Folgen
-
اهلا فيكم/ن في بودكاست " مساحة سبيل"
في الحلقة الاولى رح نحكي عن ولادة الشغف من بعد الاكتئاب
ب 21/3/2023 - يوم عيد الام - شُخصت مع "اكتئاب ما بعد الولادة" من الدرجة المتوسطة،
وخلال هالسيرورة دورت على مساحة.
مساحة تحتويني وتحضني,
مساحة تعطيني الشرعية,
مساحة اكون فيها انا وبس,
مساحة ابكي اصرخ افرغ وافضفض,
مساحة تعلمني وتثقفني,
مساحة تساعدني الاقي حالي من جديد…
مع الاسف ما لقيت هاي المساحة،
فقررت انا اخلق هاي المساحة عشان سبيل
وعشان كلنا بشي مرحلة بالحياة منضوّع السبيل.من اصعب الاشياء خلال سيرورة العلاج والتشافي لما كانوا يحكولي انه هذا الاكتئاب ممكن يكون هدية!!
ممكن يكون فرصة جميلة لتقشير طبقات وتغيير مفاهيم واعادة قولبة.
اليوم بعد ما خلصت سيرورة العلاج بقدر اقول انه مع كل صعوبة ووجع وبشاعة الايام الي مرقت،
هاي كانت الفرصة الذهبية لحتى انمو واتطور اكتشف واتعرف على حالي من جديد.
اكتئابي ممكن يكون اي حدث او محطة ثانية بحياتك، التحديات والصعوبات بتختلف وبتتنوع بس كلها بتوجّع وبتعلّم وبتترك اثر، مهم نعيشها نكون في حضور فيها نسمحلها تمر من خلالنا ونحاول ( بعرف انه كثيييير صعب ) نتطور من خلالها.
علمني الاكتئاب انه التشافي خيار،
وانه خيار جدا صعب ومش سهل
علمني الاكتئاب اني كفاية، كيف انا كفاية
واني نور، هذا النور الي في آخر النفق هو انا .
كونوا بخير، كونوا بامتنان 🧡
وما تنسوا تعطوا مساحة لسبيلكن/م 🙏🏻
كل الحب،
سبيل. -
Fehlende Folgen?
