--leh，金lah-pah ê ē脚用紅色ê字刻講： 不管是siáng來pûn chit支lah-pah， 巨人to̍h ài phak落去土脚。 烏暗ê咒語ē ho͘ phah歹--去， Kā悲傷變做歡喜。 Jia̍k chiah kā chia ê字讀soah，sûi to̍h kā lah-pah tu到嘴唇邊，大力pûn--lòe： 「Thián-tho̍h-bì！Thián-tho̍h-bì！Thián-tho̍h-bì！」 Chiah leh pûn頭1 ê音ê niā-niā，城堡ùi伊hai大ê地基到厝尾頂lóng開始chùn，ah伊hit ê小節to iáu-bē pûn kah soah，巨人kah術士to̍h teh咬ka-tī ê 大頭拇，chhoah ka-tī ê頭毛，in知影beh結束--ah，in無法度koh做歹--ah。M̄-koh巨人koh想beh戰看māi--leh，to̍h kā棍á giâ起來beh保護ka-tī；Jia̍k chŏaⁿ gia̍h大力劍快捷1劍phut--過，to̍h kā巨人ê頭chám--落-來，當然伊koh來kāng款beh án-ne處理hit ê術士，m̄-koh hit ê術士是1 ê軟脚蝦，伊叫1 káng捲螺á風，kā伊ka-tī ká去天頂，koh來to̍h無人bat看--過-伊a̍h是聽過伊ê消息--ah。He法術自án-ne to̍h滅無，所有去hông變做鳥á，野獸，龜蛇杜定kah蟲thōa ê勇敢騎士kah美麗淑女lóng koh變轉來原形，公爵ê cha-bó͘-kiáⁿ mā kāng款，伊ùi 1隻白色ê鹿á母變轉來日頭ē siāng súi ê少女。Chia ê tāi-chì chiah tú發生，kui棟城堡to̍h tī 1 chūn bông霧--ni̍h消失，無--去，mā自hit時起，巨人to̍h ùi chit塊土地--ni̍h完全無--去-ah。 Só͘-pái，to̍h tī Jia̍k kā Ga-li-gián-thòa ê頭，kah所有伊解除法術解救--出-來ê貴族kah淑女獻hō͘王Á-sò了後，伊發見講，ka-tī已經無啥物tāi-chì thang好做--ah。M̄-koh，為tio̍h beh獎勵伊過去ê chē-chē功勞，王Á-sò to̍h kā公爵ê cha-bó͘-kiáⁿ做hō͘老實ê巨人殺手Jia̍k。尾後in 2 ê to̍h結婚--a，in辦婚禮ê時全國lóng鬧熱滾滾歡喜tang-tang。王koh賞賜Jia̍k 1棟高尚ê城堡kah屬tī城堡ê lè-táu ê田園，了後，Jia̍k kah伊ê夫人koh有in ê kiáⁿ兒，to̍h tī hia過tio̍h幸福koh滿足，一直到in目睭kheh-kheh hit日。 Pe̍h-ōe-jī choân-bûn: V M̄-koh, khah án-chóaⁿ kóng to̍h bô-hoat-tō͘ hō͘ lán ê eng-hiông boán-chiok, i chin kín to̍h koh chhut-hoat khì cháu-chhōe kū-jîn. Taⁿ, i iáu-bē cháu jōa hn̄g, to̍h khì tú tio̍h 1 ê kū-jîn, chē tī àm-bong-bong ê soaⁿ-tōng tōng-kháu ê 1 tè chiok tōa tè chhâ-kho͘ téng-thâu. I tek-khak sī siāng khióng-pò͘ ê kū-jîn. I ê ba̍k-chiu thó͘-thó͘ ná iām-phà-phà ê thô͘-thòaⁿ, pháiⁿ-bīn-chhiuⁿ o͘-hng o͘-hng khòaⁿ tio̍h ē khí ke-bú-phôe; i ê chhùi-phòe ná chhin-chhiūⁿ chin tōa phiáⁿ ê ian-bah, téng-bīn koh moa 1 iân chhùi-chhiu-chat-á, 1 ki 1 ki tēng-khiauh-khiauh bē-su iân-sòaⁿ, hit kóa sàm tī i ióng-chòng ê keng-kah téng-thâu ê thâu-mn̂g, khòaⁿ tio̍h chin sêng un-lun-khûn ê chôa a̍h-sī si-si-kiò ê to̍k-chôa. I chhiú gia̍h 1 ki bóe-á 1 liû ê thih-kùn, i chhoán-khùi ê siaⁿ sī tōa kah liân 1 eng-lí hn̄g ê só͘-chāi to thiaⁿ ē tio̍h. Hiah-nī khióng-pò͘ ê chêng-kéng, Jia̍k lóng bô chùn-būn, i lo̍h-bé, kā i ê ún-sin hiû-á chhēng--leh, kiâⁿ óa kòe kū-jîn, khin-siaⁿ-á kóng: “Eh, sī lí hōⁿ? Koh bián jōa kú góa to̍h ē-tàng khiú lí ê chhùi-chhiu kā lí la̍k tiâu-tiâu.” Ōe chiah kóng soah, Jia̍k tāi-le̍k-kiàm gia̍h--leh to̍h ùi kū-jîn ê thâu chám--lo̍h-khì, m̄-koh, m̄ chai sī án-chóaⁿ chhiú oai 1 ē, soah chhò-chhiú kā kū-jîn ê phīⁿ-á chê-chê siah--lo̍h-lâi, ná teh kho͘-si-á án-ne lóng bē soa-sap! Kiaⁿ-tó-lâng! He kū-jîn ai-pē-kiò-bú phǹg-phǹg-kiò, kán-ná teh tân-lûi-kong ū-kàu tōa-siaⁿ. Kū-jîn khí siáu-kông, ū liû ê thih-kùn sa leh sì-kè o͘-pe̍h hut, to bē-su khì hō͘ ok-kúi hù-sin kāng khoán. M̄-koh Jia̍k chhēng ún-sin hiû-á, khin-khin-sang-sang to̍h siám kòe i ê kong-kek, 1 ē se̍h-sin cháu khì kū-jîn kha-chiah-āu, 1 kiàm chhut-la̍t tu̍h ji̍p-khì i ê kha-chiah-phiaⁿ, chhun kiàm-pèⁿ koh tī gōa-kháu, kū-jîn to̍h chek-sî piáng--1-ē tó tī thô͘-kha sí-giān-giān, ngia̍uh to bē ngia̍uh. Sòa--lo̍h-lâi, Jia̍k kā kū-jîn ê thâu tok--lo̍h-lâi, choan-kang chhiàⁿ 1 ê bé-chhia-hu sàng khì Ông Á-sò hia. Liáu-āu, i khai-sí chhiau-chhōe kū-jîn ê soaⁿ-tōng, beh chhōe kū-jîn ê pó-pòe. I keng-kòe chin chē oan-oan-oat-oat ê lō͘-á, bóe--á lâi kàu 1 keng khòng-khoah ê tōa-thiaⁿ, tōa-thiaⁿ ê thô͘-kha kah chhù-téng lóng sī iōng soa-gâm khí--ê. Hn̄g-hn̄g ê hìn thâu ū 1 chō chin tōa ê piah-lô͘, lāi-té koh tiàu 1 kha thih-oe-á, Jia̍k thàu-sì-lâng to m̄-bat khòaⁿ kòe hiah tōa khian ê oe-á. Oe-á lāi tng teh kún, siâⁿ lâng lâu chhùi-nōa ê phang-khùi it-ti̍t chhèng--chhut-lâi; oe-á ê chiàⁿ-chhiú-pêng ū 1 tè kāu-tut-tut ê tōa-tè toh-á, toh-á téng pâi--ê lóng sī tōa sài-suh ê pôaⁿ-á kah bì-luh poe-á. Chia to̍h sī chìn-chêng kū-jîn in teh chia̍h-pn̄g ê só͘-chāi. Koh kiâⁿ ùi khah thâu-chêng--leh, Jia̍k khòaⁿ tio̍h ká-ná sī 1 sìⁿ thang-á, iōng thih-ki hong tiâu--leh, ùi thang-á ka khòaⁿ--ji̍p-khì, to̍h khòaⁿ tio̍h 1 tōa tui hông lia̍h lâi koaiⁿ ê khó͘-liân-lâng. In khòaⁿ tio̍h Jia̍k ê sî hoah kóng: “Ái-iò͘! Hiau-hēng--ò͘! Siàu-liân-ke, lí kám sī beh lâi kah goán chò-hóe koaiⁿ tī chit ê kiaⁿ--lâng ê kaⁿ-lô--ni̍h?” Jia̍k ìn kóng: “He to̍h khòaⁿ chêng-hêng--lah, m̄-koh lín kám ē-tàng seng kā góa kóng lín sī ūi chóaⁿ-iūⁿ ē hông koaiⁿ tī chia?” In sûi hoah kóng: “Goán a̍h bô chò siáⁿ pháiⁿ tāi-chì! Goán sī khì hō͘ chho͘-chân ê kū-jîn lia̍h lâi koaiⁿ tī chia, koh kā goán chhī kah pûi-chut-chut, it-ti̍t kàu hit kóa koài-bu̍t siūⁿ beh ài chia̍h chheⁿ-chhau ê sî. Hit-chūn in to̍h ē kéng hit kúi-ê-á siāng ū-bah--ê, kā in chia̍h--khì.” Thiaⁿ in kóng liáu, Jia̍k sûi kā kaⁿ-lô ê mn̂g-só khui--khui, hō͘ chit kóa khó͘-liân ê lâng chū-iû. Liáu-āu i khì chhiau-chhōe kū-jîn ê kim-khò͘, kā lāi-té ê kim-gîn pêⁿ-pun hō͘ in chit kóa hông lia̍h--lâi-ê, ūi in siū ê khó͘-lān lâi hêng in 1-kóa kong-tō, sòa--lo̍h-khì koh chhōa in khì hū-kīn ê 1 tòng siâⁿ-pó, pān 1 tǹg ū-kàu chheⁿ-chhau--ê lâi kā in khoán-thāi. VI To̍h tī ta̍k-ê lóng teh khèng-chiok in hông kiù--chhut-lâi, koh tng teh o-ló Jia̍k ê béng-ióng ê sî, 1 ê pò-bé-á lâi pò-kò kóng, ū 1 ê kiò-chò Lûi-kong-kok ê kū-jîn, kau-chhiâng-tōa-hàn koh seⁿ 2 lia̍p thâu, i thiaⁿ-kóng i ê chhin-tông sí--khì-ah, tng teh ùi pak-pō͘ ê soaⁿ-kok piàⁿ lâi beh pò-siû, í-keng chhun 1-2 lí lō͘ to̍h ē kàu siâⁿ-pó, chng-kha ê peh-sèⁿ kā gû-iûⁿ cheng-seⁿ-á hiàm--leh, tī i ê bīn-thâu-chêng sì-sòaⁿ tô-cháu, to bē-su bí-khng sûi hong iāⁿ-iāⁿ-poe. Taⁿ, lán chit tòng siâⁿ-pó kah hoe-hn̂g sī chē-lo̍h tī 1 lia̍p sè lia̍p tó téng-bīn, tó ê sì-pêng-piⁿ--á hō͘ 20 chhioh khoah, 30 chhioh chhim, kau-kîⁿ chin kiā ê siâⁿ-kau ûi--leh. Siâⁿ-kau téng ū tiàu-kiô hāⁿ--kòe. Jia̍k 1 khek to bô iân-chhiân, hoan-hù lâng kā tiàu-kiô tiong-toāⁿ siang-pêng-piⁿ--á ê kiô-bīn kù hìⁿ-sak, kan-na lâu 1 phìⁿ pang-á bô kù, i to̍h chhēng i hông khòaⁿ bē tio̍h ê ún-sin hiû-á, chhiú gia̍h sîn-kî ê tāi-le̍k-kiàm, sī-sōa khì chiap-tīn. Sui-bóng kóng kū-jîn tong-jiân mā khòaⁿ bē tio̍h Jia̍k, m̄-koh i phīⁿ ē tio̍h, in-ūi kū-jîn in lóng sī hó-phīⁿ-sai. Só͘-pái Lûi-kong-kok to̍h iōng he kah i ê miâ kāng-khoán, ná chhin-chhiūⁿ teh tân-lûi-kong ê siaⁿ hoah kóng: “Fi̍h! Fa̍ih! Fo̍͘h! Fa̍mh! Góa phīⁿ tio̍h Eng-kok-lâng ê hoeh ê hiàn. Put-koán i sī oa̍h--ê a̍h sí--ê, Góa to beh kā i ê kut géng hún chò pháng lâi gè.” “Ū-iáⁿ--bô?” Jia̍k kah pêng-sò͘-sî kāng-khoán chhiò-chhiò-á ka ìn, koh kóng: “Án-ne lí koat-tēng sī 1 ê khióng-pò͘ ê bō-pâng thâu-ke!” Thiaⁿ kàu chia, kū-jîn sì-kè siòng, siūⁿ beh khòaⁿ 1-ē-á i ê oan-siû-lâng, koh hoah kóng: “Lí, to̍h sī hit ê thâi-sí góa kúi-nā-ê chhin-tông ê pháiⁿ-káu hōⁿ? Án-ne, góa to̍h beh iōng chhùi-khí kā lí thiah ho͘ chhùi-chhùi, kā lí ê hoeh suh ho͘ ta-ta, koh kā lí ê kut-thâu géng kah hún-hún.” "Án-ne lí to̍h ài seng lia̍h tio̍h góa chiah ē-sái--chit." Jia̍k án-ne chhiò-chhiò-á ka ìn, liáu-āu, ún-sin hiû-á phiaⁿ--leh, kín-mé su-lí-pah chhēng--leh, tōng-chok mé-lia̍h, khai-sí ín-chhōa kū-jîn chò-hóe thiàu cheng-chhái ê bú-pō͘, i ná khin-báng-báng ê ú-mn̂g án-ne tiô-thiàu se̍h-lin-long, ah kū-jîn to kán-ná ē-hiáu kiâⁿ-lō͘ ê koân-thah kāng-khoán, kha-pō͘ tîm-tāng tòe tī āu-piah jiok, ta̍k kha-pō͘ tǹg tī thô͘-kha lóng bē-su teh tē-tāng--leh. Tī piⁿ--á teh khòaⁿ lāu-jia̍t--ê, khòaⁿ Jia̍k teh hì-lāng kū-jîn lóng chhiò kah pak-tó͘ kiōng-beh li̍h--khui, ti̍t-ti̍t kàu Jia̍k i kám-kak sńg ū kàu-khùi--ah, i to̍h ùi tiàu-kiô cháu--kòe, saⁿ-nn̄g-pō͘ to̍h thong-kòe hit tè bô kù tiāu ê pang-á, khì kàu kiô ê lēng-gōa 1 thâu, iōng tiau-kang beh kā i ê tùi-chhiú chhòng-tī ê chu-sè khiā leh tán--i. Kū-jîn chŏaⁿ choân-sok chhiong--kòe-khì, i khì kah chhùi-kak khí pe̍h-pho, khì kah chhiú-thâu ê kùn-á o͘-pe̍h but. M̄-koh to̍h tī i chhiong kàu tiàu-kiô tiong-ng ê sî, i he tāng-thûi-thûi ê thé-tāng tong-jiân mā sī ē kā pang-á teh kah tn̄g--khì, kū-jîn chŏaⁿ tó-thâu-chai poa̍h lo̍h siâⁿ-kau, chhiūⁿ hái-ang án-ne phah-phún kún-ká, poa̍h kòe-lâi poa̍h kòe-khì, to̍h sī bô-hoat-tō͘ peh chhut siâⁿ-kau pò-siû. Khòaⁿ lāu-jia̍t--ê khòaⁿ kū-jîn hiah liông-pōe leh kún-liòng, ta̍k ê to chhiò-ha-ha, Jia̍k thâu-khí-seng sī thiòng 1 ē kòe-thâu, kan-na chai-iáⁿ thang ka thí-chhiò. M̄-koh, bóe-chhiú i mā sī the̍h 1 tiâu soh-á, ka khian khì thò tī kū-jîn ê 2 lia̍p thâu, liáu-āu kiò 1 tūi bé lâi tàu thoa khì hōaⁿ-piⁿ, lō͘-bóe tāi-le̍k-kiàm “chho̍p-chho̍p” 2 siaⁿ, tāi-chì siu-soah. VII Hoan-hoaⁿ-hí-hí chhit-thô 1-chām-á liáu-āu, Jia̍k sim-lāi iû-koh leh ngia̍uh-ngia̍uh-chǹg, i to̍h hâm i ê pêng-iú tī-hiaⁿ sio-sî, koh khai-sí sin ê mō͘-hiám--ah. I kiâⁿ chiok kín, iā kiâⁿ chin hn̄g, kiâⁿ kòe tōa chhiū-nâ, soaⁿ-kok hâm soaⁿ-lūn, lō͘-bóe, tī 1 ê pòaⁿ-mê-pòaⁿ, i kiâⁿ kàu 1 tòng khiā tī tōa-soaⁿ soaⁿ-kha ko͘-toaⁿ hi-bî ê chhù thâu-chêng. I khì lòng-mn̂g, lâi ka khui-mn̂g ê sī 1 ê thâu-mo͘ pe̍h-chhang-chhang ê lāu-hòe-á. “Peh--á,” Jia̍k kóng-ōe ê khùi-kháu ûn-ná kah pêng-sò͘-sî kāng-khoán chin hó-lé, “Lí kám ē-tàng siu-liû 1 ê tī pòaⁿ-mê-pòaⁿ chhōe-bô-lō͘ ê chhut-gōa-lâng?” Lāu-hòe-á ìn kóng: “Hó ā, bô būn-tê, hoan-gêng lí lâi góa chit keng m̄-chiâⁿ chhù-á.” Thiaⁿ lāu-hòe-á án-ne kóng, Jia̍k to̍h ji̍p-khì chhù--ni̍h, chia̍h-pn̄g pá in 2 ê to̍h chē--leh, chhin-hòⁿ-hòⁿ tī hia ōe-tang-ōe-sai. Hit chūn, lāu-hòe-á khòaⁿ tio̍h Jia̍k ê io-tòa, chai-iáⁿ i sī hit ê kài chhut-miâ ê Kū-jîn Sat-chhiú, i to̍h kóng: “Siàu-liân-ke--ah! Lí sī phah-tó siâ-ok koài-bu̍t ê gâu-lâng. Hiān-chhú-sî, hū-kīn to̍h ū tòa 1 chiah koài-bu̍t, chin ta̍t-tit lí khì hoat-hui lí ê si̍t-le̍k. Tī hit ki tōa-soaⁿ téng-koân, ū 1 tòng hông pàng-hû-á ê siâⁿ-pó, teh pá-siú--ê sī 1 ê miâ hō-chò Ga-li-gián-thòa ê kū-jîn, i ū 1 ê kan-kan-kúi-kúi ê lāu su̍t-sū teh ka tàu-saⁿ-kāng, kā bē chió bí-lē ê lú-sū kah ióng-kám ê khî-sū phiàn ji̍p-khì siâⁿ-pó, lâi in to̍h tī hia hông piàn-chò chióng-chióng ê chiáu-á kah iá-siù, ū ê koh khah hāi, khì hông piàn-chò hî-á a̍h sī thâng-thōa. In hông koaiⁿ-kaⁿ si̍t-chāi chin chhi-chhám; m̄-koh siōng hō͘ góa koah-tn̂g-koah-tō͘--ê sī, ū 1 ê kong-chiok ê cha-bó͘-kiáⁿ, i tī in lāu-pē ê hoe-hn̂g-á hông pa̍k--khì, iōng 1 tâi hóe-lêng thoa--ê to̍h-hóe--ê chiàn-chhia chài lâi tī chia. I khì hông piàn-chò 1 chiah pe̍h-sek ê lo̍k-á-bó; sui-bóng kóng í-keng ū kài chē ióng-kám ê khî-sū piàⁿ-sìⁿ-miā beh phah phòa mô͘-hoat thang ka kái-kiù, m̄-koh bô lâng sêng-kong; in-ūi, lí ka khòaⁿ, siâⁿ-pó ê mn̂g-chhùi-kháu ū 2 chiah khó-phàⁿ ê sai-sin-eng, in ē kā ta̍k ê siūⁿ-beh thong-kòe ê lâng chóng siau-bia̍t.” Chit chūn, Jia̍k khì siūⁿ tio̍h hit niá chìn-chêng kā i tàu-saⁿ-kāng chin chē ê ún-sin hiû-á, sòa--lòe i koh kā khiáu-bō-á tì--khí-lâi, sûi to̍h chai-iáⁿ ka-tī ài án-chóaⁿ chò--ah. Keh-kang thàu-chá, thiⁿ chiah phah-phú-á-kng, Jia̍k to̍h cheng-sîn, kā i ê ún-sin hiû-á kah kín-mé su-lí-pah chhēng--khài. Ba̍k-nih-á, i to̍h kàu soaⁿ-téng--ah! Hit 2 chiah sai-sin-eng to̍h tī hia, kā siâⁿ-pó ê mn̂g-chhùi kò͘ tiâu-tiâu, in sī khióng-pò͘ ê oa̍h-mi̍h, chi̍h kah bóe-á lóng ū pit-chhe. M̄-koh in-ūi Jia̍k chhēng ún-sin hiû-á, in 2 chiah lóng khòaⁿ bē tio̍h i, só͘-pái i to̍h kui châng hó-hó ùi in seng-khu piⁿ kiâⁿ--kòe, liân khih-kak to bô. I tī siâⁿ-mn̂g téng, khòaⁿ tio̍h 1 ki kim-sek ê lah-pah, iōng gîn liān-á tiàu--leh, kim lah-pah ê ē-kha iōng âng-sek ê jī khek kóng: Put-koán sī siáng lâi pûn chit ki lah-pah, Kū-jîn to̍h ài phak lo̍h-khì thô͘-kha. O͘-àm ê chiù-gí ē ho͘ phah pháiⁿ--khì, Kā pi-siong piàn-chò hoaⁿ-hí. Jia̍k chiah kā chia ê jī tha̍k soah, sûi to̍h kā lah-pah tu kàu chhùi-tûn piⁿ, tōa-la̍t pûn--lòe: “Thián-tho̍h-bì! Thián-tho̍h-bì! Thián-tho̍h-bì!” Chiah leh pûn thâu 1 ê im ê niā-niā, siâⁿ-pó ùi i hai-tāi ê tē-ki kàu chhù-bóe-téng lóng khai-sí chùn, ah i hit ê sió-chat to iáu-bē pûn kah soah, kū-jîn kah su̍t-sū to̍h teh kā kā-tī ê tōa-thâu-bó, chhoah ka-tī ê thâu-mn̂g, in chai-iáⁿ beh kiat-sok--ah, in bô hoat-tō͘ koh chò-pháiⁿ--ah. M̄-koh kū-jîn koh siūⁿ beh chiàn khòaⁿ-māi--leh, to̍h kā kùn-á giâ khí-lâi beh pó-hō͘ ka-tī; Jia̍k chŏaⁿ gia̍h tāi-le̍k-kiàm khoài-chia̍t 1 kiàm phut--kòe, to̍h kā kū-jîn ê thâu chám--lo̍h-lâi, tong-jiân i koh-lâi kāng-khoán beh án-ne chhú-lí hit ê su̍t-sū, m̄-koh hit ê su̍t-sū sī 1 ê nńg-kha-hê, i kiò 1 káng kńg-lê-á-hong, kā i ka-tī ká khì thiⁿ-téng, koh-lâi to̍h bô lâng bat khòaⁿ--kòe-i a̍h-sī thiaⁿ-kòe i ê siau-sit--ah. He hoat-su̍t chū án-ne to̍h bia̍t-bô, só͘-ū khì hông piàn-chò chiáu-á, iá-siù, ku chôa tō͘-tēng kah thâng-thōa ê ióng-kám khí-sū kah bí-lē siok-lú lóng koh piàn tńg-lâi goân-hêng, kong-chiok ê cha-bó͘-kiáⁿ mā kāng-khoán, i ùi 1 chiah pe̍h-sek ê lo̍k-á-bó piàn tńg-lâi ji̍t-thâu-ē siāng súi ê siàu-lú.Chia ê tāi-chì chiah tú hoat-seng, kui tòng siâⁿ-pó to̍h tī 1 chūn bông-bū--ni̍h siau-sit, bô--khì, mā chū hit sî khí, kū-jîn to̍h ùi chit tè thó͘-tē--ni̍h oân-choân bô--khì-ah. Só͘-pái, to̍h tī Jia̍k kā Ga-li-gián-thòa ê thâu, kah só͘-ū i kái-tû hoat-su̍t kái-kiù--chhut-lâi ê kùi-cho̍k kah siok-lú hiàn hō͘ Ông Á-sò liáu-āu, i hoat-kiàn kóng, ka-tī í-keng bô siáⁿ-mih tāi-chì thang-hó chò--ah. M̄-koh, ūi-tio̍h beh chióng-lē i kòe-khì ê chē-chē kong-lô, Ông Á-sò to̍h kā kong-chiok ê cha-bó͘-kiáⁿ chò hō͘ láu-si̍t ê Kū-jîn Sat-chhiú Jia̍k. Bóe-āu in 2 ê to̍h kiat-hun--a, in pān hun-lé ê sî choân-kok lóng lāu-jia̍t-kún-kún hoaⁿ-hí-tang-tang. Ông koh siúⁿ-sù Jia̍k 1 tòng ko-sióng ê siâⁿ-pó kah sio̍k tī siâⁿ-pó ê lè-táu ê chhân-hn̂g, liáu-āu, Jia̍k kah i ê hu-jîn koh ū in ê kiáⁿ-jî, to̍h tī hia kòe tio̍h hēng-hok koh boán-chiok, it-ti̍t kàu in ba̍k-chiu kheh-kheh hit ji̍t. --Hosting provided by SoundOn
-
【英國Gín-á古】巨人殺手Jia̍k 第4 Pha︱Jack the Giant Killer Part 4 原作︱Flora Annie Steel 翻譯︱蔡逸民 BuLuhSuh／柯王炳勳 Bí-leng 講古／校對︱蔡逸民 BuLuhSuh 配樂︱陳曉怡 Niau-tāu 人聲編輯︱柯王炳勳 Bí-leng 字幕︱林于真 A-chin 圖︱AI製圖 影片︱陳姿樺 Ko͘-chiáu 訂閱做工á人Youtube頻道：https://www.youtube.com/@chokangalang 完整ê英文／漢羅／POJ對照文稿khǹg ti官方網站：https://cho-kang-a-lang.github.io/ 漢羅全文： IV Tī hit ê時代，騎士in lóng四界teh走chhōe冒險ê機會，王Á-sò ê孤kiáⁿ，是1 ê有夠勇敢ê王子，伊去拜托in老爸hō͘伊1大條錢，thang hō͘伊起程去Óe-o̍͘h-suh，解救1 ê去hō͘ 7 ê邪靈附身ê美麗女士。王án-chóaⁿ ka拒絕lóng無彩工，尾--á有落軟，王子to̍h牽2隻馬á起行--ā，1隻是ka-tī beh騎，1隻是載kui載ê金幣。經過幾工á ê旅行了後，王子人來到1 ê因為結市興--起-來ê庄，庄--ni̍h tng-teh反嘩。伊去問講是án-chóaⁿ ē án-ne，人ka講，有1 ê在生ê時真慷慨ê人，伊ê死體tī beh扛去tâi ê路--ni̍h hông扣押，講是因為伊在生ê時，koh欠債主kài chē錢無還。 「Chit條法律有影酷刑。」少年ê王子án-ne講，koh講：「去--lah，去kā往生ê人安土，chiah叫hia ê債主來我tòa ê所在，伊欠--ê，我chhē。」 Só͘-pái，hit kóa債主to̍h lóng來--ā，m̄-koh債主實在是siuⁿ chē，到beh暗á，王子手頭總--ê共--ê soah chhun 2 sián，已經無才調koh繼續旅行--ā。 Tú好巨人殺手Jia̍k mā tī beh去Óe-o̍͘h-suh ê路--ni̍h經過chit庄，有聽tio̍h王子tú-tio̍h困難，mā去hō͘王子ê善良kah慷慨感動，決心beh做王子ê跟人。In 2 ê sûi講sûi鬥tah，隔轉工ê透早，Jia̍k kā siàu la̍p了，tú好kui seng-khu khêng kah ta-ta-ta，sòa--lòe，in to̍h做夥chiūⁿ路。M̄-koh to̍h tī in beh離開庄頭ê時，有1 ê老阿婆jiok tī王子ê kha-chiah後hoah講：「Ài公道！Ài正義！Hit ê往生--ê 7冬以來mā欠我2 sián錢neh。你to̍h ài親像你對待別人án-ne，kā錢還--我。」 Ah che王子to̍h是好心koh慷慨，伊kā手chhun入去伊ê lak袋á，kā伊siōng尾ê 2 sián錢mā jîm hō͘老阿婆。Taⁿ，in 2 ê人連半sián錢to無--ā，tī日頭jú來jú低，beh暗á ê時，王子講： 「Jia̍k！Kah咱2 ê lóng袋磅子--ah，咱beh án-chóaⁿ chhōe所在過暝？」 Jia̍k ìn講：「主人，安--lah，咱一定有才調應付。離chia 2，3英里ê所在，有1 ê大叢koh恐怖ê 3粒頭巨人tòa tī hia，伊ē-tàng kah 400 ê穿戰甲ê兵á sio戰，koh ē-tàng kā in phah kah bē輸米糠隨風iāⁿ-iāⁿ飛。」 「Ah án-ne是對咱有啥物好處？」王子講了koh繼續問講：「伊soah bē 1嘴to̍h kā咱2 ê pō͘ kah碎鹽鹽？」 「Bē--lah。」Jia̍k笑笑á ka ìn，koh講：「我先去--lah，路我來替你開。Ta̍k-ê lóng講chit ê巨人是1 ê giàn頭。凡勢我ē-tàng處理--ê，ē比我本底想--ê koh khah chē。」 Só͘-pái王子to̍h留tī本底ê所在，Jia̍k是kā伊馬á ê速度chhui kah盡磅，直透到巨人ê城堡，伊kā城堡ê大門lòng kah pìn-piàng叫有夠大聲，大聲kah連附近ê山脈to teh īn。 巨人聽--tio̍h，bē輸teh tân雷公án-ne phngh講： 「是siáng？」 Jia̍k ê膽khah大leh飯khaⁿ，ìn講：「Koh有siáng？你苦憐ê表細--ê，Jia̍k--lah。」 「表細--ê，Jia̍k！」巨人chhoah-1-tiô，koh問講：「我苦憐ê表細--ê Jia̍k，你有啥消息beh講？」Aih，你ka看，che巨人koh有影tio̍h驚--a neh，só͘-pái Jia̍k ûn-ná mā to̍h趕緊ka an-tah。 「表大--ê，沉重ê消息--lah！Ah！天公伯--á！」 「沉重ê消息--喔？」巨人心內驚驚，ná ka-lēng順Jia̍k ê話尾ìn，koh講：「天公伯--á掛保證，Bē有啥沉重ê消息beh來chhōe--我-lah。我kám m̄是有3粒頭？我kám m̄是ē-tàng 1人釘500 ê穿戰甲ê勇士？我kám m̄是ē-tàng kā in phah kah bē輸米糠隨風iāⁿ-iāⁿ飛？」 「無錯！Kui叢好好！」狡khiat ê Jia̍k án-ne ìn，koh講：「M̄-koh我是beh來kā你警告講，hit ê偉大ê王Á-sò in kiáⁿ，chhōa 1000 ê穿戰甲ê勇士，tng teh ùi chia來beh hō͘你死！」 聽到chia來，巨人驚kah gi̍h-gi̍h-chùn，phi̍h-phi̍h-chhoah。「Ah！表細--ê Jia̍k！好心ê表細--ê Jia̍k！Che有影是歹消息--lah！」Koh講：「緊kă講，我ài án-chóaⁿ做？」 「你bih去地陷，」狡khiat ê Jia̍k接leh講：「sòa--lòe，我ē kā門鎖--khài，koh kā門閂chhòaⁿ kah ăn-ân，鎖匙我ē隨身保管，一直到王子離開。Án-ne to̍h保証你安全。」 來he巨人hiong-hiong狂狂走入去地陷，Jia̍k to̍h鎖門，chhòaⁿ門，kā巨人關tiâu-tiâu。確定tāi-chì lóng妥當了後，Jia̍k to̍h去kā伊ê主人接--過-來，2 ê人歡喜樂暢去享受本底巨人chhoân好beh食ê暗頓，ah hit ê悲慘ê怪物--leh，猶原tī地陷--ni̍h驚kah gi̍h-gi̍h-chùn，phi̍h-phi̍h-chhoah。 To̍h án-ne，好好á歇1暝了後，Jia̍k透早to̍h去kā伊ê主人叫--起-來，koh ùi巨人ê寶庫內底the̍h bē少ê黃金白銀，kā伊ê錢袋á袋kah tīⁿ-tīⁿ，吩咐主人tio̍h ài先起程向前騎3英里ê遠。Tī Jia̍k確定巨人已經鼻bē tio̍h王子ê味了後，伊to̍h the̍h鎖匙kā伊ê犯人放--出-來。巨人身軀tâm-lok-lok，寒kah半小死，m̄-koh伊mā是有夠感謝Jia̍k án-ne來救伊kah伊ê城堡，伊拜托Jia̍k to̍h ài kā伊講，ài hō͘伊啥物貨做報賞，khah án-chóaⁿ講，Jia̍k mā應該ài得tio̍h chit ê報賞。 「真正免細jī--lah，」Jia̍k án-ne ka ìn，soah m̄知影伊ê目色一直lóng真好，to̍h講：「我kan-na想beh ài khǹg tī你眠床頭ê hit領舊裘á kah帽á，koh有hit kháu seⁿ-sian-liù-phí ê舊劍hâm hit雙su-lí-pah to̍h ē-sái。」 巨人聽伊講了，thó͘ 1口大氣，頭hàiⁿ-hàiⁿ--leh講：「你m̄知影你teh討--ê是啥物，」koh講：「he是我手頭siāng要緊ê物，m̄-koh我to̍h承諾--ah，你to̍h應當the̍h。He裘á ē kā你變無khoàiⁿ，帽á ē kā你想beh知--ê lóng講hō͘你知，hit kháu劍nā phut--lòe啥to̍h ài斷，su-lí-pah是不管你想beh去toe̍h，目nih-á伊to̍h ē chhōa你kah到。」 Jia̍k thiòng kah kiōng-beh peh起來跳，伊kā裘á，帽á，劍kah su-lí-pah chah-chah--leh，to̍h騎馬離開，kài緊to̍h jiok tio̍h伊ê主人。In to̍h做陣騎到城堡，hit棟王子beh走chhōe ê美麗女士所tòa ê城堡。 To̍h算講是去hō͘ 7 ê惡魔附身，chit ê女士猶原是有夠súi--ê。伊聽tio̍h王子想beh jiok--伊ê時，伊笑笑--á，吩咐講ài準備phang-phài ê酒桌kā王子落馬洗塵。伊坐tī王子ê正手pêng，直直ka伺候好酒好菜。 酒筵結束ê時，伊the̍h ka-tī ê手巾á，好禮á kā王子ê嘴chhit-chhit--leh，koh笑--1-ē，講： 「王子大人，我有1 ê任務ài交帶hō͘--你！你mî-á-chài早起一定ài kā chit條手巾á the̍h hō͘我看，nā無你ê頭to̍h ē無--去。」 Sòa--lòe，伊to̍h kā手巾á seh入去伊胸前，講：「晚安！」 王子感覺無望--ā，m̄-koh Jia̍k siáⁿ to無講，to̍h án-ne一直到伊ê主人去睏。Sòa--lòe，伊to̍h kā ùi巨人hia the̍h--tio̍h ê舊帽á tì--起-來，o͘h！Chiah 1目sut-á，伊想beh知--ê to̍h lóng知--a。Só͘-pái，tī 三更暝半，hit ê美麗ê女士召喚其中1 ê伊熟似ê邪靈chhōa伊去Lú-so̍h-fò hia ê時，Jia̍k to̍h緊伊1步，kā伊ê隱身裘á kah緊猛su-lí-pah穿--leh，kah女士siâng時到tè。Koh來女士to̍h kā手巾á交hō͘惡魔，吩咐惡魔to̍h ài ka顧ho͘好，等到惡魔kā手巾á khǹg去1 ê koân格á téng ê時，Jia̍k sûi to̍h跳--起-來，1-ē手to̍h kā手巾á剪--去-ah！ Só͘-pái隔轉工早起，tī hit ê去hō͘魔法迷--去ê美麗女士期待beh看tio̍h王子失神喪志ê時，王子soah kan-na真文理kā伊鞠躬， 來to̍h kā手巾á獻起lih hō͘--伊。 Chhím頭伊實在有夠失望，m̄-koh， tī hit日khah òaⁿ ê時，伊to̍h吩咐ài辦1場koh khah phang-phài ê筵席。Chit遍，酒桌soah ê時，伊嘴tú嘴kā王子khì-suh--落-去，koh講： 「心愛--ê，我有1 ê任務beh交帶hō͘--你。Mî-á-chài早起ài hō͘我看tio̍h我kim暗siāng尾á khì-suh--過ê嘴唇，nā無你ê頭to̍h ē無--去。」 Chit時，王子已經是愛--著khah慘死，溫柔kā伊ìn講：「Nā準講你kan-na beh chim我1 ê，我o.k.。」Sui-bóng講，chit ê美麗ê女士去hō͘ 7 ê邪靈附身，伊mā ûn-ná看有王子實在是1 ê有夠緣投ê少年家；伊chŏaⁿ面á hoán紅紅，ìn講： 「He m̄是重點。重點是你決定ài hō͘我看，nā無你to̍h註該ài死--ah。」 Sòa--lòe王子to̍h kah進前kāng款，憂頭kat面去睏--ah；m̄-koh Jia̍k kā khiáu帽á tì--起-來，sûi to̍h koh知影伊想beh了解ê一切。 Só͘-pái，to̍h tī暝深人聲斷，hit ê美麗ê女士召喚伊熟似ê邪靈chhōa伊去chhōe Lú-so̍h-fò ê時陣，Jia̍k kā伊ê隱身裘á kah緊猛su-lí-pah穿--起-來，早伊1脚步到位。 美麗ê女士目頭結結kā Lú-so̍h-fò講：「你已經辜負我1遍--ah，kā我ê手巾á放kah ho͘無--去。Taⁿ，我beh交帶1項無人ē-tàng偷the̍h ê物件hō͘--你，án-ne我to̍h ē-tàng贏hit ê王子，to̍h算講伊是王ê kiáⁿ mā kāng款。」 來，伊to̍h對hit隻顧人怨ê惡魔ê嘴唇chhân-chhân ka chim--落-去，人to̍h離開。Ah Jia̍k chŏaⁿ用hit支seⁿ-sian-liù-phí ê大力劍，1 ē to̍h kā Lú-so̍h-fò ê頭phut--落-來，chhàng tī伊ê隱身裘á內底，the̍h轉去hō͘伊ê主人。 隔工早起，美麗ê女士迷人ê目睭眼神帶歹意，要求王子ài hō͘伊看伊siāng尾á chim ê嘴唇ê時，王子to̍h手la̍k惡魔ê角kā頭giú--出-來。Koh來，附身tī女士seng-khu頂ê 7 ê邪靈，ki 7聲恐怖ê聲了後to̍h離開--伊。自án-ne算制煞--ah，伊koh變轉去伊本底十全ê美貌kah溫純。 To̍h án-ne，翻轉工早起伊kah王子2人to̍h成親。了後，in做夥轉去王Á-sò ê王宮，ah咱ê巨人殺手Jia̍k，因為伊chē-chē ê功勞，to̍h去hông封做其中1位圓桌武士--ā。 Pe̍h-ōe-jī choân-bûn: IV Tī hit ê sî-tāi, khî-sū in lóng sì-kè teh cháu-chhōe mō͘-hiám ê ki-hōe, Ông Á-sò ê ko͘-kiáⁿ, sī 1 ê ū-kàu ióng-kám ê Ông-chú, i khì pài-thok in lāu-pē hō͘ i 1 tōa tiâu chîⁿ, thang hō͘ i khí-thêng khì Óe-o̍͘h-suh, kái-kiù 1 ê khì hō͘ 7 ê siâ-lêng hù-sin ê bí-lē lú-sū. Ông án-chóaⁿ ka kū-choa̍t lóng bô-chhái-kang, bóe--á ū lo̍h-nńg, Ông-chú to̍h khan 2 chiah bé-á khí-kiâⁿ--ā, 1 chiah sī ka-tī beh khiâ, 1 chiah sī chài kui chài ê kim-pè. Keng-kòe kúi kang-á ê lú-hêng liáu-āu, Ông-chú lâng lâi kàu 1 ê in-ūi kiat-chhī heng--khí-lâi ê chng, chng--ni̍h tng-teh hoán-hōa. I khì mn̄g kóng sī án-chóaⁿ ē án-ne, lâng ka kóng, ū 1 ê chāi-seⁿ ê sî chin khóng-khài ê lâng, i ê sí-thé tī beh kng khì tâi ê lō͘--ni̍h hông khàu-ah, kóng sī in-ūi i chāi-seⁿ ê sî, koh khiàm chè-chú kài chē chîⁿ bô hêng. “Chit tiâu hoat-lu̍t ū-iáⁿ khok-hêng.” Siàu-liân ê Ông-chú án-ne kóng, koh kóng: “Khì--lah, khì kā óng-seng ê lâng an-thó͘, chiah kiò hia ê chè-chú lâi góa tòa ê só͘-chāi, i khiàm--ê, góa chhē.” Só͘-pái, hit kóa chè-chú to̍h lóng lâi--ah, m̄-koh chè-chú si̍t-chāi sī siuⁿ chē, kàu beh-àm-á, Ông-chú chhiú-thâu chóng--ê kiōng--ê soah chhun 2 sián, í-keng bô châi-tiāu koh kè-sio̍k lú-hêng--ā. Tú-hó Kū-jîn Sat-chhiú Jia̍k mā tī beh khì Óe-o̍͘h-suh ê lō͘--ni̍h keng-kòe chit chng, ū thiaⁿ tio̍h Ông-chú tú-tio̍h khùn-lân, mā khì hō͘ Ông-chú ê siān-liông kah khóng-khài kám-tōng, koat-sim beh chò Ông-chú ê kin-lâng. In 2 ê sûi káng sûi tàu-tah, keh-tńg-kang ê thàu-chá, Jia̍k kā siàu la̍p liáu, tú-hó kui seng-khu khêng kah ta-ta-ta, sòa--lòe, in to̍h chò-hóe chiūⁿ-lō͘. M̄-koh to̍h tī in beh lī-khui chng-thâu ê sî, ū 1 ê lāu a-pô jiok tī Ông-chú ê kha-chiah āu hoah kóng: “Ài kong-tō! Ài chèng-gī! Hit ê óng-seng--ê 7 tang í-lâi mā khiàm góa 2 sián chîⁿ neh. Lí to̍h ài chhin-chhiūⁿ lí tùi-thāi pa̍t-lâng án-ne, kā chîⁿ hêng--góa.” Ah che Ông-chú to̍h sī hó-sim koh khóng-khài, i kā chhiú chhun ji̍p-khì i ê lak-tē-á, kā i siōng-bóe ê 2 sián chîⁿ mā jîm hō͘ lāu a-pô. Taⁿ, in 2 ê lâng liân pòaⁿ sián chîⁿ to bô--ā, tī ji̍t-thâu jú lâi jú kē, beh-àm-á ê sî, Ông-chú kóng: “Jia̍k! Kah lán 2 ê lóng tē-pōng-chí--ah, lán beh án-chóaⁿ chhōe só͘-chāi kòe-mê?” Jia̍k ìn kóng: “Chú-lâng, an--lah, lán it-tēng ū châi-tiāu èng-hù. Lī chia 2, 3 eng-lí ê só͘-chāi, ū 1 ê tōa-châng koh khióng-pò͘ ê 3 lia̍p thâu kū-jîn tòa tī hia, i ē-tàng kah 400 ê chhēng chiàn-kah ê peng-á sio-chiàn, koh ē-tàng kā in phah kah bē-su bí-khng sûi hong iāⁿ-iāⁿ-poe.” “Ah án-ne sī tùi lán ū siáⁿ-mih hó-chhù?” Ông-chú kóng liáu koh kè-sio̍k mn̄g kóng: “I soah bē 1 chhùi to̍h kā lán 2 ê pō͘ kah chhùi-iâm-iâm?” “Bē--lah.” Jia̍k chhiò-chhiò-á ka ìn, koh kóng: “Góa seng khì--lah, lō͘ góa lâi thè lí khui. Ta̍k-ê lóng kóng chit ê kū-jîn sī 1 ê giàn-thâu. Hoān-sè góa ē-tàng chhú-lí--ê, ē pí góa pún-té siūⁿ--ê koh-khah chē.” Só͘-pái Ông-chú to̍h lâu tī pún-té ê só͘-chāi, Jia̍k sī kā i bé-á ê sok-tō͘ chhui kah chīn-pōng, ti̍t-thàu kàu kū-jîn ê siâⁿ-pó, i kā siâⁿ-pó ê tōa-mn̂g lòng kah pìn-piàng-kiò ū-kàu tōa-siaⁿ, tōa-siaⁿ kah liân hù-kīn ê soaⁿ-me̍h to teh īn. Kū-jîn thiaⁿ--tio̍h, bē-su teh tân-lûi-kong án-ne phngh kóng: “Sī siáng?” Jia̍k ê táⁿ khah-tōa leh pn̄g-khaⁿ, ìn kóng: “Koh ū siáng? Lí khó͘-liân ê piáu-sè--ê, Jia̍k--lah.” “Piáu-sè--ê, Jia̍k!” Kū-jîn chhoah-1-tiô, koh mn̄g kóng: “Góa khó͘-liân ê piáu-sè--ê Jia̍k, lí ū sáⁿ siau-sit beh kóng?” Aih, lí ka khòaⁿ, che kū-jîn koh ū-iáⁿ tio̍h-kiaⁿ--a neh, só͘-pái Jia̍k ûn-ná mā to̍h kóaⁿ-kín ka an-tah. “Piáu-tōa--ê, tîm-tāng ê siau-sit--lah! Ah! Thiⁿ-kong-peh--á!” “Tîm-tāng ê siau-sit--o͘h?” Kū-jîn sim-lāi kiaⁿ-kiaⁿ, ná ka-lēng sūn Jia̍k ê ōe-bóe ìn, koh kóng: “Thiⁿ-kong-peh--á kòa-pó-chèng, bē ū siáⁿ tîm-tāng ê siau-sit beh lâi chhōe--góa-lah. Góa kám m̄ sī ū 3 lia̍p thâu? Góa kám m̄ sī ē-tàng 1 lâng tèng 500 ê chhēng chiàn-kah ê ióng-sū? Góa kám m̄ sī ē-tàng kā in phah kah bē-su bí-khng sûi hong iāⁿ-iāⁿ-poe?” “Bô chhò! Kui châng hó-hó!” Káu-khiat ê Jia̍k án-ne ìn, koh kóng: “M̄-koh góa sī beh lâi kā lí kéng-kò kóng, hit ê úi-tāi ê Ông Á-sò in kiáⁿ, chhōa 1000 ê chhēng chiàn-kah ê ióng-sū, tng teh ùi chia lâi beh hō͘ lí sí!” Thiaⁿ kàu chia lâi, kū-jîn kiaⁿ kah gi̍h-gi̍h-chùn, phi̍h-phi̍h-chhoah. “Ah! Piáu-sè--ê Jia̍k! Hó-sim ê piáu-sè--ê Jia̍k! Che ū-iáⁿ sī pháiⁿ siau-sit--lah!” Koh kóng: “Kín kă kóng, góa ài án-chóaⁿ chò?” “Lí bih khì tē-hām,” Káu-khiat ê Jia̍k chiap leh kóng: “Sòa--lòe, góa ē kā mn̂g só--khài, koh kā mn̂g-chhòaⁿ chhòaⁿ kah ăn-ân, só-sî góa ē sûi-sin pó-koán, it-ti̍t kàu Ông-chú lī-khui. Án-ne to̍h pó-chèng lí an-choân.” Lâi he kū-jîn hiong-hiong-kông-kông cháu ji̍p-khì tē-hām, Jia̍k to̍h só-mn̂g, chhòaⁿ-mn̂g, kā kū-jîn koaiⁿ tiâu-tiâu. Khak-tēng tāi-chì lóng thò-tòng liáu-āu, Jia̍k to̍h khì kā i ê chú-lâng chiap--kòe-lâi, 2 ê lâng hoaⁿ-hí-lo̍k-thiòng khì hiáng-siū pún-té kū-jîn chhoân hó beh chia̍h ê àm-tǹg, ah hit ê pi-chhám ê koài-bu̍t--leh, iû-goân tī tē-hām--ni̍h kiaⁿ kah gi̍h-gi̍h-chùn, phi̍h-phi̍h-chhoah. To̍h án-ne, hó-hó-á hioh 1 mê liáu-āu, Jia̍k thàu-chá to̍h khì kā i ê chú-lâng kiò--khí-lâi, koh ùi kū-jîn ê pó-khò͘ lāi-té the̍h bē chió ê n̂g-kim pe̍h-gîn, kā i ê chîⁿ-tē-á tē kah tīⁿ-tīⁿ, hoan-hù chú-lâng tio̍h ài seng khí-thêng hiòng-chêng khiâ 3 eng-lí ê hn̄g. Tī Jia̍k khak-tēng kū-jîn í-keng phīⁿ bē tio̍h Ông-chú ê bī liáu-āu, i to̍h the̍h só-sî kā i ê hoān-lâng pàng--chhut-lâi. Kū-jîn seng-khu tâm-lok-lok, kôaⁿ kah pòaⁿ-sió-sí, m̄-koh i mā sī ū-kàu kám-siā Jia̍k án-ne lâi kiù i kah i ê siâⁿ-pó, i pài-thok Jia̍k to̍h ài kā i kóng, ài hō͘ i siáⁿ-mih-hòe chò pò-siúⁿ, khah án-chóaⁿ kóng, Jia̍k mā èng-kai ài tit-tio̍h chit ê pò-siúⁿ. “Chin-chiàⁿ bián sè-jī--lah,” Jia̍k án-ne ka ìn, soah m̄ chai-iáⁿ i ê ba̍k-sek it-ti̍t lóng chin hó, to̍h kóng: “Góa kan-na siūⁿ-beh ài khǹg tī lí bîn-chhn̂g-thâu ê hit niá kū hiû-á kah bō-á, koh ū hit kháu seⁿ-sian-liù-phí ê kū kiàm hâm hit siang su-lí-pah to̍h ē-sái.” Kū-jîn thiaⁿ i kóng liáu, thó͘ 1 kháu tōa-khùi, thâu hàiⁿ-hàiⁿ--leh kóng: “Lí m̄ chai-iáⁿ lí teh thó--ê sī siáⁿ-mi̍h,” koh kóng: “He sī góa chhiú-thâu siāng iàu-kín ê mi̍h, m̄-koh góa to̍h sêng-lo̍k--ah, lí to̍h èng-tong the̍h. He hiû-á ē kā lí piàn bô-khoàiⁿ, bō-á ē kā lí siūⁿ-beh chai--ê lóng kóng hō͘ lí chai, hit kháu kiàm nā phut--lòe siáⁿ to̍h ài tn̄g, su-lí-pah sī put-koán lí siūⁿ-beh khì toe̍h, ba̍k-nih-á i to̍h ē chhōa lí kah kàu.” Jia̍k thiòng kah kiōng-beh peh khí-lâi thiàu, i kā hiû-á, bō-á, kiàm kah su-lí-pah chah-chah--leh, to̍h khiâ bé lī-khui, kài kín to̍h jiok tio̍h i ê chú-lâng. In to̍h chò-tīn khiâ kàu siâⁿ-pó, hit tòng Ông-chú beh cháu-chhōe ê bí-lē lú-sū só͘ tòa ê siâⁿ-pó. To̍h sǹg-kóng sī khì hō͘ 7 ê ok-mô͘ hù-sin, chit ê lú-sū iû-goân sī ū-kàu súi--ê. I thiaⁿ tio̍h Ông-chú siūⁿ-beh jiok--i ê sî, i chhiò-chhiò--á, hoan-hù kóng ài chún-pī phang-phài ê chiú-toh kā Ông-chú lo̍h-bé sé-tîn. I chē tī Ông-chú ê chiàⁿ-chhiú-pêng, ti̍t-ti̍t ka su-hāu hó chiú hó chhài. Chiú-iân kiat-sok ê sî, i the̍h ka-tī ê chhiú-kin-á, hó-lé-á kā Ông-chú ê chhùi chhit-chhit--leh, koh chhiò--1-ē, kóng: “Ông-chú tāi-jîn, góa ū 1 ê jīm-bū ài kau-tài hō͘--lí! Lí mî-á-chài chái-khí it-tēng ài kā chit tiâu chhiú-kin-á the̍h hō͘ góa khòaⁿ, nā bô lí ê thâu to̍h ē bô--khì.” Sòa--lòe, i to̍h kā chhiú-kin-á seh ji̍p-khì i heng-chêng, kóng: “Boán-an!” Ông-chú kám-kak bô-bāng--ā, m̄-koh Jia̍k siáⁿ to bô kóng, to̍h án-ne it-ti̍t kàu i ê chú-lâng khì khùn. Sòa--lòe, i to̍h kā ùi kū-jîn hia the̍h--tio̍h ê kū bō-á tì--khí-lâi, o͘h! Chiah 1-ba̍k-sut-á, i siūⁿ-beh chai--ê to̍h lóng chai--a. Só͘-pái, tī saⁿ-keⁿ-mî-pòaⁿ, hit ê bí-lē ê lú-sū tiàu-hoàn kî-tiong 1 ê i se̍k-sāi ê siâ-lêng chhōa i khì Lú-so̍h-fò hia ê sî, Jia̍k to̍h kín i 1 pō͘, kā i ê ún-sin hiû-á kah kín-mé su-lí-pah chhēng--leh, kah lú-sū siâng-sî kàu tè. Koh-lâi lú-sū to̍h kā chhiú-kin-á kau hō͘ ok-mô͘, hoan-hù ok-mô͘ to̍h ài ka kò͘ ho͘ hó, tán kàu ok-mô͘ kā chhiú-kin-á khǹg khì 1 ê koân keh-á téng ê sî, Jia̍k sûi to̍h thiàu--khí-lâi, 1-ē-chhiú to̍h kā chhiú-kin-á chián--khì-ah! Só͘-pái keh-tńg-kang chái-khí, tī hit ê khì hō͘ mô͘-hoat bê--khì ê bí-lē lú-sū kî-thāi beh khòaⁿ tio̍h Ông-chú sit-sîn-sòng-chì ê sî, Ông-chú soah kan-na chin bûn-lí kā i kiok-kiong, lâi to̍h kā chhiú-kin-á hiàn khí-lih hō͘--i. Chhím-thâu i si̍t-chāi ū-kàu sit-bōng, m̄-koh, tī hit ji̍t khah òaⁿ ê sî, i to̍h hoan-hù ài pān 1 tiûⁿ koh khah phang-phài ê iân-sia̍h. Chit piàn, chiú-toh soah ê sî, i chhùi-tú-chhùi kā Ông-chú khì-suh--lo̍h-khì, koh kóng: “Sim-ài--ê, góa ū 1 ê jīm-bū beh kau-tài hō͘--lí. Mî-á-chài chái-khí ài hō͘ góa khòaⁿ-tio̍h góa kim-àm siāng-bóe-á khì-suh--kòe ê chhùi-tûn, nā bô lí ê thâu to̍h ē bô--khì.” Chit sî, Ông-chú í-keng sī ài--tio̍h khah chhám sí, un-jiû kā i ìn kóng: “Nā chún-kóng lí kan-na beh chim góa 1 ê, góa o.k..” Sui-bóng kóng, chit ê bí-lē ê lú-sū khì hō͘ 7 ê siâ-lêng hù-sin, i mā ûn-ná khòaⁿ-ū Ông-chú si̍t-chāi sī 1 ê ū-kàu iân-tâu ê siàu-liân-ke; i chŏaⁿ bīn-á hoán âng-âng, ìn kóng: “He m̄ sī tiōng-tiám. Tiōng-tiám sī lí koat-tēng ài hō͘ góa khòaⁿ, nā bô lí to̍h chù-kai ài sí--ah.” Sòa--lòe Ông-chú to̍h kah chìn-chêng kāng-khoán, iu-thâu-kat-bīn khì khùn--ah; m̄-koh Jia̍k kā khiáu bō-á tì--khí-lâi, sûi to̍h koh chai-iáⁿ i siūⁿ-beh liáu-kái ê it-chhè. Só͘-pái, to̍h tī mê-chhim lâng siaⁿ tn̄g, hit ê bí-lē ê lú-sū tiàu-hoàn i se̍k-sāi ê siâ-lêng chhōa i khì chhōe Lú-so̍h-fò ê sî-chūn, Jia̍k kā i ê ún-sin hiû-á kah kín-mé su-lí-pah chhēng--khí-lâi, chá i 1 kha-pō͘ kàu ūi. Bí-lē ê lú-sū ba̍k-thâu kat-kat kā Lú-so̍h-fò kóng: “Lí í-keng ko͘-hū góa 1 piàn--ah, kā góa ê chhiú-kin-á pàng kah ho͘ bô--khì. Taⁿ, góa beh kau-tài 1 hāng bô-lâng ē-tàng thau the̍h ê mi̍h-kiāⁿ hō͘--lí, án-ne góa to̍h ē-tàng iâⁿ hit ê Ông-chú, to̍h sǹg-kóng i sī Ông ê kiáⁿ mā kāng-khoán.” Lâi, i to̍h tùi hit chiah kò͘-lâng-oàn ê ok-mô͘ ê chhùi-tûn chhân-chhân ka chim--lo̍h-khì, lâng to̍h lī-khui. Ah Jia̍k chŏaⁿ iōng hit ki seⁿ-sian-liù-phí ê tāi-le̍k kiàm, 1-ē to̍h kā Lú-so̍h-fò ê thâu phut--lo̍h-lâi, chhàng tī i ê ún-sin hiû-á lāi-té, the̍h tńg-khì ho͘ i ê chú-lâng. Keh-kang chái-khí, bí-lē ê lú-sū bê-lâng ê ba̍k-chiu gán-sîn tài pháiⁿ-ì, iau-kiû Ông-chú ài ho͘ i khòaⁿ i siāng-bóe-á chim ê chhùi-tûn ê sî, Ông-chú to̍h chhiú la̍k ok-mô͘ ê kak kā thâu giú--chhut-lâi. Koh-lâi, hù-sin tī lú-sū seng-khu téng ê 7 ê siâ-lêng, ki 7 siaⁿ khióng-pò͘ ê siaⁿ liáu-āu to̍h lī-khui--i. Chū án-ne sǹg chè-soah--ah, i koh piàn tńg-khì i pún-té cha̍p-chn̂g ê bí-māu kah un-sûn. To̍h án-ne, hoan-tńg-kang chái-khí i kah Ông-chú 2 lâng to̍h sêng-chhin. Liáu-āu, in chò-hóe tńg-khì Ông Á-sò ê ông-kiong, ah lán ê Kū-jîn Sat-chhiú Jia̍k, in-ūi i chē-chē ê kong-lô, to̍h khì hông hong chò kî-tiong 1 ūi Îⁿ-toh Bú-sū--ā. --Hosting provided by SoundOn
-
【英國Gín-á古】巨人殺手Jia̍k 第1-3 Pha︱Jack the Giant Killer Part 1-3 原作︱Flora Annie Steel 翻譯︱蔡逸民 BuLuhSuh／柯王炳勳 Bí-leng 講古／校對︱蔡逸民 BuLuhSuh 配樂︱陳曉怡 Niau-tāu 人聲編輯︱柯王炳勳 Bí-leng 字幕︱林于真 A-chin 圖︱AI製圖 影片︱陳姿樺 Ko͘-chiáu 訂閱做工á人Youtube頻道：https://www.youtube.com/@chokangalang 完整ê英文／漢羅／POJ對照文稿khǹg ti官方網站：https://cho-kang-a-lang.github.io/ 漢羅全文： I Tī了不起ê王Á-sò，kah伊ê王后Kóe-lo̍h-bī-ò統治ê時，tī Khòng-ò͘附近1 ê叫做土地ê盡尾ê所在，有1 ê作穡人，伊有1 ê孤kiáⁿ號做Jia̍k。Chit ê Jia̍k元氣飽tīⁿ腳手猛lia̍h ，隨時準備好beh chhia-piàⁿ，頭殼活kioh反應緊，無啥人mā無啥tāi-chì ián伊ē倒。 Hit chūn，tī Khòng-ò͘ ê聖Mái-kho͘h山to̍h是巨人ê城堡，hit ê巨人to̍h號做Khó͘-mo̍͘h-liàn。 Chit ê Khó͘-mo̍͘h-liàn足足有1丈koh過8尺hiah koân，伊ê腰身大概á有9尺hiah粗，面á惡khia̍k-khia̍k koh生tio̍h kài恐怖，附近ê庄á頭lóng驚伊驚kah beh死。伊tòa tī he石頭山內底ê 1 ê山洞--ni̍h，伊nā需要食si̍t，to̍h ē liâu過流水去大陸，看tio̍h啥伊to̍h食。不管是好額sàn，便nā聽tio̍h伊hit雙大脚teh liâu水sī-sā叫ê聲，lóng總ē ùi in tau走出去bih--起-來，因為巨人nā看tio̍h人，lia̍h--6-7-ê-á來hang-hang--leh做早頓mā是kài四常ê tāi-chì。事實siōng，伊來搶精牲á lóng搶kui批--ê，1遍kā 6隻大牛犅phāiⁿ tī kha-chiah-phiaⁿ，koh kā羊kah豬掛tī伊ê腰帶，to bē輸kui捆ê蠟條án-ne。Taⁿ chit-lō情形已經幾落冬--a，苦憐ê Khòng-ò͘人lóng真絕望，因為無人ē-tàng kā chit ê巨人Khó͘-mo̍͘h-liàn khăn-jió͘--起-來。 Tú-á好tī 1 ê有開市ê日子，hit時，Jia̍k iáu是1 ê少年家á-thûn niâ，伊發見講kui ê庄á頭因為巨人koh來搶劫，kui ê舞kah天地péng-péng--過。婦人人lóng teh流目屎，cha-po͘人lóng teh chhoh-kàn-kiāu，ah地方ê治安官teh開會看koh來beh án-chóaⁿ。M̄-koh無人有步。Chit時，Jia̍k to̍h歡頭喜面koh興chhih-chhih行去治安官in面頭前，伊人本底to̍h kài有禮貌，伊chŏaⁿ真好禮kā in問講，nā是有人ē-tàng kā巨人Khó͘-mo̍͘h-liàn thâi--死，伊ē有啥物賞。 In ìn講：「巨人山洞內底ê寶。」 Jia̍k koh問講：「Lóng總？」Jia̍k to̍h是ài問kah有1枝柄thang giâ。 In koh ìn講：「Khêng kah chhun siōng尾1-sián錢mā是你ê！」 「Án-ne chit ê穡頭我to̍h ín--ah。」Jia̍k講soah，sûi to̍h開始進行chit項khang-khòe。 Hit時是寒--人，伊去chhōe 1支牛角吹，1支尖嘴掘á，kah 1支土chhiah，tī暗眠摸ê暗頭á去到山--ni̍h，起手khang-khòe，tī天beh phah-phú光進前to̍h kā 1 ê窟á挖好--ah，chit ê窟á，深2丈4尺半，闊mā差不多是án-ne。伊用長長ê幼柴枝á kah草kó kā khang am--leh，koh iā 1沿鬆鬆ê土tī面頂，ho͘看--起-來to̍h親像tēng-tauh ê土脚kāng款。To̍h án-ne，tī天phú-kng ê時，伊tī窟á ê邊--á離巨人ê山洞siāng hn̄g ê所在，khiā kah好勢好勢，老神在在，kā牛角吹tu到嘴唇邊，出全力ka pûn--lòe： 「Thián-tho̍h-bì！Thián-tho̍h-bì！Thián-tho̍h-bì！」 To̍h親像伊去phah狐狸ê時teh做--ê kāng款。 當然--lah，án-ne一定ē kā巨人吵精神，巨人氣kah beh死，chŏaⁿ ùi山洞chông--出-來，1-ē出來到tè，看tio̍h hit ê細隻á ê Jia̍k khiā kah好勢好勢，老神在在teh pûn吹，巨人氣kah kiōng beh piāng--去，sûi to̍h衝過beh hō͘攪擾伊歇睏ê人好看，嘴hoah講：「你chit ê死gín-á脯，敢kā巨人吵--起-來。我ē kā你教講你tī hia teh Thián-tho̍h-bì ē jōa淒慘落魄，我ē kā你lia̍h來kui隻hang-hang--leh做早…。」 伊話chiah tú講到chia，意外to̍h發生--a，伊lak落去khang--ni̍h-ah！摔1-ē有影kài食力，kui lia̍p聖Mái-kho͘h山bē輸lóng teh地動--leh。 Jia̍k是笑kah teh chùn，伊大聲笑講：「Ho͘h-ho͘h，巨人先生，chit-má你ê早頓創kah án-chóaⁿ--ah？你是beh kă sa去烘爐烘a̍h是the̍h去土窯khòng？Kám講nā無苦憐ê細隻Jia̍k你to̍h無mi̍h thang食--ah？Súi ŏ͘！你已經tio̍h吊走無路--ā，你因為為非sám做去hō͘我關--起-來，beh án-chóaⁿ kā你凌治lóng在我歡喜。我chit-má nā有臭--去ê雞卵to̍h好--ah，m̄-koh，chit支ûn-ná bē-bái--lah。」講soah，to̍h kā伊ê尖嘴掘á gia̍h kah koân-koân-koân，使硬力ùi巨人Khó͘-mo̍͘h-liàn ê頭殼頂chhân-chhân ka掘--落-去，當場to̍h ka thâi--死-ah。 Sòa--lòe，Jia̍k tiām-tiām-á kā窟á用土thūn--起-來，to̍h入去山洞chhiau-chhōe，chhōe tio̍h有夠chē金銀財寶。 治安官in聽tio̍h Jia̍k ê大成就了後，宣布講ta̍k ê以後lóng tio̍h ài稱呼伊是： 巨人殺手JIA̍K。 In送Jia̍k 1 kháu寶劍kah 1條腰帶，頂面用金線繡2 chōa字： Thâi死巨人Khó͘-mo̍͘h-liàn Siōng勇敢ê Khòng-ò͘人。 II 當然Jia̍k贏--ā ê消息，真緊to̍h傳kah kui ê英格蘭to通人知，só͘-pái，有另外1 ê tòa tī北pêng，叫做Pu-nńg-tò-pò͘ ê巨人聽tio̍h風聲了後，咒誓講，nā是去ho͘ tú tio̍h Jia̍k，che冤仇伊一定ē討。Chit ê巨人Pu-nńg-tò-pò͘，to̍h是khiā tī稀微ê大樹林中央，hit棟hông咒懺ê城堡ê主人。 Mā真tú好，to̍h差不多tī Jia̍k kā Khó͘-mo̍͘h-liàn thâi--死ê 4個月後，chhiàng-suh chhiàng-suh thang去Óe-o̍͘h-suh旅行，路--ni̍h伊經過chit ê大樹林。伊kiâⁿ kah人siān--ā ê時，tī路邊看tio̍h 1 káng迷人ê水泉，伊to̍h倒落來休息，無jōa久to̍h睏落眠--ā。 現此時，巨人Pu-nńg-tò-pò͘來到鼓井邊beh chhiūⁿ水，看tio̍h Jia̍k tng teh睏，koh看伊腰帶ê繡字to̍h知影講，chit--ê to̍h是名聲thàng京城ê巨人殺手。實在有夠好運，巨人歡喜kah kiōng-beh tio̍h-poa̍h，半聲半to̍h kā Jia̍k扛tī肩胛頭，nǹg過樹林á行轉去hit棟hông咒懺ê城堡。 Jia̍k去hō͘樹oe sā-sā叫ê聲吵精神，伊發見講ka-tī ê性命已經去hō͘巨人la̍k tī手頭，驚kah面青面綠，尾--á，伊去看tio̍h城堡ê門口埕kui土脚lóng是死人骨頭ê時，驚kah尿lóng kiōng-beh siàm--出-來。 「你真緊to̍h ē hâm in lām做夥--ah。」Pu-nńg-tò-pò͘ ná講，ná kā苦憐ê Jia̍k鎖入去城堡大門頂頭ê 1間有夠大間ê房間。這間房間koân-lòng-sòng，thiăn-jió͘有樑thiāu，kan-na有1扇窗á門niâ，看--出-去to̍h是路。Pu-nńg-tò-pò͘ beh去chhōe伊tòa tī kāng 1 phiàn樹林á內ê巨人兄弟，做夥來食chheⁿ-chhau，這時，苦憐ê Jia̍k to̍h hông關tī房間內等。 1-chām-á了後，Jia̍k ùi窗á看tio̍h in 2 ê巨人緊pia̍k-pia̍k，脚步phōng-phōng叫，滿心期待趕beh赴in ê暗頓。 Jia̍k nauh講：「是死是活盡拚to̍h chit tù，sûi to̍h知--a。」因為伊已經想tio̍h 1 ê計畫。伊tī房間ê 1 ê角--á，看tio̍h 2條真粗ê索á。伊kā 2條索á lóng the̍h來結1 ê liù-kho͘絲á，koh kā liù-kho͘絲á hit頭hâⁿ tī窗á外。To̍h tī巨人tng teh開鐵門鎖ê時，Jia̍k趁in無注意，偷偷á kā liù-kho͘絲á套tī in ê頷頸。Sòa--lòe，用緊kah bē輸目1-nih ê速度，kā hit 2條索á pa̍k去樑thiāu頂。Só͘-pái巨人繼續行ê時，liù-kho͘絲á to̍h kā in ê頷頸束kah ân-tòng-tòng，一直到in面lóng反烏。Jia̍k看時機已經到，to̍h ùi索á溜--落-去，長劍poe̍h--出-來，kā 2 ê巨人thâi--死。 Chū án-ne, Jia̍k to̍h kā城堡ê鎖匙the̍h--leh，kā所有ê門lóng開--開，有3 ê美麗ê女士to̍h hō͘伊放--出-來，in隨人ê頭鬃lóng hông pa̍k tiâu--leh走bē去，早to̍h kiōng-beh iau--死-ah。Jia̍k孤脚跪落地，伊to̍h是hiah有禮貌--lah，koh講：「可愛ê女士--ah，che是chit棟hông咒懺ê城堡ê鎖匙，我已經kā巨人Pu-nńg-tò-pò͘ kah伊野蠻ê兄弟消滅--ah，só͘-pái lín mā lóng已經自由。Chit寡鎖匙應該ē-tàng hō͘ lín得tio̍h lín所需要ê物件。」 講soah，伊to̍h起身繼續伊beh去Óe-o̍͘h-suh ê路途--ā。 III 伊用siāng緊ê速度ùi目標--去，凡勢是siuⁿ趕緊，soah行m̄ tio̍h路，天變kah暗so-so，四pêng無人mā無人家。伊滿心期待，四界chhōe路，最後行到1 ê e̍h-e̍h--á ê山谷ê時，看tio̍h 1棟kài大間m̄-koh陰冷陰冷ê厝，孤孤單單khiā tī hia。 伊真ǹg望beh緊chhōe 1 ê所在thang u，to̍h趕緊去ka lòng門。你ē-tàng想像--lah，nā是來ka開門--ê是1 ê生2粒頭ê巨人，Jia̍k ē有jōa緊張koh jōa驚hiâⁿ。M̄-koh，sui-bóng講chit ê巨人生tio̍h惡khia̍k-khia̍k，人soah kài有禮數。事實上，伊是1 ê Óe-o̍͘h-suh巨人，有2 ê面，是雙面人，人kài滑溜，真hèng用虛情假意來對你好thang hâm你交朋友，m̄-koh che to̍h是伊beh奸鬼惡毒做歹tāi ê手段niâ。 伊用真明顯ê Óe-o̍͘h-suh腔口，熱情歡迎Jia̍k來，m̄-nā準備1間睏房beh ho͘睏，koh真親切ka祝福，希望伊ē-tàng歇睏kah sù-sī-sù-sī。M̄-koh，Jia̍k實在是thiám kah過頭--ā，顛倒睏bē好勢，hoan來péng去睏bē落眠ê時，無意中去聽tio̍h主人tī隔壁房間ka-tī teh nga̍uh-nga̍uh唸。Jia̍k ê耳khang chiâⁿ利，有才調聽tio̍h主人teh講siáⁿ，伊講ê話差不多是親像án-ne： 「Sui-bóng你今á暗kah我tòa做夥， m̄-koh你免想講有thang看tio̍h明á載ê日頭jōa mé， 我ê棍á ē kā你ê頭殼hám kah看無腦髓。」 Jia̍k nauh講：「好lí大膽！有夠敢講！」人一下to̍h精神--起-來，koh講：「Tang時á che to̍h是lín Óe-o̍͘h-suh ê奸詭步，tio̍h hoⁿh？M̄-koh chiah看我án-chóaⁿ對付--你-lah。」了後，伊落眠床，kā 1 chat大塊柴kho͘ khǹg tī眠床頂用毯á am--leh，伊ka-tī mā the̍h 1條毯á kā ka-tī moa--leh，chiah bē寒--tio̍h，koh走去tī房間ê角--á，bih kah sù-sī-sù-sī，假做睏kah kôⁿ-kôⁿ叫，to̍h是beh hō͘ Mí-su̍h-thah巨人當做伊已經睏--去-ah。 Koh有影hō͘ Jia̍k料kah準準，過無jōa久，hit ê怪物nih脚尾行--入-來-ah，he脚步to bē輸踏tī雞卵面頂hiah-nī輕，手--ni̍h koh the̍h 1支大支棍á。Sòa--lòe…。 Póng！Póng！Póng！ Jia̍k聽tio̍h眠床去hō͘巨人kòng kah pìn-pòng叫，一直到巨人感覺伊ê人客kui seng-khu ê骨頭lóng已經ho͘ phah到chiâu碎，chiah koh偷偷á離開房間。了後Jia̍k to̍h tiām-tiām-á koh chiūⁿ眠床，kui暝睏kah真好勢！隔轉工早起，巨人看tio̍h Jia̍k精神飽tīⁿ koh kui叢好好ùi樓梯行--落-來ê時，bē輸是去看tio̍h鬼--leh。 「雞母ôe！Nah有可能！」巨人去ho͘驚kah大聲喝--出-來，koh問講：「睏有好勢--無？Cha暗kám lóng無感覺tio̍h啥？」 「喔！」Jia̍k心內暗笑ìn講：「我感覺有1隻niáu鼠á走--來，koh用伊ê尾á kā我sut 2-3 ē。」 巨人聽1 ē目白舌吐，to̍h chhōa Jia̍k去食早起頓，伊phâng 1 ê siāng無ē-tàng té 15 li̍p ê麥á-moâi ê碗，koh要求伊講，hiah有氣魄ê cha-po͘人，應該有法度kā chit碗moâi食了了。咱Jia̍k nā teh四界旅行ê時，伊lóng ē chah 1 kha皮袋á khǹg tī伊ê風幔ē底，thang好té物件；伊sûi to̍h想tio̍h講ē-tàng kā hit kha皮袋á sóa來頭前，kā皮袋á ê嘴正正對tī ē-hâi ē-kha；án-ne，伊teh食moâi ê時，to̍h ē-tàng kā大部分ê moâi lóng倒入去袋á--ni̍h，koh bē hō͘巨人覺察--tio̍h。In to̍h坐落來食飯--ā，巨人是piàⁿ性命食，三嘴做二嘴大嘴吞，ah Jia̍k--leh，伊是tiām-tiām-á kā伊碗內ê moâi變ho͘無--去。 Jia̍k用奸巧ê手段kā moâi食了以後講：「Eh，換我來展1步比你gâu雙倍ê工夫hō͘你看。」講soah，伊to̍h the̍h 1支尖刀 kā伊ê皮袋á liô ho͘破，hin內底ê moâi to̍h lóng lak落去土脚--a！ 「雞母ôe！Nah有可能！」巨人m̄認輸koh大聲hoah講：「Che我mā ē-hiáu lah！」講soah，伊to̍h kā尖刀gia̍h--起-來，kā ka-tī ê腹肚liô--開，sòa--lòe伊to̍h poa̍h倒，死--去。 To̍h án-ne，Jia̍k to̍h免koh hâm chit ê Óe-o̍͘h-suh巨人觸纏--ā。 Pe̍h-ōe-jī choân-bûn: I Tī liáu-put-khí ê Ông Á-sò, kah i ê Ông-hiō Kóe-lo̍h-bī-ò thóng-tī ê sî, tī Khòng-ò͘ hū-kīn 1 ê kiò-chò Thó͘-tē ê Chīn-bóe ê só͘-chāi, ū 1 ê choh-sit-lâng, i ū 1 ê ko͘-kiáⁿ hō-chò Jia̍k. Chit ê Jia̍k goân-khì pá-tīⁿ kha-chhiú mé-lia̍h, sûi-sî chún-pī hó beh chhia-piàⁿ, thâu-khak oa̍h-kioh hoán-èng kín, bô siáⁿ lâng mā bô siáⁿ tāi-chì ián i ē tó. Hit chūn, tī Khòng-ò͘ ê Sèng Mái-kho͘h Soaⁿ to̍h sī kū-jîn ê siâⁿ-pó, hit ê kū-jîn to̍h hō-chò Khó͘-mo̍͘h-liàn. Chit ê Khó͘-mo̍͘h-liàn chiok-chiok ū 1 tn̄g koh kòe 8 chhioh hiah koân, i ê io-sin tāi-khài-á ū 9 chhioh hiah chho͘, bīn-á ok-khia̍k-khia̍k koh seⁿ tio̍h kài khióng-pò͘, hū-kīn ê chng-á-thâu lóng kiaⁿ i kiaⁿ kah beh sí. I tòa tī he chio̍h-thâu soaⁿ lāi-té ê 1 ê soaⁿ-tōng--ni̍h, i nā su-iàu chia̍h-si̍t, to̍h ē liâu kòe lâu-chúi khì tāi-lio̍k, khòaⁿ tio̍h siáⁿ i to̍h chia̍h. Put-koán sī hó-gia̍h-sàn, piān-nā thiaⁿ tio̍h i hit siang tōa kha teh liâu-chúi sī-sā-kiò ê siaⁿ, lóng-chóng ē ùi in tau cháu chhut-khì bih--khí-lâi, in-ūi kū-jîn nā khòaⁿ tio̍h lâng, lia̍h--6-7-ê-á lâi hang-hang--leh chò chá-tǹg mā sī kài sù-siông ê tāi-chì. Sū-si̍t siōng, i lâi chhiúⁿ cheng-seⁿ-á lóng chhiúⁿ kui phoe--ê, 1 piàn kā 6 chiah tōa gû-káng phāiⁿ tī kha-chiah-phiaⁿ, koh kā iûⁿ kah ti kòa tī i ê io-tòa, to bē-su kui khún ê la̍h-tiâu án-ne. Taⁿ chit-lō chêng-hêng í-keng kúi-lo̍h tang--a, khó͘-liân ê Khòng-ò͘ lâng lóng chin choa̍t-bōng, in-ūi bô lâng ē-tàng kā chit ê kū-jîn Khó͘-mo̍͘h-liàn khăn-jió͘--khí-lâi. Tú-á-hó tī 1 ê ū khui-chhī ê ji̍t-chí, hit sî, Jia̍k iáu sī 1 ê siàu-liân-ke-á-thûn niâ, i hoat-kiàn kóng kui ê chng-á-thâu in-ūi kū-jîn koh lâi chhiúⁿ-kiap, kui ê bú kah thiⁿ-tē péng-péng--kòe. Hū-jîn-lâng lóng teh lâu ba̍k-sái, cha-po͘-lâng lóng teh chhoh-kàn-kiāu, ah tē-hng ê tī-an-koaⁿ teh khui-hōe khòaⁿ koh-lâi beh án-chóaⁿ. M̄-koh bô lâng ū pō͘. Chit-sî, Jia̍k to̍h hoaⁿ-thâu-hí-bīn koh hèng-chhih-chhih kiâⁿ khì tī-an-koaⁿ in bīn-thâu-chêng, i lâng pún-té to̍h kài ū lé-māu, i chŏaⁿ chin hó-lé kā in mn̄g kóng, nā sī ū lâng ē-tàng kā kū-jîn Khó͘-mo̍͘h-liàn thâi--sí, i ē ū siáⁿ-mih siúⁿ. In ìn kóng: “Kū-jîn soaⁿ-tōng lāi-té ê pó.” Jia̍k koh mn̄g kóng: “Lóng-chóng?” Jia̍k to̍h sī ài mn̄g kah ū 1 ki pèⁿ thang giâ. In koh ìn kóng: “Khêng kah chhun siōng-bóe 1-sián chîⁿ mā sī lí ê!” “Án-ne chit ê sit-thâu góa to̍h ín--ah.” Jia̍k kóng soah, sûi to̍h khai-sí chìn-hêng chit hāng khang-khòe. Hit sî sī kôaⁿ--lâng, i khì chhōe 1 ki gû-kak-chhoe, 1 ki chiam-chhùi-ku̍t-á, kah 1 ki thô͘-chhiah, tī àm-bîn-bong ê àm-thâu-á khì kàu soaⁿ--ni̍h, khí-chhiú khang-khòe, tī thiⁿ beh phah-phú-kng chìn-chêng to̍h kā 1 ê khut-á ó͘ hó--ah, chit ê khut-á, chhim 2 tn̄g 4 chhioh pòaⁿ, khoah mā chha-put-to sī án-ne. I iōng tn̂g-tn̂g ê iù chhâ-ki-á kah chháu-kó kā khang am--leh, koh iā 1 iân sang-sang ê thô͘ tī bīn-téng, ho͘ khòaⁿ--khí-lâi to̍h chhin-chhiūⁿ tēng-tauh ê thô͘-kha kāng khoán. To̍h án-ne, tī thiⁿ phú-kng ê sî, i tī khut-á ê piⁿ--á lī kū-jîn ê soaⁿ-tōng siāng hn̄g ê só͘-chāi, khiā kah hó-sè hó-sè, lāu-sîn-chāi-chāi, kā gû-kak-chhoe tu kàu chhùi-tûn piⁿ, chhut choân-la̍t ka pûn--lòe: “Thián-tho̍h-bì! Thián-tho̍h-bì! Thián-tho̍h-bì!” To̍h chhin-chhiūⁿ i khì phah hô͘-lî ê sî teh chò--ê kāng-khoán. Tong-jiân--lah, án-ne it-tēng ē kā kū-jîn chhá cheng-sîn, kū-jîn khì kah beh sí, chŏaⁿ ùi soaⁿ-tōng chông--chhut-lâi, 1-ē chhut-lâi kàu-tè, khòaⁿ tio̍h hit ê sè-chiah-á ê Jia̍k khiā kah hó-sè hó-sè, lāu-sîn-chāi-chāi teh pûn-chhoe, kū-jîn khì kah kiōng-beh piāng--khì, sûi to̍h chhiong kòe beh hō͘ kiáu-jiáu i hioh-khùn ê lâng hó-khòaⁿ, chhùi hoah kóng: “Lí chit ê sí-gín-á-pó͘, káⁿ kā kū-jîn chhá--khí-lâi. Góa ē kā lí kà kóng lí tī hia teh Thián-tho̍h-bì ē jōa chhi-chhám-lo̍k-phek, góa ē kā lí lia̍h lâi kui chiah hang-hang--leh chò chá…” I ōe chiah tú kóng kàu chia, ì-gōa to̍h hoat-seng--a, i lak lo̍h-khì khang--ni̍h-ah! Siak 1-ē ū-iáⁿ kài chia̍h-la̍t, kui lia̍p Sèng Mái-kho͘h Soaⁿ bē-su lóng teh tē-tāng--leh. Jia̍k sī chhiò kah teh chùn, i tōa-siaⁿ chhiò kóng: “Ho͘h-ho͘h, kū-jîn sian-siⁿ, chit-má lí ê chá-tǹg chhòng kah án-chóaⁿ--ah? Lí sī beh kă sa khì hang-lô͘ hang a̍h sī the̍h khì thô͘-iô khòng? Kám-kóng nā bô khó͘-liân ê sè-chiah Jia̍k lí to̍h bô mi̍h thang chia̍h--ah? Súi ŏ͘! Lí í-keng tio̍h-tiàu cháu-bô-lō͘--ā, lí in-ūi ûi-hui-sám-chò khì hō͘ góa koaiⁿ--khí-lâi, beh án-chóaⁿ kā lí lêng-tī lóng chāi góa hoaⁿ-hí. Góa chit-má nā ū chhàu--khì ê ke-nn̄g to̍h hó--ah, m̄-koh, chit ki ûn-ná bē-bái--lah.” Kóng soah, to̍h kā i ê chiam-chhùi-ku̍t-á gia̍h kah koân-koân-koân, sái ngē-la̍t ùi kū-jîn Khó͘-mo̍͘h-liàn ê thâu-khak-téng chhân-chhân ka ku̍t--lo̍h-khì, tong-tiûⁿ to̍h ka thâi--sí-ah. Sòa--lòe, Jia̍k tiām-tiām-á kā khut-á iōng thô͘ thūn--khí-lâi, to̍h ji̍p-khì soaⁿ-tōng chhiau-chhōe, chhōe tio̍h ū-kàu chē kim-gîn châi-pó. Tī-an-koaⁿ in thiaⁿ tio̍h Jia̍k ê tōa sêng-chiū liáu-āu, soan-pò͘ kóng ta̍k-ê í-āu lóng tio̍h ài chheng-ho͘ i sī: KŪ-JÎN SAT-CHHIÚ JIA̍K. In sàng Jia̍k 1 kháu pó-kiàm kah 1 tiâu io-tòa, téng-bīn iōng kim-sòaⁿ siù 2 chōa jī: Thâi sí kū-jîn Khó͘-mo̍͘h-liàn Siōng ióng-kám ê Khòng-ò͘ lâng. II Tong-jiân Jia̍k iâⁿ--ā ê siau-sit, chin kín to̍h thoân kah kui ê Eng-kek-lân to thong-lâng-chai, só͘-pái, ū lēng-gōa 1 ê tòa tī pak-pêng, kiò-chò Pu-nńg-tò-pò͘ ê kū-jîn thiaⁿ tio̍h hong-siaⁿ liáu-āu, chiù-chōa kóng, nā sī khì ho͘ tú tio̍h Jia̍k, che oan-siû i it-tēng ē thó. Chit ê kū-jîn Pu-nńg-tò-pò͘, to̍h sī khiā tī hi-bî ê tōa chhiū-nâ tiong-ng, hit tòng hông chiù-chhàm ê siâⁿ-pó ê chú-lâng. Mā chin tú-hó, to̍h chha-put-to tī Jia̍k kā Khó͘-mo̍͘h-liàn thâi--sí ê 4 kó-goe̍h āu, chhiàng-suh chhiàng-suh thang khì Óe-o̍͘h-suh lú-hêng, lō͘--ni̍h i keng-kòe chit ê tōa chhiū-nâ. I kiâⁿ kah lâng siān--ā ê sî, tī lō͘-piⁿ khòaⁿ tio̍h 1 káng bê-lâng ê chúi-chôaⁿ, i to̍h tó lo̍h-lâi hiu-sek, bô jōa kú to̍h khùn lo̍h-bîn--ā. Hiān-chhú-sî, kū-jîn Pu-nńg-tò-pò͘ lâi kàu kó͘-chéⁿ piⁿ beh chhiūⁿ-chúi, khòaⁿ tio̍h Jia̍k tng teh khùn, koh khòaⁿ i io-tòa ê siù-jī to̍h chai-iáⁿ kóng, chit--ê to̍h sī miâ-siaⁿ thàng kiaⁿ-siâⁿ ê kū-jîn sat-chhiú. Si̍t-chāi ū-kàu hó-ūn, kū-jîn hoaⁿ-hí kah kiōng-beh tio̍h-poa̍h, pòaⁿ-siaⁿ-pòaⁿ to̍h kā Jia̍k kng tī keng-kah-thâu, nǹg kòe chhiū-nâ-á kiâⁿ tńg-khì hit tòng hông chiù-chhàm ê siâⁿ-pó. Jia̍k khì hō͘ chhiū-oe sā-sā-kiò ê siaⁿ chhá cheng-sîn, i hoat-kiàn kóng ka-tī ê sìⁿ-miā í-keng khì hō͘ kū-jîn la̍k tī chhiú-thâu, kiaⁿ kah bīn-chheⁿ-bīn-le̍k, bóe--á, i khì khòaⁿ tio̍h siâⁿ-pó ê mn̂g-kháu-tiâⁿ kui thô͘-kha lóng sī sí-lâng kut-thâu ê sî, kiaⁿ kah jiō lóng kiōng-beh siàm--chhut-lâi. “Lí chin kín to̍h ē hâm in lām chò-hóe--ah.” Pu-nńg-tò-pò͘ ná kóng, ná kā khó͘-liân ê Jia̍k só ji̍p-khì siâⁿ-pó tōa-mn̂g téng-thâu ê 1 keng ū-kàu tōa keng ê pâng-keng. Chit keng pâng-keng koân-lòng-sòng, thiăn-jió͘ ū niû-thiāu, kan-na ū 1 sìⁿ thang-á-mn̂g niâ, khòaⁿ--chhut-khì to̍h sī lō͘. Pu-nńg-tò-pò͘ beh khì chhōe i tòa tī kāng 1 phiàn chhiū-nâ-á lāi ê kū-jîn hiaⁿ-tī, chò-hóe lâi chia̍h chheⁿ-chhau, chit sî, khó͘-liân ê Jia̍k to̍h hông koaiⁿ tī pâng-keng lāi tán. 1-chām-á liáu-āu, Jia̍k ùi thang-á khòaⁿ tio̍h in 2 ê kū-jîn kín-pia̍k-pia̍k, kha-pō͘ phōng-phōng-kiò, móa-sim kî-thāi kóaⁿ beh hù in ê àm-tǹg. Jia̍k nauh kóng: “Sī sí sī oa̍h chīn-piàⁿ to̍h chit tù, sûi to̍h chai--a.” In-ūi i í-keng siūⁿ tio̍h 1 ê kè-ōe. I tī pâng-keng ê 1 ê kak--á, khòaⁿ tio̍h 2 tiâu chin chho͘ ê soh-á. I kā 2 tiâu soh-á lóng the̍h lâi kat 1 ê liù-kho͘-si-á, koh kā liù-kho͘-si-á hit thâu hâⁿ tī thang-á gōa. To̍h tī kū-jîn tng teh khui thih-mn̂g só ê sî, Jia̍k thàn in bô chù-ì, thau-thau-á kā liù-kho͘-si-á thò tī in ê ām-kún. Sòa--lòe, iōng kín kah bē-su ba̍k-1-nih ê sok-tō͘, kā hit 2 tiâu soh-á pa̍k khì niû-thiāu téng. Só͘-pái kū-jîn kè-sio̍k kiâⁿ ê sî, liù-kho͘-si-á to̍h kā in ê ām-kún sok kah ân-tòng-tòng, it-ti̍t kàu in bīn lóng hoán o͘. Jia̍k khòaⁿ sî-ki í-keng kàu, to̍h ùi soh-á liu--lo̍h-khì, tn̂g-kiàm poe̍h--chhut-lâi, kā 2 ê kū-jîn thâi--sí. Chū án-ne, Jia̍k to̍h kā siâⁿ-pó ê só-sî the̍h--leh, kā só͘-ū ê mn̂g lóng khui--khui, ū 3 ê bí-lē ê lú-sū to̍h hō͘ i pàng--chhut-lâi, in sûi-lâng ê thâu-chang lóng hông pa̍k tiâu--leh cháu bē khì, chá to̍h kiōng-beh iau--sí-ah. Jia̍k ko͘ kha kūi lo̍h tē, i to̍h sī hiah ū lé-māu--lah, koh kóng: “Khó-ài ê lú-sū--ah, che sī chit tòng hông chiù-chhàm ê siâⁿ-pó ê só-sî, góa í-keng kā kū-jîn Pu-nńg-tò-pò͘ kah i iá-bân ê hiaⁿ-tī siau-bia̍t--ah, só͘-pái lín mā lóng í-keng chū-iû. Chit kóa só-sî èng-kai ē-tàng hō͘ lín tit-tio̍h lín só͘ su-iàu ê mi̍h-kiāⁿ.” Kóng soah, i to̍h khí-sin kè-sio̍k i beh khì Óe-o̍͘h-suh ê lō͘-tô͘--ā. III I iōng siāng kín ê sok-tō͘ ùi bo̍k-phiau--khì, hoān-sè sī siuⁿ kóaⁿ-kín, soah kiâⁿ m̄ tio̍h lō͘, thiⁿ piàn kah àm-so-so, sì-pêng bô lâng mā bô jîn-ke. I móa-sim kî-thāi, sì-kè chhōe lō͘, chòe-āu kiâⁿ kàu 1 ê e̍h-e̍h--á ê soaⁿ-kok ê sî, khòaⁿ tio̍h 1 tòng kài tōa keng m̄-koh im-léng-im-léng ê chhù, ko͘-ko͘-toaⁿ-toaⁿ khiā tī hia. I chin ǹg-bāng beh kín chhōe 1 ê só͘-chāi thang u, to̍h kóaⁿ-kín khì ka lòng mn̂g. Lí ē-tàng sióng-siōng--lah, nā sī lâi ka khui mn̂g--ê sī 1 ê seⁿ 2 lia̍p thâu ê kū-jîn, Jia̍k ē ū jōa kín-tiuⁿ koh jōa kiaⁿ-hiâⁿ. M̄-koh, sui-bóng kóng chit ê kū-jîn seⁿ tio̍h ok-khia̍k-khia̍k, lâng soah kài ū lé-sò͘. Sū-si̍t siōng, i sī 1 ê Óe-o̍͘h-suh kū-jîn, ū 2 ê bīn, sī siang-bīn-lâng, lâng kài ku̍t-liu, chin hèng iōng hi-chêng-ké-ì lâi tùi lí hó thang hâm lí kau pêng-iú, m̄-koh che to̍h sī i beh kan-kúi ok-to̍k chò pháiⁿ-tāi ê chhiú-toāⁿ niâ. I iōng chin bêng-hián ê Óe-o̍͘h-suh khiuⁿ-kháu, jia̍t-chêng hoan-gêng Jia̍k lâi, m̄-nā chún-pī 1 keng khùn-pâng beh ho͘ khùn, koh chin chhin-chhiat ka chiok-hok, hi-bāng i ē-tàng hioh-khùn kah sù-sī-sù-sī. M̄-koh, Jia̍k si̍t-chāi sī thiám kah kòe-thâu--ā, tian-tò khùn bē hó-sè, hoan lâi péng khì khùn bē lo̍h-bîn ê sî, bô-ì-tiong khì thiaⁿ tio̍h chú-lâng tī keh-piah pâng-keng ka-tī teh nga̍uh-nga̍uh-liām. Jia̍k ê hī-khang chiâⁿ lāi, ū châi-tiāu thiaⁿ tio̍h chú-lâng teh kóng siáⁿ, i kóng ê ōe chha-put-to sī chhin-chhiūⁿ án-ne: “Sui-bóng lí kin-á-àm kah góa tòa chò-hóe, M̄-koh lí bián siūⁿ kóng ū-thang khòaⁿ tio̍h mî-á-chài ê ji̍t-thâu jōa mé, Góa ê kùn-á ē kā lí ê thâu-khak hám kah khòaⁿ bô náu-chhóe.” Jia̍k nauh kóng: “Hó lí tōa-táⁿ! Ū-kàu káⁿ kóng!” Lâng 1-ē to̍h cheng-sîn--khí-lâi, koh kóng: “Tang-sî-á che to̍h sī lín Óe-o̍͘h-suh ê kan-kúi pō͘, tio̍h hoⁿh? M̄-koh chiah khòaⁿ góa án-chóaⁿ tùi-hù--lí-lah.” Liáu-āu, i lo̍h bîn-chhn̂g, kā 1 chat tōa-tè chhâ-kho͘ khǹg tī bîn-chhn̂g téng iōng thán-á am--leh, i ka-tī mā the̍h 1 tiâu thán-á kā ka-tī moa--leh, chiah bē kôaⁿ--tio̍h, koh cháu khì tī pâng-keng ê kak--á, bih kah sù-sī-sù-sī, ké-chò khùn kah kôⁿ-kôⁿ-kiò, to̍h sī beh hō͘ Mí-su̍h-thah kū-jîn tòng-chò i í-keng khùn--khì-ah. Koh ū-iáⁿ hō͘ Jia̍k liāu kah chún-chún, kòe bô jōa kú, hit ê koài-bu̍t nih kha-bóe kiâⁿ--ji̍p-lâi-ah, he kha-pō͘ to bē-su ta̍h tī ke-nn̄g bīn-téng hiah-nī khin, chhiú--ni̍h koh the̍h 1 ki tōa ki kùn-á. Sòa--lòe… Póng! Póng! Póng! Jia̍k thiaⁿ tio̍h bîn-chhn̂g khì hō͘ kū-jîn kòng kah pìn-pòng-kiò, it-ti̍t kàu kū-jîn kám-kak i ê lâng-kheh kui seng-khu ê kut-thâu lóng í-keng ho͘ phah kàu chiâu chhùi, chiah koh thau-thau-á lī-khui pâng-keng. Liáu-āu Jia̍k to̍h tiām-tiām-á koh chiūⁿ bîn-chhn̂g, kui mê khùn kah chin hó-sè! Keh-tńg-kang chái-khí, kū-jîn khòaⁿ tio̍h Jia̍k cheng-sîn pá-tīⁿ koh kui châng hó-hó ùi lâu-thui kiâⁿ--lo̍h-lâi ê sî, bē-su sī khì khòaⁿ tio̍h kúi--leh. “Ke-bó ôe! Nah ū khó-lêng!” Kū-jîn khì ho͘ kiaⁿ kah tōa-siaⁿ hoah--chhut-lâi, koh mn̄g kóng: “Khùn ū hó-sè--bô? Cha-àm kám lóng bô kám-kak tio̍h siáⁿ?” “O͘h!” Jia̍k sim-lāi àm-chhiò ìn kóng: “Góa kám-kak ū 1 chiah niáu-chhí-á cháu--lâi, koh iōng i ê bóe-á kā góa sut 2-3 ē.” Kū-jîn thiaⁿ 1-ē ba̍k-pe̍h-chi̍h-thó͘, to̍h chhōa Jia̍k khì chia̍h chái-khí-tǹg, i phâng 1 ê siāng-bô ē-tàng té 15 li̍p ê be̍h-á-moâi ê óaⁿ, koh iau-kiû i kóng, hiah ū khì-phek ê cha-po͘-lâng, èng-kai ū hoat-tō͘ kā chit óaⁿ moâi chia̍h liáu-liáu. Lán Jia̍k nā teh sì-kè lú-hêng ê sî, i lóng ē chah 1 kha phôe-tē-á khǹg tī i ê hong-moa ē-té, thang-hó té mi̍h-kiāⁿ; i sûi to̍h siūⁿ tio̍h kóng ē-tàng kā hit kha phôe-tē-á sóa lâi thâu-chêng, kā phôe-tē-á ê chhùi chiàⁿ-chiàⁿ tùi tī ē-hâi ē-kha; án-ne, i teh chia̍h moâi ê sî, to̍h ē-tàng kā tāi-pō͘-hūn ê moâi lóng tò ji̍p-khì tē-á--ni̍h, koh bē hō͘ kū-jîn kak-chhat--tio̍h. In to̍h chē lo̍h-lâi chia̍h-pn̄g--ā, kū-jîn sī piàⁿ sìⁿ-miā chia̍h, saⁿ chhùi chò 2 chhùi tōa-chhùi thun, ah Jia̍k--leh, i sī tiām-tiām-á kā i óaⁿ lāi ê moâi pìⁿ ho͘ bô--khì. Jia̍k iōng kan-khiáu ê chhiú-toāⁿ kā moâi chia̍h liáu í-āu kóng: “Eh, ōaⁿ góa lâi tián 1 pō͘ pí lí gâu siang-pōe ê kang-hu ho͘ lí khòaⁿ.” Kóng soah, i to̍h the̍h 1 ki chiam-to kā i ê phôe-tē-á liô ho͘ phòa, hin lāi-té ê moâi to̍h lóng lak lo̍h-khì thô͘-kha--a! “Ke-bó ôe! Nah ū khó-lêng!” Kū-jîn m̄ jīn-su koh tōa-siaⁿ hoah kóng: “Che góa mā ē-hiáu lah!” Kóng soah, i to̍h kā chiam-to gia̍h--khí-lâi, kā ka-tī ê pak-tó͘ liô--khui, sòa--lòe i to̍h poa̍h-tó, sí--khì. To̍h án-ne, Jia̍k to̍h bián koh hâm chit ê Óe-o̍͘h-suh kū-jîn tak-tîⁿ--ā. --Hosting provided by SoundOn
-
A郎ê bàng-gah來--lio͘h，全新配樂，希望ta̍k-ke ē kah意。 [Podcast] SoundOn https://bit.ly/ChKaL_SO Spotify https://spoti.fi/48jD2tI KKBOX Podcast https://bit.ly/ChKaL_KK Apple Podcast https://apple.co/3HZyfD3 YouTube Podcast https://bit.ly/ChKaL_YT [社交平台 Siā-kau Pêⁿ-tâi] YouTube https://bit.ly/ChKaL_YT Facebook https://bit.ly/ChKaL_FB Instagram https://www.instagram.com/chokangalang/ X (Twitter) https://twitter.com/chokangalang 方格子 https://vocus.cc/salon/cho-kang-a-lang --Hosting provided by SoundOn
-
【相招來看戲】紫羅蘭永久花園︱Violet Evergarden 文稿／主持／配樂︱陳曉怡 Niau-tāu 潤稿／校對︱蔡逸民 BuLuhSuh 人聲編輯︱柯王炳勳 Bí-leng 字幕︱林于真 A-chin 圖︱AI製圖 影片︱陳姿樺 Ko͘-chiáu 訂閱做工á人Youtube頻道：https://www.youtube.com/@chokangalang 完整ê漢羅／POJ對照文稿khǹg ti官方網站：https://cho-kang-a-lang.github.io/ 漢羅全文: 各位線頂ê聽眾朋友，ta̍k-ê平安，ta̍k-ê好，我是主持人Niau-tāu，歡迎收聽做工á人phá-kheh-su̍h-to͘h。Ta̍k-ê平素時愛看啥款ê戲齣？是感動--人ê愛情戲？是去想像未來ē如何ê科技大戲？A̍h是hâm我仝款上愛--ê是推理、探偵類？M̄-koh恐怖、比賽、美食chit kóa我mā真愛，講較明--leh ，to̍h是較無teh揀--lah！ 今á日kā ta̍k-ke紹介--ê ，是我ka-tī心內排名chiâⁿ koân ê 1齣A-ní-meh。 Chit ê故事是teh講1 ê查某囡á，伊ê名號做Bái-o̍͘h-lè。伊自細漢to̍h是軍隊ê兵á，hō͘人訓練做1 ê戰爭ê機器，kan-na知影thang kah人相戰，其他--ê伊啥to bē曉；對人類應該有ê情感mā攏kài生分，無法度去理解。戰爭結束了後，伊ê頂司安排伊去1間郵局做khang-khòe。郵局ê khang-khòe m̄-nā是寄批收批niâ，in上重要--ê 1項業務，to̍h是kā人tàu寫批。有ê人是m̄-bat字，無法度ka-tī寫批，有ê人是bē曉表達伊ka-tī ê感情。Chit款寫批ê khang-khòe，soah是Bái-o̍͘h-lè chit ê m̄知影啥物是感情ê人teh做--ê。Tī伊kā人客寫批ê過程，伊ta̍uh-ta̍uh-á開始體會tio̍h啥物是人ê感情，啥物是愛。 Bái-o̍͘h-lè做兵ê時陣，kan-na需要接受命令，了後to̍h照命令去執行。Só͘-pái伊開始teh學寫批ê時，伊寫ê文字，to̍h親像teh寫公文beh kā頂司報告仝款，攏無感情。伊ài為tio̍h無仝款ê人客，無仝款ê事件，去kâng寫批。聽chit寡人客ê故事，hō͘ Bái-o̍͘h-lè開始感受tio̍h啥物是親情，啥物是愛情，感受tio̍h in ê滿足hâm遺憾。伊漸漸漸漸理解，當初男主角Gí-ó͘-biat kā伊講ê彼句「我愛--你」是啥物意思，mā 1步1步開始了解ka-tī心內真正想beh ài--ê是啥物貨。 Bái-o̍͘h-lè寫ê ta̍k張批，後壁攏有1 ê hō͘人感動ê故事。 親像有1 ê破病ê母親，知影ka-tī時間已經chhun無jōa chē--ā，伊chhōe Bái-o̍͘h-lè來替伊寫批。囡á為tio̍h媽媽規工hâm Bái-o̍͘h-lè做夥，攏無陪伴--伊，tī hia leh使性地，伊傷心去chhōe Bài-o̍͘h-lè，問伊講是按怎in teh寫批ê時，伊攏bē-sái tī邊--á。Bái-o̍͘h-lè ka講，時到，你to̍h ē了解--ah。Chit ê媽媽無jōa久to̍h過身--去-ah，m̄-koh伊ê囡á，ta̍k年生日ê時，攏ē收tio̍h in媽媽寫hō͘--伊ê批，一直到伊大漢chiâⁿ人。 故事內底ê媽媽hō͘人感受tio̍h啥物是母愛，啥物是溫暖hâm犧牲；伊ta̍k年ê批，hō͘伊ê囡á ē-sái感受tio̍h伊ê成長過程--ni̍h，媽媽一直攏teh陪伴--伊。 Chit ê故事m̄-nā hō͘觀眾足m̄甘，mā hō͘ Bái-o̍͘h-lè知影原來伊ê chit-lō感情叫做「思念」；體會tio̍h思念是啥物感覺；思念1 ê人，m̄-koh chit ê人永遠bē koh轉來身軀邊，是啥物感受。 其中有1張批是teh戰場寫--ê，1 ê阿兵哥寫hō͘厝--ni̍h ê批。阿兵哥講伊真siàu念厝內人，講伊腹內ê心聲，講伊m̄-bat對厝內人講--過ê話。Bái-o̍͘h-lè一直m̄知影愛是啥？Chit ê時陣，伊發見講愛to̍h是1 ê ē hông耐心等待，hông疼，mā ē hō͘人希望ê物件。 閣有1 ê真chhèng ê作家，寫作去tú-tio̍h困難，無靈感，作品寫bē --落-去，chŏaⁿ邀請Bái-o̍͘h-lè來ka鬥相共。Bái-o̍͘h-lè發覺講作家較早ê作品攏充滿期待kah希望，m̄-koh因為伊心愛ê囝破病死--去，作家去受tio̍h真大ê打擊，伊寫作ê熱情soah chŏaⁿ無--去-ah。Só͘-pái tī伊chit擺ê新作品，伊寫bē出好ê結局，心情siuⁿ過沈重，無法度寫出伊想beh ài--ê彼種自由ê感覺。Bái-o̍͘h-lè聽tio̍h伊ê故事，to̍h giâ 1支雨傘，學劇本內底ê主角，親像會曉飛án-ne，koân-koân跳--起-來，想beh飛ùi池á ê另外1 pêng。當然--lah，無翼股ná有可能飛ē過。M̄-koh伊去ho͘ lak落去水--ni̍h，笑hai-hai ê形影，soah hō͘作家想起伊ê查某囝。Mā因為án-ne，作家發見伊ê故事kán-ná ē-sái koh寫--落-去-ah。Bái-o̍͘h-lè所做--ê，hō͘作家閣再chhōe tio̍h靈感，mā開始去接受過去ê創傷，雖罔痛苦koh留tī心內，m̄-koh人生猶是有未來。 Chit ê故事hông感覺溫暖，感動，有tang-tio̍h-á愛m̄是to̍h一定ài用話講--出-來，用行動mā ē-sái傳達。寫作m̄-nā是寫字，mā是用感情來表現人ê內心。 Hia ê批有tang-chūn-á m̄-nā是寫hō͘過去，mā是寫hō͘未來。 Chit phō作品我是看A-ní-meh--ê，畫面真súi，細節製作有夠幼路，音樂mā真好聽；女主角ê造型chiâⁿ súi，連伊因為戰爭ê關係，雙手sī機器做--ê，普通時á攏kòa 1雙手lông，nā tú-tio̍h beh phah字寫批，chiah kā手lông thǹg--落-來ê動作ûn-ná有夠phāⁿ；ē-sái講ta̍k項to好。Khah無彩--ê to̍h是tī女主角ê感情chit部份，感覺無夠完滿。Chit phō作品tī小說內底，男女主角in 2 ê是有做夥--ê。M̄-koh teh A-ní-meh--ni̍h，Gí-ó͘-biat攏出現tī Bái-o̍͘h-lè ê記持內底，結尾mā是Bái-o̍͘h-lè相信講， Gí-ó͘-biat一定koh活--leh，in一定有見面ê 1工。 可能有人ē感覺án-ne chiâⁿ好，有希望tī--leh，m̄-koh我to̍h是ē kah意好結局ê彼款人，何況人原著小說in to̍h是有做夥neh！若是hâm我有相像ê感覺ê觀眾，會用得看電影版，tī電影版內底in 2人總算是有美滿ê結局--lah！ 最後beh來講女主角ê名Bái-o̍͘h-lè，伊是1種花ê名，咱人話號做「紫羅蘭」；伊mā是chit phō A-ní-meh ê名。Tī故事內底伊hit kóa郵局同事ê名，仝款攏是用花來號名，而且女主角ê名，Bái-o̍͘h-lè，chit lō花代表ê意思to̍h是，「永久ê愛」。 今á日hâm各位觀眾朋友紹介ê A-ní-meh，m̄知lín kám有kah意？你--leh？你上愛--ê是toh 1齣，歡迎留話kā阮講--ŏ͘！咱會使來互相推薦分享！感謝各位觀眾朋友今á日ê收聽，咱後回再會ŏ͘！ Pe̍h-ōe-jī choân-bûn: Kok-ūi sòaⁿ-téng ê thiaⁿ-chiòng pêng-iú, ta̍k-ê pêng-an, ta̍k-ê hó, góa sī chú-chhî-jîn Niau-tāu, hoan-gêng siu-thiaⁿ Chò-kang-á-lâng phá-kheh-su̍h-to͘h. Ta̍k-ê pêng-sò͘-sî ài khòaⁿ siáⁿ-khoán ê hì-chhut? Sī kám-tōng--lâng ê ài-chêng hì? Sī khì sióng-siōng bī-lâi ē jû-hô ê kho-ki tōa hì? A̍h sī hâm góa kāng-khoán siōng ài--ê sī chhui-lí, thàm-cheng lūi? M̄-koh khióng-pò͘, pí-sài, bí-si̍t chit kóa góa mā chin ài, kóng khah bêng--leh, to̍h sī khah bô teh kéng--lah! Kin-á-ji̍t kā ta̍k-ke siāu-kài--ê, sī góa ka-tī sim-lāi pâi-miâ chiâⁿ koân ê 1 chhut A-ní-meh. Chit ê kò͘-sū sī teh kóng 1 ê cha-bó͘ gín-á, i ê miâ hō-chò Bái-o̍͘h-lè. I chū sè-hàn to̍h sī kun-tūi ê peng-á, hō͘ lâng hùn-liān chò 1 ê chiàn-cheng ê ki-khì, kan-na chai-iáⁿ thang kah lâng sio-chiàn, kî-tha--ê i siáⁿ to bē-hiáu; tùi jîn-lūi èng-kai ū ê chêng-kám mā lóng kài chheⁿ-hūn, bô-hoat-tō͘ khì lí-kái. Chiàn-cheng kiat-sok liáu-āu, i ê téng-si an-pâi i khì 1 keng iû-kio̍k chò khang-khòe. Iû-kio̍k ê khang-khòe m̄-nā sī kià-phoe siu-phoe niâ, in siōng tiōng-iàu--ê 1 hāng gia̍p-bū, to̍h sī kā lâng tàu siá-phoe. Ū ê lâng sī m̄-bat jī, bô-hoat-tō͘ ka-tī siá-phoe, ū ê lâng sī bē-hiáu piáu-ta̍t i ka-tī ê kám-chêng. Chit khoán siá-phoe ê khang-khòe, soah sī Bái-o̍͘h-lè chit ê m̄ chai-iáⁿ siáⁿ-mih sī kám-chêng ê lâng teh chò--ê. Tī i kā lâng-kheh siá-phoe ê kòe-têng, i ta̍uh-ta̍uh-á khai-sí thé-hōe tio̍h siáⁿ-mi̍h sī lâng ê kám-chêng, siáⁿ-mi̍h sī ài. Bái-o̍͘h-lè chò-peng ê sî-chūn, kan-na su-iàu chiap-siū bēng-lēng, liáu-āu to̍h chiàu bēng-lēng khì chip-hêng. Só͘-pái i khai-sí teh o̍h siá-phoe ê sî, i siá ê bûn-jī, to̍h chhin-chhiūⁿ teh siá kong-bûn beh kā téng-si pò-kò kāng-khoán, lóng bô kám-chêng. I ài ūi-tio̍h bô-kāng-khoán ê lâng-kheh, bô-kāng-khoán ê sū-kiāⁿ, khì kâng siá-phoe. Thiaⁿ chit kóa lâng-kheh ê kò͘-sū, hō͘ Bái-o̍͘h-lè khai-sí kám-siū tio̍h siáⁿ-mi̍h sī chhin-chêng, siáⁿ-mi̍h sī ài-chêng, kám-siū tio̍h in ê boán-chiok hâm ûi-hām. I chiām-chiām chiām-chiām lí-kái, tong-chho͘ lâm-chú-kak Gí-ó͘-biat kā i kóng ê hit kù “Góa ài--lí” sī siáⁿ-mih ì-sù, mā 1 pō͘ 1 pō͘ khai-sí liáu-kái ka-tī sim-lāi chin-chiàⁿ siūⁿ-beh ài--ê sī siáⁿ-mih hòe. Bái-o̍͘h-lè siá ê ta̍k tiuⁿ phoe, āu-piah lóng ū 1 ê hō͘ lâng kám-tōng ê kò͘-sū. Chhin-chhiūⁿ ū 1 ê phòa-pēⁿ ê bú-chhin, chai-iáⁿ ka-tī sî-kan í-keng chhun bô jōa chē--ā, i chhōe Bái-o̍͘h-lè lâi thè i siá-phoe. Gín-á ūi-tio̍h ma-ma kui kang hâm Bái-o̍͘h-lè chò-hóe, lóng bô pôe-phōaⁿ--i, tī hia leh sái-sèng-tē, i siong-sim khì chhōe Bái-o̍͘h-lè, mn̄g i kóng sī án-chóaⁿ in teh siá-phoe ê sî, i lóng bē-sái tī piⁿ--á. Bái-o̍͘h-lè ka kóng, sî-kàu, lí to̍h ē liáu-kái--ah. Chit ê ma-ma bô jōa kú to̍h kòe-sin--khì-ah, m̄-koh i ê gín-á, ta̍k nî seⁿ-ji̍t ê sî, lóng ē siu-tio̍h in ma-ma siá hō͘--i ê phoe, it-ti̍t kàu i tōa-hàn chiâⁿ-lâng. Kò͘-sū lāi-té ê ma-ma hō͘ lâng kám-siū tio̍h siáⁿ-mi̍h sī bú-ài, siáⁿ-mi̍h sī un-loán hâm hi-seng; i ta̍k nî ê phoe, hō͘ i ê gín-á ē-sái kám-siū tio̍h i ê sêng-tióng kòe-têng--ni̍h, ma-ma it-ti̍t lóng teh pôe-phōaⁿ--i. Chit ê kò͘-sū m̄-nā hō͘ koan-chiòng chiok m̄-kam, mā hō͘ Bái-o̍͘h-lè chai-iáⁿ goân-lâi i ê chit-lō kám-chêng kiò-chò “su-liām”; thé-hōe tio̍h su-liām sī siáⁿ-mih kám-kak; su-liām 1 ê lâng, m̄-koh chit ê lâng éng-oán bē koh tńg-lâi seng-khu piⁿ, sī siáⁿ-mih kám-siū. Kî-tiong ū 1 tiuⁿ phoe sī teh chiàn-tiûⁿ siá--ê, 1 ê a-peng-ko siá hō͘ chhù--ni̍h ê phoe. A-peng-ko kóng i chin siàu-liām chhù-lāi-lâng, kóng i pak-lāi ê sim-siaⁿ, kóng i m̄-bat tùi chhù-lāi-lâng kóng--kòe ê ōe. Bái-o̍͘h-lè it-ti̍t m̄ chai-iáⁿ ài sī siáⁿ? Chit ê sî-chūn, i hoat-kiàn kóng ài to̍h sī 1 ê ē hông nāi-sim tán-thāi, hông thiàⁿ, mā ē hō͘ lâng hi-bāng ê mi̍h-kiāⁿ. Koh ū 1 ê chin chhèng ê chok-ka, siá-chok khì tú-tio̍h khùn-lân, bô lêng-kám, chok-phín siá bē --lo̍h-khì, chŏaⁿ iau-chhiáⁿ Bái-o̍͘h-lè lâi ka tàu-saⁿ-kāng. Bái-o̍͘h-lè hoat-kak kóng chok-ka khah-chá ê chok-phín lóng chhiong-boán kî-thāi kah hi-bāng, m̄-koh in-ūi i sim-ài ê kiáⁿ phòa-pēⁿ sí--khì, chok-ka khì siū tio̍h chin tōa ê tá-kek, i siá-chok ê jia̍t-chêng soah chŏaⁿ bô--khì-ah. Só͘-pái tī i chit pái ê sin chok-phín, i siá bē chhut hó ê kiat-kio̍k, sim-chêng siuⁿ-kòe tîm-tāng, bô hoat-tō͘ siá chhut i siūⁿ-beh ài--ê hit chióng chū-iû ê kám-kak. Bái-o̍͘h-lè thiaⁿ tio̍h i ê kò͘-sū, to̍h giâ 1 ki hō͘-sòaⁿ, o̍h kio̍k-pún lāi-té ê chú-kak, chhin-chhiūⁿ ē-hiáu poe án-ne, koân-koân thiàu--khí-lâi, siūⁿ-beh poe ùi tî-á ê lēng-gōa 1 pêng. Tong-jiân--lah, bô si̍t-kó͘ ná ū khó-lêng poe ē kòe. M̄-koh i khì ho͘ lak lo̍h-khì chúi--ni̍h, chhiò-hai-hai ê hêng-iáⁿ, soah hō͘ chok-ka siūⁿ-khí i ê cha-bó͘ kiáⁿ. Mā in-ūi án-ne, chok-ka hoat-kiàn i ê kò͘-sū kán-ná ē-sái koh siá--lo̍h-khì-ah. Bái-o̍͘h-lè só͘ chò--ê, hō͘ chok-ka koh-chài chhōe tio̍h lêng-kám, mā khai-sí khì chiap-siū kòe-khì ê chhòng-siong, sui-bóng thòng-khó͘ koh lâu tī sim-lāi, m̄-koh jîn-seng iáu-sī ū bī-lâi. Chit ê kò͘-sū hông kám-kak un-loán, kám-tōng, ū-tang-tio̍h-á ài m̄ sī to̍h it-tēng ài iōng ōe kóng--chhut-lâi, iōng hêng-tōng mā ē-sái thoân-ta̍t. Siá-chok m̄-nā sī siá-jī, mā sī iōng kám-chêng lâi piáu-hiān lâng ê lāi-sim. Hia ê phoe ū-tang-chūn-á m̄-nā sī siá hō͘ kòe-khì, mā sī siá hō͘ bī-lâi. Chit phō chok-phín góa sī khòaⁿ A-ní-meh--ê, ōe-bīn chin súi, sè-chiat chè-chok ū-kàu iù-lō͘, im-ga̍k mā chin hó-thiaⁿ; lú-chú-kak ê chō-hêng chiâⁿ súi, liân i in-ūi chiàn-cheng ê koan-hē, siang-chhiú sī ki-khì chò--ê, phó͘-thong-sî-á lóng kòa 1 siang chhiú-lông, nā tú-tio̍h beh phah-jī siá-phoe, chiah kā chhiú-lông thǹg--lo̍h-lâi ê tōng-chok ûn-ná ū-kàu phāⁿ; ē-sái kóng ta̍k hāng to hó. Khah bô-chhái--ê to̍h sī tī lú-chú-kak ê kám-chêng chit pō͘-hūn, kám-kak bô-kàu oân-boán. Chit phō chok-phín tī siáu-soat lāi-té, lâm-lú-chú-kak in 2 ê sī ū chò-hóe--ê. M̄-koh teh A-ní-meh--ni̍h, Gí-ó͘-biat lóng chhut-hiān tī Bái-o̍͘h-lè ê kì-tî lāi-té, kiat-bóe mā sī Bái-o̍͘h-lè siong-sìn kóng, Gí-ó͘-biat it-tēng koh oa̍h--leh, in it-tēng ū kìⁿ-bīn ê 1 kang. Khó-lêng ū lâng ē kám-kak án-ne chiâⁿ hó, ū hi-bāng tī--leh, m̄-koh góa to̍h sī ē kah-ì hó kiat-kio̍k ê hit-khoán lâng, hô-hóng lâng goân-tù sió-soat in to̍h sī ū chò-hóe neh! Nā sī hâm góa ū sio-siâng ê kám-kak ê koan-chiòng, ē-ēng-tit khòaⁿ tiān-iáⁿ pán, tī tiān-iáⁿ pán lāi-té in 2 lâng chóng-sǹg-sī ū bí-boán ê kiat-kio̍k--lah! Chòe-āu beh lâi kóng lú-chú-kak ê miâ Bái-o̍͘h-lè, i sī 1 chióng hoe ê miâ, lán-lâng-ōe hō-chò “chí-lô-lân”; i mā sī chit phō A-ní-meh ê miâ. Tī kò͘-sū lāi-té i hit kóa iû-kio̍k tông-sū ê miâ, kāng-khoán lóng sī iōng hoe lâi hō-miâ, jî-chhiáⁿ lú-chú-kak ê miâ, Bái-o̍͘h-lè, chit-lō hoe tāi-piáu ê ì-sù to̍h sī: “éng-kiú ê ài”. Kin-á-ji̍t hâm kok-ūi koan-chiòng pêng-iú siāu-kài ê A-ní-meh, m̄-chai lín kám ū kah-ì? Lí--leh? Lí siōng ài--ê sī toh 1 chhut, hoan-gêng lâu ōe kā gún kóng--ŏ͘! Lán ē-sái lâi hō͘-siong chhui-chiàn hun-hióng! Kám-siā kok-ūi koan-chiòng pêng-iú kin-á-ji̍t ê siu-thiaⁿ, lán āu-hôe chài-hōe ŏ͘! --Hosting provided by SoundOn
-
【英國Gín-á古】Pân-tōaⁿ Jia̍k︱Lazy Jack 原作︱Flora Annie Steel 翻譯︱蔡逸民 BuLuhSuh／柯王炳勳 Bí-leng 講古／配樂︱陳曉怡 Niau-tāu 人聲編輯︱柯王炳勳 Bí-leng 字幕︱林于真 A-chin 校對︱蔡逸民 BuLuhSuh 圖︱AI製圖 影片︱陳姿樺 Ko͘-chiáu 訂閱Youtube頻道：https://www.youtube.com/@chokangalang 完整ê英文／漢羅／POJ對照文稿khǹg ti官方網站：https://cho-kang-a-lang.github.io/ 漢羅全文： 古早古早，有1 ê cha-po͘ gín-á，伊ê名號做Jia̍k，伊kah in老母tòa tī 1塊公地。In sàn kah beh hō͘鬼扛--去，chit ê老chŏ͘人是靠紡紗á teh過日，m̄-koh Jia̍k實在是有夠pân-tōaⁿ，伊熱天to̍h去曝日，寒--人to̍h坐tī壁爐邊角--á ê所在，其他--ê伊siáⁿ to bē-giàn做。Só͘-pái人to̍h lóng叫伊Pân-tōaⁿ Jia̍k。In老母無才調叫伊去ka tàu做任何tāi-chì，最後，to̍h tī 1 ê禮拜一ka講，伊nā m̄開始為伊ka-tī食ê moâi做khang-khòe，to̍h beh ka趕--出-去，叫伊食ka-tī。 Chia ê話bē輸hō͘ Jia̍k精神--khài，伊翻轉工to̍h出去kā厝邊ê作穡人tàu做khang-khòe，趁tio̍h 1-sián錢。M̄-koh伊從來to m̄-bat袋過錢，só͘-pái to̍h tī伊beh轉厝ê時，經過溪á to̍h kā錢phah-ka-la̍uh--去-ah。 「你chit ê戇gín-á，你èng-kai ài kā錢袋去lak袋á。」 In老母án-ne講。 Jia̍k ìn講：「Án-ne我後遍to̍h ē-hiáu--ah。」 來隔工Jia̍k to̍h koh出去kā 1 ê飼牛--ê tàu作穡，飼牛--ê to̍h hō͘伊1甕牛奶當做伊hit日ê工錢。Jia̍k to̍h kā甕á接--過-來，袋入去伊外套ê大lak袋á--ni̍h，ná行ná sìm，牛奶早to̍h tī轉厝ê路--ni̍h choat kah chhun無半滴。 「僥倖--o͘h！你m̄-to̍h ài kā牛奶thèⁿ tī頭殼頂。」老chŏ͘人án-ne ka講。 Jia̍k ìn講：「Án-ne我後遍to̍h ē-hiáu--ah。」 Sòa--lòe隔轉工，Jia̍k koh去kā 1 ê作穡人tàu-saⁿ-kāng，作穡--ê講beh hō͘伊1塊khu-lí-muh chhì-suh做代價。到beh暗á ê時，Jia̍k kā chhì-suh the̍h--leh，to̍h khòe tī頭殼頂行轉去厝。伊到厝ê時，chhì-suh lóng總臭酸--去，有1-kóa-á已經lak無--去，1-kóa-á是kah伊ê頭毛糊做夥--ah。 「真正戇beh死neh！你應該ài好禮á ka phóng tī手--ni̍h-lah。」In老母án-ne ka講。 Jia̍k ìn講：「Án-ne我後遍to̍h ē-hiáu--ah。」 Sòa--lòe隔工Pân-tōaⁿ Jia̍k koh出門去做khang-khòe--ah，chit遍伊是tī 1 ê做pháng ê師傅hia tàu做，人kan-na beh hō͘伊1隻大貓公。Jia̍k kā貓á接--過-來，好禮á kō͘雙手mo͘h--leh，m̄-koh過無jōa久，貓á to̍h kā伊jiàu kah大khang細li̍h，伊ko͘-put-chiong，mā kan-na ē-tàng kā貓á放ho͘走。 到厝ê時，in老母ka講：「你有夠飯桶neh，你應該to̍h ài用索á ka縛--leh，kā伊拖tī後壁行chiah tio̍h。」 Jia̍k ìn講：「Án-ne我後遍to̍h ē-hiáu--ah。」 Koh翻轉工，Jia̍k去kā 1 ê thâi羊--ê tàu做工，thâi羊--ê hō͘伊1塊真優ê羊肩胛肉，當做伊ê報賞。Jia̍k kā羊肉the̍h--leh，to̍h the̍h索á kā肉縛--leh，tī伊ê kha-chhng後拖土leh行，só͘-pái，tī伊到厝ê時，kui塊肉lóng歹--去-ah。In老母chit遍已經對伊完全lóng無耐性--ah，因為隔轉工to̍h是禮拜，in老母無ta-tit-ôa，kan-na ē-tàng食高麗菜做暗頓。 「你chit ê thûi--哥，你應該是ài ka扛tī肩胛頭。」In老母án-ne ka講。 Jia̍k ìn講：「Án-ne我後遍to̍h ē-hiáu--ah。」 來to̍h是拜一--ah，Pân-tōaⁿ Jia̍k koh 1擺出門做工，伊chit遍是去chhōe 1 ê飼牛--ê tàu做khang-khòe，人送伊1隻驢á做伊無閒kui工ê謝禮。Sui-bóng講Jia̍k是生做真勇壯，m̄-koh伊mā有智覺tio̍h講，beh kā驢á giâ起lih肩胛頭扛--leh實在是kài ngē-táu，m̄-koh伊最後也是成功--a，伊to̍h án-ne ta̍uh-ta̍uh-á kā伊ê賞品扛轉去厝。To̍h tī伊beh轉去厝ê路--ni̍h，伊經過1間樓á厝，有1 ê好額人kah伊hit ê 生kah súi-tang-tang，m̄-koh臭耳聾koh é-káu ê孤cha-bó͘ kiáⁿ tòa tī hin。Chit ê chŏ͘-gín-á 1世人到今iáu m̄-bat笑--過，醫生講，nā無人有才調hō͘伊笑，伊chit世人to̍h lóng bē講話--ā。Só͘-pái chit ê老pē有公開宣布講，nā有cha-po͘人ē-tàng hō͘ in chŏ͘-kiáⁿ笑--出-來，伊to̍h ē kā in chŏ͘-kiáⁿ嫁--伊。To̍h tī Jia̍k扛1隻驢á行過chŏ͘-gín-á in tau ê時，chit ê少年ê女士tú好tng teh看窗á外，hit隻苦憐ê精牲四支脚hiòng天頂liòng無停--ê，koh拚命teh hìⁿ-hòⁿ叫。有影--lah，chit-lō情境實在是siuⁿ笑詼，chŏ͘-gín-á chŏaⁿ腹肚攬--leh放聲笑，mā即時to̍h變kah聽有聲mā會曉講話--ā。In老pē有影是歡喜過頭，to̍h照品照行，kā in chŏ͘-kiáⁿ嫁hō͘ Pân-tōaⁿ Jia̍k，Jia̍k to̍h án-ne變做1 ê好額ê紳士。In ang-á-bó͘做夥tòa tī 1間大厝宅--ni̍h，Jia̍k in老母mā kah in做夥tòa，日子過tio̍h真幸福，一直到伊過身--去。 【Eng-kok Gín-á-kó͘】Pân-tōaⁿ Jia̍k Goân-chok: Flora Annie Steel Hoan-e̍k: Chhòa It-bîn / KoaÔng Péng-hun Kóng-kó͘ / Phòe-ga̍k: Tân Hiáu-î Lâng-siaⁿ Phian-chip: KoaÔng Péng-hun Jī-bō͘: Lîm Û-chin Kàu-tùi: Chhòa It-bîn Tô͘: AI Chè-tô͘ Iáⁿ-phìⁿ: Tân Chu-hôa Tēng-oa̍t Youtube pîn-tō: https://www.youtube.com/@chokangalang Oân-chéng ê Eng-bûn, Hàn-lô, POJ tùi-chiàu bûn-kó khǹg tī koaⁿ-hong bāng-chām: https://cho-kang-a-lang.github.io/ POJ choân-bûn: Kó͘-chá kó͘-chá, ū 1 ê cha-po͘ gín-á, i ê miâ hō-chò Jia̍k, i kah in lāu-bú tòa tī 1 tè kong-tē. In sàn kah beh hō͘ kúi kng--khì, chit ê lāu chŏ͘-lâng sī khò pháng se-á teh kòe-ji̍t, m̄-koh Jia̍k si̍t-chāi sī ū-kàu pân-tōaⁿ, i joa̍h-thiⁿ to̍h khì pha̍k-ji̍t, kôaⁿ--lâng to̍h chē tī piah-lô͘ piⁿ kak--á ê só͘-chāi, kî-tha--ê i siáⁿ to bē-giàn chò. Só͘-pái lâng to̍h lóng kiò i Pân-tōaⁿ Jia̍k. In lāu-bú bô châi-tiāu kiò i khì ka tàu chò jīm-hô tāi-chì, chòe-āu, to̍h tī 1 ê lé-pài-it ka kóng, i nā m̄ khai-sí ūi i ka-tī chia̍h ê moâi chò khang-khòe, to̍h beh ka kóaⁿ--chhut-khì, kiò i chia̍h ka-tī. Chia ê ōe bē-su hō͘ Jia̍k cheng-sîn--khài, i hoan-tńg-kang to̍h chhut-khì kā chhù-piⁿ ê choh-sit-lâng tàu chò khang-khòe, thàn tio̍h 1-sián chîⁿ. M̄-koh i chiông-lâi to m̄-bat tē kòe chîⁿ, só͘-pái to̍h tī i beh tńg-chhù ê sî, keng-kòe khe-á to̍h kā chîⁿ phah-ka-la̍uh--khì-ah. “Lí chit ê gōng gín-á, lí èng-kai ài kā chîⁿ tē khì lak-tē-á.” In lāu-bú án-ne kóng. Jia̍k ìn kóng: “Án-ne góa āu-piàn to̍h ē-hiáu--ah.” Lâi keh-kang Jia̍k to̍h koh chhut-khì kā 1 ê chhī-gû--ê tàu choh-sit, chhī-gû--ê to̍h hō͘ i 1 àng gû-leng tòng-chò i hit ji̍t ê kang-chîⁿ. Jia̍k to̍h kā àng-á chiap--kòe-lâi, tē ji̍p-khì i gōa-thò ê tōa lak-tē-á--ni̍h, ná kiâⁿ ná sìm, gû-leng chá to̍h tī tńg-chhù ê lō͘--ni̍h choat kah chhun bô pòaⁿ tih. “Hiau-hēng--o͘h! Lí m̄-to̍h ài kā gû-leng thèⁿ tī thâu-khak téng.” Lāu chŏ͘-lâng án-ne ka kóng. Jia̍k ìn kóng: “Án-ne góa āu-piàn to̍h ē-hiáu--ah.” Sòa--lòe keh-tńg-kang, Jia̍k koh khì kā 1 ê choh-sit-lâng tàu-saⁿ-kāng, choh-sit--ê kóng beh hō͘ i 1 tè khu-lí-muh chhì-suh chò tāi-kè. Kàu beh-àm-á ê sî, Jia̍k kā chhì-suh the̍h--leh, to̍h khòe tī thâu-khak téng kiâⁿ tńg-khì chhù. I kàu chhù ê sî, chhì-suh lóng-chóng chhàu-sng--khì, ū 1-kóa-á í-keng lak bô--khì, 1-kóa-á sī kah i ê thâu-mo͘ kô͘ chò-hóe--ah. “Chin-chiàⁿ gōng beh sí neh! Lí èng-kai ài hó-lé-á ka phóng tī chhiú--ni̍h-lah.” In lāu-bú án-ne ka kóng. Jia̍k ìn kóng: “Án-ne góa āu-piàn to̍h ē-hiáu--ah.” Sòa--lòe keh-kang Pân-tōaⁿ Jia̍k koh chhut-mn̂g khì chò khang-khòe--ah, chit piàn i sī tī 1 ê chò pháng ê sai-hū hia tàu chò, lâng kan-na beh hō͘ i 1 chiah tōa niau-kang. Jia̍k kā niau-á chiap--kòe-lâi, hó-lé-á kō͘ siang-chhiú mo͘h--leh, m̄-koh kòe bô jōa kú, niau-á to̍h kā i jiàu kah tōa-khang-sè-li̍h, i ko͘-put-chiong, mā kan-na ē-tàng kā niau-á pàng ho͘ cháu. Kàu chhù ê sî, in lāu-bú ka kóng: “Lí ū-kàu pn̄g-tháng neh, lí èng-kai to̍h ài iōng soh-á ka pa̍k--leh, kā i thoa tī āu-piah kiâⁿ chiah tio̍h.” Jia̍k ìn kóng: “Án-ne góa āu-piàn to̍h ē-hiáu--ah.” Koh hoan-tńg-kang, Jia̍k khì kā 1 ê thâi-iûⁿ--ê tàu chò-kang, thâi-iûⁿ--ê hō͘ i 1 tè chin iu ê iûⁿ keng-kah bah, tòng-chò i ê pò-siúⁿ. Jia̍k kā iûⁿ-bah the̍h--leh, to̍h the̍h soh-á kā bah pa̍k--leh, tī i ê kha-chhng āu thoa-thô͘ leh kiâⁿ, só͘-pái, tī i kàu chhù ê sî, kui tè bah lóng pháiⁿ--khì-ah. In lāu-bú chit piàn í-keng tùi i oân-choân lóng bô nāi-sèng--ah, in-ūi keh-tńg-kang to̍h sī lé-pài, in lāu-bú bô-ta-tit-ôa, kan-na ē-tàng chia̍h ko-lê-chhài chò àm-tǹg. “Lí chit ê thûi--ko, lí èng-kai sī ài ka khǹg tī keng-kah-thâu.” In lāu-bú án-ne ka kóng. Jia̍k ìn kóng: “Án-ne góa āu-piàn to̍h ē-hiáu--ah.” Lâi to̍h sī pài-it--ah, Pân-tōaⁿ Jia̍k koh 1 pái chhut-mn̂g chò-kang, i chit piàn sī khì chhōe 1 ê chhī-gû--ê tàu chò khang-khòe, lâng sàng i 1 chiah lî-á chò i bô-êng kui kang ê siā-lé. Sui-bóng kóng Jia̍k sī seⁿ chò chin ióng-chòng, m̄-koh i mā ū tì-kak tio̍h kóng, beh kā lî-á giâ khí-lih keng-kah-thâu kng--leh si̍t-chāi sī kài ngē-táu, m̄-koh i chòe-āu iā sī sêng-kong--a, i to̍h án-ne ta̍uh-ta̍uh-á kā i ê siúⁿ-phín kng tńg-khì chhù. To̍h tī i beh tńg-khì chhù ê lō͘--ni̍h, i keng-kòe 1 keng lâu-á-chhù, ū 1 ê hó-gia̍h-lâng kah i hit ê seⁿ kah súi-tang-tang, m̄-koh chhàu-hīⁿ-lâng koh é-káu ê ko͘ cha-bó͘ kiáⁿ tòa tī hin. Chit ê chŏ͘-gín-á 1-sì-lâng kàu-taⁿ iáu m̄-bat chhiò--kòe, i-seng kóng, nā bô lâng ū châi-tiāu hō͘ i chhiò, i chit-sì-lâng to̍h lóng bē kóng-ōe--ā. Só͘-pái chit ê lāu-pē ū kong-khai soan-pò͘ kóng, nā ū cha-po͘-lâng ē-tàng hō͘ in chŏ͘-kiáⁿ chhiò--chhut-lâi, i to̍h ē kā in chŏ͘-kiáⁿ kè--i. To̍h tī Jia̍k kng 1 chiah lî-á kiâⁿ kòe chŏ͘-gín-á in tau ê sî, chit ê siàu-liân ê lú-sū tú-hó tng teh khòaⁿ thang-á gōa, hit chiah khó͘-liân ê cheng-siⁿ 4 ki kha hiòng thiⁿ-téng liòng bô thêng--ê, koh piàⁿ-miā teh hìⁿ-hòⁿ-kiò. Ū-iáⁿ--lah, chit-lō chêng-kéng si̍t-chāi sī siuⁿ chhiò-khoe, chŏ͘-gín-á chŏaⁿ pak-tó͘ lám--leh pàng-siaⁿ chhiò, mā chek-sî to̍h piàn kah thiaⁿ ū siaⁿ mā ē-hiáu kóng-ōe--ā. In lāu-pē ū-iáⁿ sī hoaⁿ-hí kòe-thâu, to̍h chiàu-phín-chiàu-kiâⁿ, kā in chŏ͘-kiáⁿ kè hō͘ Pân-tōaⁿ Jia̍k, Jia̍k to̍h án-ne piàn-chò 1 ê hó-gia̍h ê sin-sū. In ang-á-bó͘ chò-hóe tòa tī 1 keng tōa chhù-the̍h--ni̍h, Jia̍k in lāu-bú mā kah in chò-hóe tòa, ji̍t-chí kòe tio̍h chin hēng-hok, it-ti̍t kàu i kòe-sin--khì. --Hosting provided by SoundOn
-
【E暗食啥貨】卵︱Nn̄g 文稿／主持︱蔡逸民 BuLuhSuh 配樂︱陳曉怡 Niau-tāu 人聲編輯／校對︱柯王炳勳 Bí-leng 字幕︱林于真 A-chin 圖︱AI製圖 影片︱陳姿樺 Ko͘-chiáu 完整ê英文／漢羅／POJ對照文稿khǹg ti官方網站：https://cho-kang-a-lang.github.io/ 漢羅全文： 各位線頂ê聽眾朋友，ta̍k-ê平安，ta̍k-ê好！歡迎收聽做工á人phá-kheh-su̍h-to͘h。 Ta̍k日kho̍k-kho̍k-chông，kui口灶士農工商隨人去，讀冊--ê讀chheh，做工--ê做kang，有才調做夥食--ê，大概mā chhun暗頓chit頓niâ，m̀，e暗beh食啥貨？Che有時，mā是kài歹kâng ìn ê問題neh！ 無閒kui日，khang-khòe結束轉到厝，總--是ē ǹg望kā俗事hē--leh，好好á食1頓輕鬆ê飯，ta̍uh-ta̍uh-á食，慢慢á話，kah厝--ni̍h ê ta̍k-ê，ōe看今á日ê日子過tio̍h啥款？ Ah，飯煮好--ah，菜iáu leh款，無我mā來tàu-saⁿ-kāng。Chit ê時間，mā差不多beh食暗--ah，厝--ni̍h ê人ē隨ê sóa來客廳chia活動。「Lín kám beh食卵？」「Beh--o͘h！」好，來煎卵。 冰箱to̍h tī gá-suh爐ê對面，先the̍h幾粒á卵--出-來，liam-mi to̍h beh料理。Che卵beh煎，ûn-ná有真chē變化neh！Nā講tio̍h蔥á卵，做法to̍h真簡單，seng khà幾粒卵落去碗公，蔥á the̍h--1-2-枝，切珠，khǹg去碗公，摻kóa鹽，hē kóa豆油，phah ho͘ sòaⁿ。Che鹹chiáⁿ to在人kah意，ta̍k ê人ê口味無kâng。鼎nā jia̍t，咱tú-chiah chhiau好ê料to̍h ē-tàng落鼎煎，chit-chūn，你to̍h斟酌ka看，seng kah鼎面接觸--tio̍h ê卵，真緊to̍h ē熟，m̄-koh khah頂面ê卵koh ē湯湯，chit-má，ē-tàng kā已經熟ê卵，用tī a̍h是煎匙ka póe去1 pêng，鼎sió ka gia̍h ho͘ chhu-chhu，hō͘湯湯ê部份，ē-tàng流過空--出-來ê鼎面煎，to̍h án-ne一直照chit-lō版路ka處理，尾--á，鼎--ni̍h ê卵，to̍h lóng ē變kah膏膏tēng-tēng ê形，chit時，to̍h ē-tàng péng-pêng繼續煎，chit-chūn，nā像我chit款有練--過ê o͘-chí-sáng，免用煎匙thuh，手1 ê屈勢，出1 ê力，卵to̍h ē飛tī空中pha-liàn-táu，koh ē用真súi ê姿勢落鼎，ah，害--ā，練無夠，落鼎失敗，卵去ho͘破做3-4 pêng，咱nā tú tio̍h án-ne ê狀況，人to̍h ài冷靜，ài假做像he無tāi-chì án-ne，緊用煎匙koh kā卵thuh做夥，看koh會赴ka粘做1塊完整--ê-無，人nā變做o͘-chí-sáng有1 ê好--處，工夫無的確ē kài gâu，m̄-koh面皮一般lóng ē變kah khah厚。話koh講倒 --轉-來，卵nā煎kah雙pêng lóng sió-khóa-á赤赤，豆油kah蔥á ê芳to̍h ē chhèng--出-來，chit-chūn to̍h差不多ē-tàng起鼎--ah，煎jú久卵to̍h jú tēng，m̄-koh豆油kah蔥á ê phang khùi mā ē變kah jú明，起鼎ê時機隨在人kah意ka-tī節。有ê人無ài hē豆油，講卵看--起-來ē khah烏，m̄-koh，我ka-tī是真kah意豆油過炒ê氣味。 Nā是講菜脯卵，做法mā kah蔥á卵差不多，精差tī菜脯切ho͘幼了後，ài seng浸水，nā無，有ê菜脯真正是鹹tok-tok，到時to̍h ē變做挾1塊á卵，配kui大碗飯。Che菜脯浸水ài浸jōa久？一般我ê辦法，是浸--1-chām-á to̍h the̍h 1塊起來試鹹汫，感覺差不多--a，chiah kah卵chhiau做夥。一般菜脯卵teh chhiau料，我to̍h無koh lām鹽kah豆油--ā，靠菜脯本身ê鹹to̍h有夠。 Che菜脯卵kah蔥á卵，咱nā去khah tiōng手路ê店食，in一般ē hē真chē油，煎-出--來卵圓koh厚，食--起-來koh酥酥，phang頭真有，真好食，m̄-koh，chit-má chit ê時代，khah講究油mài用hiah重，beh kā卵煎kah圓koh厚，工夫mā to̍h ài真老到，我che凊彩食凊彩大--ê，揀he食ē ha̍h koh簡單做ê方式to̍h好！ Sui-bóng我到taⁿ講kah hiah chē，m̄-koh chit-má我tng-teh煎--ê，是卵包。無法度，節目nā beh做，人to̍h bē-tàng無厚話。Nā是leh煎卵包，我siāng愛kā卵仁煎kah 1-sut-á熟to̍h好，大概是煎kah gia̍h tī ka tu̍h--1-ē， to̍h ē流--出-來ê狀況，第1，看卵仁ta̍uh-ta̍uh-á流--出-來，khí-mo͘ kài giang，第2，án-ne mā kài好食！Beh kā卵煎kah chit-lō款，我ē kā卵先ùi冰箱the̍h出來退冰，咱siōng好是用kah室內溫度差不多ê卵去煎ē khah好煎，卵nā siuⁿ冰，卵頂下teh熟ê速度ē差真chē，下面--ê卵熟kah強beh臭乾，頂面--ê卵清koh水水，tēng ê部分siuⁿ少，beh péng-pêng ē khah oh，無péng koh ē煎kah臭乾，hit-chūn to̍h進退兩難--lo͘h。 咱beh煎，kāng款鼎hē油ho͘ jia̍t，ûn-ûn-á火to̍h好，今á日ê卵包我想beh ka煎ho͘白phau-phau koh幼mi-mi，火to̍h m̄-thang開siuⁿ iām，卵nā beh khà，咱ē-tàng先予卵清落鼎，卵仁chiah對卵清ê正中央ho͘ --落-去，án-ne煎--起-來khah súi，卵lóng loeh--ah，chit時to̍h ē-tàng用煎匙kā he烏白走ê卵清póe去中央，ta̍uh-ta̍uh-á kā卵ê形khioh ho͘圓圓，ná聽油鼎chhu̍h-chhu̍h叫ê聲，ná注意講卵通好péng-pêng--ā-無？Beh péng-pêng to̍h ài真細膩ŏ͘，m̄-thang siuⁿ粗魯，這時ê卵仁koh是chheⁿ--ê，siuⁿ大力to̍h破--去，to̍h輕輕--a，ta̍uh-ta̍uh-á好禮á ka péng--過，péng--過了後to̍h ài注意時間--a，免jōa久to̍h ē-tàng起鼎，主要to̍h是beh kā猶未熟ê卵清，koh有卵仁ê表面煎ho͘熟，jōa久to̍h ài ka-tī chat，用心感受，nā koh ài算看幾秒幾秒，án-ne to̍h無浪漫--ā。 講to̍h ài講kài久，nā真正leh煎，1粒卵是真緊to̍h煎ē好--ah，1人1粒算kah tú-tú-á好，ka phâng去飯桌。看看--leh，siāng尾1齣菜mā處理好--ah，「食飯o͘h！隨人去添飯haⁿh！」 坐好勢，tú添好ê飯koh tng-teh chhèng煙，ngeh 1粒卵包hē tī碗--ni̍h，lâm kóa豆油tī卵頂面，tī gia̍h--leh kā卵仁chhiám--落-去，看he卵仁膏膏，ta̍uh-ta̍uh-á流--出-來，流去飯--ni̍h，kā飯染kah黃gìm-gìm，碗phâng--起-來飯ka pe--lòe，ûn-ûn-á pō͘，卵kah豆油kah飯ê氣味lóng lām tī嘴--ni̍h，喔，讚！起毛有夠giang，che有影是幸福ê滋味！ 食飽bē？你e暗食啥貨？食tio̍h kám有心適？食tio̍h有歡喜--無？ 感謝各位聽眾朋友來收聽goán chit ê節目，goán今á日ê節目to̍h放送到chia，期待後禮拜咱koh tī空中再相會ŏ͘！ 【E-àm Chia̍h Sáⁿ-hòe】Nn̄g Bûn-kó / Chú-chhî: Chhòa It-bîn Phòe-ga̍k: Tân Hiáu-î Lâng-siaⁿ Phian-chip / Kàu-tùi: KoaÔng Péng-hun Jī-bō͘: Lîm Û-chin Tô͘: AI Chè-tô͘ Iáⁿ-phìⁿ: Tân Chu-hôa Oân-chéng ê Hàn-lô, POJ tùi-chiàu bûn-kó khǹg tī koaⁿ-hong bāng-chām: htt ps://cho-kang-a-lang.github.io/ POJ Choân-bûn: Kok-ūi sòaⁿ-téng ê thiaⁿ-chiòng pêng-iú, ta̍k-ê pêng-an, ta̍k-ê hó, hoan-gêng siu-thiaⁿ Chò-kang-á-lâng phá-kheh-su̍h-to͘h. Ta̍k-ji̍t kho̍k-kho̍k-chông, kui-kháu-chàu sū-lông-kang-siong sûi-lâng khì, tha̍k-chheh--ê tha̍k-chheh, chò-kang--ê chò-kang, ū châi-tiāu chò-hóe chia̍h--ê, tāi-khài mā chhun àm-tǹg chit tǹg niâ, m̀, e-àm beh chia̍h sáⁿ-hòe? Che ū-sî, mā sī kài pháiⁿ kâng ìn ê būn-tê neh! Bô-êng kui ji̍t, khang-khòe kiat-sok tńg kàu chhù, chóng--sī ē ǹg-bāng kā sio̍k-sū hē--leh, hó-hó-á chia̍h 1 tǹg khin-sang ê pn̄g, ta̍uh-ta̍uh-á chia̍h, bān-bān-á ōe, kah chhù--ni̍h ê ta̍k-ê, ōe khòaⁿ kin-á-ji̍t ê ji̍t-chí kòe tio̍h siáⁿ-khoán? Ah, pn̄g chú hó--ah, chhài iáu leh khoán, bô góa mā lâi tàu-saⁿ-kāng. Chit ê sî-kan, mā chha-put-to beh chia̍h-àm--ah, chhù--ni̍h ê lâng ē sûi ê sóa lâi kheh-thiaⁿ chia oa̍h-tāng. “Lín kám beh chia̍h nn̄g?” “Beh--o͘h!” Hó, lâi chian nn̄g. Peng-siuⁿ to̍h tī gá-suh-lô͘ ê tùi-bīn, seng the̍h kúi-lia̍p-á nn̄g--chhut-lâi, liam-mi to̍h beh liāu-lí. Che nn̄g beh chian, ûn-ná ū chin chē piàn-hòa neh! Nā kóng tio̍h chhang-á-nn̄g, chò-hoat to̍h chin kán-tan, seng khà kúi lia̍p nn̄g lo̍h-khì óaⁿ-kong, chhang-á the̍h--1-2-ki, chhiat-chu, khǹg khì óaⁿ-kong, chham kóa iâm, hē kóa tāu-iû, phah ho͘ sòaⁿ. Che kiâm-chiáⁿ to chāi lâng kah-ì, ta̍k ê lâng ê kháu-bī bô kâng. Tiáⁿ nā jia̍t, lán tú-chiah chhiau hó ê liāu to̍h ē-tàng lo̍h tiáⁿ chian, chit-chūn, lí to̍h chim-chiok ka khòaⁿ, seng kah tiáⁿ-bīn chiap-chhiok--tio̍h ê nn̄g, chin kín to̍h ē se̍k, m̄-koh khah téng-bīn ê nn̄g koh ē thng-thng, chit-má, ē-tàng kā í-keng se̍k ê nn̄g, iōng tī a̍h-sī chian-sî ka póe khì 1 pêng, tiáⁿ sió ka gia̍h ho͘ chhu-chhu, hō͘ thng-thng ê pō͘-hūn, ē-tàng lâu kòe khang--chhut-lâi ê tiáⁿ-bīn chian, to̍h án-ne it-ti̍t chiàu chit-lō pán-lō͘ ka chhú-lí, bóe--á, tiáⁿ--ni̍h ê nn̄g, to̍h lóng ē piàn kah ko-ko tēng-tēng ê hêng, chit-sî, to̍h ē-tàng péng-pêng kè-sio̍k chian, chit-chūn, nā chhiūⁿ góa chit-khoán ū liān--kòe ê o͘-chí-sáng, bián iōng chian-sî thuh, chhiú 1 ê khut-sè, chhut 1 ê la̍t, nn̄g to̍h ē poe tī khong-tiong pha-liàn-táu, koh ē iōng chin súi ê chu-sè lo̍h tiáⁿ, ah, hāi--ā, liān bô-kàu, lo̍h tiáⁿ sit-pāi, nn̄g khì ho͘ phòa chò 3-4 pêng, lán nā tú tio̍h án-ne ê chōng-hóng, lâng to̍h ài léng-chēng, ài ké-chò chhiūⁿ he bô tāi-chì án-ne, kín iōng chian-sî koh kā nn̄g thuh chò-hóe, khòaⁿ koh ē-hù ka liâm chò 1 tè oân-choân--ê-bô, lâng nā piàn-chò o͘-chí-sáng ū 1 ê hó--chhù, kang-hu bô tek-khak ē kài gâu, m̄-koh bīn-phôe it-poaⁿ lóng ē piàn kah khah kāu. Ōe koh kóng tò --tńg-lâi, nn̄g nā chian kah siang-pêng lóng sió-khóa-á chhiah-chhiah, tāu-iû kah chhang-á ê phang to̍h ē chhèng--chhut-lâi, chit-chūn to̍h chha-put-to ē-tàng khí tiáⁿ--ah, chian jú kú nn̄g to̍h jú tēng, m̄-koh tāu-iû kah chhang-á ê phang khùi mā ē piàn kah jú bêng, khí-tiáⁿ ê sî-ki sûi-chāi lâng kah-ì ka-tī chat. Ū ê lâng bô ài hē tāu-iû, kóng nn̄g khòaⁿ--khí-lâi ē khah o͘, m̄-koh, góa ka-tī sī chin kah-ì tāu-iû kòe chhá ê khì-bī. Nā-sī kóng chhài-pó͘-nn̄g, chò-hoat mā kah chhang-á-nn̄g chha-put-to, cheng-chha tī chhài-pó͘ chhiat ho͘ iù liáu-āu, ài seng chìm chúi, nā bô, ū ê chhài-pó͘ chin-chiàⁿ sī kiâm-tok-tok, kàu-sî to̍h ē piàn-chò ngeh 1-tè-á nn̄g, phòe kui tōa óaⁿ pn̄g. Che chhài-pó͘ chìm-chúi ài chìm jōa-kú? It-poaⁿ góa ê pān-hoat, sī chìm--1-chām-á to̍h the̍h 1 tè khí-lâi chhì kiâm-chiáⁿ, kám-kak chha-put-to--a, chiah kah nn̄g chhiau chò-hóe. It-poaⁿ chhài-pó͘-nn̄g teh chhiau liāu, góa to̍h bô koh lām iâm kah tāu-iû--ā, khò chhài-pó͘ pún-sin ê kiâm to̍h ū kàu. Che chhài-pó͘-nn̄g kah chhang-á-nn̄g, lán nā khì khah tiōng chhiú-lō͘ ê tiàm chia̍h, in it-poaⁿ ē hē chin chē iû, chian--chhut-lâi nn̄g îⁿ koh kāu, chia̍h--khí-lâi koh so͘-so͘, phang-thâu chin ū, chin hó chia̍h, m̄-koh, chit-má chit ê sî-tāi, khah káng-kiù iû mài iōng hiah tāng, beh kā nn̄g chian kah îⁿ koh kāu, kang-hu mā to̍h ài chin láu-tàu, góa che chhìn-chhái chia̍h chhìn-chhái tōa--ê, kéng he chia̍h ē ha̍h koh kán-tan chò ê hong-sek to̍h hó! Sui-bóng góa kàu taⁿ kóng kah hiah chē, m̄-koh chit-má góa tng teh chian--ê, sī nn̄g-pau. Bô-hoat-tō͘, chiat-bo̍k nā beh chò, lâng to̍h bē-tàng bô kāu-ōe. Nā sī leh chian nn̄g-pau, góa siāng ài kā nn̄g-jîn chian kah 1-sut-á se̍k to̍h hó, tāi-khài sī chian kah gia̍h tī ka tu̍h--1-ē, to̍h ē lâu--chhut-lâi ê chōng-hóng, tē 1, khòaⁿ nn̄g-jîn ta̍uh-ta̍uh-á lâu--chhut-lâi, khí-mo͘ kài giang, tē 2, án-ne mā kài hó chia̍h! Beh kā nn̄g chian kah chit-lō khoán, góa ē kā nn̄g seng ùi peng-siuⁿ the̍h chhut-lâi thè-peng, lán siōng hó sī iōng kah sek-lāi un-tō͘ chha-put-to ê nn̄g khì chian ē khah hó chian, nn̄g nā siuⁿ peng, nn̄g téng-ē teh se̍k ê sok-tō͘ ē chha chin chē, ē-bīn--ê nn̄g se̍k kah kiōng-beh chhàu-ta, téng-bīn--ê nn̄g-chheng koh chúi-chúi, tēng ê pō͘-hūn siuⁿ chió, beh péng-pêng ē khah oh, bô péng koh ē chian kah chhàu-ta, hit-chūn to̍h chìn-thè-lióng-lân--lo͘h. Lán beh chian, kāng-khoán tiáⁿ hē iû ho͘ jia̍t, ûn-ûn-á-hóe to̍h hó, kin-á-ji̍t ê nn̄g-pau góa siūⁿ-beh ka chian ho͘ pe̍h-phau-phau koh iù-mi-mi, hóe to̍h m̄-thang khui siuⁿ iām, nn̄g nā beh khà, lán ē-tàng seng hō͘ nn̄g-chheng lo̍h tiáⁿ, nn̄g-jîn chiah tùi nn̄g-chheng ê chiàⁿ-tiong-ng ho͘ --lo̍h-khì, án-ne chian--khí-lâi khah súi, nn̄g lóng loeh--ah, chit-sî to̍h ē-tàng iōng chian-sî kā he o͘-pe̍h cháu ê nn̄g-chheng póe khì tiong-ng, ta̍uh-ta̍uh-á kā nn̄g ê hêng khioh ho͘ îⁿ-îⁿ, ná thiaⁿ iû-tiáⁿ chhu̍h-chhu̍h-kiò ê siaⁿ, ná chù-ì kóng nn̄g thang-hó péng-pêng--ā-bô? Beh péng-pêng to̍h ài chin sè-jī ŏ͘, m̄-thang siuⁿ chho͘-ló͘, chit-sî ê nn̄g-jîn koh sī chheⁿ--ê, siuⁿ tōa-la̍t to̍h phòa--khì, to̍h khin-khin--a, ta̍uh-ta̍uh-á hó-lé-á ka péng--kòe, péng--kòe liáu-āu to̍h ài chù-ì sî-kan--a, bián jōa kú to̍h ē-tàng khí-tiáⁿ, chú-iàu to̍h sī beh kā iáu-bōe se̍k ê nn̄g-chheng, koh ū nn̄g-jîn ê piáu-bīn chian ho͘ se̍k, jōa kú to̍h ài ka-tī chat, iōng sim kám-siū, nā koh ài sǹg khòaⁿ kúi bió kúi bió, án-ne to̍h bô lōng-bān--ā. Kóng to̍h ài kóng kài kú, nā chin-chiàⁿ leh chian, 1 lia̍p nn̄g sī chin kín to̍h chian ē hó--ah, 1 lâng 1 lia̍p sǹg kah tú-tú-á-hó, ka phâng khì pn̄g-toh. Khòaⁿ-khòaⁿ--leh, siāng-bóe 1 chhut chhài mā chhú-lí hó--ah, “Chia̍h-pn̄g o͘h! Sûi-lâng khì thiⁿ-pn̄g haⁿh!” Chē hó-sè, tú thiⁿ hó ê pn̄g koh tng-teh chhèng ian, ngeh 1 lia̍p nn̄g-pau hē tī óaⁿ--ni̍h, lâm kóa tāu-iû tī nn̄g téng-bīn, tī gia̍h--leh kā nn̄g-jîn chhiám--lo̍h-khì, khòaⁿ he nn̄g-jîn ko-ko, ta̍uh-ta̍uh-á lâu--chhut-lâi, lâu khì pn̄g--ni̍h, kā pn̄g ní kah n̂g-gìm-gìm, óaⁿ phâng--khí-lâi pn̄g ka pe--lòe, ûn-ûn-á pō͘, nn̄g kah tāu-iû kah pn̄g ê khì-bī lóng lām tī chhùi--ni̍h, o͘h, chán! Khí-mo͘ ū-kàu giang, che ū-iáⁿ sī hēng-hok ê chu-bī! Chia̍h pá bē? Lí e-àm chia̍h sáⁿ-hòe? Chia̍h tio̍h kám ū sim-sek? Chia̍h tio̍h ū hoaⁿ-hí--bô? Kám-siā kok-ūi thiaⁿ-chiòng pêng-iú lâi siu-thiaⁿ goán chit ê chiat-bo̍k, goán kin-á-ji̍t ê chiat-bo̍k to̍h hòng-sàng kàu chia, kî-thāi āu lé-pài lán koh tī khong-tiong chài siong-hōe ŏ͘! --Hosting provided by SoundOn
-
【A郎台語小詞典】Ep.039 粒 ︱Lia̍p 文稿／主持︱蔡逸民 BuLuhSuh 配樂︱陳曉怡 Niau-tāu 人聲編輯／校對︱柯王炳勳 Bí-leng 字幕︱林于真 A-chin 圖︱林佳祥 Chia-siông／AI製圖 影片︱陳姿樺 Ko͘-chiáu 完整ê漢羅／POJ對照文稿khǹg ti官方網站：https://cho-kang-a-lang.github.io/ 漢羅全文： 各位線頂ê聽眾朋友，ta̍k-ê平安，ta̍k-ê好！歡迎收聽做工á人phá-kheh-su̍h-to͘h。Iû-koh到咱紹介語詞ê時間--a，請ta̍k-ê做夥來聽看māi。 咱今á日來káng chit字粒。Ē想beh來講chit字，是因為tú好有1日，teh食暗ê時，飯ka pe--lòe，ĕ，nah ē chiah tēng，koh斟酌ka哺，米心是煮有透，m̄-koh to̍h是kán-ná teh煮飯ê時，水hē無夠chē ê款，我隨時to̍h nauh 1句講，「Ĕ，今á日ê飯nah ē煮kah chiah粒？」Ta̍k ê koh繼續káng--lòe，chiah知影hit日tú去買米，凡勢是去買tio̍h舊米，後遍beh煮飯ê時，水to̍h ài koh ke hē--kóa，飯煮--起-來chiah ē khiū。食tio̍h飯粒粒ûn-ná有好--處neh，koh ke 1 ê題目來hâm ta̍k-ke做夥稽考。 Chit字粒，一般是the̍h來算細細á ê物件ê助數詞，chhiūⁿ講沙，米，m̄-koh mā無的確講lia̍p--ê lóng真細，籃球mā算粒，枕頭、西瓜mā算粒，總--是，tī咱ê生活--ni̍h，用粒teh算--ê有影是chiâⁿ chē。 Koh 1種粒，應該是人人lóng bē kah意，to̍h是粒á，生粒á ē爛，ē發hông，ē孵膿，ē疼，khah嚴重--leh人koh ē發燒，che人人lóng無愛。Éng過，我gín-á時，nā生粒á，老母to̍h ē去kâng買he烏烏ê膏藥á轉來hō͘我貼。買--轉-來ê時，膏藥á是koeh tī細細塊á ê布面頂，koh kā布對拗，kā膏藥á拗tī內面，he黏黏烏烏ê膏藥á chiah bē kō kah四界lóng是。Beh貼進前，koh to̍h ài用火kā膏藥á烘ho͘燒，án-ne，khah好拆，拆--開to̍h ē-tàng貼去粒á頂，等kah粒á頭變軟，a̍h是膏藥á tēng--去-ah，to̍h ē-tàng拆--khài，nā是猶未好，to̍h koh ài貼1塊新--ê。Che lóng我gín-á時ê記智--ah，chit-má chit ê時代，凡勢連膏藥á mā無tàng買--ah。 Lia̍p mā有kā軟軟ê物件，用手tēⁿ做ka-tī beh ài ê形ê意思，親像講，lia̍p土丸á，lia̍p土尪á，lia̍p雞母狗á chit款--ê。Só͘-pái，咱mā ē kā飼kiáⁿ chit件tāi-chì用lia̍p來形容，咱ka chhiâⁿ，咱ka教，kā伊惜命命，m̄ hō͘伊行歪chhoa̍h，che mā kāng款是beh kā伊雕琢做咱beh ài ê形，nā用lia̍p來形容io飼gín-á，ûn-ná是kài tàu-tah--lah。 最後來1句連續劇ê台詞做咱ê結尾：「我辛辛苦苦kā你lia̍p kah chiah大漢，你竟然為tio̍h chit ê m̄知tó位來ê死查某鬼á，beh放sak你ê爸á母，天公伯--á…，我nah ē chiah歹命！」 Án-ne，咱今á日ê A郎小詞典to̍h紹介到chia，請各位聽眾朋友繼續kā goán支持kah鼓勵，有閒koh來ŏ͘！ 【A-lông Tâi-gí Sió-sû-tián】Ep.039 Lia̍p Bûn-kó / Chú-chhî: Chhòa It-bîn Phòe-ga̍k: Tân Hiáu-î Lâng-siaⁿ Phian-chip / Kàu-tùi: KoaÔng Péng-hun Jī-bō͘: Lîm Û-chin Tô͘: Lîm Ka-siông / AI Chè-tô͘ Iáⁿ-phìⁿ: Tân Chu-hôa Oân-chéng ê Hàn-lô, POJ tùi-chiàu bûn-kó khǹg tī koaⁿ-hong bāng-chām: https://ch o-kang-a-lang.github.io/ POJ Choân-bûn: Kok-ūi sòaⁿ-téng ê thiaⁿ-chiòng pêng-iú, ta̍k-ê pêng-an, ta̍k-ê hó! Hoan-gêng siu-thiaⁿ Chò-kang-á-lâng phá-kheh-su̍h-to̍͘h. Iû koh kàu lán siāu-kài gí-sû ê sî-kan--a, chhiáⁿ ta̍k-ê chò-hóe lâi thiaⁿ khòaⁿ-māi. Lán kin-á-ji̍t lâi káng chit jī ”lia̍p”. Ē siūⁿ-beh lâi kóng chit jī, sī in-ūi tú-hó ū 1 ji̍t, teh chia̍h-àm ê sî, pn̄g ka pe--lòe, ĕ, nah ē chiah tēng, koh chim-chiok ka pō͘, bí-sim sī chú ū thàu, m̄-koh to̍h sī kán-ná teh chú-pn̄g ê sî, chúi hē bô-kàu chē ê khoán, góa sûi-sî to̍h nauh 1 kù kóng: ”Ĕ, kin-á-ji̍t ê pn̄g nah ē chú kah chiah lia̍p?” Ta̍k-ê koh kè-sio̍k káng--lòe, chiah chai-iáⁿ hit ji̍t tú khì bé bí, hoān-sè sī khì bé tio̍h kū-bí, āu-piàn beh chú-pn̄g ê sî, chúi to̍h ài koh ke hē--kóa, pn̄g chú--khí-lâi chiah ē khiū. Chia̍h tio̍h pn̄g lia̍p-lia̍p ûn-ná ū hó--chhù neh, koh ke 1 ê tê-bo̍k lâi hâm ta̍k-ke chò-hóe khe-khó. Chit jī ”lia̍p”, it-poaⁿ sī the̍h lâi sǹg sè-sè-á ê mi̍h-kiāⁿ ê chō͘-sò͘-sû, chhiūⁿ kóng soa, bí, m̄-koh mā bô-tek-khak kóng lia̍p--ê lóng chin sè, nâ-kiû mā sǹg lia̍p, chím-thâu, si-koe mā sǹg lia̍p, chóng--sī, tī lán ê seng-oa̍h--ni̍h, iōng lia̍p teh sǹg--ê ū-iáⁿ sī chiâⁿ chē. Koh 1 chióng ”lia̍p”, èng-kai sī lâng-lâng lóng bē kah-ì, to̍h-sī lia̍p-á, seⁿ lia̍p-á ē nōa, ē hoat-hông, ē pū-lâng, ē thiàⁿ, khah giâm-tiōng--leh lâng koh ē hoat-sio, che lâng-lâng lóng bô-ài. Éng-kòe, góa gín-á sî, nā seⁿ lia̍p-á, lāu-bú to̍h ē khì kâng bé he o͘-o͘ ê ko-io̍h-á tńg-lâi hō͘ góa tah, bé--tńg-lâi ê sî, ko-io̍h-á sī koeh tī sè-sè-tè-á ê pò͘ bīn-téng, koh kā pò͘ tùi áu, kā ko-io̍h-á áu tī lāi-bīn, he liâm-liâm o͘-o͘ ê ko-io̍h-á chiah bē kō kah sì-kè lóng sī. Beh tah chìn-chêng, koh to̍h ài iōng hóe kā ko-io̍h-á hang ho͘ sio, án-ne, khah hó thiah, thiah--khui to̍h ē-tàng tah khì lia̍p-á téng, tán kah lia̍p-á thâu piàn nńg, a̍h-sī ko-io̍h-á tēng--khì-ah, to̍h ē-tàng thiah--khài, nā-sī iáu-bē hó, to̍h koh ài tah 1 tè sin--ê. Che lóng góa gín-á-sî ê kì-tì--ah, chit-má chit ê sî-tāi, hoān-sè liân ko-io̍h-á mā bô-tàng bé--ah. Lia̍p mā-ū kā nńg-nńg ê mi̍h-kiāⁿ, iōng chhiú tēⁿ chò ka-tī beh ài ê hêng ê ì-sù, chhin-chhiūⁿ kóng, lia̍p thô͘-oân-á, lia̍p thô͘-ang-á, lia̍p ke-bó-káu-á chit-khoán--ê. Só͘-pái, lán mā ē kā chhī-kiáⁿ chit kiāⁿ tāi-chì iōng lia̍p lâi hêng-iông, lán ka chhiâⁿ, lán ka kà, kā i sioh-miā-miā, m̄ hō͘ i kiâⁿ oai-chhoa̍h, che mā kāng-khoán sī beh kā i tiau-tok chò lán beh ài ê hêng, nā iōng lia̍p lâi hêng-iông io-chhī gín-á, ûn-ná sī kài tàu-tah--lah. Chòe-āu lâi 1 kù liân-sio̍k-kio̍k ê tâi-sû chò lán ê kiat-bóe,” Góa sin-sin-khó͘-khó͘ kā lí lia̍p kah chiah tōa-hàn, lí kèng-jiân ūi tio̍h chit ê m̄-chai tó-ūi lâi ê sí cha-bó͘-kúi-á, beh pàng-sak lí ê pē-á-bú, thiⁿ-kong-peh--á…, góa nah ē chiah pháiⁿ-miā!” Án-ne, lán kin-á-ji̍t ê A-lông Sió-sû-tián to̍h siāu-kài kàu chia, chhiáⁿ kok-ūi thiaⁿ-chiòng pêng-iú kè-sio̍k kā goán chi-chhî kah kó͘-lē, ū-êng koh lâi ŏ͘! --Hosting provided by SoundOn
-
【英國Gín-á古】3支羽毛下集︱The Three Feathers Part 2 原作︱Flora Annie Steel 翻譯︱蔡逸民 BuLuhSuh／柯王炳勳 Bí-leng 講古／配樂︱陳曉怡 Niau-tāu 人聲編輯／校對︱柯王炳勳 Bí-leng 字幕︱林于真 A-chin 圖︱AI製圖 影片︱陳姿樺 Ko͘-chiáu 完整ê英文／漢羅／POJ對照文稿khǹg ti官方網站：https://cho-kang-a-lang.github.io/ 漢羅全文： E暗到--ah，chŏ͘-gín-á kā錢用圍身裙tau--leh，to̍h tī伊beh peh樓梯--起-lih ê時，伊hiông-hiông停落來講：「Ah！Ē害！我koh kā衫phi tī索á頂neh。你小等--1-ē，我去ka收--入-來。」 駛馬車--ê ûn-ná是1 ê kài有禮數ê人，só͘-pái伊to̍h sûi ìn講：「我去to̍h好，e暗hiah冷，風koh透，你ē寒--tio̍h-lah。」 Sòa--lòe駛馬車--ê to̍h行--出-去-ah，cha-bó͘ gín-á to̍h kā伊ê羽毛the̍h--出-來，講：「藉我ê真愛心肝頭ê chit 3支羽毛，望hit kóa衫hō͘風搧kah四界飛直透到天光，mā望駛馬車ê先生無法度kā衫khioh ho͘好勢，雙手koh ài一直無閒teh khioh衫。」 話講soah，伊to̍h tiām-tiām-á去眠床睏，因為sòa--落-來ē án-nóa伊to知知--leh。有影tāi-chì kah伊所料--ê kāng款。駛馬車ê先生m̄-bat有1暝親像án-ne，tâm-lok-lok ê衫tī伊耳khang邊iāⁿ-iāⁿ hàiⁿ烏白搧，床巾，被單kā伊捆kah ná肉粽，害伊poa̍h倒，面巾同齊時koh tī hia sut伊ê脚sut無停。Sui-bóng伊kui身軀疼了了，mā是to̍h án-ne繼續到天光。駛馬車--ê siān-tauh-tauh koh憂頭結面，m̄-koh伊連爬去伊ê眠床to bē-sái，因為伊to̍h koh飼伊ê馬食料lim水！伊驚á ē hông笑，mā激tiām-tiām啥to無講。Chit ê súi koh khiáu ê洗衫女工，kā 40鎊khǹg去kheh-á--ni̍h，kah hit 70鎊收做夥，koh來to̍h歡歡喜喜繼續khang-khòe。Koh過1-chām-á了後，in hia有1 ê cha-po͘使用人，伊是1 ê古意ê少年á，mā去saⁿh tio̍h hit ê洗衫女工。伊經過洗衫間ê時，想beh koh ke gió 1-ē-á伊思慕ê人，to̍h ùi鎖匙khang ka偷看，soah看tio̍h伊坐tī椅á頂teh曲脚，衫已經摺好熨好勢，ka-tī飛去桌á頂。 少年á看1-ē心內實在真苦惱，só͘-pái伊to̍h去chhōe主人，去kā伊儉ê錢全部領--出-來，接sòa to̍h去chhōe chŏ͘-gín-á，講，nā是chŏ͘-gín-á無同意beh嫁--伊，伊to̍h一定ài kā伊所看--tio̍h-ê，照實講hō͘女主人知。 少年á講：「你看！我一直tòe tī主人身軀邊，有khiām 1 kóa錢，你mā tī chia chiah久--ah，一定mā有khiām--kóa，咱ē-tàng kā咱2 ê khiām--ê kap做夥，to̍h thèng好ē-tàng起家，a̍h是講，你想beh繼續tī chia做khang-khòe mā在你。」 總是chŏ͘-gín-á有試過beh hō͘伊放棄chit lō想法，m̄-koh伊實在有夠堅持，路尾，chŏ͘-gín-á講： 「Jiàm-suh！親愛--ê，去地下室kā我the̍h kóa不懶池酒來，你害我心koân心kē jû-chháng-chháng！」Tī Jiàm-suh離開了後，伊to̍h kā伊hit 3支羽毛the̍h--出-來，講：「藉我ê真愛心肝頭ê chit 3支羽毛，望Jiàm-suh無法度好勢á kā不懶池酒倒--出-來，kan-na ē-tàng倒落去伊ka-tī ê嚨喉khang。」 Hèⁿ！Án-chóaⁿ講án-chóaⁿ siàⁿ。不管Jiàm-suh khah án-chóaⁿ試，to̍h是無法度kā不懶池酒倒入去玻璃au-á，酒chiah滴幾滴á入去au-á內，to̍h koh ē順伊ê手流--出-來，來to̍h滴lŏe土脚。To̍h án-ne一直餾，直直到伊thiám kah感覺ka-tī mā需要sip--1-kóa，to̍h kā au-á內hit 1-sut-á lim--lòe，koh接lŏe試，結果mā是無khah好。Só͘-pái，伊to̍h koh lim 1嘴á-kiáⁿ，試，koh試，hē性命ka試，直直到伊變kah má-se-má-se。好死m̄死，主人tī chit時落來到地下室，伊1-ē看，to̍h sûi知影是án-chóaⁿ ē一直鼻tio̍h不懶池酒ê味！ Jiàm-suh chit ê使用人是老實koh條直，só͘-pái伊to̍h照實kā主人講，伊 --落-來是為tio̍h beh thîn kóa不懶池酒hō͘ hit ê感覺無爽快ê洗衫女工，m̄-koh伊ê手一直chhoah thîn bē好勢，to̍h倒ùi土脚，結果土脚ê酒味chhèng--起-來，害伊頭殼gông-chhia-chhia。 「Bē輸是真--ê-leh！」主人講soah，Jiàm-suh to̍h ho͘ kòng kah悽慘oe-oe。 Sòa--lòe，主人to̍h去chhōe女主人，也to̍h是in bó͘，講：「Kā你hit ê洗衫女工辭辭--leh-lah。我ê下脚手人ta̍k ê to出tāi-chì。In kā寄tī我chia ê錢lóng the̍h-the̍h--去，to̍h親像in beh chhōa-bó͘ án-ne，m̄-koh soah lóng無人離開lán chia，我teh想，to̍h是hit ê chŏ͘-gín-á leh歹鬼chhōa頭。」 M̄-koh in bó͘無ài聽伊講洗衫女工ê不是，伊to chit間厝宅內siāng好ê使用人ā，比in其他--ê總tàu-tàu--leh koh khah有價值，m̄ tio̍h--ê一定是主人伊ê hit kóa使用人。In ang-á-bó͘ to̍h án-ne冤--起-來，m̄-koh路尾主人lo̍h軟--ah。自án-ne了後，tāi-chì to̍h平靜--落-來-ah，因為女主人有kā chŏ͘-gín-á吩咐講，ài khah bih鬚--leh，ah in hit kóa cha-po͘人驚á ē hō͘其他ê使用人笑，mā無人ē kā發生ê tāi-chì講--出-來。 日子to̍h án-ne平平順順，一直到有1工，主人tng beh坐車出門，馬車to̍h停tī門口，使用人kā車門開--開hōaⁿ--leh，管家mā chhoân便便khiā tī gîm-á。To̍h tī chit時，ioh看是siáng ùi庭--ni̍h行--過？To̍h是hit ê洗衫女工！伊kng 1大籃á清氣衫，看--起-來是hiah-nī活潑koh hiah-nī顯目。Jiàm-suh，也to̍h是hit ê使用人1-ē看--tio̍h to̍h擋bē-tiâu，大聲吼--出-來。伊講： 「伊是1 ê惡毒ê cha-bó͘，kā我khiām ê錢the̍h了了--無打緊，koh害我去hông電kah金sih-sih。」 Sòa--lòe，駛馬車--ê心肝mā lia̍h坦橫，講：「Kám án-ne？你he kah伊對我所做--ê根本to差天差地。」伊 to̍h khiā--起-來，kā hit暗hō͘ tâm-lok-lok ê衫chau-that，koh有舞kui暝，bē輸天lóng bē光ê恐怖tāi lóng總講--出-來。來to̍h換khiā tī gîm-á ê管家bē直--ah，伊氣kah kiông-kiông beh爆炸，擋bē tiâu mā是kā百葉窗khi-khi-kho̍k-kho̍k lòng kui暝ê tāi-chì講--出-來。 Koh講：「其中1塊窗á枋，koh去khà tio̍h我ê鼻á！」 3 ê人kā ta̍k人ê悽慘tāi聽soah，to̍h恬靜--落-來，in lóng同意講，聽候主人--出-來，to̍h beh kā chia ê tāi-chì lóng講ho͘知，beh hō͘ chit ê cha-bó͘ giat-áu chhia糞斗。Hit ê洗衫女工ê耳khang ûn-ná chiâⁿ利，早to̍h停脚tī門後teh偷聽，伊了解狀況了後，知影to̍h ài做kóa啥chiah thang kā tāi-chì擋tiām，só͘-pái伊to̍h kā伊ê 3支羽毛the̍h--出-來，講：「藉我ê真愛心肝頭ê chit 3支羽毛，望in 3 ê去比phēng看siáng受苦siāng傷重，路尾冤kah lak落去水池á--ni̍h，創kah kui身軀tâm-kô͘-kô͘。」 來ā，話chiah tú講soah niâ，in 3 ê cha-po͘人to̍h開始冤講，siáng siāng悽慘落魄，sòa--lòe Jiàm-suh to̍h雄雄出手kā大箍把ê管家mau--lòe，phah kah伊目睭烏青激血，koh來hit ê肥管家kā Jiàm-suh hap落去土脚，hē性命ka cheng，ah駛車--ê mā無teh閒，ùi駕駛座peh--出-來，對in其他2 ê siòng準to̍h悽慘á phah，洗衫女工是tī邊--á笑kah嘴á li̍h-sai-sai。 Chit時主人出--來-ah，m̄-koh無人想beh先聽別人講，kan-kan-á想beh先kā ka-tī ê tāi-chì講hō͘主人聽，só͘-pái，koh開始sio-phah，e-e-kheh-kheh做1夥，cheng來cheng去phah bē soah，siōng尾，3 ê人lóng e-e-sak-sak chhia落去水池á--ni̍h，創kah kui身軀tâm-lok-lok。 主人to̍h問chŏ͘-gín-á到底是án-chóaⁿ ē創kah án-ne，chŏ͘-gín-á ìn講： 「因為我無beh嫁--in，in to̍h lóng beh編1 kóa對我不利ê話，1 ê講伊ê故事siāng好，1 ê講伊ê故事siāng有效，in to̍h為tio̍h tó 1 ê故事siāng ē hō͘我出tāi-chì teh hoe bē soah。M̄-koh chit-má in lóng受tio̍h報應--ah，tāi-chì到chia soah to̍h ē-sái。」 Koh來，主人to̍h行去in bó͘ ê面頭前講：「你講了無m̄ tio̍h。你hit ê洗衫女工是1 ê真khiáu ê chŏ͘-gín-á。」 Sòa--lòe，管家，駛車--ê hâm Jiàm-suh，kan-na ē-tàng見笑面見笑面kā嘴that--leh，siáⁿ to bē-tàng做。洗衫--ê koh來to̍h一直lóng盡本份kā伊ê khang-khòe做kah好勢好勢，無koh有啥新ê是非。 Koh來，7冬koh過1工ê時間到--ah，chit 1日駛le̍k金ê氣派馬車來到門脚口--ê是siáng？正正是伊ê鳥á-ang，伊已經koh變做緣投ê少年家。伊beh kā洗衫女工chhōa--走，hō͘伊koh再1遍做伊ê bó͘，主人kah女主人lóng為伊ê好運感覺真歡喜，in命令所有其他ê使用人tī gîm-á列隊kā伊祝福。來伊經過管家ê seng-khu邊ê時，kā 1 ê內底té 70鎊ê袋á chiⁿ teh管家ê手--ni̍h，嘴甜but-but講：「Che是beh補償你去關百葉窗。」 伊經過駛車--ê ê時，kā 1 ê內底té 40鎊ê袋á chiⁿ teh駛車--ê ê手--ni̍h，講：「Che是beh報賞你kă tàu收衫。」M̄-koh伊經過hit ê cha-po͘使用人ê時，hō͘伊1 ê內底té 100鎊ê袋á，笑hai-hai講：「Che是beh答謝你hit杯一直無斟--來ê不懶池酒！」 路尾，伊to̍h kah伊ê緣投á ang做夥駛車離開，去過in幸福快樂ê日子--ah。 【Eng-kok Gín-á-kó͘】3-Ki Ú-mn̂g Hā-chi̍p︱The Three Feathers Part 2 Goân-chok: Flora Annie Steel Hoan-e̍k: Chhòa It-bîn / KoaÔng Péng-hun Kóng-kó͘ / Phòe-ga̍k: Tân Hiáu-î Lâng-siaⁿ Phian-chip / Kàu-tùi: KoaÔng Péng-hun Jī-bō͘: Lîm Û-chin Tô͘: AI Chè-tô͘ Iáⁿ-phìⁿ: Tân Chu-hôa Oân-chéng ê Eng-bûn, Hàn-lô, POJ tùi-chiàu bûn-kó khǹg tī koaⁿ-hong bāng-chām: https://cho- kang-a-lang.github.io/ POJ choân-bûn: E-àm kàu--ah, chŏ͘-gín-á kā chîⁿ iōng ûi-sin-kûn tau--leh, to̍h tī i beh peh lâu-thui--khí-lih ê sî, i hiông-hiông thêng lo̍h-lâi kóng: “Ah! Ē hāi! Góa koh kā saⁿ phi tī soh-á téng neh. Lí sió-tán--1-ē, góa khì ka siu--ji̍p-lâi.” Sái-bé-chhia--ê ûn-ná sī 1 ê kài ū lé-sò͘ ê lâng, só͘-pái i to̍h sûi ìn kóng: “Góa khì to̍h hó, e-àm hiah léng, hong koh thàu, lí ē kôaⁿ--tio̍h-lah.” Sòa--lòe sái-bé-chhia--ê to̍h kiâⁿ--chhut-khì-ah, cha-bó͘ gín-á to̍h kā i ê ú-mn̂g the̍h--chhut-lâi, kóng: “Chià góa ê chin-ài sim-koaⁿ-thâu ê chit 3 ki ú-mn̂g, bāng hit kóa saⁿ hō͘ hong siàn kah sì-kè poe ti̍t-thàu kàu thiⁿ-kng, mā bāng sái bé-chhia ê sian-siⁿ bô-hoat-to͘ kā saⁿ khioh ho͘ hó-sè, siang-chhiú koh ài it-ti̍t bô-êng teh khioh saⁿ.” Ōe kóng soah, i to̍h tiām-tiām-á khì bîn-chhn̂g khùn, in-ūi sòa--lo̍h-lâi ē án-nóa i to chai-chai--leh. Ū-iáⁿ tāi-chì kah i só͘ liāu--ê kāng-khoán. Sái bé-chhia ê sian-siⁿ m̄-bat ū 1 mê chhin-chhiūⁿ án-ne, tâm-lok-lok ê saⁿ tī i hī-khang piⁿ iāⁿ-iāⁿ hàiⁿ o͘-pe̍h siàn, chhn̂g-kin, phōe-toaⁿ kā i khún kah ná bah-chàng, hāi i poa̍h-tó, bīn-kin tâng-chê-sî koh tī hia sut i ê kha sut bô thêng. Sui-bóng i kui seng-khu thiàⁿ liáu-liáu, mā sī to̍h án-ne kè-sio̍k kàu thiⁿ-kng. Sái-bé-chhia--ê siān-tauh-tauh koh iu-thâu-kat-bīn, m̄-koh i liân pê khì i ê bîn-chhn̂g to bē-sái, in-ūi i to̍h koh chhī i ê bé chia̍h liāu lim chúi! I kiaⁿ-á ē hông chhiò, mā kek tiām-tiām siáⁿ to bô kóng. Chit ê súi koh khiáu ê sé-saⁿ lú-kang, kā 40 pōng khǹg khì kheh-á--ni̍h, kah hit 70 pōng siu chò-hóe, koh-lâi to̍h hoaⁿ-hoaⁿ-hí-hí kè-sio̍k khang-khòe. Koh kòe 1-chām-á liáu-āu, in hia ū 1 ê cha-po͘ sú-iōng-lâng, i sī 1 ê kó͘-ì ê siàu-liân-á, mā khì saⁿh tio̍h hit ê sé-saⁿ lú-kang. I keng-kòe sé-saⁿ-keng ê sî, siūⁿ-beh koh ke gió 1-ē-á i su-bō͘ ê lâng, to̍h ùi só-sî-khang ka thau khòaⁿ, soah khòaⁿ tio̍h i chē tī í-á téng teh khiau-kha, saⁿ í-keng chih hó ut hó-sè, ka-tī poe khì toh-á téng. Siàu-liân-á khòaⁿ 1-ē sim-lāi si̍t-chāi chin khó͘-náu, só͘-pái i to̍h khì chhōe chú-lâng, khì kā i khiām ê chîⁿ choân-pō͘ niá--chhut-lâi, chiap-sòa to̍h khì chhōe chŏ͘-gín-á, kóng, nā sī chŏ͘-gín-á bô tông-ì beh kè--i, i to̍h it-tēng ài kā i só͘ khòaⁿ--tio̍h-ê, chiàu-si̍t kóng hō͘ lú-chú-lâng chai. Siàu-liân-á kóng: “Lí khòaⁿ! Góa it-ti̍t tòe tī chú-lâng seng-khu piⁿ, ū khiām 1 kóa chîⁿ, lí mā tī chia chiah kú--ah, it-tēng mā ū khiām--kóa, lán ē-tàng kā lán 2 ê khiām--ê kap chò-hóe, to̍h thèng-hó ē-tàng khí-ke, a̍h sī kóng, lí siūⁿ beh kè-sio̍k tī chia chò khang-khòe mā chāi lí.” Chóng-sī chŏ͘-gín-á ū chhì kòe beh hō͘ i hòng-khì chit lō siūⁿ-hoat, m̄-koh i si̍t-chāi ū-kàu kian-chhî, lō͘-bóe, chŏ͘-gín-á kóng: “Jiàm-suh! Chhin-ài--ê, khì tē-hā-sek kā góa the̍h kóa put-lán-tî-chiú lâi, lí hāi góa sim-koân-sim-kē jû-chháng-chháng!” Tī Jiàm-suh lī-khui liáu-āu, i to̍h kā i hit 3-ki ú-mn̂g the̍h--chhut-lâi, kóng: “Chià góa ê chin-ài sim-koaⁿ-thâu ê chit 3-ki ú-mn̂g, bāng Jiàm-suh bô-hoat-tō͘ hó-sè-á kā Put-lán-tî chiú tò--chhut-lâi, kan-na ē-tàng tò lo̍h-khì i ka-tī ê nâu-âu khang.” Hèⁿ! Án-chóaⁿ kóng án-chóaⁿ siàⁿ. Put-koán Jiàm-suh khah án-chóaⁿ chhì, to̍h sī bô-hoat-to͘ kā put-lán-tî-chiú tò ji̍p-khì po-lê au-á, chiú chiah tih kúi-tih-á ji̍p-khì au-á lāi, to̍h koh ē sūn i ê chhiú lâu--chhut-lâi, lâi to̍h tih lŏe thô͘-kha. To̍h án-ne it-ti̍t liū, ti̍t-ti̍t kàu i thiám kah kám-kak ka-tī mā su-iàu sip--1-kóa, to̍h kā au-á lāi hit 1-sut-á lim--lòe, koh chiap lŏe chhì, kiat-kó mā sī bô khah hó. Só͘-pái, i to̍h koh lim 1-chhùi-á-kiáⁿ, chhì, koh chhì, hē sìⁿ-miā ka chhì, ti̍t-ti̍t kàu i piàn kah má-se-má-se. Hó-sí m̄-sí, chú-lâng tī chit-sî lo̍h-lâi kàu tē-hā-sek, i 1-ē khòaⁿ, to̍h sûi chai-iáⁿ sī án-chóaⁿ ē it-ti̍t phīⁿ tio̍h put-lán-tî-chiú ê bī! Jiàm-suh chit ê sú-iōng-lâng sī láu-si̍t koh tiâu-ti̍t, só͘-pái i to̍h chiàu-si̍t kā chú-lâng kóng, i --lo̍h-lâi sī ūi-tio̍h beh thîn kóa put-lán-tî-chiú ho͘ hit ê kám-kak bô sóng-khòai ê sé-saⁿ lú-kang, m̄-koh i ê chhiú it-ti̍t chhoah thîn bē hó-sè, to̍h tò ùi thô͘-kha, kiat-kó thô͘-kha ê chiú-bī chhèng--khí-lâi, hāi i thâu-khak gông-chhia-chhia. “Bē-su sī chin--ê-leh!” Chú-lâng kóng soah, Jiàm-suh to̍h ho͘ kòng kah chhi-chhám oe-oe. Sòa--lòe, chú-lâng to̍h khì chhōe lú-chú-lâng, iā to̍h sī in bó͘, kóng: “Kā lí hit ê sé-saⁿ lú-kang sî-sî--leh-lah. Góa ê ē-kha-chhiú-lâng ta̍k ê to chhut-tāi-chì. In kā kià tī góa chia ê chîⁿ lóng the̍h-the̍h--khì, to̍h chhin-chhiūⁿ in beh chhōa-bó͘ án-ne, m̄-koh soah lóng bô lâng lī-khui lán chia, góa teh siūⁿ, to̍h sī hit ê chŏ͘-gín-á leh pháiⁿ-kúi chhōa-thâu.” M̄-koh in bó͘ bô-ài thiaⁿ i kóng sé-saⁿ lú-kang ê put-sī, i to chit keng chhù-the̍h lāi siāng hó ê sú-iōng-lâng ā, pí in kî-tha--ê chóng tàu-tàu--leh koh khah ū kè-ta̍t, m̄ tio̍h--ê it-tēng sī chú-lâng i ê hit kóa sú-iōng-lâng. In ang-á-bó͘ to̍h án-ne oan--khí-lâi, m̄-koh lō͘-bóe chú-lâng lo̍h-nńg--ah. Chū án-ne liáu-āu, tāi-chì to̍h pêng-chēng--lo̍h-lâi-ah, in-ūi lú-chú-lâng ū kā chŏ͘-gín-á hoan-hù kóng, ài khah bih-chhiu--leh, ah in hit kóa cha-po͘ lâng kiaⁿ-á ē hō͘ kî-tha ê sú-iōng-lâng chhiò, mā bô-lâng ē kā hoat-seng ê tāi-chì kóng--chhut-lâi. Ji̍t-chí to̍h án-ne pêng-pêng-sūn-sūn, it-ti̍t kàu ū 1 kang, chú-lâng tng beh chē-chhia chhut-mn̂g, bé-chhia to̍h thêng tī mn̂g-kháu, sú-iōng-lâng kā chhia-mn̂g khui--khui hōaⁿ--leh, koán-ke mā chhoân piān-piān khiā tī gîm-á. To̍h tī chit sî, ioh khòaⁿ sī siáng ùi tiâⁿ--ni̍h kiâⁿ--kòe? To̍h sī hit ê sé-saⁿ lú-kang! I kng 1-tōa-nâ-á chheng-khì saⁿ, khòaⁿ--khí-lâi sī hiah-nī oa̍h-phoat koh hiah-nī hiáⁿ-ba̍k. Jiàm-suh, iā to̍h sī hit ê sú-iōng-lâng 1-ē khòaⁿ--tio̍h to̍h tòng bē-tiâu, tōa-siaⁿ háu--chhut-lâi. I kóng: “I sī 1 ê ok-to̍k ê cha-bó͘, kā góa khiām ê chîⁿ the̍h liáu-liáu--bô-táⁿ-kín, koh hāi góa khì hông tiān kah kim-sih-sih.” Sòa--lòe, sái-bé-chhia--ê sim-koaⁿ mā lia̍h thán-hoâiⁿ, kóng: “Kám án-ne? Lí he kah i tùi góa só͘ chò--ê kin-pún to chha-thiⁿ-chha-tē.” I to̍h khiā--khí-lâi, kā hit àm hō͘ tâm-lok-lok ê saⁿ chau-that, koh ū bú kui-mê, bē-su thiⁿ lóng bē kng ê khióng-pò͘ tāi lóng-chóng kóng--chhut-lâi. Lâi to̍h ōaⁿ khiā tī gîm-á ê koán-ke bē-ti̍t--ah, i khì kah kiông-kiông beh po̍k-chà, tòng bē tiâu mā sī kā pah-hio̍h-thang khi-khi-kho̍k-kho̍k lòng kui-mê ê tāi-chì kóng--chhut-lâi. Koh kóng: “Kî-tiong 1 tè thang-á-pang, koh khì khà tio̍h góa ê phīⁿ-á!” 3 ê lâng kā ta̍k-lâng ê chhi-chhám tāi thiaⁿ soah, to̍h tiām-chēng--lo̍h-lâi, in lóng tông-ì kóng, thèng-hāu chú-lâng--chhut-lâi, to̍h beh kā chia ê tāi-chì lóng kóng ho͘ chai, beh hō͘ chit ê cha-bó͘ giat-áu chhia-pùn-táu. Hit ê sé-saⁿ lú-kang ê hī-khang ûn-ná chiâⁿ lāi, chá to̍h thêng-kha tī mn̂g-āu teh thau-thiaⁿ, i liáu-kái chōng-hóng liáu-āu, chai-iáⁿ to̍h ài chò kóa siáⁿ chiah thang kā tāi-chì tòng tiām, só͘-pái i to̍h kā i ê 3 ki ú-mn̂g the̍h--chhut-lâi, kóng: “Chià góa ê chin-ài sim-koaⁿ-thâu ê chit 3 ki ú-mn̂g, bāng in 3 ê khì pí-phēng khòaⁿ siáng siū-khó͘ siāng siong-tiōng, lō͘-bóe oan kah lak lo̍h-khì chúi-tî-á--ni̍h, chhòng kah kui seng-khu tâm-kô͘-kô.” Lâi ā, ōe chiah tú kóng soah niâ, in 3 ê cha-po͘-lâng to̍h khai-sí oan kóng, siáng siāng chhi-chhám-lo̍k-phek, sòa--lòe Jiàm-suh to̍h hiông-hiông chhut-chhiú kā tōa-kho͘-pé ê koán-ke mau--lòe, phah kah i ba̍k-chiu o͘-chheⁿ kek-huih, koh lâi hit ê pûi koán-ke kā Jiàm-suh hap lo̍h-khì thô͘-kha, hē sìⁿ-miā ka cheng, ah sái-chhia--ê mā bô teh êng, ùi kà-sú-chō peh--chhut-lâi, tùi in kî-thaⁿ 2 ê siòng-chún to̍h chhi-chhám-á phah, sé-saⁿ lú-kang sī tī piⁿ--á chhiò kah chhùi-á li̍h-sai-sai. Chit-sî chú-lâng chhut--lâi-ah, m̄-koh bô lâng siūⁿ-beh seng thiaⁿ pa̍t-lâng kóng, kan-kan-á siūⁿ-beh seng kā ka-tī ê tāi-chì kóng hō͘ chú-lâng thiaⁿ, só͘-pái, koh khai-sí sio-phah, e-e-kheh-kheh chò 1 hóe, cheng-lâi-cheng-khì phah bē soah, siōng-bóe, 3 ê lâng lóng e-e-sak-sak chhia lo̍h-khì chúi-tî-á--ni̍h, chhòng kah kui seng-khu tâm-lok-lok. Chú-lâng to̍h mn̄g chŏ͘-gín-á tàu-té sī án-chóaⁿ ē chhòng kah án-ne, chŏ͘-gín-á ìn kóng: “In-ūi góa bô beh kè--in, in to̍h lóng beh pian 1 kóa tùi góa put-lī ê ōe, 1 ê kóng i ê kò͘-sū siāng hó, 1 ê kóng i ê kò͘-sū siāng ū-hāu, in to̍h ūi-tio̍h tó 1 ê kò͘-sū siāng ē hō͘ góa chhut tāi-chì teh hoe bē soah. M̄-koh chit-má in lóng siū tio̍h pò-èng--ah, tāi-chì kàu chia soah to̍h ē-sái.” Koh-lâi, chú-lâng to̍h kiâⁿ khì in bó͘ ê bīn-thâu-chêng kóng: “Lí kóng liáu bô m̄-tio̍h. Lí hit ê sé-saⁿ lú-kang sī 1 ê chin khiáu ê chŏ͘-gín-á.” Sòa--lòe, koán-ke, sái-chhia--ê hâm Jiàm-suh, kan-na ē-tàng kiàn-siàu-bīn kiàn-siàu-bīn kā chhùi that--leh, siáⁿ to bē-tàng chò. Sé-saⁿ--ê koh-lâi to̍h it-ti̍t lóng chīn pún-hūn kā i ê khang-khòe chò kah hó-sè hó-sè, bô koh ū siáⁿ sin ê sī-hui. Koh-lâi, 7 tang koh kòe 1 kang ê sî-kan kàu--ah, chit 1 ji̍t sái le̍k-kim ê khì-phài bé-chhia lâi kàu mn̂g-kha-kháu--ê sī siáng? Chiàⁿ-chiàⁿ sī i ê chiáu-á-ang, i í-keng koh piàn-chò iân-tâu ê siàu-liân-ke. I beh kā sé-saⁿ lú-kang chhōa--cháu, hō͘ i koh-chài 1 piàn chò i ê bó͘, chú-lâng kah lú-chú-lâng lóng ūi i ê hó-ūn kám-kak chin hoaⁿ-hí, in bēng-lēng só͘-ū kî-thaⁿ ê sú-iōng-lâng tī gîm-á lia̍t-tūi kā i chiok-hok. Lâi i keng-kòe koán-ke ê seng-khu piⁿ ê sî, kā 1 ê lāi-té té 70 pōng ê tē-á chiⁿ teh koán-ke ê chhiú--ni̍h, chhùi tiⁿ-but-but kóng: “Che sī beh pó͘-siông lí khì koaiⁿ pah-hio̍h-thang.” I keng-kòe sái-chhia--ê ê sî, kā 1 ê lāi-té té 40 pōng ê tē-á chiⁿ teh sái-chhia--ê ê chhiú--ni̍h, kóng: “Che sī beh pò-siúⁿ lí kă tàu siu-saⁿ.” M̄-koh i keng-kòe hit ê cha-po͘ sú-iōng-lâng ê sî, hō͘ i 1 ê lāi-té té 100 pōng ê tē-á, chhiò-hai-hai kóng: “Che sī beh tap-siā lí hit poe it-ti̍t bô thîn--lâi ê put-lán-tî-chiú!” Lō͘-bóe, i to̍h kah i ê iân-tâu-á ang chò-hóe sái-chhia lī-khui, khì kòe in hēng-hok khoài-lo̍k ê ji̍t-chí--ah. --Hosting provided by SoundOn
-
【英國Gín-á古】3支羽毛上集︱The Three Feathers Part 1 原作︱Flora Annie Steel 翻譯︱蔡逸民 BuLuhSuh／柯王炳勳 Bí-leng 講古／配樂︱陳曉怡 Niau-tāu 人聲編輯／校對︱柯王炳勳 Bí-leng 字幕︱林于真 A-chin 圖︱AI製圖 影片︱陳姿樺 Ko͘-chiáu 完整ê英文／漢羅／POJ對照文稿khǹg ti官方網站：https://cho-kang-a-lang.github.io/ 漢羅全文： Éng過有1 ê chŏ͘-gín-á，伊hō͘ 1 ê伊m̄-bat見過面ê cha-po͘人jiok，了後to̍h嫁hō͘--伊，chit ê cha-po͘人lóng是tī天暗--ah了後chiah來ka phāⁿ，tī in結婚了後，伊猶原m̄-bat tī天暗進前轉厝，mā lóng是tī天光進前to̍h ē出門。 To̍h算講是án-ne，cha-po͘人mā是對伊真好真有量，kā伊心內想beh ài ê一切lóng款kah chiâu tio̍h，só͘-pái伊有1-chām-á真滿足。但是無jōa久了後，伊有1-kóa朋友，的確是看伊ê運好leh起怨妒，開始私底下teh nauh講，伊hit ê m̄-bat hông看過面ê ang婿，一定有siáⁿ-mih bē見眾--chit ê tāi-chì，chiah ē無ài hông看--tio̍h。 Tī in tú開始teh行ê時，chŏ͘-gín-á to̍h bat好玄講，是án-chóaⁿ伊ê愛人á無hâm其他ê cha-bó͘ gín-á ê kāng款，tī日時á光明正大來ka phāⁿ。Chhím頭，伊mā無iàu-ì伊ê厝邊tī hia使目尾，a̍h是下頦ngia̍uh--leh ngia̍uh--leh teh ka暗示，m̄-koh久--來，mā是開始感覺講，in teh講ê話凡勢是有kóa道理。Só͘-pái，伊決定beh ka-tī親身去探看māi-á--leh。To̍h tī 1 ê暗時，伊聽tio̍h in ang行入來房間--ni̍h，伊to̍h hiông-hiông kā蠟條點--起-來，in ang ê面sûi to̍h去ho͘看kah清清楚楚。 Óa！無疑誤伊是hiah-nī漂撇，緣投kah有chhun，súi kah ē hō͘全世界ê cha-bó͘人當場to̍h去saⁿh tio̍h伊。M̄-koh伊to̍h án-ne kā in ang看1 ē niā-niā，in ang soah chŏaⁿ變做1隻咖啡色ê大隻鳥á，hiong-kài-kài teh ka gîn，目睭內全全是受氣kah責備。 鳥á ka講：「你做chit件tāi-chì to̍h是leh反背--góa，為tio̍h án-ne，除非你tī sòa--lòe ê 7 tang koh過1工--ni̍h，專心一志來替我去奉獻，nā無你to̍h bē koh見tio̍h我--ah。」 Cha-bó͘ gín-á哭kah kui面全目屎，ná chhn̍gh ná ìn講：「Nā是你ē-tàng回心轉意，叫我服侍7遍ê 7 tang koh過1工to ē-sái。Kā我講我ài án-chóaⁿ做。」 來伊hit ê鳥á ang to̍h ìn講：「我ē安排khang-khòe hō͘你做，你ài留tī hia好好á做kah 7 tang koh過1工，nā是有人kā你siâⁿ，kā你拐，叫你mài koh做chit ê khang-khòe，你bē-tàng聽。Nā是你無照品照行，我to̍h永遠bē koh轉--來-ah。」 Chit ê條件，cha-bó͘ gín-á答應--ah，鳥á to̍h kā伊闊闊ê咖啡色翼股thí--開，chhōa伊去1間大厝宅。 鳥á ang ka講：「In chia需要1 ê洗衫ê女工，你 --入-去，kā in講你beh chhōe chia ê女主人，講你beh來ín chit ê khang-khòe。M̄-koh你ài ē記--chit，你to̍h ài做到7冬koh過1工hiah-nī久！」 Cha-bó͘ gín-á ìn講：「M̄-koh che我連7工to做bē到neh，我to bē曉洗衫，mā bē曉熨衫--ā。」 鳥á to̍h ka ìn講：「He無要緊，你án-ne做to̍h好，你ùi我ê翼股下底，óa心臟ê所在挽3支羽毛--落-來，chit 3支羽毛不管如何lóng ē聽你ê命令。你kan-na需要kā in khǹg tī你ê手面，嘴講：『藉我ê真愛心肝頭ê chit 3支羽毛，望che圓滿。』Tāi-chì to̍h ē做好--ah。」 Cha-bó͘ gín-á to̍h ùi鳥á ê翼股下挽3支羽毛，sòa--lòe，鳥á to̍h飛--走-ah。 Cha-bó͘ gín-á to̍h照伊hông吩咐--ê去做，大厝宅ê女主人mā ûn-ná有ka chhiàⁿ。To無hit款像伊hiah-nī好腳手ê洗衫工--lah，當然--lah，你ka想看māi，伊to̍h kan-na ài行入去洗衫á間，門chhòaⁿ--leh，百葉窗ka thoah--落-來，án-ne to̍h無人ē-tàng看tio̍h伊teh創啥，sòa--lòe koh kā hit 3支羽毛the̍h--出-來，講：「藉我ê真愛心肝頭ê chit 3支羽毛，望柴火點起來hiâⁿ銅鼎，衫分類好，洗好，滾--過，phi ho͘ ta，摺好，teh平，熨好勢。」你ka看！清氣kah白siak-siak ê衫to̍h án-ne自動飛去桌á頂，隨時ē-tàng收--起-來。Só͘-pái，女主人對伊是不止á對重，講從來m̄-bat看過hiah好ê洗衫女工。To̍h án-ne，4冬過--去-ah，mā無風聲講伊beh離開。M̄-koh其他ê使用人是jú來jú怨妒--伊，尤其是伊koh生tio̍h真súi，hia ê cha-po͘使用人ta̍k-ê to去愛tio̍h伊，koh想beh ka chhōa。 M̄-koh伊siáng to m̄願嫁，因為伊一直苦心teh等待伊ê鳥á ang，以人ê樣相轉來伊身軀邊ê hit 1工。 想beh chhōa--伊ê人內底，其中有1 ê是1-khian肚大大khian ê管家，有1日，伊ùi酒館轉--來ê時，tú好去經過洗衫á間。伊聽tio̍h 1 ê聲講：「藉我ê真愛心肝頭ê chit 3支羽毛，望柴火點起來hiâⁿ銅鼎，衫分類好，洗好，滾--過，phi ho͘ ta，摺好，teh平，熨好勢。」 伊感覺真奇怪，to̍h ùi鎖匙khang ka偷看，看tio̍h hit ê cha-bó͘ gín-á坐tī椅á頂teh曲脚，同齊時he衫to̍h ka-tī自動飛去桌á頂，lóng處理kah thèng好thang ka收--起-來-ah。 Só͘-pái hit暗，伊to̍h去chhōe hit ê cha-bó͘ gín-á，chhiàng講，nā是koh看伊無，拒絕伊ê求婚，伊to̍h ē去kā女主人講，講伊hit ê it-tó͘ ê洗衫女工是1 ê尪姨。到時，to̍h算講伊無去hông活活燒kah死，mā ē無頭路。 Taⁿ，chŏ͘-gín-á煩惱kah m̄知beh án-chóaⁿ，nā是講，伊對伊ê鳥á-ang不忠，a̍h是講伊無奉待伊ê女主人到7冬koh過1工ê久，伊ê鳥á-ang lóng kāng款bē koh轉--來，só͘-pái伊to̍h藉口講，nā是無the̍h有夠額ê錢thang hō͘伊滿意，伊siáng to bē考慮。 聽tio̍h che，hit ê大箍把ê管家笑--出-來。Ìn講：「錢？我有70鎊khiām tī主人hia，án-ne kám koh無夠thang hō͘你滿意？」 伊ìn講：「凡勢有夠。」 Só͘-pái，隔工e暗管家the̍h 70鎊ê金幣來chhōe--伊，伊to̍h用圍身裙kā錢tau--leh，講án-ne伊滿足--ah。因為伊已經想tio̍h 1 ê計畫。To̍h tī in tng beh做夥chiūⁿ樓ê時，伊停落來講： 「管家先生，請小等--1-ē，我bē記chit關洗衫房ê百葉窗--a，to̍h ài去ka關--khài，nā無he ē kho̍k kui暝，去攪擾tio̍h主人in ang-á-bó͘！」 Sui-bóng講管家開始sió-khóa-á leh老款koh phāiⁿ 1-khian肚，伊mā是koh真想beh表現講，伊iáu真少年koh勇壯，só͘-pái，伊sûi to̍h ìn講： 「美人--ah，免--lah，我去to̍h好，che sap-á khang-khòe niâ，sûi to̍h好！」 管家sûi to̍h出發--ah，伊人1-ē走，cha-bó͘ gín-á即時kā hit 3支羽毛the̍h出來khǹg tī手面，緊phuh-phuh講： 「藉我ê真愛心肝頭ê chit 3支羽毛，望he百葉窗khi-khi-kho̍k-kho̍k lòng到天光lóng bē停，望管家先生ê雙手一直無閒leh關窗á。」 Koh來，Tāi-chì to̍h照伊所望--ê發生--a。 管家先生kā百葉窗關好--ah，m̄-koh “pū”--1-ē，窗á koh ka-tī開--開。伊to̍h koh ka關--1-遍，chit遍窗á iû-koh hiông-hiông開--開，koh去搧tio̍h伊ê面，m̄-koh伊bē-tàng喝停，一定ài繼續關，to̍h án-ne kui暝舞bē soah。從來m̄-bat án-ne--ê，chhoh-kàn-kiāu，pìn-piàng叫，phì-phè叫，摔窗á，chia ê tāi-chì餾kui暝，一直到天色phah-phú-á光，管家mā thiám kah連受氣ê氣力to無--ā，to̍h無lám無ne thōm轉去ka-tī ê眠床，決心講不管án-chóaⁿ，絕對m̄ kā cha暗ê tāi-chì講--出-去，無是去hông笑--死niâ。管家真正啥to無講，ah咱chit ê cha-bó͘ gín-á是kā hit 70鎊袋--leh，tī心內暗笑伊hit ê無緣ê管家á愛人。 過--1-chām-á了後，in hit ê pòaⁿ-ló-lāu，穿插pih-chah，漂撇ê駛馬車--ê，kāng款是數想beh chhōa chit ê khiáu koh súi ê洗衫女工chiâⁿ久--ah，tī伊去水hia̍p-á hia beh chhiūⁿ水hō͘馬á lim ê時，無意中去聽tio̍h in hit ê洗衫女工teh命令伊hit 3支羽毛，伊to̍h像管家án-ne，ùi鎖匙khang ka偷看，ho͘看tio̍h hit ê cha-bó͘ gín-á坐tī椅á頂teh曲脚，同齊時he衫lóng總洗好，熨好，teh kah平平，koh ē ka-tī自動飛去桌á頂。 Sòa--lòe，to̍h koh像管家kāng款，伊行去hit ê cha-bó͘ gín-á ê面頭前，講：「美人--ah，我cháng tio̍h你ê頭鬃尾--ah，你siāng好是mài kă拒絕，nā無…，我to̍h kā女主人講你是1 ê尪姨。」 Koh來cha-bó͘ gín-á真平靜ìn講：「Nā無錢啥lóng免講。」 駛馬車--ê ìn講：「Nā全然是án-ne niâ，我tī主人hia有khiām 40鎊，我明á-ĕng ē the̍h--過-來，到時希望你to̍h kā錢收--落-來。」 【Eng-kok Gín-á-kó͘】3-Ki Ú-mn̂g Siōng-chi̍p︱The Three Feathers Part 1 Goân-chok: Flora Annie Steel Hoan-e̍k: Chhòa It-bîn / KoaÔng Péng-hun Kóng-kó͘ / Phòe-ga̍k: Tân Hiáu-î Lâng-siaⁿ Phian-chip / Kàu-tùi: KoaÔng Péng-hun Jī-bō͘: Lîm Û-chin Tô͘: AI Chè-tô͘ Iáⁿ-phìⁿ: Tân Chu-hôa Oân-chéng ê Eng-bûn, Hàn-lô, POJ tùi-chiàu bûn-kó khǹg tī koaⁿ-hong bāng-chām: https://ch o-kang-a-lang.github.io/ POJ choân-bûn: Éng-kòe ū 1 ê chŏ͘-gín-á, i hō͘ 1 ê i m̄-bat kìⁿ kòe bīn ê cha-po͘-lâng jiok, liáu-āu to̍h kè hō͘--i, chit ê cha-po͘-lâng lóng sī tī thiⁿ-àm--ah liáu-āu chiah lâi ka phāⁿ, tī in kiat-hun liáu-āu, i iû-goân m̄-bat tī thiⁿ-àm chìn-chêng tńg chhù, mā lóng sī tī thiⁿ-kng chìn-chêng to̍h ē chhut-mn̂g. To̍h sǹg-kóng sī án-ne, cha-po͘-lâng mā sī tùi i chin hó chin ū-liōng, kā i sim-lāi siūⁿ-beh ài ê it-chhè lóng khoán kah chiâu tio̍h, só͘-pái i ū 1-chām-á chin boán-chiok. Tān-sī bô jōa kú liáu-āu, i ū 1-kóa pêng-iú, tek-khak sī khòaⁿ i ê ūn hó leh khí oàn-tò͘, khai-sí su-té-hā teh nauh kóng, i hit ê m̄-bat hông khòaⁿ kòe bīn ê ang-sài, it-tēng ū siáⁿ-mih bē kìⁿ-chèng--chit ê tāi-chì, chiah ē bô ài hông khòaⁿ--tio̍h. Tī in tú khai-sí teh kiâⁿ ê sî, chŏ͘-gín-á to̍h bat hò͘ⁿ-hiân kóng, sī án-chóaⁿ i ê ài-jîn-á bô hâm kî-tha ê cha-bó͘ gín-á ê kāng-khoán, tī ji̍t-sî-á kong-bêng-chèng-tāi lâi ka phāⁿ. Chhím thâu, i mā bô iàu-ì i ê chhù-piⁿ tī hia sái-ba̍k-bóe, a̍h sī ē-hâi ngia̍uh--leh ngia̍uh--leh teh ka àm-sī, m̄-koh kú--lâi, mā sī khai-sí kám-kak kóng, in teh kóng ê ōe hoān-sè sī ū kóa tō-lí. Só͘-pái, i koat-tēng beh ka-tī chhin-sin khì thàm khòaⁿ-māi-á--leh. To̍h tī 1 ê àm-sî, i thiaⁿ tio̍h in ang kiâⁿ ji̍p-lâi pâng-keng--ni̍h, i to̍h hiông-hiông kā la̍h-tiâu tiám--khí-lâi, in ang ê bīn sûi to̍h khì ho͘ khòaⁿ kah chheng-chheng-chhó-chhó. Óa! Bô-gî-gō͘ i sī hiah-nī phiau-phiat, iân-tâu kah ū chhun, súi kah ē hō͘ choân-sè-kài ê cha-bó͘-lâng tong-tiûⁿ to̍h khì saⁿh tio̍h i. M̄-koh i to̍h án-ne kā in ang khòaⁿ 1 ē niā-niā, in ang soah chŏaⁿ piàn-chó 1 chiah ka-pi-sek ê tōa-chiah chiáu-á, hiong-kài-kài teh ka gîn, ba̍k-chiu lāi choân-choân sī siū-khì kah chek-pī. Chiáu-á ka kóng: “Lí chò chit kiāⁿ tāi-chì to̍h sī leh hoán-pōe--góa, ūi tio̍h án-ne, tû-hui lí tī sòa--lòe ê 7 tang koh kòe 1 kang--ni̍h, choan-sim it-chì lâi thè góa khì hōng-hiàn, nā bô lí to̍h bē koh kìⁿ tio̍h góa--ah.” Cha-bó͘ gín-á khàu kah kui bīn choân ba̍k-sái, ná chhn̍gh ná ìn kóng: “Nā sī lí ē-tàng hôe-sim-choán-ì, kiò góa ho̍k-sāi 7 piàn ê 7 tang koh kòe 1 kang to ē-sái. Kā góa kóng góa ài án-chóaⁿ chò.” Lâi i hit ê chiáu-á ang to̍h ìn kóng: “Góa ē an-pâi khang-khòe hō͘ lí chò, lí ài lâu tī hia hó-hó-á chò kah 7 tang koh kòe 1 kang, nā sī ū lâng kā lí siâⁿ, kā lí koái, kiò lí mài koh chò chit ê khang-khòe, lí bē-tàng thiaⁿ. Nā sī lí bô chiàu-phín chiàu-kiâⁿ, góa to̍h éng-oán bē koh tńg--lâi-ah.” Chit ê tiâu-kiāⁿ, cha-bó͘ gín-á tah-èng--ah, chiáu-á to̍h kā i khoah-khoah ê ka-pi-sek si̍t-kó͘ thí--khui, chhōa i khì 1 keng tōa chhù-the̍h. Chiáu-á ang ka kóng: “In chia su-iàu 1 ê sé-saⁿ ê lú-kang, lí --ji̍p-khì, kā in kóng lí beh chhōe chia ê lú-chú-lâng, kóng lí beh lâi ín chit ê khang-khòe. M̄-koh lí ài ē-kì--chit, lí to̍h ài chò kàu 7 tang koh kòe 1 kang hiah-nī kú!” Cha-bó͘ gín-á ìn kóng: “M̄-koh che góa liân 7 kang to chò bē kàu neh, góa to bē-hiáu sé-saⁿ, mā bē-hiáu ut-saⁿ--ā.” Chiáu-á to̍h ka ìn kóng: “He bô iàu-kín, lí án-ne chò to̍h hó, lí ùi góa ê si̍t-kó͘ ē-té, óa sim-chōng ê só͘-chāi bán 3 ki ú-mn̂g--lo̍h-lâi, chit 3 ki ú-mn̂g put-koán jû-hô lóng ē thiaⁿ lí ê bēng-lēng. Lí kan-na su-iàu kā in khǹg tī lí ê chhiú-bīn, chhùi kóng: “Chià góa ê chin-ài sim-koaⁿ-thâu ê chit 3 ki ú-mn̂g, bāng che oân-boán.” Tāi-chì to̍h ē chò hó--ah.” Cha-bó͘ gín-á to̍h ùi chiáu-á ê si̍t-kó͘ ē bán 3 ki ú-mn̂g, sòa--lòe, chiáu-á to̍h poe--cháu-ah. Cha-bó͘ gín-á to̍h chiàu i hông hoan-hù--ê khì chò, tōa chhù-the̍h ê lú-chú-lâng mā ûn-ná ū ka chhiàⁿ. To bô hit khoán chhiūⁿ i hiah-nī hó-kha-chhiú ê sé-saⁿ-kang--lah, tong-jiân--lah, lí ka siūⁿ khòaⁿ-māi, i to̍h kan-na ài kiâⁿ ji̍p-khì sé-saⁿ-á-keng, mn̂g chhòaⁿ--leh, pah-hio̍h-thang ka thoah--lo̍h-lâi, án-ne to̍h bô lâng ē-tàng khòaⁿ tio̍h i teh chhòng-siáⁿ, sòa--lòe koh kā hit 3 ki ú-mn̂g the̍h--chhut-lâi, kóng: “Chià góa ê chin-ài sim-koaⁿ-thâu ê chit 3 ki ú-mn̂g, bāng chhâ-hóe tiám khí-lâi hiâⁿ tâng-tiáⁿ, saⁿ hun-lūi hó, sé hó, kún--kòe, phi ho͘ ta, chih hó, teh pêⁿ, ut hó-sè.” Lí ka khòaⁿ! chheng-khì kah pe̍h-siak-siak ê saⁿ to̍h án-ne chū-tōng poe khì toh-á téng, sûi-sî ē-tàng siu--khí-lâi. Só͘-pái, lú-chú-lâng tùi i sī put-chí-á tùi-tiōng, kóng chiông-lâi m̄-bat khòaⁿ kòe hiah hó ê sé-saⁿ lú-kang. To̍h án-ne, 4 tang kòe--khì-ah, mā bô hong-siaⁿ kóng i beh lī-khui. M̄-koh kî-tha ê sú-iōng-lâng sī jú lâi jú oàn-tò͘--i, iû-kî sī i koh seⁿ tio̍h chin súi, hia ê cha-po͘ sú-iōng-lâng ta̍k-ê to khì ài tio̍h i, koh siūⁿ-beh ka chhōa. M̄-koh i siáng to m̄-goān kè, in-ūi i it-ti̍t khó͘-sim teh tán-thāi i ê chiáu-á ang, í lâng ê iūⁿ-siùⁿ tńg-lâi i seng-khu piⁿ ê hit 1 kang. Siūⁿ-beh chhōa--i ê lâng lāi-té, kî-tiong ū 1 ê sī 1-khian-tō͘ tōa-tōa khian ê koán-ke, ū 1 ji̍t, i ùi chiú-koán tńg--lâi ê sî, tú-hó khì keng-kòe sé-saⁿ-á-keng. I thiaⁿ tio̍h 1 ê siaⁿ kóng: “Chià góa ê chin-ài sim-koaⁿ-thâu ê chit 3 ki ú-mn̂g, bāng chhâ-hóe tiám khí-lâi hiâⁿ tâng-tiáⁿ, saⁿ hun-lūi hó, sé hó, kún--kòe, phi ho͘ ta, chih hó, teh pêⁿ, ut hó-sè.” I kám-kak chin kî-koài, to̍h ùi só-sî khang ka thau khòaⁿ, khòaⁿ tio̍h hit ê cha-bó͘ gín-á chē tī í-á téng teh khiau-kha, tâng-chê-sî he saⁿ to̍h ka-tī chū-tōng poe khì toh-á téng, lóng chhú-lí kah thèng hó thang ka siu--khí-lâi-ah. Só͘-pái hit àm, i to̍h khì chhōe hit ê cha-bó͘ gín-á, chhiàng kóng, nā sī koh khòaⁿ i bô, kī-choa̍t i ê kiû-hun, i to̍h ē khì kā lú-chú-lâng kóng, kóng i hit ê it-tó͘ ê sé-saⁿ lú-kang sī 1 ê ang-î. Kàu-sî, to̍h sǹg-kóng i bô khì hông oa̍h-oa̍h sio kah sí, mā ē bô thâu-lō͘. Taⁿ, chŏ͘-gín-á hoân-ló kah m̄ chai beh án-chóaⁿ, nā sī kóng, i tùi i ê chiáu-á-ang put-tiong, a̍h-sī kóng i bô hōng-thāi i ê lú-chú-lâng kàu 7 tang koh kòe 1 kang ê kú, i ê chiáu-á-ang lóng kāng-khoán bē koh tńg--來, só͘-pái ito̍h chià-kháu kóng, nā sī bô the̍h ū kàu-gia̍h ê chîⁿ thang hō͘ i boán-ì, i siáng to bē khó-lū. Thiaⁿ tio̍h che, hit ê tōa-kho͘-pé ê koán-ke chhiò--chhut-lâi. Ìn kóng: “ Chîⁿ? Góa ū 70 pōng khiām tī chú-lâng hia, án-ne kám koh bô-kàu thang hō͘ lí boán-ì?” I ìn kóng: “Hoān-sè ū kàu.” Só͘-pái, keh-kang e-àm koán-ke the̍h 70 pōng ê kim-pè lâi chhōe--i, i to̍h iōng ûi-sin-kûn kā chîⁿ tau--leh, kóng án-ne i boán-chiok--ah. In-ūi i í-keng siūⁿ tio̍h 1 ê kè-ōe. To̍h tī in tng beh chò-hóe chiūⁿ lâu ê sî, i thêng lo̍h-lâi kóng: “Koán-ke sian-siⁿ, chhiáⁿ sió-tán--1-ē, góa bē-kì-chit koaiⁿ sé-saⁿ-pâng ê pah-hio̍h-thang--a, to̍h ài khì ka koaiⁿ--khài, nā-bô he ē kho̍k kui-mê, khì kiáu-jiáu tio̍h chú-lâng in ang-á-bó͘!” Sui-bóng kóng koán-ke khai-sí sió-khóa-á leh lāu-khoán koh phāiⁿ 1-khian tō͘, i mā sī koh chin siūⁿ-beh piáu-hiān kóng, i iáu chin siàu-liân koh ióng-chòng, só͘-pái, i sûi to̍h ìn kóng: “Bí-jîn--ah, bián--lah, góa khì to̍h hó, che sap-á khang-khòe niâ, sûi to̍h hó!” Koán-ke sûi to̍h chhut-hoat--ah, i lâng 1-ē cháu, cha-bó͘ gín-á chek-sî kā hit 3-ki ú-mn̂g the̍h chhut-lâi khǹg tī chhiú-bīn, kín-phuh-phuh kóng: “Chià góa ê chin-ài sim-koaⁿ-thâu ê chit 3 ki ú-mn̂g, bāng he pah-hio̍h-thang khi-khi-kho̍k-kho̍k lòng kàu thiⁿ-kng lóng bē thêng, bāng koán-ke sian-siⁿ ê siang-chhiú it-ti̍t bô-êng leh koaiⁿ thang-á.” Koh-lâi, tāi-chì to̍h chiàu i só͘-bāng--ê hoat-seng--a. Koán-ke sian-siⁿ kā pah-hio̍h-thang koaiⁿ hó--ah, m̄-koh “pū”--1-ē, thang-á koh ka-tī khui--khui. I to̍h koh ka koaiⁿ--1-piàn, chit piàn thang-á iû-koh hiông-hiông khui--khui, koh khì siàn tio̍h i ê bīn, m̄-koh i bē-tàng hoah thêng, it-tēng ài kè-sio̍k koaiⁿ, to̍h án-ne kui mî bú bē soah. Chiông-lâi m̄-bat án-ne--ê, chhoh-kàn-kiāu, pìn-piàng-kiò, phì-phè-kiò, siak thang-á, chia ê tāi-chì liū kui mê, it-ti̍t kàu thiⁿ-sek phah-phú-á-kng, koán-ke mā thiám kah liân siū-khì ê khùi-la̍t to bô--ā, to̍h bô-lám-bô-ne thōm tńg-khì ka-tī ê bîn-chhn̂g, koat-sim kóng put-koán án-chóaⁿ, choa̍t-tùi m̄ kā cha-àm ê tāi-chì kóng--chhut-khì, bô sī khì hông chhiò--sí niâ. Koán-ke chin-chiàⁿ siáⁿ to bô kóng, ah lán chit ê cha-bó͘ gín-á sī kā hit 70 pōng tē--leh, tī sim-lāi àm-chhiò i hit ê bô-iân ê koán-ke-á ài-jîn. Kòe--1-chām-á liáu-āu, in hit ê pòaⁿ-ló-lāu, chhēng-chhah pih-chah, phiau-phiat ê sái-bé-chhia--ê, kāng-khoán sī siàu-siūⁿ beh chhōa chit ê khiáu koh súi ê sé-saⁿ lú-kang chiâⁿ kú--ah, tī i khì chúi-hia̍p-á hia beh chhiūⁿ chúi hō͘ bé-á lim ê sî, bô-ì-tiong khì thiaⁿ tio̍h in hit ê sé-saⁿ lú-kang teh bēng-lēng i hit 3 ki ú-mn̂g, i to̍h chhiūⁿ koán-ke án-ne, ùi só-sî-khang ka thau khòaⁿ, ho͘ khòaⁿ tio̍h hit ê cha-bó͘ gín-á chē tī í-á téng teh khiau-kha, tâng-chê-sî he saⁿ lóng-chóng sé hó, ut hó, teh kah pêng-pêng, koh ē ka-tī chū-tōng poe khì toh-á téng. Sòa--lòe, to̍h koh chhiūⁿ koán-ke kāng-khoán, i kiâⁿ khì hit ê cha-bó͘ gín-á ê bīn-thâu-chêng, kóng: “Bí-jîn--ah, góa cháng tio̍h lí ê thâu-chang-bé--ah, lí siāng hó sī mài kă kī-choa̍t, nā bô…, góa to̍h kā lú-chú-lâng kóng lí sī 1 ê ang-î.” Koh-lâi cha-bó͘ gín-á chin pêng-chēng ìn kóng: “Nā bô chîⁿ siáⁿ lóng bián kóng.” Sái-bé-chhia--ê ìn kóng: “Nā chn̂g-jiân sī án-ne niâ, góa tī chú-lâng hia ū khiàm 40 pōng, góa bîn-á-ĕng ē the̍h--kòe-lâi, kàu-sî hi-bāng lí to̍h kā chîⁿ siu--lo̍h-lâi.” --Hosting provided by SoundOn
-
【民間故事】燈猴傳說 文稿︱陳姿樺 Ko͘-chiáu 潤稿︱蔡逸民 BuLuhSuh 講古／影片製作︱陳姿樺 Ko͘-chiáu 聲音後製／校對︱柯王炳勳 Bí-leng 完整ê漢羅／POJ對照文稿khǹg ti官方網站：https://cho-kang-a-lang.github.io/ 漢羅全文： 有1 ê美麗ê島嶼，伊ê名號做Formosa，mā叫做台灣。 Tī hit ê猶未有電火ê年代，島嶼ê人nā是beh照光(chhiō-kng)，to̍h ài用油燈chiah會使--得。 In用竹á做1 ê架á，kā 1塊細塊盤á khǹg tī架á頂面，盤á內底倒1寡á土豆油，koh kā燈心khǹg入去盤á內底，án-ne燈心koh ka點--起-來，to̍h會使kā烏暗ê暗暝照ho͘光。 竹á做ê燈架á，伊ê外形to̍h親像1隻猴ku--leh。 島--lih ê人相信ta̍k項物件lóng是神靈ê化身，像che油燈to̍h是猴á仙ê化身，所擺in to̍h ka號做「燈猴」。 燈猴hō͘人真大ê幫贊，便nā有伊，tio̍h準講是半暝mā會使看kah明明明。 Tī 1 ê年底將近beh過節ê時陣，島民為tio̍h beh感謝神明kā眾人照顧，lóng無閒teh chhoân chheⁿ-chhau--ê，準備beh來拜神。 燈猴是守護厝--ni̍h ê神明，hō͘人光明，不而過島民soah一直無ka拜。燈猴to̍h án-ne一直等一直等，lóng等無人。燈猴失望ka̍h，感覺ta̍k-ke kan-na beh拜其他ê神明，soah kā ka-tī放bē記--ah！ 燈猴足chheh心--ê，伊認為台灣島民忘恩背義，所擺伊to̍h kā滿腹ê苦情投hō͘玉皇大帝聽。 玉皇大帝聽燈猴講了後，mā感覺台灣ê島民m̄知影thang感恩，chiū決定beh hō͘台灣島民淡薄á教示，hō͘台灣島做大水，一直到台灣島沉落海--去。 玉皇大帝做決定ê時陣，土地公伯--á拄好to̍h tī邊--á。伊了解講台灣島民單純koh善良，in知影「食果子to̍h ài拜樹頭」，m̄是像燈猴講--ê án-ne，一定是toh去重tâⁿ--ā。 土地公伯--á to̍h kā chit ê消息放送hō͘其他ê神明知，koh hâm善良ê觀世音菩薩tàu陣苦勸玉皇大帝，想beh阻止chit層代誌發生。 M̄-koh iáu是無法度改變玉皇大帝ê心思，伊猶原想beh替燈猴主持公道。所擺土地公伯--á to̍h kā 29暝hit工會落大雨ê信息，偷偷á講hō͘四常去土地公廟ê島民知影，koh交帶in千萬to̍h ài細jī，向望ta̍k-ke lóng會使平安渡過chit táu ê災難。 島民趕緊kā chit層代誌放送--出-去，勇敢ê台灣島民決定tàu陣面對teh beh發生ê代誌。To̍h準講是落大雨，in mā m̄驚，上要緊--ê，是ta̍k-ke團結總--是有才調thang處理。 Ta̍k-ke討論ê結果講29暝hit工，所有ê島民lóng來穿in ka-tī上súi ê衫á褲，chhoân上phong-phài ê食物(chia̍h-mi̍h)。Koh通知平常時無tòa做夥ê親人hit工lóng to̍h趕--轉-來，ta̍k-ke做夥好好á團圓、食飯，好好á享受tī人世間上尾1暝。序大koh kā ka-tī平素時儉--loài ê錢khǹg tī紅色ê袋á，向望災禍過--ah了後，ta̍k-ke lóng平安，會凍留hō͘囝兒序細thang用。 全島ê人繼續無閒chhoân好料--ê拜神明、祖先，當然mā包括拜燈猴，感謝燈猴hō͘眾人光明。 Chit ê時陣燈猴chiah發見ka-tī誤會台灣島民--ā！原來in kan-na是siuⁿ無閒，暫時無ka拜niā-niā，燈猴ê心內感覺足後悔--ê。Chiū趕緊走去kā玉皇大帝稟報ka-tī舞m̄-tio̍h--去-ah！ 29暝hit工，雷公熾爁直直來，風雨mā chiâⁿ大。島民決定kui暝lóng m̄睏，互相保護，mā珍惜ta̍k-ke會凍做夥ê日子。 看天氣hiah bái，ta̍k-ke心內lóng有無好ê按算--ah！無疑悟天tú phah-phú-kng ê時陣，外口本底烏mà-mà，soah hiông-hiông變好天，無風mā無雨，koh出大日頭。 Ta̍k-ke歡喜ka̍h，趕緊去kā親chiâⁿ朋友、厝邊頭尾報平安，四界lóng鬧熱滾滾，炮á聲響連天。眾人互相講恭喜，恭喜ta̍k-ke lóng平安無代誌。 隔轉工，結婚ê女性mā轉去後頭厝，看序大有平安--無。 無閒2工--a！第3工ta̍k-ke to̍h好好á ka歇睏。 第4工to̍h準備迎接神明轉--來，感謝神明kā ta̍k-ke保庇。 第5工骨力ê台灣島民koh開始phah-piàⁿ做khang-khòe--ah！ 尾--á，島民走去土地公廟，問土地公伯--á，he雨是按怎停--ê？Iáu-koh出日頭--neh。 土地公伯--á講是因為玉皇大帝看tio̍h台灣島民hiah-ni̍h團結，koh真心感謝神明kā in保庇。玉皇大帝to̍h知影是ka-tī誤解台灣島民--ā！眾神明議論了後，決定beh koh一直kā台灣島民保護。 To̍h án-ne便nā到29暝hit工，台灣島民lóng會轉去hâm親人團圓，歡歡喜喜做夥食飯、過年。當然ta̍k-ke mā lóng會記得感謝hō͘眾人光明ê燈猴。 親愛ê朋友，lín兜kám有hâm燈猴kāng款，一直lóng恬恬á kā咱看顧，咱soah有時陣無細jī ē ka放bē記ê人？Ài會記得定定kā咱所愛ê人，表示咱tùi in ê感激--ŏ͘！ POJ Choân-bûn: Ū 1 ê bí-lē ê tó-sū, i ê miâ hō-chò Formosa, mā kiò-chò Tâi-oân. Tī hit ê iáu-bē ū tiān-hóe ê nî-tāi, tó-sū ê lâng nā-sī beh chhiō-kng, to̍h ài iōng iû-teng chiah ē-sái--tit. In iōng tek-á chò 1 ê kè-á, kā 1 tè sè-tè pôaⁿ-á khǹg tī kè-á téng-bīn, pôaⁿ-á lāi-té tò 1 kóa-á thô͘-tāu-iû, koh kā teng-sim khǹg ji̍p-khì pôaⁿ-á lāi-té, án-ne teng-sim koh ka tiám--khí-lâi, to̍h ē-sái kā o͘-àm ê àm-mî chiò ho͘ kng. Tek-á chò ê teng-kè-á, i ê gōa-hêng to̍h chhin-chhiūⁿ 1 chiah kâu ku--leh. Tó--lih ê lâng siong-sìn ta̍k-hāng mi̍h-kiāⁿ lóng sī sîn-lêng ê hòa-sin, chhiūⁿ che iû-teng to̍h sī kâu-á-sian ê hòa-sin, só͘-pái in to̍h ka hō-chò “Teng-kâu”. Teng-kâu hō͘ lâng chin tōa ê pang-chān, piān-nā ū i, to̍h chún-kóng sī pòaⁿ-mê mā ē-sái khòaⁿ kah bêng-bêng-bêng. Tī 1 ê nî-té chiong-kīn beh kòe chiat ê sî-chūn, tó-bîn ūi-tio̍h beh kám-siā sîn-bêng kā chiòng-lâng chiàu-kò͘, lóng bô-êng teh chhoân chheⁿ-chhau--ê, chún-pī beh lâi pài-sîn. Teng-kâu sī siú-hō͘ chhù--ni̍h ê sîn-bêng, hō͘ lâng kong-bêng, put-jī-kò tó-bîn soah it-ti̍t bô ka pài. Teng-kâu to̍h án-ne it-ti̍t tán it-ti̍t tán, lóng tán bô lâng. Teng-kâu sit-bōng ka̍h, kám-kak ta̍k-ke kan-na beh pài kî-thaⁿ ê sîn-bêng, soah kā ka-tī bē-kì--ah! Teng-kâu chiok chheh-sim--ê, i jīn-ûi Tâi-oân tó-bîn bōng-un-pōe-gī , só͘-pái i to̍h kā móa-pak ê khó͘-chêng tâu hō͘ Gio̍k-hông-tāi-tè thiaⁿ. Gio̍k-hông-tāi-tè thiaⁿ Teng-kâu kóng liáu-āu, mā kám-kak Tâi-oân ê tó-bîn m̄-chai-iáⁿ thang kám-un, chiū koat-tēng beh hō͘ Tâi-oân tó-bîn tām-po̍h-á kà-sī, hō͘ Tâi-oân-tó chò-tōa-chúi, it-ti̍t kàu Tâi-oân-tó tîm lo̍h-hái--khì. Gio̍k-hông-tāi-tè chò koat-tēng ê sî-chūn, Thó͘-tī-kong-peh--á tú-hó to̍h tī piⁿ--á. I liáu-kái kóng Tâi-oân tó-bîn tan-sûn koh siān-liông, in chai-iáⁿ “Chia̍h kóe-chí to̍h ài pài chhiū-thâu”, m̄-sī chhiūⁿ Teng-kâu kóng--ê án-ne, it-tēng sī toh khì têng-tâⁿ--ā. Thó͘-tī-kong-peh--á to̍h kā chit ê siau-sit hòng-sàng hō͘ kî-thaⁿ ê sîn-bêng chai, koh hâm siān-liông ê Koan-sè-im Phô͘-sat tàu-tīn khó͘-khǹg Gio̍k-hông-tāi-tè, siūⁿ-beh chó͘-chí chit chân tāi-chì hoat-seng. M̄-koh iáu-sī bô hoat-tō͘ kái-piàn Gio̍k-hông-tāi-tè ê sim-su, i iû-goân siūⁿ-beh thè Teng-kâu chú-chhî kong-tō. Só͘-pái Thó͘-tī-kong-peh--á to̍h kā 29 mê hit kang ē lo̍h-tōa-hō͘ ê sìn-sit, thau-thau-á kóng hō͘ sù-siông khì Thó͘-tī-kong-biō ê tó-bîn chai-iáⁿ, koh kau-tài in chhian-bān to̍h ài sè-jī, ǹg-bāng ta̍k-ke lóng ē-sái pêng-an tō͘ kòe chit táu ê chai-lān. Tó-bîn kóaⁿ-kín kā chit chân tāi-chì hòng-sàng--chhut-khì, ióng-kám ê Tâi-oân tó-bîn koat-tēng tàu-tīn bīn-tùi teh beh hoat-seng ê tāi-chì. To̍h chún-kóng sī lo̍h-tōa-hō͘, in mā m̄-kiaⁿ, siōng iàu-kín--ê, sī ta̍k-ke thoân-kiat chóng--sī ū châi-tiāu thang chhú-lí. Ta̍k-ke thó-lūn ê kiat-kó kóng 29 mê hit kang, só͘-ū ê tó-bîn lóng lâi chhēng in ka-tī siōng súi ê saⁿ-á-khò͘, chhoân siōng phong-phài ê chia̍h-mi̍h. Koh thong-ti pêng-siông-sî bô tòa chò-hóe ê chhin-lâng hit-kang lóng to̍h kóaⁿ--tńg-lâi, ta̍k-ke chò-hóe hó-hó-á thoân-îⁿ, chia̍h-pn̄g, hó-hó-á hiáng-siū tī jîn-sè-kan siōng-bóe 1 mê. Sī-tōa koh kā ka-tī pêng-sò͘-sî khiām--loài ê chîⁿ khǹg tī âng-sek ê tē-á, ǹg-bāng chai-ē kòe--ah liáu-āu, ta̍k-ke lóng pêng-an, ē-tàng lâu hō͘ kiáⁿ-jî sī-sè thang iōng. Choân tó ê lâng kè-sio̍k bô-êng chhoân hó-liāu--ê pài sîn-bêng, chó͘-sian, tong-jiân mā pau-koat pài Teng-kâu, kám-siā Teng-kâu hō͘ chiòng-lâng kong-bêng. Chit ê sî-chūn Teng-kâu chiah hoat-kiàn ka-tī gō͘-hōe Tâi-oân tó-bîn--ah! Goân-lâi in kan-na sī siuⁿ bô-êng, chiām-sî bô ka pài niā-niā, Teng-kâu ê sim-lāi kám-kak chiok hiō-hóe--ê. Chiū kóaⁿ-kín cháu-khì kā Gio̍k-hông-tāi-tè pín-pò ka-tī bú m̄-tio̍h--khì-ah! 29 mê hit kang, lûi-kong sih-nà ti̍t-ti̍t lâi, hong-hō͘ mā chiâⁿ tōa. Tó-bîn koat-tēng kui-mî lóng m̄ khùn, hō͘-siong pó-hō͘, mā tin-sioh ta̍k-ke ē-tàng chò-hóe ê ji̍t-chí. Khòaⁿ thiⁿ-khì hiah bái, ta̍k-ke sim-lāi lóng ū bô-hó ê àn-sǹg--ah! Bô-gî-gō͘ thiⁿ tú phah-phú-kng ê sî-chūn, gōa-kháu pún-té o͘-mà-mà, soah hiông-hiông pìⁿ hó-thiⁿ, bô hong mā bô hō͘, koh chhut tōa ji̍t-thâu. Ta̍k-ke hoaⁿ-hí ka̍h, kóaⁿ-kín khì kā chhin-chiâⁿ pêng-iú, chhù-piⁿ-thâu-bóe pò pêng-an, sì-kè lóng lāu-jia̍t kún-kún, phàu-á siaⁿ hiáng liân thian. Chiòng-lâng hō͘-siong kóng kiong-hí, kiong-hí ta̍k-ke lóng pêng-an bô tāi-chì. Keh tńg kang, kiat-hun ê lú-sèng mā tńg-khì āu-thâu-chhù, khòaⁿ sī-tōa ū pêng-an--bô. Bô-êng 2 kang--a! Tē 3 kang ta̍k-ke to̍h hó-hó-á ka hio̍h-khùn. Tē 4 kang to̍h chún-pī gêng-chiap sîn-bêng tńg--lâi, kám-siā sîn-bêng kā ta̍k-ke pó-pì. Tē 5 kang kut-la̍t ê Tâi-oân tó-bîn koh khai-sí phah-piàⁿ chò khang-khòe--ah! Bóe--á, tó-bîn cháu-khì Thó͘-tī-kong-biō, mn̄g Thó͘-tī-kong-peh--á, he hō͘ sī án-chóaⁿ thêng--ê? Iáu-koh chhut ji̍t-thâu--neh. Thó͘-tī-kong-peh--á kóng sī in-ūi Gio̍k-hông-tāi-tè khòaⁿ-tio̍h Tâi-oân tó-bîn hiah-ni̍h thoân-kiat, koh chin-sim kám-siā sîn-bêng kā in pó-pì. Gio̍k-hông-tāi-tè to̍h chai-iáⁿ sī ka-tī gō͘-kái Tâi-oân tó-bîn--ā! Chiòng sîn-bêng gī-lūn liáu-āu, koat-tēng beh koh it-ti̍t kā Tâi-oân tó-bîn pó-hō͘. To̍h án-ne piān-nā kàu 29 mê hit kang, Tâi-oân tó-bîn lóng ē tńg-khì hâm chhin-lâng thoân-îⁿ, hoaⁿ-hoaⁿ-hí-hí chò-hóe chia̍h-pn̄g, kòe-nî. Tong-jiân ta̍k-ke mā lóng ē kì-ti̍t kám-siā hō͘ chiòng-lâng kong-bêng ê Teng-kâu. Chhin-ài ê pêng-iú, lín tau kám ū hâm Teng-kâu kāng-khoán, it-ti̍t lóng tiām-tiām-á kā lán khòaⁿ-kò͘, lán soah ū sî-chūn bô sè-jī ē ka pàng-bē-kì ê lâng? Ài ē-kì-tit tiāⁿ-tiāⁿ kā lán só͘ ài ê lâng. Piáu-sī lán tùi in ê kám-kek--ŏ͘! --Hosting provided by SoundOn
-
台語有字！完整漢羅/白話字POJ原稿，請看做工á人台語工作室網站 https://cho-kang-a-lang.github.io/ [收聽Podcast] SoundOn https://bit.ly/ChKaL_SO Spotify https://spoti.fi/48jD2tI KKBOX Podcast https://bit.ly/ChKaL_KK Apple Podcast https://apple.co/3HZyfD3 [社交平台 Siā-kau Pêⁿ-tâi] Facebook https://bit.ly/ChKaL_FB Instagram https://www.instagram.com/chokangalang/ X (Twitter) https://twitter.com/chokangalang 方格子 https://vocus.cc/salon/cho-kang-a-lang 以下內容是漢羅kah白話字原稿，有需要歡迎ta̍k-ke來參考。 【漢羅版】 台語內底ê goán kah咱，lóng是leh講2 ê人以上ê群體，m̄-koh真chē台語語感khah無hiah好ê朋友，chhiāⁿ-chhiāⁿ ē kā goán講做咱，咱講做goán，che有時nā聽tio̍h人講m̄ tio̍h，雖bóng是知影伊ê意思，m̄-koh to̍h是ē怪怪khê-khê，感覺話講tio̍h無hiah súi-khùi án-ne，今á日咱專工做chit齣來解說看māi--leh，看kám ē-sái幫助ta̍k-ê對chit 2字koh khah有理解。 咱直接用情境來解說，pí-jū講我kah我ê小弟，今á日出門，tú好去tn̄g tio̍h米奶--ê，káng kah真歡喜，koh tú好食tàu ê時間mā beh到，chit時我to̍h講：「無咱做夥來去食飯，好--無？」Chit chūn chit ê咱，是teh講siáng？是在場ê 3 ê人lóng總有算ŏ͘！咱chit ê字，to̍h是所有有聽tio̍h chit句話ê人lóng算chāi內。 Kāng款是tú-chiah hit ê情境，我nā kā米奶--ê講，「好，真歡喜hâm你開講，án-ne goán ài先去食飯--ā，有閒chiah來goán tau坐。」Chit時chit ê goán是leh講siáⁿ-mih人？是我hâm goán小弟，米奶--ê to̍h無算在內。Goán to̍h是講本底hâm你是kāng 1 tīn ê人，比喻講是ka-tī厝--ni̍h ê人，kāng公司--ê，kāng組--ê，kāng班--ê，kāng國--ê，kāng 1 ê群體去tú tio̍h另外1 ê群體a̍h是個人，chiah ē用tio̍h goán。 Koh講1 ê例來補充，像講，goán cha-bó͘-kiáⁿ kā我講：「今á日咱班ê合唱比賽tio̍h第1名neh！」Án-ne kám tio̍h？M̄-tio̍h ŏ͘，因為我to m̄是伊ê同學，咱to̍h是ē kā聽tio̍h chit句話ê人mā算在內，só͘-pái，chit句to̍h ài講做：「今á日goán班ê合唱比賽tio̍h第1名neh！」Koh來1 ê例想看māi，mî-á-chài，kui家夥á lóng ài出動，beh去pōe墓，老pē to̍h講：「今á日goán to̍h ài khah早睏--leh，mî-á-chài真早to̍h ài出門。」Án-ne mā是m̄ tio̍h，因為án-ne gín-á ē聽做是老pē kah老母khah早睏to̍h好，chit-chūn to̍h ài講咱，chiah是kui口灶lóng ài khah早睏。 有1 ê笑詼是án-ne講，春嬌hâm志明2 ê人lóng離過婚，1人lóng有1 ê前1段婚姻ê gín-á，koh來，春嬌hâm志明2 ê人緣份到--ah，chŏaⁿ結婚，尾--á in 2 ê人koh生1 ê kiáⁿ，to̍h án-ne 5 ê人做夥生活。有1 kang，志明到厝，看tio̍h siāng細漢--ê leh háu，趕緊問春嬌：「是按怎--ah？細漢--ê nah ē leh háu？」春嬌á無奈ka應講：「Aih，to̍h goán kiáⁿ kah lín kiáⁿ做夥phah咱kiáⁿ--lah。」Siāng尾hit句話，實在巧妙koh心適，用來解說咱今á日ê主題koh真tú好！ 總講--1-句，你nā聽tio̍h咱，to̍h是koh來beh講ê tāi-chì有包括你，你nā聽tio̍h goán，to̍h是koh來ê tāi-chì無包括你。精差to̍h tī chia，當然goán chit ê字，有ê人是講做gún，che是腔口差，意思無siáⁿ-mih無kâng。 M̄-koh，有1 ê kah頂面所講ê情形無kâng ê例外，親像講，有人來chhi̍h電鈴，咱ka問講：「咱toeh beh chhōe？」咱去食飯，走桌--ê來問講：「今á日咱beh ài食siáⁿ？」Tú tio̍h chheⁿ-hūn人，咱ka請教講：「請問咱按怎稱呼？」Tī chit kóa所在，chit ê咱，是leh表示「你」ê意思。是按怎ē án-ne？咱台灣人本底to̍h厚禮數，án-ne kâng問，表示講咱是kā伊當做ka-tī chit pêng ê人teh對待，khah親切，khah有人情味。 【Pe̍h-ōe-jī pán】 Tâi-gí lāi-té ê goán kah lán, lóng sī leh kóng 2 ê lâng í-siōng ê kûn-thé, m̄-koh chin chē Tâi-gí gí-kám khah bô hiah hó ê pêng-iú, chhiāⁿ-chhiāⁿ ē kā goán kóng chò lán, lán kóng chò goán, che ū sî nā thiaⁿ tio̍h lâng kóng m̄ tio̍h, sui-bóng sī chai-iáⁿ i ê ì-sù, m̄-koh to̍h sī ē koài-koài khê-khê, kám-kak ōe kóng tio̍h bô hiah súi-khùi án-ne, kin-á-ji̍t lán choan-kang chò chit chhut lâi kái-soeh khòaⁿ-māi--leh, khòaⁿ kám ē-sái pang-chō͘ ta̍k-ê tùi chit 2 jī koh khah ū lí-kái. Lán ti̍t-chiap iōng chêng-kéng lâi kái-soeh, pí-jū kóng góa kah góa ê sió-tī, kin-á-ji̍t chhut-mn̂g, tú-hó khì tn̄g tio̍h Bí-leng--ê, káng kah chin hoaⁿ-hí, koh tú-hó chia̍h-tàu ê sî-kan mā beh kàu, chit sî góa to̍h kóng:” Bô lán chò-hóe lâi khì chia̍h-pn̄g, Hó--bô?” Chit chūn chit ê lán, sī teh kóng siáng? Sī chāi-tiûⁿ ê 3 ê lâng lóng-chóng ū sǹg ŏ͘! Lán chit ê jī, to̍h sī só͘-ū ū thiaⁿ tio̍h chit kù ōe ê lâng lóng sǹg chāi lāi. Kāng-khoán sī tú-chiah hit ê chêng-kéng, Góa nā kā Bí-leng--ê kóng, ” Hó, chin hoaⁿ-hí hâm lí khai-káng, án-ne goán ài seng khì chia̍h-pn̄g--ā, ū êng chiah lâi goán tau chē.” Chit-sî chit ê goán sī leh kóng siáⁿ-mih lâng? Sī góa hâm goán sió-tī, Bí-leng--ê to̍h bô sǹg chāi-lāi. Goán to̍h sī kóng pún-té hâm lí sī kāng 1 tīn ê lâng, pí-ū kóng sī ka-tī chhù--ni̍h ê lâng, kāng kong-si--ê, kāng cho͘--ê, kāng pan--ê, kāng kok--ê, kāng 1 ê kûn-thé khì tú tio̍h lēng-gōa 1 ê kûn-thé a̍h sī kò-jîn, chiah ē iōng tio̍h goán. Koh kóng 1 ê lē lâi pó͘-chhiong, chhiūⁿ-kóng, goán cha-pó͘-kiáⁿ kā góa kóng:” Kin-á-ji̍t lán pan ê ha̍p-chhiùⁿ pí-sài tio̍h tē 1 miâ neh!” Án-ne kám tio̍h? M̄-tio̍h ŏ͘, in-ūi góa to m̄ sī i ê tông-o̍h, lán to̍h sī ē kā thiaⁿ tio̍h chit kù ōe ê lâng mā sǹg chāi-lāi, só͘-pái, chit kù to̍h ài kóng chòe:” Kin-á-ji̍t goán pan ê ha̍p-chhiùⁿ pí-sài tio̍h tē 1 miâ neh!” Koh lâi 1 ê lē siūⁿ khòaⁿ-māi, mî-á-chài, kui ke-hóe-á lóng ài chhut-tōng, beh khì pōe bōng, lāu-pē to̍h kóng:” Kin-á-ji̍t goán to̍h ài khah chá khùn--leh, mî-á-chài chin chá to̍h ài chhut-mn̂g.” Án-ne mā sī m̄ tio̍h, in-ūi án-ne gín-á ē thiaⁿ chò sī lāu-pē kah lāu-bú khah chá khùn to̍h hó, chit-chūn to̍h ài kóng lán, chiah sī kui kháu-chàu lóng ài khah chá khùn. Ū 1 ê chhiò-khoe sī án-ne kóng, Chhun-kiau hâm Chì-bêng 2 ê lâng lóng lî kòe hun, 1 lâng lóng ū 1 ê chêng 1 tōaⁿ hun-in ê gín-á, koh lâi, Chhun-kiau hâm Chì-bêng 2 ê lâng iân-hūn kàu--ah, chŏaⁿ kiat-hun, bóe--á in 2 ê lâng koh seⁿ 1 ê kiáⁿ, to̍h án-ne 5 ê lâng chò-hóe seng-oa̍h. Ū 1 kang, Chì-bêng kàu chhù, khòaⁿ tio̍h siāng sè-hàn--ê leh háu, kóaⁿ-kín mn̄g Chhun-kiau:” Sī án-chóaⁿ--ah? Sè-hàn--ê nah ē leh háu?” Chhun-kiau-á bô-nāi ka ìn kóng:” Aih, to̍h goán kiáⁿ kah lín kiáⁿ chò-hóe phah lán kiáⁿ--lah.” Siāng bóe hit kù ōe, si̍t-chāi khá-miāu koh sim-sek, iōng lâi kái-soeh lán kin-á-ji̍t ê chú-tê koh chin tú hó! Chóng kóng--1-kù, lí nā thiaⁿ tio̍h lán, to̍h sī koh lâi beh kóng ê tāi-chì ū pau-koat lí, lí nā thiaⁿ tio̍h goán, to̍h sī koh lâi ê tāi-chì bô pau-koat lí. Cheng-chha to̍h tī chia, tong-jiân goán chit ê jī, ū ê lâng sī kóng chò gún, che sī khiuⁿ-kháu chha, ì-sù bô siáⁿ-mih bô kâng. M̄-koh, ū 1 ê kah téng-bīn só͘-kóng ê chêng-hêng bô kâng ê lē-gōa, chhin-chhiūⁿ kóng, ū lâng lâi chhi̍h tiān-lêng, lán ka mn̄g kóng:” Lán tóe beh chhōe?” Lán khì chia̍h pn̄g, cháu-toh--ê lâi mn̄g kóng:” Kin-á-ji̍t lán beh ài chia̍h siáⁿ?” Tú tio̍h chheⁿ-hūn lâng, lán ka chhéng-kàu kóng:” Chhiáⁿ-mn̄g lán án-chóaⁿ chheng-ho͘?” Tī chit kóa só͘-chāi, chit ê lán, sī leh piáu-sī ”lí” ê ì-sù. Sī án-chóaⁿ ē án-ne? Lán Tâi-oân-lâng pún-té to̍h kāu lé-sò͘, án-ne kâng mn̄g, piáu-sī kóng lán sī kā i tòng-chò ka-tī chit pêng ê lâng teh tùi-thāi, khah chhin-chhiat, khah ū jîn-chêng bī. --Hosting provided by SoundOn
-
台語有字！完整漢羅/白話字POJ原稿，請看做工á人台語工作室網站 https://cho-kang-a-lang.github.io/ [收聽Podcast] SoundOn https://bit.ly/ChKaL_SO Spotify https://spoti.fi/48jD2tI KKBOX Podcast https://bit.ly/ChKaL_KK Apple Podcast https://apple.co/3HZyfD3 [社交平台 Siā-kau Pêⁿ-tâi] Facebook https://bit.ly/ChKaL_FB Instagram https://www.instagram.com/chokangalang/ X (Twitter) https://twitter.com/chokangalang 方格子 https://vocus.cc/salon/cho-kang-a-lang 以下內容是漢羅kah白話字原稿，有需要歡迎ta̍k-ke來參考。 【漢羅版】 今á日咱beh來講ê主題是鬼。凡勢聽眾朋友ē想講，ĕ，kám是七月份iû-koh到--ah？Só͘-pái，goán mā teh tòe時行，beh來hâm ta̍k-ê講鬼，講mǹg-sǹg--ê，講魔神á，窮實lóng m̄是。M̄-chai各位kám bat注意過tī咱台語內底，尾字--ê是鬼ê形容詞實在有夠chē！咱今á日beh kéng 1 kóa khah心適--ê，來紹介hō͘ ta̍k-ê。 咱台語chhiāⁿ-chhiāⁿ ē tī 1 ê名詞後壁koh ke講1字鬼，來形容bó͘-mih人對1件代誌真hèng，he程度koh大大超過一般ê人。像講kiáu鬼、酒鬼、錢鬼、sâi食鬼chit款--ê，像chit lō話，一般是teh mē--人-ê，to̍h m̄-thang tng人ê面講ē khah好！「Iau鬼假細jī」講--tio̍h ê iau鬼，mā是kāng chit類ê詞，明明to̍h chiok sâi食，koh tī hia teh講「免--lah！免--lah！」其實ta̍k-ê ê心內lóng知知--leh好--無，koh假to̍h無sêng--ā！ Sòa--lòe, koh有1部分ê kúi，是leh形容1 ê人ê行為，kāng款mā是teh kâng mē ê話。像講nā lóng m̄洗seng軀，衛生習慣真bái--ê，凡勢咱to̍h講伊是thái-ko鬼、lah-sap鬼、a-cha鬼án-ne。做人鹹koh澀，真凍霜--ê，咱to̍h講伊是乞食鬼。愛四界chhit-thô，風流ê人，to̍h叫伊風騷鬼。看tio̍h查某人to̍h beh kâng khoe，beh chhōe-khang-chhōe縫kâng khà油--ê，咱mā ē叫伊不死鬼。行路lóng無聲，害你oa̍t頭hiông-hiông去ho͘ chhoah-1-tiô--ê，to̍h ē hông mē講是mo͘h壁鬼。有ê人做人真卑鄙，來到咱chia to̍h講咱kah意聽ê話，去到in hia，to̍h講in hia聽tio̍h ē歡喜ê話，對2 pêng lóng bē忠，kan-na beh顧看ka-tī有好khang--ê thang thio無，chit lō人，咱to̍h講伊是雙面刀鬼，nā知影有人是chit款--ê，咱千萬m̄-thang ka信táu。Nā講做tāi-chì欠考慮，燥性koh chhóng-pōng，咱to̍h講伊是青狂鬼。人nā án-ne歹chhèng-chhèng，惡khia̍k-khia̍k，咱ē講伊歹鬼鬼。 咱mā ē-tàng用kah鬼有關係ê 1 kóa詞來做句，像講：「你免tī hia leh假鬼假怪，奸奸鬼鬼，最近公司ê機密，去hō͘對手ê公司the̍h--tio̍h，你免怪我leh疑神疑鬼，我想，一定是你leh內神通外鬼！」 最後，咱來講1 kóa m̄是leh講人ê行為ê鬼。Gín-á時，歇熱hit-tang-chūn，走去海邊á sńg kui e晡，到厝to̍h ē去hông唸講：「叫你日頭khah軟lio̍h--eh chiah去sńg，lóng講m̄聽，你看！曝kah án-ne烏鬼鬼，皮膚ē受傷neh！」Nah有法度！Gín-á人有水thang sńg，nah擋ē tiâu。Koh有hit款專門teh藏水ê兵á，海龍hit款--ê，台灣話to̍h hō做水鬼á，藏水bī專門teh穿ê衫，to̍h hō-chò水鬼á衫。活鬼m̄是鬼koh活--leh ŏ͘，活鬼是1種自動機關，親像有ê尪á，發條ka chūn-chūn--leh，ē ka-tī tín-tāng，he to̍h是用活鬼--ê，koh有1種音樂kheh-á，choān發條to̍h ē演奏1條歌hit款，mā ē-tàng講是用活鬼--ê。 【Pe̍h-ōe-jī pán】 Kin-á-ji̍t lán beh lâi kóng ê chú-tê sī “kúi”. Hoān-sè thiaⁿ-chiòng pêng-iú ē siūⁿ kóng, ĕ, kám sī 7 goe̍h-hūn iû-koh kàu--ah? Só͘-pái, goán mā teh tòe sî-kiâⁿ,beh lâi hâm ta̍k-ê kóng kúi, kóng mǹg-sǹg--ê, kóng mô͘-sîn-á,khêng-si̍t lóng m̄ sī. M̄-chai kok-ūi kám bat chù-ì kòe tī lán Tâi-gí lāi-té, bóe jī--ê sī kúi ê hêng-iông sû si̍t-chāi ū kàu chē! Lán kin-á-ji̍t beh kéng 1 kóa khah sim-sek--ê, lâi siāu-kài hō͘ ta̍k-ê. Lán Tâi-gí chhiāⁿ-chhiāⁿ ē tī 1 ê miâ-sû āu-piah koh ke kóng 1 jī kúi, lâi hêng-iông bó͘-mih lâng tùi 1 kiāⁿ tāi-chì chin hèng, he têng-tō͘ koh tōa-tōa chhiau-kòe it-poaⁿ ê lâng. Chhiūⁿ kóng kiáu-kúi, chiú-kúi, chîⁿ-kúi, sâi-chia̍h-kúi chit khoán--ê, chhiūⁿ chit-lō ōe, it poaⁿ sī teh mē--lâng-ê, to̍h m̄-thang tng lâng ê bīn kóng ē khah hó! “Iau kúi ké sè-jī” kóng--tio̍h ê iau kúi, mā sī kāng chit lūi ê sû, bêng-bêng to̍h chiok sâi-chia̍h, koh tī hia teh kóng ”Bián--lah! Bián--lah!” Kî-si̍t ta̍k-ê ê sim-lāi lóng chai-chai--leh hó--bô, koh ké to̍h bô sêng--ā! Sòa--lòe, koh ū 1 pō͘-hūn ê kúi, sī leh hêng-iông 1 ê lâng ê hêng-ûi, kāng khoán mā sī teh kâng mē ê ōe. Chhiūⁿ kóng nā lóng m̄ sé seng-khu, ōe-seng si̍p-koàn chin bái--ê, hoān-sè lán to̍h kóng i sī thái-ko-kúi, lah-sap-kúi, a-cha-kúi án-ne. Chò lâng kiâm koh siap, chin tàng-sng--ê, lán to̍h kóng i sī khit-chia̍h-kúi. Ài sì-kè chhit-thô, hong-liû ê lâng, to̍h kiò i hong-so-kúi. Khòaⁿ tio̍h cha-bó͘ lâng to̍h beh kâng khoe, beh chhōe-khang-chhōe-phāng kâng khà-iû--ê, lán mā kiò i put-sú-kúi. Kiâⁿ-lō͘ lóng bô siaⁿ, hāi lí oa̍t-thâu hiông-hiông khì ho͘ chhoah-1-tiô--ê, to̍h ē hông mē kóng sī mo͘h-piah-kúi. Ū ê lâng chò lâng chin pi-phí, lâi kàu lán chia to̍h kóng lán kah-ì thiaⁿ ê ōe, khì kàu in hia, to̍h kóng in hia thiaⁿ tio̍h ē hoaⁿ-hí ê ōe, tùi 2 pêng lóng bē tiong, kan-na beh kò͘ khòaⁿ ka-tī ū hó-khang--ê thang thio bô, chit-lō lâng, lán to̍h kóng i sī siang-bīn-to-kúi, nā chai-iáⁿ ū lâng sī chit khoán--ê, lán chhian-bān m̄-thang ka sìn-táu. Nā kóng chò tāi-chì khiàm khó-lū, sò-sèng koh chhóng-pōng, lán to̍h kóng i sī chheⁿ-kông-kúi. Lâng nā án-ne pháiⁿ-chhèng-chhèng, ok-khia̍k-khia̍k, lán ē kóng i pháiⁿ-kúi-kúi. Lán mā ē-tàng iōng kah kúi ū koan-hē ê 1 kóa sû lâi chò kù, chhiūⁿ kóng:” Lí bián tī hia leh ké-kúi-ké-koài, kan-kan-kúi-kúi, chòe-kīn kong-si ê ki-bi̍t, khì hō͘ tùi-chhiú ê kong-si the̍h--tio̍h, lí bián koài góa leh gî-sîn-gî-kúi, góa siūⁿ, it-tēng sī lí leh lāi sîn thong gōa kúi!” Chòe-āu, lán lâi kóng 1 kóa m̄ sī leh kóng lâng ê hêng-ûi ê kúi. Gín-á sî, hioh-joa̍h hit-tang-chun, cháu khì hái-piⁿ-á sńg kui e-po͘, kàu chhù to̍h ē khì hông liām kóng:” Kiò lí ji̍t-thâu khah nńg lio̍h--eh chiah khì sńg, lóng kóng m̄ thiaⁿ, lí khòaⁿ! Pha̍k kah án-ne o͘-kúi-kúi, phôe-hu ē siū-siong neh!” Nah ū hoat-tō͘! Gín-á lâng ū chúi thang sńg, nah tòng ē tiâu. Koh ū hit khoán choan-bûn teh chhàng-chúi ê peng-á, Hái-lêng hit khoán--ê, Tâi-oân-ōe to̍h hō chò chúi-kúi-á, chhàng-chúi-bī choan-bûn teh chhēng ê saⁿ, to̍h hō-chò chúi-kúi-á-saⁿ. Oa̍h-kúi m̄ sī kúi koh oa̍h--leh ŏ, oa̍h-kúi sī 1 chióng chū-tōng ki-koan, chhin-chhiūⁿ ū ê ang-á, hoa̍t-tiâu ka chūn-chūn--leh, ē ka-tī tín-tāng, he to̍h sī iōng oa̍h-kúi--ê, koh ū 1 chióng im-ga̍k kheh-á, choān hoat-tiâu to̍h ē ián-chàu 1 tiâu koa hit khoán, mā ē-tàng kóng sī iōng oa̍h-kúi--ê. --Hosting provided by SoundOn
-
台語有字！完整漢羅/白話字POJ原稿，請看做工á人台語工作室網站 https://cho-kang-a-lang.github.io/ [收聽Podcast] SoundOn https://bit.ly/ChKaL_SO Spotify https://spoti.fi/48jD2tI KKBOX Podcast https://bit.ly/ChKaL_KK Apple Podcast https://apple.co/3HZyfD3 [社交平台 Siā-kau Pêⁿ-tâi] Facebook https://bit.ly/ChKaL_FB Instagram https://www.instagram.com/chokangalang/ X (Twitter) https://twitter.com/chokangalang 方格子 https://vocus.cc/salon/cho-kang-a-lang 以下內容是漢羅kah白話字原稿，有需要歡迎ta̍k-ke來參考。 【漢羅版】 流、漏、落，咱斟酌ka聽，in 3字kan-na精差tī聲調niâ，照順序是5、7、3 3種聲調，chit 3字lóng koh加減á hâm水有關係，咱nā beh koh講ho͘ khah精確--leh，in lóng kah液體有關係。 頭起先，咱先來看流，咱水道頭ka開--開ē按怎？水sûi to̍h ē流--出-來。咱nā無細jī，去hō͘刀á liô--tio̍h ē按怎？Ē流血。咱nā是傷心委屈，滿腹心事無人知，忍不住，目屎mā是ē流--落-來。感冒mā chhiāⁿ-chhiāⁿ ē流鼻水。Só͘-pái，chit字流，to̍h是液體teh振動，koh因為有重力teh作用ê因端，一般ē流ùi khah kē ê所在--去。流chit字基本ê意思to̍h是án-ne。Sòa--lòe，咱來補充1 kóa kah流有關係ê詞，像講，tīⁿ流、khó流，tīⁿ流ê時，海平面siōng koân，khó流ê時海平面siāng kē，這時海水ē退，沙埔á to̍h ē現--出-來，nā chit chūn poa̍h桶kōaⁿ--leh，手耙á the̍h--leh，to̍h thèng好去沙埔á挖看有殼á類--ê-無，親像蚶á，竹蚶chit款--ê。咱俗語mā有leh講死狗放水流，he是1種風俗，chit-má èng該是khah無án-ne teh做--ah，m̄-koh chit ê放水流，尾--á mā ē the̍h來講，代誌beh放ho͘隨在伊去ê情形，像講：「咱2 ê人ê恩恩怨怨，to̍h到chia soah，ho͘放水流，當做無輸無贏to̍h好！」 Nā kóng tio̍h漏，一般是物件已經té好勢，put-kò soah ùi teh ka té ê所在洩--出來，一般是容器有破有pit-sûn，che無的確ài是水水ê物件ŏ͘，沙á、米chit款幼粒á物mā ē-tàng講漏。像講：「Chit台né-kó͘-á車，底--á已經蛀1 khang--a，beh chhia土沙ē漏，ài sak hit台新--ê-去。」Koh chhan像lia̍h漏、水管漏水，厝頂漏雨，iăn-gín漏油，lóng是kāng款ê概念。話mā ē-tàng漏neh！「Chit ê祕密，kan-na ē-tàng你知我知，千萬m̄-thang漏洩！」油漏á、酒漏á、水漏á，lóng是咱beh kā物件té去chhùi細細khang-á ê矸á，ài用--tio̍h ê家私。 Siōng尾咱來講落，làu是1 ê動作，伊kah漏kāng款有洩--出-來ê意思，m̄-koh是咱主動去做，親像：「我去kā你làu燒水！」，水道頭chūn--開，to̍h ē-tàng làu。做kui日ê工，kui身軀bú kah thái-ko-nōa-lô，到厝nā有燒水thang浸，有影是kài享受！Koh像講，咱ê o͘-tó͘-bái，nā beh換烏油，ài先kā舊底ê油làu掉，新--ê chiah koh添--入-去，nā輪á紋磨kah平--去，想beh換輪á，mā是to̍h ài先làu風chiah ē-tàng換新輪，làu風koh有teh形容另外1件tāi-chì，親像gín-á tng teh換嘴齒，新--ê猶未puh--出-來ê時，a̍h是講老人嘴齒已經減幾nā ki，講話to̍h ē làu風làu風。 【Pe̍h-ōe-jī pán】 Lâu, lāu, làu, lán chim-chiok ka thiaⁿ, in 3 jī kan-na cheng-chha tī siaⁿ-tiāu niâ, chiàu sūn-sī sī 5, 7, 3 3 chióng siaⁿ-tiāu, chit 3 jī lóng koh ke-kiám-á hâm chúi ū koan-hē, lán nā beh koh kóng ho͘ khah cheng-khak--leh, in lóng kah e̍k-thé ū koan-hē. Thâu-khí-seng, lán seng lâi khòaⁿ lâu, lán chúi-tō-thâu ka khui--khui ē án-chóaⁿ? Chúi sûi to̍h ē lâu--chhut-lâi. Lán nā bô sè-jī, khì hō͘ to-á liô--tio̍h ē án-chóaⁿ? Ē lâu-hoeh. Lán nā-sī siong-sim úi-khut, móa-pak sim-sū bô lâng chai, jím put chū, ba̍k-sái mā sī ē lâu--lo̍h-lâi. Kám-mō͘ mā chhiāⁿ-chhiāⁿ ē lâu phīⁿ-chúi. Só͘-pái, chit jī lâu, to̍h-sī e̍k-thé teh tín-tāng, koh in-ūi ū tiōng-le̍k teh chok-iōng ê in-toaⁿ, it-poaⁿ ê lâu ùi khah kē ê só͘-chāi--khì. Lâu chit jī ki-pún ê ì-sù to̍h sī án-ne. Sòa--lòe, lán lâi pó͘-chhiong 1 kóa kah lâu ū koan-hē ê sû, chhiūⁿ kóng, tīⁿ-lâu, khó-lâu, tīⁿ-lâu ê sî, hái pêng-bīn siōng koân, khó-lâu ê sî hái pêng-bīn siāng kē, chit-sî hái-chúi ē thè, soa-po͘-á to̍h ē hiàn--chhut-lâi, nā chit chūn poa̍h-tháng kōaⁿ--leh, chhiú-pê-á the̍h--leh, to̍h thèng-hó khì soa-po͘-á ó͘ khòaⁿ ū khak-á lūi--ê-bô, chhin-chhiūⁿ ham-á,tek-ham chit khoán--ê. Lán sio̍k-gí mā ū leh kóng sí káu pàng-chúi-lâu, he sī 1 chióng hong-sio̍k, chit-má èng-kai sī khah bô án-ne teh chò--ah, m̄-koh chit ê pàng chúi lâu, bóe--á mā ē the̍h lâi kóng, tāi-chì beh pàng ho͘ sûi-chāi i khì ê chêng-hêng, chhiūⁿ kóng:” Lán 2 ê lâng ê un-un-oàn-oàn, to̍h kàu chia soah, ho͘ pàng-chúi-lâu, tòng chò bô-su-bô-iâⁿ to̍h hó!” Nā kóng tio̍h lāu, it-poaⁿ sī mi̍h-kiāⁿ í-keng té hó-sè, put-kò soah ùi teh ka té ê só͘-chāi sia̍p--chhut-lâi, it-poaⁿ sī iông-khì ū phòa ū pit-sûn, che bô tek-khak ài sī chúi-chúi ê mi̍h-kiāⁿ ŏ͘, soa-á, bí chit khoán iù lia̍p-á-mi̍h mā ē-tàng kóng lāu. Chhiūⁿ kóng:” Chit tâi né-kó͘-á-chhia, té--á í-keng chiù 1 khang--a, beh chhia thô͘-soa ē lāu, ài sak hit tâi sin--ê-khì.” Koh chhan-chhiūⁿ lia̍h-lāu, chúi-kóng lāu chúi, chhù-téng lāu hō͘, iăn-gín lāu iû, lóng sī kāng-khoán ê khài-liām. Ōe mā ē-tàng lāu neh! ” Chit ê pì-bi̍t, kan-na ē-tàng lí chai góa chai, chhian-bān m̄-thang lāu-sia̍p!” Iû-lāu-á, chiú-lāu-á, chúi-lāu-á, lóng sī lán beh kā mi̍h-kiāⁿ té khì chhùi sè-sè-khang-á ê kan-á, ài iōng--tio̍h ê ke-si. Siōng bóe lán lâi kóng làu, làu sī 1 ê tōng-chok, i kah lāu kāng-khoán ū sia̍p--chhut-lâi ê ì-sù, m̄-koh sī lán chú-tōng khì chò, chhin-chhiūⁿ:” Góa khì kā lí làu sio-chúi!”, chúi-tō-thâu chūn--khui, to̍h ē-tàng làu. Chò kui ji̍t ê kang, kui sin-khu bú kah thái-ko-nōa-lô, kàu chhù nā ū sio-chúi thang chìm, ū-iáⁿ sī kài hiáng-siū! Koh chhiūⁿ kóng, lán ê o͘-tó͘-bái, nā beh ōaⁿ o͘-iû, ài seng kā kū-té ê iû làu tiāu, sin--ê chiah koh thiⁿ--ji̍p-khì, nā lián-á bûn bôa kah pêⁿ--khì, siūⁿ beh ōaⁿ lián-á, mā sī to̍h ài seng làu hong chiah ē-tàng ōaⁿ sin lián, làu hong koh ū teh hêng-iông lēng-gōa 1 kiāⁿ tāi-chì, chhin-chhiūⁿ gín-á tng teh ōaⁿ chhùi-khí, sin--ê iáu-bē puh--chhut-lâi ê sî, a̍h sī kóng lāu-lâng chhùi-khí í-keng kiám kúi-nā ki, kóng-ōe to̍h ē làu-hong làu-hong. --Hosting provided by SoundOn
-
台語有字！完整漢羅/白話字POJ原稿，請看做工á人台語工作室網站 https://cho-kang-a-lang.github.io/ [收聽Podcast] SoundOn https://bit.ly/ChKaL_SO Spotify https://spoti.fi/48jD2tI KKBOX Podcast https://bit.ly/ChKaL_KK Apple Podcast https://apple.co/3HZyfD3 [社交平台 Siā-kau Pêⁿ-tâi] Facebook https://bit.ly/ChKaL_FB Instagram https://www.instagram.com/chokangalang/ X (Twitter) https://twitter.com/chokangalang 方格子 https://vocus.cc/salon/cho-kang-a-lang 以下內容是漢羅kah白話字原稿，有需要歡迎ta̍k-ke來參考。 【漢羅版】 今á日咱beh來稽考ê字是chám kah chām，chit 2字ê漢字一般lóng是寫做kāng 1字，m̄-koh讀音to̍h ē分做2種，像講斬(chám)首，斬(chām)頭，ĕ，nah ē án-ne？明明lóng是thâi頭，nah ē 2塊詞ê音無kāng款？Che咱後壁to̍h sûi來分析看māi--leh。 咱nā用chám kah chām chit 2字，tī臺日大辭典內底chhiau-chhōe，ē-tàng看tio̍h不管是tó 1 ê音，lóng ē用tio̍h家私，chit ê家私可能是刀，斧頭，keh-á chit款物件，有beh kā物件切斷ê意思tī--leh。M̄-koh kài趣味ê所在是，chām伊有特別說明是kā物件khǹg tī砧頂面切，另外hit ê chám，伊是講斜面chhò。Án-ne，咱來ka分析，to̍h是講，chām ê出力方式是對頂koân向下面，chám是chhu-chhu、chhoa̍h-chhoa̍h ka phut--落-去，主要to̍h是出力ê方向無仝。台語leh歹學ê因端to̍h tī chia，咱teh形容tāi-chì ê用字是真幼路。 Koh來，chit ê chám，各位nā有leh看古裝ê台語戲劇--ê，應該是chhiāⁿ-chhiāⁿ ē聽--tio̍h。像講，nā是有teh聽三國--ê，「過五關，斬六將」chit句話絕對是聽kah臭phú--ah。咱koh有真chē chám neh，斬草除根，斬斷情絲，先斬後奏，斬首示眾，sak出午門候斬，nā看tio̍h大貪官大歹人去hông sak--出-去，心內to̍h真暢，人講，做戲khong，看戲gōng，to̍h是án-ne。當然mā有咱平素時to̍h有leh講ê話，像講「Chit枝竹á ùi chia ka chám ho͘斷，我beh the̍h去插tī菜瓜栽á hia，hō͘伊通soan籐起lih棚á。」 Koh轉來講chām，咱有1 kóa詞mā報hō͘ ta̍k-ê知，斬雞肉，kā雞肉khǹg tī砧頂面，切ho͘ 1塊1塊thang好食，講tio̍h che，sûi to̍h想tio̍h白斬雞，ùn hiam椒á豆油，有夠好配飯！切肉kah魚chit類--ê，lóng ē-tàng講chām。中藥材khǹg tī柴砧面頂，tok做細塊細塊thang好choaⁿ，che mā叫做chām。Nā紙斬á是the̍h來斬紙ê家私，che mā-sī用chhi̍h--ê ùi頂面出力kā紙切做koe̍h。話koh講翻頭，是án-chóaⁿ講是chām頭？應該to̍h是像戲leh演--ê，用狗頭鍘（cha̍h）去chām，chiah講chām頭，nā hit款叫犯人跪--leh，1 ê惡面--ê gia̍h 1 ki大刀chhu-chhu phut--lòe he，應該chiah是斬首。 【Pe̍h-ōe-jī pán】 Kin-á-ji̍t lán beh lâi khe-khó ê jī sī chám kah chām, chit 2 jī ê hàn-jī it-poaⁿ lóng sī siá chò kāng 1 jī, m̄-koh tho̍k-im to̍h ē hun-chò 2 chióng, chhiūⁿ-kóng chám-siú, chām-thâu, ĕ, nah ē án-ne? Bêng-bêng lóng sī thâi-thâu, nah ē 2 tè sû ê im bô kāng-khoán? Che lán āu-piah to̍h sûi lâi hun-sek khòaⁿ-māi--leh. Lán nā iōng chám kah chām chit 2 jī, tī Tâi-ji̍t Tōa-sû-tián lāi-té chhiau-chhōe, ē-tàng khòaⁿ-tio̍h put-koán sī tó 1 ê im, lóng ē iōng tio̍h ke-si, chit ê ke-si khó-lêng sī to, pó͘-thâu, keh-á chit khoán mi̍h-kiāⁿ, ū beh kā mi̍h-kiāⁿ chhiat-tn̄g ê ì-sù tī--leh. M̄-koh kài chhù-bī ê só͘-chāi sī, chām i ū te̍k-pia̍t soat-bêng sī kā mi̍h-kiāⁿ khǹg tī tiam téng-bīn chhiat, lēng-gōa hit ê chám, i sī kóng siâ-bīn chhò. Án-ne lán lâi ka hun-sek, to̍h sī kóng, chām ê chhut-la̍t hong-sek sī tùi téng-koân hiòng ē-bīn, chám sī chhu-chhu, chhoa̍h-chhoa̍h ka phut--lo̍h-khì, chú-iàu to̍h sī chhut-la̍t ê hong-hiòng bô-kâng. Tâi-gí leh pháiⁿ o̍h ê in-toaⁿ to̍h tī chia, lán teh hêng-iông tāi-chì ê iōng-jī sī chin iù-lō͘. Koh lâi, chit ê chám, kok-ūi nā ū leh khòaⁿ kó͘-chong ê Tâi-gí hì-kio̍k--ê, èng-kai sī chhiāⁿ-chhiāⁿ ē thiaⁿ--tio̍h. Chhiūⁿ-kóng, nā sī ū teh thiaⁿ Sam-kok--ê, “kòe ngó͘ koan, chám lio̍k chiòng” chit kù ōe choa̍t-tùi sī thiaⁿ kah chhàu-phú--ah. Lán koh ū chin chē chám neh, chám-chháu tû-kin, chám toān chêng-si, seng-chám hiō chàu, chám-siú sī-chiòng, sak chhut ngó͘-mn̂g hāu chám, nā khòaⁿ tio̍h tōa tham-koaⁿ tōa pháiⁿ-lâng khì hông sak--chhut-khì, sim-lāi to̍h chin thiòng, lâng kóng, chò hì khong, khòaⁿ hì gōng, to̍h sī án-ne. Tong-jiân mā ū lán pêng-sò͘-sî to̍h ū leh kóng ê ōe, chhiūⁿ-kóng “Chit ki tek-á ùi chia ka chám ho͘ tn̄g, góa beh the̍h khì chhah tī chhài-koe chai-á hia, hō͘ i thang soan-tîn khí-lih pêⁿ-á.” Koh tńg-lâi kóng chām, lán ū 1 kóa sû mā pò hō͘ ta̍k-ê chai, chām ke-bah, kā ke-bah khǹg tī tiam téng-bīn, chhiat hō͘ 1 tè 1 tè thang hó chia̍h, kóng tio̍h che, sûi to̍h siūⁿ tio̍h pe̍h-chām-ke, ùn hiam-chio-á tāu-iû, ū-kàu hó phòe pn̄g! Chhiat bah kah hî chit lūi--ê, lóng ē-tàng kóng chām. Tiong io̍h-châi khǹg tī chhâ-tiam bīn-téng, tok chò sè tè sè tè thang hó choaⁿ, che mā kiò-chò chām. Nā chóa-chām-á sī the̍h lâi chām-chóa ê ke-si, che mā-sī iōng chhi̍h--ê ùi téng-bīn chhut-la̍t kā chóa chhiat chò koe̍h. Ōe koh kóng hoan-thâu, sī án-chóaⁿ kóng sī chām-thâu? Èng-kai to̍h sī chhiūⁿ hì leh ián--ê, iōng káu-thâu-cha̍h khì chām, chiah kóng chām-thâu, nā hit khoán kiò hoān-lâng kūi--leh, 1 ê ok-bīn--ê gia̍h 1 ki tōa to chhu-chhu phut--lòe he, èng-kai chiah sī chám-siú. --Hosting provided by SoundOn
- Mehr anzeigen
